លោក Imran Khan ដែលជាប់ឆ្នោតនៅឆ្នាំ២០១៨ ត្រូវបានទាញទម្លាក់ពីតំណែងនាយករដ្ឋមន្ត្រីកាលពីថ្ងៃទី១០ ខែមេសា ដោយកម្លាំងសាមគ្គីគ្នារវាងក្រុមសមាជិកសភានៃគណបក្សប្រឆាំងធំ២ បូកនឹងបក្សតូចៗជាច្រើន។
មូលហេតុដែលនាំឱ្យសមាជិកសភាក្រុមប្រឆាំងរុញលោក Imran Khan ធ្លាក់ពីអាសនៈនាយករដ្ឋមន្ត្រី គឺមានកត្តាច្រើនយ៉ាងនៅពីក្រោយ។ វិបត្តិសេដ្ឋកិច្ចក្នុងប្រទេសធ្លាក់ក្នុងជំងឺកូវីដ គឺជាបញ្ហាចម្បងមួយរួចទៅហើយ។ វិបត្តិបំណុលបរទេស គឺជាបញ្ហាមួយទាញទម្លាក់សេដ្ឋកិច្ច ដែលនាំឲ្យអ្នកនយោបាយក្រុមប្រឆាំងប្រមូលមតិ និងកម្លាំងរួមគ្នាពិនិត្យឡើងវិញអំពីបំណុលរាប់ពាន់លានដុល្លាររបស់ចិន ដែលធ្វើឲ្យប្រទេសអាស៊ីខាងត្បូងមួយនេះនៅបន្តភាពក្រីក្រ។
ក្នុងដំណាក់កាលដែលពិភពលោកនៃក្រុមបស្ចិមប្រទេស និងប្រទេសកុម្មុយនីស្តសហការជាមួយប្រទេសផ្ដាច់ការប្រជែងដណ្ដើមភូមិសាស្ត្រនយោបាយ គេកត់សម្គាល់ឃើញនាយករដ្ឋមន្ត្រីប៉ាគីស្ថាន Imran Khan ដែលត្រូវបានទាញទម្លាក់ពីអំណាចនេះ បានងាករេខ្លាំងទៅរកប្រទេសចិន និងរុស្ស៊ី។ បើកុំតែក្រុមប្រឆាំងមានឥទ្ធិពល ឬមានតុល្យភាពនឹងបក្សកាន់អំណាចរបស់លោក Imran Khan ម្ល៉េះប៉ាគីស្ថានអាចក្លាយជាមូលដ្ឋានកងទ័ពចិននៅលើទឹកដីនៃប្រទេសអាស៊ីខាងត្បូងមួយនេះទៅហើយ។
នៅមុនសភាដកហូតអំណាចរបស់លោក Imran Khan បុរសនេះត្រូវបានប្រជាជនធ្វើបាតុកម្មប្រឆាំងរដ្ឋាភិបាលរបស់លោកដែលដំឡើងថ្លៃសេវាអគ្គិសនី និងទាមទារឱ្យរដ្ឋាភិបាល Imran Khan បង្ហាញតម្លាភាពនៃប្រាក់កម្ចីបរទេស ជាពិសេសបំណុលប្រទេសចិន។ ប្រទេសនេះធ្លាក់ក្នុងបំណុលបរទេស ១៣០ពាន់លានដុល្លារអាមេរិក គិតត្រឹមឆ្នាំ២០២១។ នេះបើយោងតាមសារព័ត៌មាន Asia Times។
រហូតមកទល់ពេលនេះ ពុំមានការបង្ហាញតួលេខណាមួយថា ប៉ាគីស្ថានជំពាក់ចិនប៉ុន្មានពាន់លានដុល្លារពិតប្រាកដនោះទេ ប៉ុន្តែចិនបានទាមទារឱ្យប៉ាគីស្ថានសងប្រាក់ជាបន្ទាន់ក្នុងជំហានដំបូង ១៤ពាន់លានដុល្លារ ដែលការទាមទាររបស់ចិននេះហើយធ្វើឱ្យអ្នកនយោបាយប៉ាគីស្ថានដាក់ការព្រួយបារម្ភអំពីការមិនអាចរកប្រាក់សងចិនវិញបាន ហើយប៉ាគីស្ថានអាចប្រឈមមុខនឹងការបាត់បង់អ្វីមួយដែលជាទ្រព្យបញ្ចាំជាមួយនឹងប្រទេសចិន។
មិនតែប៉ុណ្ណោះ ចិនសម្លឹងទៅរកការជួលដីប៉ាគីស្ថាន ដើម្បីបង្កើតមូលដ្ឋានទ័ពរបស់ចិនថែមទៀត តែការព្រមានរបស់ក្រុមប្រឆាំងក៏ស្របពេលសហរដ្ឋអាមេរិកក៏ព្រមានដែរ ចំពោះចរិតរបស់លោក Imran Khan ដែលធ្វើខ្លួនឱ្យស្និទ្ធនឹងចិន។ ទីបំផុត ក្រុមប្រឆាំងសាកល្បងកោះឱ្យលោក Imran Khan មកប្រឈមមុខនឹងការបោះឆ្នោតដកសេចក្ដីទុកចិត្តពីសមាជិកសភា ប៉ុន្តែលោក Imran Khan បានប្រើល្បិចមួយ នៅពេលសភាចូលប្រជុំបែរជាអនុប្រធានរដ្ឋសភាដែលជាមិត្តជិតស្និទ្ធនឹងលោកបានបង្វែងស្ថានការណ៍ដោយបុរសនេះបែរជាប្រឆាំងនឹងការបោះឆ្នោត។
ទីបំផុត ការបោះឆ្នោតសេចក្ដីទុកចិត្តលើ Imran Khan នៅថ្ងៃទី៣ ខែមេសា ធ្វើឱ្យ Imran Khan រួចខ្លួន ហើយលោកក៏បានស្នើឱ្យប្រធានាធិបតីរំលាយរដ្ឋសភាតែម្ដង។ ប៉ុន្តែក្រុមប្រឆាំងសម្រេចប្ដឹងទៅតុលាការកំពូលឱ្យទុកជាមោឃៈនូវសេចក្ដីសម្រេចរបស់ប្រធានាធិបតី ដោយបង្គាប់ឱ្យសភាបើកកិច្ចប្រជុំដើម្បីដកតំណែងលោក Imran Khan តែម្ដង ក្រោមដីកាចោទថា អំណាចរបស់ប្រធានាធិបតីដែលរំលាយរដ្ឋសភា គឺមិនសមស្របនឹងស្ថានការណ៍ជាក់ស្ដែងឡើយ។
តុលាការកំពូលបានបង្គាប់ឱ្យសភាកោះប្រជុំទាំងយប់ គឺនៅថ្ងៃទី១០ ខែមេសា ហើយទីបំផុតរកបានសំឡេងឆ្នោត១៧៤ ទល់នឹង ១៦៨ ដោយទម្លាក់លោក Imran Khan ពីអំណាចបានជាផ្លូវការ ដោយសំឡេងឈ្នះតែ ៦សំឡេងប៉ុណ្ណោះ។ លោក Imran Khan ដែលមិនទទួលយកសេចក្ដីសម្រេចរបស់សភា ក៏បានព្រមានស្នើឱ្យប្រធានាធិបតីរំលាយរដ្ឋសភាជាថ្មីម្ដងទៀត។
តែយ៉ាងណា តុលាការប្រទេសប៉ាគីស្ថានពុំមែនជាតុលាការតេឡេដូចប្រទេសមួយចំនួននៅអាស៊ីអាគ្នេយ៍នោះទេ។ ឥឡូវនេះ នាយករដ្ឋមន្ត្រីមកពីបក្សប្រឆាំងដែលមាននិន្នាការនឹងពួកបស្ចិមប្រទេស គឺលោក Shehbaz Sharif បានបង្កើតរដ្ឋាភិបាលចម្រុះថ្មីកាលពីថ្ងៃអង្គារ ទី១៩ មេសា។ រដ្ឋាភិបាលចម្រុះថ្មីនេះបានចូលរួមដោយគណបក្សដែលបានរួមគំនិតជាមួយគ្នាទម្លាក់នាយករដ្ឋមន្ត្រីលោក Imran Khan កាលពីថ្ងៃទី១០ មេសា។
អ្វីជាអាទិភាពរបស់រដ្ឋាភិបាលចម្រុះថ្មីមានច្រើន រួមមានការផ្សះផ្សាជាតិ និងស្រោចស្រង់ទំនាក់ទំនងជាមួយបស្ចិមប្រទេស ពិសេសជាមួយសហរដ្ឋអាមេរិកដែលបានធ្លាក់ចុះខ្លាំងនៅក្នុងជំនាន់នាយករដ្ឋមន្ត្រីលោក Imran Khan ដែលងាកទៅរកចិន និងរុស្ស៊ីយ៉ាងខ្លាំង។
ជាមួយនឹងការបង្កើនទំនាក់ទំនងជាមួយក្រុមបស្ចិមប្រទេស រដ្ឋាភិបាលថ្មីរបស់ប៉ាគីស្ថាន បានដាក់ពាក្យស្នើប្រាក់កម្ចីពីមូលនិធិរូបិយវត្ថុអន្តរជាតិ (IMF) ដើម្បីយកមកស្ដារសេដ្ឋកិច្ចឡើងវិញ ដែលការពិត IMF បានយល់ព្រមឱ្យប្រាក់កម្ចីចំនួន ៦ពាន់លានដុល្លារដល់ប៉ាគីស្ថានតាំងពីឆ្នាំ២០១៩ តែពេលនោះ អាមេរិកដែលប្រធានគណៈអភិបាល IMF មិនសម្រេចឱ្យប៉ាគីស្ថានខ្ចីទៀតនោះទេ ព្រោះរដ្ឋាភិបាលរបស់លោក Imran Khan ខ្វះតម្លាភាពនៃការប្រើប្រាស់ប្រាក់កម្ចីបរទេស។
តែអ្នកសង្កេតការណ៍មើលឃើញថា ការដែលអាមេរិកសម្រេចដូចនេះ ដោយសារតែអាមេរិកមិនពេញចិត្តនឹងលោក Imran Khan ដែលធ្វើខ្លួនជាអាយ៉ងរបស់ចិន និងរុស្ស៊ី ព្រោះតែចង់ជួលដីឱ្យចិនស្ថាបនាមូលដ្ឋានទ័ពនៅលើទឹកដីប៉ាគីស្ថាន ជួយដោះបំណុលចិន។
ក្នុងស្ថានភាពដែលប៉ាគីស្ថានមាននាយករដ្ឋមន្ត្រីមកពីក្រុមប្រឆាំង ហើយមាននិន្នាការជាមួយពួកបស្ចិមប្រទេស គឺប្រទេសចិនស្ងាត់មាត់ឈឹង ហើយសូម្បីរំឭកអំពីបំណុលរបស់ខ្លួន ក៏ក្រុងប៉េកាំងមិនទាន់ឃើញលើកឡើងដែរ។
រដ្ឋាភិបាលរបស់នាយករដ្ឋមន្ត្រី Shehbaz Sharif បានសន្យាធ្វើការពិនិត្យអំពីការចាយវាយប្រាក់កម្ចីរបស់ចិន នៅក្នុងអន្តរកាលរបស់លោក Imran Khan ថាតើមានតម្លាភាពកម្រិតណា ខណៈរដ្ឋាភិបាលថ្មីនេះពុំបាននិយាយយោងថា ត្រូវបង្វិលបំណុលចិននៅពេលណានោះទេ។
នាយករដ្ឋមន្ត្រី Shehbaz Sharif មិនត្រឹមតែសន្យាផ្សារទំនាក់ទំនងជិតស្និទ្ធជាមួយនឹងពួកបស្ចិមប្រទេសនោះទេ ក៏បានសន្យាធ្វើឱ្យមានទំនាក់ទំនងល្អឡើងវិញជាមួយនឹងប្រទេសឥណ្ឌា ដែលជាសត្រូវប្រវត្តិសាស្ត្រនឹងប៉ាគីស្ថានតាំងក្រោយពីអង់គ្លេស ដកអាណានិគមនៅឆ្នាំ១៩៤៧៕