29 C
Phnom Penh

លោក ហ៊ុន ម៉ាណែត នឹង​ជួប​សំណេះ​សំណាល​ក្រុម​អ្នក​សារព័ត៌មាន​ជា​លើកដំបូង​នៅ​ដើម​ខែ​ឧសភា

ដោយ ឌឹ ខេមបូឌា ដេលី

បទវិភាគ

អនាគត​បេក្ខជន​នាយករដ្ឋមន្ត្រី លោក ហ៊ុន ម៉ាណែត ដែល​តំណាង​ឲ្យ​លោក ហ៊ុន សែន នឹង​ជួប​សំណេះសំណាល​ផ្លូវការ​ជា​លើកដំបូង​ជាមួយ​ក្រុម​អ្នក​សារព័ត៌មាន​កម្ពុជា នៅ​ក្នុង​ពិធី​អបអរ​ទិវា​សេរីភាព​សារព័ត៌មាន​សកលលោក ៣ ឧសភា លើក​ទី​២៩ ដើម្បី​លើកស្ទួយ​សេរីភាព​សារព័ត៌មាន និង​បង្កើន​ភាព​ស្និទ្ធស្នាល។

យោង​តាម​ការ​បញ្ជាក់​ក្នុង​លិខិត​របស់​ក្រសួង​ព័ត៌មាន បាន​ឲ្យ​ដឹង​ថា ពិធី​ជួប​សំណេះសំណាល​ដែល​រៀបចំ​ដោយ​ក្រសួង​ព័ត៌មាន នឹង​ធ្វើ​នៅ​សណ្ឋាគារ​សុខា​ភ្នំពេញ។ ការ​រៀបចំ​ពិធី​អបអរ​ទិវា​សេរីភាព​សារព័ត៌មាន គឺ​ដើម្បី​លើកស្ទួយ​សេរីភាព​នៃ​ការ​បញ្ចេញមតិ សេរីភាព​ខាង​សារព័ត៌មាន និង​លើក​ទឹកចិត្ត​ដល់​អ្នក​សារព័ត៌មាន​ជាតិ និង​អន្តរជាតិ​ដែល​កំពុង​បំពេញ​ភារកិច្ច​លើ​វិស័យ​សារព័ត៌មាន​នៅ​កម្ពុជា និង​នៅ​លើ​សកលលោក។

នៅ​ក្នុង​លិខិត​នោះ​ក៏​បាន​បញ្ជាក់​ផង​ដែរ​ថា ពិធី​នេះ​ក៏​ជា​ឱកាស​នៃ​ការ​បង្កើន​ភាព​ស្និទ្ធស្នាល​រវាង​ថ្នាក់​ដឹកនាំ ក៏ដូចជា​អ្នក​នាំពាក្យ​ជាមួយ​អ្នក​សារព័ត៌មាន​ផង​ដែរ។ លោក ហ៊ុន ម៉ាណែត តំណាង​លោក​នាយករដ្ឋមន្ត្រី ហ៊ុន សែន នឹង​ជួប​សំណេះសំណាល​ជាមួយ​ក្រុម​អ្នក​សារព័ត៌មាន​ជា​លើកដំបូង​មាន​រយៈពេល ១​ម៉ោង​កន្លះ។

យោង​តាម​របៀបវារៈ តំណាង​ក្រសួង​ព័ត៌មាន​នឹង​អាន​សារ​លិខិត​របស់​សម្តេច​នាយករដ្ឋមន្ត្រី ហ៊ុន សែន ក្នុង​ឱកាស​អបអរ​ទិវា​សេរីភាព​សារព័ត៌មាន​សកលលោក​លើក​ទី​២៩ នា​ថ្ងៃ​ទី​៣ ខែ​ឧសភា។

ភាគី​ពាក់ព័ន្ធ​ដែល​បម្រើ​ការ​ក្នុង​វិស័យ​សារព័ត៌មាន នឹង​ត្រូវ​ឡើង​បង្ហាញ​ចំណាប់​អារម្មណ៍​របស់​ខ្លួន មុន​នឹង​ឈាន​ដល់​មតិ​ស្វាគមន៍​ជា​បន្តបន្ទាប់​របស់​លោក Sardar Umar Alam តំណាង​យូណេស្កូ​ប្រចាំ​កម្ពុជា លោកស្រី Camilla Ottoson តំណាង​ស្ថានទូត​ស៊ុយអែត​ប្រចាំ​កម្ពុជា លោកស្រី Carmen Moreno ឯកអគ្គរដ្ឋទូត​សហភាព​អឺរ៉ុប​ប្រចាំ​កម្ពុជា និង​រដ្ឋមន្ត្រី​ក្រសួង​ព័ត៌មាន លោក ខៀវ កាញារីទ្ធ។

អង្គការ​អ្នក​កាសែត​គ្មាន​ព្រំដែន កាលពី​ពេល​ថ្មីៗ​នេះ​បាន​បន្ត​ផ្ដល់​ចំណាត់ថ្នាក់​សេរីភាព​សារព័ត៌មាន​នៅ​កម្ពុជា ឆ្នាំ​២០២១ ស្ថិត​នៅ​ក្នុង​រូបភាព​អាក្រក់​ដដែល ដោយ​នៅ​លេខ​រៀង​ទី​១៤៤ ក្នុង​ចំណោម ១៨០​ប្រទេស​នៅ​លើ​ពិភពលោក។ សេរីភាព​សារព័ត៌មាន​ដែល​អង្គការ​នេះ​វាយតម្លៃ បង្ហាញ​ថា កម្ពុជា​បាន​ធ្លាក់​ចុះ ៣​ឆ្នាំ​ជាប់ៗ​គ្នា​ចាប់តាំង​ពី​ឆ្នាំ​២០១៧ មក។

មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) បាន​ចេញ​របាយការណ៍​របស់​ខ្លួន​ស្ដីពី​សេរីភាព​សារព័ត៌មាន​នៅ​កម្ពុជា​សម្រាប់​ឆ្នាំ​២០២២ នេះ​ថា សេរីភាព​សារព័ត៌មាន​នៅ​កម្ពុជា​ក្នុង​ឆ្នាំ​២០២១ បាន​ធ្លាក់​ចុះ​កាន់តែ​អាក្រក់ បើ​ប្រៀបធៀប​នឹង​ឆ្នាំ​២០២០ កន្លងទៅ ដោយសារ​ការ​បន្ត​រឹតត្បិត​ផ្នែក​នយោបាយ និង​បទដ្ឋាន​ច្បាប់​ផ្សេងៗ​ដែល​ផ្ដល់​អំណាច​កាន់​តែ​ច្រើន​ដល់​រដ្ឋាភិបាល​ក្នុង​ការ​គ្រប់គ្រង​ប្រព័ន្ធ​ផ្សព្វផ្សាយ​នៅ​កម្ពុជា។

របាយការណ៍​ដដែល​ថា មាន​ការ​បៀតបៀន​លើ​អ្នក​សារព័ត៌មាន​ជាង ៥០​ករណី។ អ្នក​កាសែត​ជាង ៣០​នាក់​ត្រូវ​បាន​ចាប់​ខ្លួន ខណៈ​អ្នក​សារព័ត៌មាន​ជាង ២០​នាក់​ប្រឈម​នឹង​ចំណាត់ការ​តាម​ផ្លូវ​ច្បាប់។ ចំណែក ១៨​ករណី​ផ្សេង​ទៀត​ត្រូវ​រង​នូវ​អំពើ​ហិង្សា​ដោយ​ការ​យាយី​លើ​រាងកាយ​យ៉ាង​ធ្ងន់ធ្ងរ។

កាលពី​អំឡុង​ខែ​ធ្នូ ឆ្នាំ​២០២១ មេដឹកនាំ​បក្ស​កាន់​អំណាច លោក ហ៊ុន សែន ចោទ​ថា​ស្ថាប័ន និង​អ្នក​សារព័ត៌មាន​មួយ​ចំនួន​នៅ​កម្ពុជា​បាន​ប្រើ​ឧបាយកល​បំផុសបំផុល​ប្រជាពលរដ្ឋ ដោយ​ការ​ផ្សព្វផ្សាយ​នូវ​ព័ត៌មាន​មិន​ពិត​ជាច្រើន ប៉ុន្តែ​ត្រូវ​រដ្ឋាភិបាល​របស់​លោក​គ្រប់គ្រង​បាន​ទាន់​ពេល។

ជា​លេស​ដើម្បី​គ្រប់គ្រង​ស្ថាប័ន​សារព័ត៌មាន​ក្នុង​ស្រុក​ទាំងអស់ ក្នុង​ការ​បិទ​សំឡេង​សារព័ត៌មាន​ឯករាជ្យ នាយករដ្ឋមន្ត្រី​ដែល​ក្រាញ​នឹង​អំណាច​យូរ​ជាងគេ​នៅ​អាស៊ី លោក ហ៊ុន សែន បាន​ធ្វើ​ទុក្ខបុកម្នេញ​ដោយ​បង្ខំ​ឲ្យ​កាសែត The Cambodia Daily និង​វិទ្យុ​មួយ​ចំនួន​សម្រេច​បិទ​ការិយាល័យ​របស់​ខ្លួន​នៅ​ភ្នំពេញ ដោយសារ​រង​សម្ពាធ​នយោបាយ និង​ការ​គាបសង្កត់​ពី​រដ្ឋាភិបាល​ក្រោម​ហេតុផល​មិន​បង់​ពន្ធ​ឲ្យ​រដ្ឋាភិបាល។

យោង​តាម​របាយការណ៍​របស់​ក្រសួង​ព័ត៌មាន បាន​ឲ្យ​ដឹង​ថា ស្ថាប័ន​សារព័ត៌មាន​ជាង ៥០០​ស្ថាប័ន​ដែល​បាន​ចុះ​បញ្ជី​នៅ​ក្រសួង​ព័ត៌មាន ក្នុង​នោះ​ឃើញ​មាន​កាសែត​បរទេស​ចំនួន ៤៣​ស្ថាប័ន វិទ្យុ​ក្នុង​ស្រុក​ជាង ២០០​ស្ថាប័ន ទូរទស្សន៍ ២០​ស្ថាប័ន និង​វេបសាយ ១៤៨​ស្ថាប័ន​ដែល​បាន​ចុះបញ្ជី។ ប៉ុន្តែ​ស្ថាប័ន​ទាំងនោះ​គ្រាន់តែ​ជា​ឧបករណ៍​ដើម្បី​បំពង​សំឡេង​របស់​បក្ស​កាន់​អំណាច​តែប៉ុណ្ណោះ ហើយ​រដ្ឋាភិបាល​ខ្លួនឯង​ក៏​ពុំ​ដែល​យកចិត្ត​ទុកដាក់​ចំពោះ​ការ​ចុះផ្សាយ​របស់​ស្ថាប័ន​ទាំងនោះ​ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស