លោកនាយករដ្ឋមន្ត្រី ហ៊ុន សែន បដិសេធថា លោកមិនបានចោទអាមេរិកនៅពីក្រោយសំណុំរឿងលោក កឹម សុខា នោះទេ ខណៈអនុរដ្ឋមន្ត្រីក្រសួងការបរទេសសហរដ្ឋអាមេរិក អ្នកស្រី Wendy Sherman បារម្ភអំពីដំណើរការសវនាការសំណុំរឿងរបស់លោក កឹម សុខា។
លោក កឹម សុខា ប្រធានគណបក្សសង្គ្រោះជាតិ ត្រូវបានរដ្ឋាភិបាលចោទប្រកាន់ពីបទរួមគំនិតជាមួយបរទេស ក្នុងគម្រោងមួយដែលរដ្ឋាភិបាលរបស់លោក ហ៊ុន សែន ហៅថា «ការប៉ុនប៉ងផ្ដួលរំលំរដ្ឋាភិបាល» ដោយមានសហរដ្ឋអាមេរិកនៅពីក្រោយ ប៉ុន្តែការចោទប្រកាន់នេះ ត្រូវបានលោក កឹម សុខា និងសហរដ្ឋអាមេរិកបានបដិសេធ។
ក្នុងពិធីជួបសំណេះសំណាលជាមួយប្រជាពលរដ្ឋខ្មែររស់នៅសហរដ្ឋអាមេរិក និងកាណាដា ប្រមាណជា ២ពាន់នាក់នៅរដ្ឋធានីវ៉ាស៊ីនតោន នាថ្ងៃទី១២ ឧសភា នេះ លោក ហ៊ុន សែន ដែលអះអាងកន្លងមកថា លោកជាអ្នកបញ្ជាទៅសមត្ថកិច្ចឱ្យចាប់ខ្លួនលោក កឹម សុខា ទៅឃុំខ្លួននៅពន្ធនាគារត្រពាំងផ្លុង បែរជាឆ្លើយបដិសេធទៅវិញ។
លោក ហ៊ុន សែន អះអាងថា រូបលោកមិនដែលបានចោទអាមេរិកពាក់ព័ន្ធសំណុំរឿងសន្ទិដ្ឋភាពជាមួយរដ្ឋបរទេសរបស់លោក កឹម សុខា ដើម្បីផ្តួលរំលំរាជរដ្ឋាភិបាលកម្ពុជានោះទេ។ ប៉ុន្តែលោក កឹម សុខា ជាអ្នកលើកឡើងដោយខ្លួនឯង។ ករណីនេះ លោកបានជំរុញឱ្យអាមេរិកគួរទៅនិយាយរឿងនេះជាមួយលោក កឹម សុខា ព្រោះលោក កឹម សុខា ជាអ្នកលើកឡើង។
លោក ហ៊ុន សែន បន្តថា កន្លងមក ទាំងតុលាការ ទាំងរាជរដ្ឋាភិបាលកម្ពុជា មិនបានចោទអាមេរិកទេ ហើយចំពោះដំណើររឿងក្តីរបស់លោក កឹម សុខា ទុកឱ្យតុលាការជាអ្នកសម្រេច ដោយលោកគ្មានសិទ្ធិអ្វីទៅបញ្ជាទៅតុលាការដែរ។
យ៉ាងណាក៏ដោយ ការបដិសេធរបស់លោក ហ៊ុន សែន ដែលថាលោកមិនបានទាញភ្ជាប់ ឬចោទអាមេរិកជាមួយសំណុំរឿងលោក កឹម សុខា នោះ បានធ្វើឡើងស្របពេលលោកកំពុងស្ថិតនៅសហរដ្ឋអាមេរិក ដើម្បីចូលរួមកិច្ចប្រជុំកំពូលពិសេសអាស៊ាន-អាមេរិក ចាប់ពីថ្ងៃទី១២ ដល់ថ្ងៃទី១៣ ខែឧសភា ឆ្នាំ២០២២។
ក្នុងជំនួបជាមួយក្រុមអ្នកវិភាគតាមបណ្ដាញសង្គមរស់នៅសហរដ្ឋអាមេរិក នៅព្រឹកថ្ងៃទី១១ ខែឧសភា ឆ្នាំ២០២២ លោកនាយករដ្ឋមន្ត្រី ហ៊ុន សែន បានហៅលោក សម រង្ស៊ី ថាជាអ្នកនយោបាយមិនចេះគ្រប់គ្រងឱកាស ដោយថាលោក សម រង្ស៊ី មិនបានផ្ញើលិខិតចូលរួមមរណទុក្ខលោក ហ៊ុន ណេង ដែលជាបងប្រុសបង្កើតរបស់លោក ធ្វើឲ្យបាត់បង់ឱកាសវិលត្រឡប់ចូលកម្ពុជាវិញ។
ក្នុងជំនួបជាមួយរដ្ឋមន្ត្រីការបរទេស និងសហប្រតិបត្តិការអន្តរជាតិ និងជាឧបនាយករដ្ឋមន្ត្រីនៃកម្ពុជា លោក ប្រាក់ សុខុន ជាមួយអនុរដ្ឋមន្ត្រីក្រសួងការបរទេសសហរដ្ឋអាមេរិក អ្នកស្រី វីនឌី ហ្សឺមេន (Wendy R. Sherman) ដើម្បីជជែកអំពីការគាំទ្ររបស់សហរដ្ឋអាមេរិកសម្រាប់កម្ពុជាជាប្រធានអាស៊ាន អ្នកស្រីក៏បានជំរុញឱ្យមានការអនុវត្តឱ្យបានពេញលេញនូវកិច្ចព្រមព្រៀងកុងសង់ស៊ីសប្រាំចំណុចស្ដីពីភូមា។
ក្រៅពីជំរុញឱ្យកម្ពុជាអនុវត្តកិច្ចព្រមព្រៀងនោះ អ្នកស្រី វីនឌី ហ្សឺមេន (Wendy R. Sherman) បានបង្ហាញការព្រួយបារម្ភពីការជំនុំជម្រះក្តីរបស់លោក កឹម សុខា និងឱ្យកម្ពុជាចែករំលែកពីវត្តមានរបស់សាធារណរដ្ឋប្រជាមានិតចិន នៅមូលដ្ឋានកងទ័ពជើងទឹករាម។
គិតមកដល់ពេលនេះ លោក កឹម សុខា ត្រូវបានតុលាការដកសិទ្ធិធ្វើនយោបាយប្រមាណ ៤ឆ្នាំមកហើយ ខណៈដំណើរការសវនាការក្នុងសំណុំរឿង «សន្ទិដ្ឋភាពជាមួយរដ្ឋបរទេស» នេះ ត្រូវបានក្រុមមេធាវីលោក កឹម សុខា ថាមិនមានភាពជឿនលឿននោះទេ ដោយសារតំណាងអយ្យការ និងមេធាវីដើមរដ្ឋាភិបាលនៅតែបន្តសួរសំណួរដែលតុលាការបានសួររួចហើយ។ ករណីនេះ បានធ្វើឱ្យដំណើរការសវនាការនេះចេះតែបន្តអូសបន្លាយប្រមាណ ២ឆ្នាំមកហើយគិតមកដល់ពេលនេះ។
កាលពីថ្ងៃទី៤ ខែឧសភា ឆ្នាំ២០២២ តំណាងជាន់ខ្ពស់ និងជាអនុប្រធានសហភាពអឺរ៉ុប លោក ចូសឹប បូរ៉ែល (Josep Borrell) ជំរុញរដ្ឋាភិបាលកម្ពុជាបើកលំហនយោបាយ និងផ្តល់ដំណោះស្រាយលើសំណុំរឿងប្រធានគណបក្សសង្គ្រោះជាតិ លោក កឹម សុខា ខណៈការបោះឆ្នោតជិតចូលមកដល់ ដោយថាខ្លួននឹងពិចារណាផ្តល់ប្រព័ន្ធអនុគ្រោះពន្ធ EBA ឱ្យកម្ពុជាវិញ ប្រសិនបើស្ថានភាពនយោបាយ និងប្រជាធិបតេយ្យប្រសើរឡើងវិញ៕