អនុប្រធានសហភាពអឺរ៉ុប ជំរុញឱ្យរដ្ឋាភិបាលកម្ពុជាផ្តល់ដំណោះស្រាយបន្ទាន់លើសំណុំរឿងប្រធានគណបក្សសង្គ្រោះជាតិ លោក កឹម សុខា និងធានាឱ្យបាននូវការបោះឆ្នោតតាមបែបប្រជាធិបតេយ្យនៅឆ្នាំ២០២២ ខាងមុខនេះ តាមរយៈនៃការបើកឱ្យមានគណបក្សប្រឆាំងមួយដែលមានតម្លៃផ្លូវច្បាប់ពេញលេញ។
អនុប្រធានសហភាពអឺរ៉ុប ដែលតំណាងឱ្យរដ្ឋសមាជិកទាំង ២៧រដ្ឋក្នុងសហគមន៍អឺរ៉ុប លោក ចូសឹប បូរ៉ែល (Josep Borrell) បានលើកឡើងក្នុងកិច្ចប្រជុំដេញដោលរបស់សភាអឺរ៉ុប កាលពីថ្ងៃទី៥ ខែឧសភា ឆ្នាំ២០២២ ថា សហភាពអឺរ៉ុបបានបើកចំហក្នុងការចូលរួមឡើងវិញរបស់កម្ពុជាលើការពិភាក្សាអំពីប្រព័ន្ធអនុគ្រោះពន្ធ EBA ប្រសិនបើមានការកែលំអឱ្យបានកាន់តែល្អប្រសើរច្រើនឡើងលើបញ្ហានៃលំហលទ្ធិប្រជាធិបតេយ្យនៅកម្ពុជាសព្វថ្ងៃនេះ។
តំណាងសហភាពអឺរ៉ុប លើកឡើងថា ដើម្បីស្ដារលទ្ធិប្រជាធិបតេយ្យ និងការគោរពសិទ្ធិមនុស្សឱ្យល្អប្រសើរឡើងវិញ រដ្ឋាភិបាលខ្មែរគួរតែចាត់វិធានការជាបន្ទាន់ក្នុងការបើកលំហសេរីភាពនយោបាយនៅកម្ពុជា និងអនុញ្ញាតឱ្យមានការចូលរួមពីគណបក្សប្រឆាំងមួយដែលអាចជឿទុកចិត្តបាន ជាពិសេសកម្ពុជាគួរតែផ្តល់ដំណោះស្រាយជាបន្ទាន់លើសំណុំរឿងប្រធានគណបក្សសង្គ្រោះជាតិ លោក កឹម សុខា ដែលត្រូវបានចោទប្រកាន់ទាំងអយុត្តិធម៌ក្នុងពេលបច្ចុប្បន្ននេះ។
អនុប្រធានសហភាពអឺរ៉ុប លោក ចូសឹប បូរ៉ែល បញ្ជាក់ថា ចាប់តាំងពីរដ្ឋាភិបាលកម្ពុជារំលាយគណបក្សសង្គ្រោះជាតិកាលពីឆ្នាំ២០១៧ កន្លងទៅ សហភាពអឺរ៉ុបបានធ្វើការជាមួយភាគីពាក់ព័ន្ធទាំងអស់យ៉ាងយកចិត្តទុកដាក់ រួមមានអង្គការសង្គមស៊ីវិល និងអាជ្ញាធរកម្ពុជា ជាដើម ដើម្បីលើកទឹកចិត្តឱ្យមានការបើកឡើងវិញនូវលំហសេរីភាពនយោបាយ និងសិទ្ធិមូលដ្ឋានរបស់ប្រជាពលរដ្ឋ។
ប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី១១ ឧសភា នេះថា ការលើកឡើងរបស់អនុប្រធានសហភាពអឺរ៉ុប បានបង្ហាញឱ្យឃើញថា ការតស៊ូរបស់ប្រធានគណបក្សសង្គ្រោះជាតិ លោក កឹម សុខា ក្នុងការស្វែងរកដំណោះស្រាយចំពោះវិបត្តិនយោបាយនៅកម្ពុជា មានតម្លៃលើសអ្នកនយោបាយណាៗទាំងអស់ក្នុងស្ថានភាពបច្ចុប្បន្ននេះ។
លោក ម៉ែន ណាត អះអាងថា ខ្លឹមសារនៃសុន្ទរកថាដដែលនោះក៏មានន័យបញ្ជាក់យ៉ាងច្បាស់ដែរថា សហភាពអឺរ៉ុបបានច្រានចោលការបោះឆ្នោតឃុំ-សង្កាត់ឆ្នាំ២០២២ នេះរួចទៅហើយ ដូច្នេះលទ្ធផលនៃការបោះឆ្នោតនេះ ពួកគេនឹងមិនទទួលស្គាល់នោះទេ ស្របពេលដែលការបោះឆ្នោតនេះគ្រាន់តែជាការរៀបចំផែនការដើម្បីប្លន់តាមរយៈនៃការរៀបចំគ្រប់បែបយ៉ាងរបស់គណបក្សកាន់អំណាចតែប៉ុណ្ណោះ។
លោកបញ្ជាក់ថា អាណត្តិកន្លងទៅ គណបក្សកាន់អំណាចមានលទ្ធភាពត្រឹមតែលួចសន្លឹកឆ្នោតប៉ុណ្ណោះ ប៉ុន្តែអាណត្តិទី៥ នេះ បក្សកាន់អំណាចបានគ្រប់គ្រង និងរៀបចំដំណើរការទាំងស្រុងតាមរយៈ គ.ជ.ប ដែលមានសមាសភាពមកពីបក្សកាន់អំណាចទាំងអស់ ខណៈមេដឹកនាំបក្សប្រឆាំង លោក កឹម សុខា និងគណបក្សសង្គ្រោះជាតិដែលមានពលរដ្ឋគាំទ្រជិតកន្លះប្រទេស នៅតែត្រូវបានបិទសិទ្ធិមិនឱ្យចូលរួមការបោះឆ្នោតនេះដដែល។
កាលពីថ្ងៃទី១៦ ខែវិច្ឆិកា ឆ្នាំ២០១៧ កន្លងទៅ តុលាការកំពូលកម្ពុជាបានចេញសាលដីការំលាយគណបក្សសង្គ្រោះជាតិ ជុំវិញសំណុំរឿងមេដឹកនាំបក្សប្រឆាំង លោក កឹម សុខា ដែលត្រូវបានចោទប្រកាន់ពីបទឃុបឃិតជាមួយរដ្ឋបរទេសដើម្បីផ្តួលរំលំរដ្ឋាភិបាលកម្ពុជា តាមប្រសាសន៍របស់មេដឹកនាំបក្សកាន់អំណាច លោក ហ៊ុន សែន។
ជុំវិញការចោទប្រកាន់នេះ ប្រធានគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចដាក់កម្លាំងចូលចាប់ខ្លួនដល់គេហដ្ឋានទាំងកណ្តាលយប់កាលពីថ្ងៃទី៣ ខែកញ្ញា ឆ្នាំ២០១៧ យកទៅឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ អស់រយៈពេលមួយឆ្នាំ និងបន្តរឹតត្បិតសេរីភាពក្រោមការឃ្លាំមើលរបស់តុលាការកម្ពុជារហូតដល់សព្វថ្ងៃនេះ។
ទាក់ទិននឹងបញ្ហានេះ ប្រធានគណបក្សសង្គ្រោះជាតិ លោក កឹម សុខា បានអះអាងកាលពីថ្ងៃទី១០ ឧសភា ឆ្នាំ២០២២ ថា បណ្តាតំណាងអង្គទូតដែលជាមិត្តរបស់កម្ពុជា នៅតែចាត់ទុកលោកថាជាតួអង្គតំណាងឲ្យឆន្ទៈរបស់ប្រជាពលរដ្ឋខ្មែរ ដែលអាចចូលរួមស្វែងរកដំណោះស្រាយបញ្ហាជាតិរវាងខ្មែរ និងខ្មែរបាន ដោយមានការសាទរពីសហគមន៍អន្តរជាតិ៕