បុរសខ្លាំងកម្ពុជា លោក ហ៊ុន សែន សម្រេចកាត់ផ្ទៃដីបឹងតាមោកបន្ថែមទៀតដើម្បីប្រគល់ឱ្យប្អូនស្រី និងជំនួយការរបស់លោកធ្វើជាកម្មសិទ្ធិ។ ចាប់ពីឆ្នាំ២០១៨ ដល់ចុងឆ្នាំ២០២១ ផ្ទៃបឹងតាមោកនេះត្រូវបានលោក ហ៊ុន សែន កាត់ជាង ២ពាន់ហិកតារហើយ។
ក្នុងអនុក្រឹត្យចុះថ្ងៃទី៣១ ខែធ្នូ ឆ្នាំ២០២១ លោក ហ៊ុន សែន បានសម្រេចកាត់ដីផ្ទៃបឹងតាមោកជាង ២ហិកតារស្ថិតក្នុងភូមិត្រពាំងពោធិ៍ សង្កាត់គោករកា ខណ្ឌព្រែកព្នៅ ប្រគល់ឱ្យលោក ក្រូច ផាន ប្រធានក្រុមប្រឹក្សាខណ្ឌពោធិ៍សែនជ័យ។ លោក ក្រូច ផាន ត្រូវតែងតាំងជាប្រធានក្រុមប្រឹក្សាខណ្ឌពោធិ៍សែនជ័យ និងជំនួយការលោក ហ៊ុន សែន កាលពីខែកក្កដា ឆ្នាំ២០១៧។
ដោយឡែកអនុក្រឹត្យមួយទៀតដែលចុះហត្ថលេខានៅចុងខែធ្នូ ឆ្នាំ២០២១ លោក ហ៊ុន សែន បានកាត់ដីផ្ទៃបឹងតាមោក ៥ម៉ឺន ៦ពាន់ម៉ែត្រក្រឡាស្ថិតនៅសង្កាត់ពន្សាំង ខណ្ឌព្រែកព្នៅ រាជធានីភ្នំពេញ ប្រគល់ឱ្យអ្នកស្រី រស់ ព្រីប៊ូន ដោយពន្ធ និងអាករផ្សេងៗជាបន្ទុករបស់រដ្ឋ។
ចំណែកអនុក្រឹត្យចុះថ្ងៃទី៣០ ខែធ្នូ ឆ្នាំ២០២១ លោក ហ៊ុន សែន បានសម្រេចកាត់ផ្ទៃដីចំនួន ៧ទីតាំងសរុបទំហំជាង ២សែនម៉ែត្រក្រឡា ស្ថិតនៅសង្កាត់ពញាពន់ និងសង្កាត់គោករកា ខណ្ឌព្រែកព្នៅ ប្រគល់ឱ្យអ្នកស្រី ហ៊ុន សេងនី និងលោក ឡាញ់ ភារ៉ា ជាកម្មសិទ្ធិ ដោយពន្ធ និងអាករផ្សេងៗជាបន្ទុករបស់រដ្ឋ។
អ្នកស្រី ហ៊ុន សេងនី ជាអគ្គនាយិកាអង្គការបេសកកម្មសុខុមាលភាពសង្គមកម្ពុជា និងត្រូវជាប្អូនស្រីរបស់បុរសខ្លាំងក្រាញអំណាច លោក ហ៊ុន សែន ខណៈលោក ឡាញ់ ភារ៉ា ដែលជាម្ចាស់ក្រុមហ៊ុនផង និងជាស្វាមីរបស់អ្នកស្រី ហ៊ុន សេងនី ផង ធ្លាប់ត្រូវបានពលរដ្ឋចំនួន ៧៧គ្រួសារនៅខេត្តព្រះសីហនុ ចោទថារំលោភយកដីធ្លីរបស់ពួកគេដែលកំពុងអាស្រ័យផលស្ថិតនៅភូមិពូធឿង ឃុំបិតត្រាំង ស្រុកព្រៃនប់។
នាយិកាមជ្ឈមណ្ឌលសិទ្ធិមនុស្សកម្ពុជា (CCHR) អ្នកស្រី ចក់ សុភាព បានសរសេរលើទំព័រហ្វេសប៊ុកនាថ្ងៃសុក្រ ទី១ មេសា ថា ទោះបីជាប្រឹងអំពាវនាវនាំគ្នាចូលរួមការពារ ថែរក្សា ប៉ុន្តែបែរជាបឹងធម្មជាតិនៅតែត្រូវបានលុបជាបន្តបន្ទាប់ ខណៈព្រៃក៏នៅតែបន្តបាត់បង់ ហើយខ្សាច់ក៏នៅតែបន្តប្រឹងបូម រីឯភ្នំក៏បន្តប្រឹងរំលើងផងដែរ។
អ្នកស្រីសំណូមពរទៅរដ្ឋាភិបាលឱ្យផ្តល់និយមន័យអភិវឌ្ឍន៍ ហើយអ្នកស្រីលើកជាសំណួរថា តើអ្វីទៅជាការអភិវឌ្ឍប្រកបដោយចីរភាព? តើអ្នកណាទទួលបានប្រយោជន៍ពីការអភិវឌ្ឍបែបនេះ?
បឹងតាមោកមានផ្ទៃដីសរុបជាង ៣២៣៩ហិកតារ ជាអាងស្តុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងនេះត្រូវបានរដ្ឋាភិបាលចេញអនុក្រឹត្យមួយកាលពីដើមខែកុម្ភៈ ឆ្នាំ២០១៦ ដោយកំណត់ជាសម្បត្តិសាធារណៈរបស់រដ្ឋ។
អង្គការសមាគមធាងត្នោត នៅថ្ងៃទី១០ ខែកុម្ភៈ ឆ្នាំ២០២២ បានចេញរបាយការណ៍មួយដោយបង្ហាញថា គិតត្រឹមខែធ្នូ ឆ្នាំ២០២១ ផ្ទៃបឹងតាមោក ឬបឹងកប់ស្រូវ ប្រមាណជាង ២ពាន់ហិកតារ (២០៩៤,៧១៦៥ហិកតារ) ឬស្មើជិត ៦៥% ត្រូវបានលោក ហ៊ុន សែន កាត់ឱ្យឧកញ៉ា ក្រុមហ៊ុនឯកជន និងស្ថាប័នសាធារណៈសម្រាប់សាងសង់អគារ និងហេដ្ឋារចនាសម្ព័ន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួន។
កាលពីឆ្នាំ២០២១ លោក ហ៊ុន សែន បានថ្លែងថា បញ្ហាទឹកជំនន់ដែលបង្កឱ្យលិចទីក្រុងភ្នំពេញ មិនមែនបណ្ដាលមកពីការលុបបឹងធម្មជាតិនោះទេ។ លោកថា ទោះបីជាមិនលុបបឹង ទីក្រុងភ្នំពេញក៏មានទឹកជំនន់ដែរ ហើយឈប់នាំគ្នារិះគន់លើបញ្ហានេះទៅ៕