 បានដាក់ពង្រាយកងទ័ពឡោមព័ទ្ធប្រទេសជិតខាងមួយនេះដល់ទៅជិត ២០ម៉ឺននាក់។){kind=link}
គេនៅចាំបានថា នៅមុនការលើកទ័ពឈ្លានពានអ៊ុយក្រែន គឺរដ្ឋាភិបាលប្រធានាធិបតី វ៉្លាឌីមៀរ ពូទីន (Vladimir Putin) បានដាក់ពង្រាយកងទ័ពឡោមព័ទ្ធប្រទេសជិតខាងមួយនេះដល់ទៅជិត ២០ម៉ឺននាក់។
ជាមួយគ្នានេះ សព្វាវុធទំនើបៗមានដូចជាមីស៊ីល រថក្រោះ រថពាសដែក កាំភ្លើងធំ និងរ៉ុក្កែតហ្វូងដែលគេហៅថា កាំភ្លើង ៤០កាណុង រួមទាំងយន្តហោះចម្បាំង និងឧទ្ធម្ភាគចក្រ ត្រូវបានដាក់ពង្រាយ។ នេះបើតាមប្រភពចារកម្មរបស់កងទ័ពអាមេរិក និងអង់គ្លេស។
ដោយមើលឃើញថាទ័ពអ៊ុយក្រែនអាចនឹងងាយបាក់ស្មារតី និងបាក់ទ័ព លោក ពូទីន បានព្រមានថានឹងវាយកាន់កាប់លើប្រទេសអ៊ុយក្រែន ដើម្បីបញ្ចប់របបយោធាណាហ្ស៊ីរបស់ប្រធានាធិបតី ហ្សេឡេនស្គី (Volodymyr Zelenskyy) គឺត្រូវប្រើពេលតែ ៤៨ម៉ោង ឬ ៧២ម៉ោងប៉ុណ្ណោះ អាចនឹងវាយកាន់កាប់បានសម្រេចហើយ។
លោក ពូទីន និងជំនួយការជិតស្និទ្ធរបស់លោកទំនងចង់ប្រាប់លោក ហ្សេឡេនស្គី និងកងទ័ពអ៊ុយក្រែន ថា កុំចង់លេងល្បែងសង្គ្រាមជាមួយនឹងរុស្ស៊ីឲ្យសោះ គឺមិនអាចទប់ទល់នឹងកងទ័ពរុស្ស៊ីបានឡើយ។
ទាំងនេះគឺជាការកត់ត្រារបស់អ្នកសារព័ត៌មាន និងអ្នកវិភាគអំពីសង្គ្រាមដែលលោក ពូទីន បញ្ជាឱ្យកងទ័ពរុស្ស៊ីលើកទ័ពចូលវាយលុកលុយកាន់កាប់ប្រទេសអ៊ុយក្រែន។
តែមកដល់ពេលនេះ សង្គ្រាមបានឈានដល់ ៦៤ថ្ងៃហើយ គឺរុស្ស៊ីវាយអ៊ុយក្រែនមិនអាចវាយបែកឡើយ។ មិនតែប៉ុណ្ណោះ លោក ពូទីន បានបញ្ជាឱ្យកងទ័ពរុស្ស៊ីដែលគេថាបាក់ទ័ពរត់ចោលសមរភូមិនៅភាគខាងជើងប្រទេស ឲ្យមកប្រមូលផ្ដុំគ្នានៅភាគខាងកើត និងភាគខាងត្បូងប្រទេស ដើម្បីវាយកាន់កាប់ឱ្យបាននូវភូមិសាស្ត្រក្នុងតំបន់នេះ។
តាំងពីរុស្ស៊ីដកទ័ពមកនៅភាគខាងកើត និងខាងត្បូងប្រទេស ការវាយប្រយុទ្ធគ្នាផ្ទុះពេញទំហឹងនៅតំបន់ដុនបាស់ លើផ្ទៃដីជាង ២ម៉ឺន ៦ពាន់គីឡូម៉ែត្រក្រឡា មានរយៈពេលជិត ១០ថ្ងៃមកហើយ ហើយរុស្ស៊ីក៏មិនទាន់អាចវាយកាន់កាប់បាននៅឡើយដែរ។ តាមដំណឹងមកថា ទ័ពរុស្ស៊ីមានដល់ជាង ១០ម៉ឺននាក់បើកប្រតិបត្តិការសឹកនៅតំបន់នោះ។
ទោះជាយ៉ាងនេះក្ដី បុរសខ្លាំង ពូទីន បានបន្តអួតប្រាប់សមាជិកសភារបស់លោកកាលពីថ្ងៃទី២៧ ខែមេសា ថា កងទ័ពរុស្ស៊ីមានលទ្ធភាពវាយលឿនដូចផ្លេកបន្ទោរទៅលើពួកបស្ចិមប្រទេស ដោយប្រើអាវុធយុទ្ធសាស្ត្រ។ លោកបានថ្លែងដូចនេះថា៖ ប្រសិនបើមានប្រទេសណាចង់លូកដៃពីខាងក្រៅចូលទៅក្នុងព្រឹត្តិការណ៍ដែលកំពុងកើតមាននៅអ៊ុយក្រែនពេលនេះ គឺប្រទេសនោះត្រូវដឹងថា គឺជាការបង្កើតការគំរាមកំហែងភូមិសាស្ត្រនយោបាយលើរុស្ស៊ី។ នៅក្នុងករណីនេះ ប្រទេសនោះត្រូវដឹងថានឹងមានចម្លើយមួយពីរុស្ស៊ី គឺការវាយប្រហារយ៉ាងឆាប់រហ័សដូចផ្លេកបន្ទោរ ហើយការវាយប្រហារនេះដោយអាវុធយុទ្ធសាស្ត្រទៀតផង។
លោក ពូទីន បានពន្យល់ថា រុស្ស៊ីមានគ្រប់មធ្យោបាយដែលគ្មានប្រទេសណាមួយមានទេនៅពេលនេះ។ លោក ពូទីន អះអាងថា រុស្ស៊ីមិនអួតអាងអ្វីទេ តែរុស្ស៊ីនឹងប្រើវានៅក្នុងករណីចាំបាច់។
គេពុំដឹងថា អាវុធយុទ្ធសាស្ត្រទាំងនោះមានអ្វីខ្លះនោះទេ តែចុងក្រោយនេះ រុស្ស៊ីបានធ្វើតេស្ដដោយជោគជ័យនូវការបាញ់មីស៊ីលអន្តរទ្វីបបំពាក់ដោយក្បាលគ្រាប់នុយក្លេអ៊ែរ ដែលមីស៊ីលមួយដើមអាចមានគ្រាប់នុយក្លេអ៊ែរដល់ទៅ ១០គ្រាប់។
នុយក្លេអ៊ែរជាអាវុធប្រល័យលោកដែលត្រូវបានហាមឃាត់ក្រោមច្បាប់អង្គការសហប្រជាជាតិ។ ប្រទេសរុស្ស៊ីមានអាវុធប្រភេទនេះ ៦២៥០គ្រាប់។ ចំណែកអាមេរិកមាន ៥៥៥០គ្រាប់ បារាំង ២៥០គ្រាប់ និងអង់គ្លេសមាន ៣០០គ្រាប់។
យ៉ាងណា ការព្រមានរបស់លោក ពូទីន ទំនងប្រតិកម្មទៅនឹងពួកបស្ចិមប្រទេសដែលបញ្ជូនអាវុធធុនធ្ងន់ទៅឱ្យកងទ័ពអ៊ុយក្រែន ក្នុងនោះមានសហរដ្ឋអាមេរិក អង់គ្លេស បារាំង អាល្លឺម៉ង់ កាណាដា និងប្រទេសជាច្រើនជាសមាជិកអង្គការយោធាណាតូដែលនៅអឺរ៉ុបខាងកើត ហើយពួកគេភាគច្រើនមានព្រំដែនជាប់នឹងប្រទេសអ៊ុយក្រែន និងរុស្ស៊ី។
បើតាមទីភ្នាក់ងារ AP ការព្រមានរបស់លោក ពូទីន កើតឡើងនៅពេលដែលលោក ចូ បៃដិន ប្រធានាធិបតីអាមេរិក បានដាក់ស្នើសុំកញ្ចប់ថវិកាថ្មីថែមទៀត ដើម្បីជួយផ្គត់ផ្គង់អាវុធ និងជំនួយមនុស្សធម៌ទៅឱ្យប្រទេសអ៊ុយក្រែន ក្នុងគោលដៅជួយរដ្ឋាភិបាលលោកប្រធានាធិបតី ហ្សេឡេនស្គី ទប់ទល់ក្នុងសង្គ្រាមជាមួយនឹងរុស្ស៊ី។
គិតចាប់តាំងពីលោក ពូទីន បញ្ជាឱ្យទ័ពរុស្ស៊ីឈ្លានពានអ៊ុយក្រែន នៅថ្ងៃទី២៤ កុម្ភៈ មកនោះ សម្រាប់សហរដ្ឋអាមេរិកបានប្រកាសថា ក្រុងវ៉ាស៊ីនតោន បានផ្ដល់ជំនួយទាំងជំនួយយោធា និងជំនួយមនុស្សធម៌គិតជាសាច់ប្រាក់ ៧ពាន់លានដុល្លារមកហើយ៕