សភាអឺរ៉ុប ព្រមានកម្ពុជាថា បើការបោះឆ្នោតទាំងថ្នាក់ក្រោមជាតិ និងការបោះឆ្នោតថ្នាក់ជាតិនៅពេលខាងមុខ មិនប្រព្រឹត្តទៅដោយសេរី ត្រឹមត្រូវ និងយុត្តិធម៌ទេ គណៈកម្មការអឺរ៉ុបនឹងដកហូតប្រព័ន្ធអនុគ្រោះពន្ធ EBA ពីកម្ពុជាបន្ថែមទៀត។
ការព្រមានរបស់គណៈកម្មការអឺរ៉ុប ធ្វើឡើងតាមរយៈញត្តិមួយរបស់សភាអឺរ៉ុប នៅថ្ងៃទី៥ ខែឧសភា នេះ ដែលទទួលបានការគាំទ្រពីតំណាងរាស្ត្រសភាអឺរ៉ុប ចំនួន ៥២៦នាក់លើ ៥៩៤នាក់។
បើតាមខ្លឹមសារញត្តិចុះថ្ងៃទី៥ ខែឧសភា ឆ្នាំ២០២២ សភាអឺរ៉ុបបានជំរុញឱ្យសមាជិករបស់ខ្លួនដែលមានចំនួន ២៧ប្រទេសធ្វើការតាមដានមើលការបោះឆ្នោតថ្នាក់ឃុំ-សង្កាត់នៅក្នុងខែមិថុនា ក៏ដូចជាការបោះឆ្នោតថ្នាក់ជាតិនៅឆ្នាំក្រោយឱ្យបានដិតដល់បំផុត។
បើតាមសភាអឺរ៉ុប បញ្ជាក់ថា ប្រសិនបើការបោះឆ្នោតនេះមិនសេរី ត្រឹមត្រូវ និងយុត្តិធម៌ទេ នោះសភាអឺរ៉ុបស្នើឱ្យគណៈកម្មការអឺរ៉ុបដាក់ទណ្ឌកម្មបន្ថែមទៀតមកលើរដ្ឋាភិបាលកម្ពុជា តាមរយៈការព្យួរ EBA បន្ថែមទៀតពីលើការព្យួរ EBA ចំនួន ២០% កាលពីលើកមុន។
ការស្នើឱ្យសមាជិកតាមដាននេះ ដើម្បីធ្វើសូចនាករមួយសម្រាប់វាស់វែងពីដំណើរការប្រជាធិបតេយ្យ និងសិទ្ធិមនុស្សនៅកម្ពុជា។
សភាអឺរ៉ុប បានអំពាវនាវផងដែរឱ្យសហភាពអឺរ៉ុប និងសហគមន៍អន្តរជាតិតាមដានឱ្យដិតដល់ និងវាយតម្លៃពីឥទ្ធិពលនៃការព្យួរ EBA ២០% កន្លងមកជាមួយនឹងការដាក់សម្ពាធលើតួនាទីរបស់កម្ពុជា ជាប្រធានអាស៊ាន ដើម្បីការពារសកម្មជននយោបាយ និងអ្នកការពារសិទ្ធិមនុស្សក្នុងការតស៊ូរបស់ពួកគេ។
ការអំពាវនាវរបស់សភាអឺរ៉ុប ធ្វើឡើងស្របពេលដែលកម្ពុជាកំពុងអង្គុយលើកៅអីជាប្រធានអាស៊ាន ខណៈកន្លងមក សភាអឺរ៉ុបបានដាក់ទណ្ឌកម្មប្រឆាំងនឹងមន្ត្រីកម្ពុជាដែលបានរំលោភសិទ្ធិមនុស្ស និងលទ្ធិប្រជាធិបតេយ្យ តាមរយៈការហាមប្រាមការធ្វើដំណើរទៅក្រៅប្រទេស និងការបង្កកទ្រព្យសម្បត្តិ។
កាលពីថ្ងៃទី៣០ ខែមីនា ឆ្នាំ២០២២ អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា លោក វីទិត មុនតាប៊ន (Vitit Muntarbhorn) ឱ្យដឹងថា លំហពលរដ្ឋ និងនយោបាយនៅកម្ពុជាកាន់តែរួមតូចទៅ និងកំពុងដើរថយក្រោយ ដោយសារតែការគ្រប់គ្រងបែបឯកបក្ស។
កាលពីថ្ងៃទី១៦ ខែវិច្ឆិកា ឆ្នាំ២០១៧ ក្រុមប្រឹក្សាអង្គជំនុំជម្រះតុលាការកំពូលចំនួន ៩រូបដឹកនាំដោយលោក ឌិត មុន្ទី បានចេញសាលដីកាជាប្រវត្តិសាស្ត្ររំលាយគណបក្សសង្គ្រោះជាតិ ទៅតាមបណ្ដឹងរបស់ក្រសួងមហាផ្ទៃ ដោយចោទប្រកាន់ថាគណបក្សនេះមានបំណងផ្តួលរំលំរដ្ឋាភិបាលកម្ពុជា។
តាមរយៈសាលដីការបស់តុលាការកំពូល ក៏បានសម្រេចព្យួរសិទ្ធិនយោបាយរបស់ថ្នាក់ដឹកនាំអតីតគណបក្សសង្គ្រោះជាតិ ចំនួន ១១៨នាក់ ក្នុងម្នាក់ៗចំនួន ៥ឆ្នាំ ខណៈគណៈកម្មាធិការជាតិរៀបចំការបោះឆ្នោតបានចាត់ចែងបែងចែកអាសនៈសភារបស់អតីតគណបក្សសង្គ្រោះជាតិ ចំនួន៥៥ និងអាសនៈឃុំ-សង្កាត់ចំនួន ៥០០៧ ទៅឱ្យគណបក្សនយោបាយផ្សេងៗទៀត។
ក្រោយពីមានការរំលាយគណបក្សសង្គ្រោះជាតិ នៅថ្ងៃទី១៦ ខែវិច្ឆិកា ឆ្នាំ២០១៧ មក សហភាពអឺរ៉ុប បានកាត់ផ្ដាច់ប្រព័ន្ធអនុគ្រោះពន្ធ EBA ២០% ពីកម្ពុជា កាលពីថ្ងៃទី១២ ខែសីហា ឆ្នាំ២០២០ ខណៈសហរដ្ឋអាមេរិកកំពុងពិចារណាក្នុងការបន្ត ឬមិនបន្តការផ្ដល់ប្រព័ន្ធអនុគ្រោះពន្ធទូទៅ (GSP) ដល់កម្ពុជាវិញនៅឡើយទេ ស្របពេលដែលរដ្ឋសភាសហរដ្ឋអាមេរិកក៏បានអនុម័តសេចក្ដីព្រាងច្បាប់ស្ដីពី «លទ្ធិប្រជាធិបតេយ្យកម្ពុជា ឆ្នាំ២០២១ ឬ H.R 4686» ផងដែរ៕