បុរសខ្លាំងនៅកម្ពុជា លោក ហ៊ុន សែន មិនបានលើកឡើងអំពីទំនាក់ទំនងរវាងកម្ពុជា-អាមេរិក ថាបានដើរដល់កម្រិតណានោះទេ ក្រោយពីបានដឹកនាំមន្ត្រីជាន់ខ្ពស់របស់ខ្លួនទៅជាន់ទឹកដីសហរដ្ឋអាមេរិក ដើម្បីចូលរួមកិច្ចប្រជុំកំពូលអាស៊ាន-អាមេរិក រយៈពេលពីរថ្ងៃកាលពីថ្ងៃទី១២-១៣ ខែឧសភា កន្លងទៅនេះ។
លោក ហ៊ុន សែន បានសរសេរលើទំព័រហ្វេសប៊ុករបស់លោកកាលពីថ្ងៃទី១៥ ខែឧសភា ឆ្នាំ២០២២ នេះថា លោកនិងមន្ត្រីជាន់ខ្ពស់ផ្សេងទៀតបានធ្វើដំណើរមកដល់កម្ពុជាវិញហើយ នៅយប់ថ្ងៃអាទិត្យ បន្ទាប់ពីចូលរួមកិច្ចប្រជុំកំពូលពិសេសអាស៊ាន-អាមេរិក ក្នុងរដ្ឋធានីវ៉ាស៊ីនតោន សហរដ្ឋអាមេរិក ប្រកបដោយលទ្ធផលជោគជ័យរយៈពេលពីរថ្ងៃកាលពីថ្ងៃទី១២-១៣ ខែឧសភា ឆ្នាំ២០២២ កន្លងទៅថ្មីៗនេះ។
លោក ហ៊ុន សែន បានអះអាងថា ជាលទ្ធផលក្នុងកិច្ចប្រជុំដ៏មានសារសំខាន់នេះ ថ្នាក់ដឹកនាំអាស៊ាន និងសហរដ្ឋអាមេរិកបានជួបពិភាក្សាការងារជាច្រើនក្នុងការពង្រឹង និងពង្រីកនូវកិច្ចសហប្រតិបត្តិការរវាងអាស៊ាន និងសហរដ្ឋអាមេរិក ប៉ុន្តែលោក ហ៊ុន សែន មិនបានបញ្ជាក់អំពីទំនាក់ទំនងទ្វេភាគីរវាងកម្ពុជា និងអាមេរិក ដូចកាលមុនកិច្ចប្រជុំនោះឡើយ។
លោក ហ៊ុន សែន បញ្ជាក់ថា ក្នុងកិច្ចប្រជុំកំពូលអាស៊ាន-អាមេរិកនេះ ថ្នាក់ដឹកនាំអាស៊ាន និងអាមេរិកបានជជែកពិភាក្សាស្ដីពីបញ្ហាវិធានការអាកាសធាតុ បញ្ហាថាមពលស្អាត ហេដ្ឋារចនាសម្ព័ន្ធប្រកបដោយចីរភាព ការពិភាក្សាផ្លាស់ប្ដូរទស្សនៈគ្នាអំពីបញ្ហាតំបន់ និងអន្តរជាតិ និងការនាំភាពជាដៃគូអាស៊ាន-សហរដ្ឋអាមេរិកទៅកាន់កម្រិតមួយទៀតដែលជាប្រធានបទដ៏សំខាន់នៃកិច្ចប្រជុំកំពូលនេះ។
កាលពីថ្ងៃទី១០ ខែឧសភា ឆ្នាំ២០២២ លោក ហ៊ុន សែន បានធ្វើដំណើរចាកចេញពីកម្ពុជាដើម្បីចូលរួមកិច្ចប្រជុំកំពូលពិសេសអាស៊ាន-អាមេរិក ដែលប្រព្រឹត្តទៅនៅថ្ងៃទី១២-១៣ ខែឧសភា ឆ្នាំ២០២២ កន្លងទៅ។
មុនកិច្ចប្រជុំកំពូលអាស៊ាន-អាមេរិកមួយថ្ងៃ មេដឹកនាំបក្សកាន់អំណាច លោក ហ៊ុន សែន កាលពីថ្ងៃទី១១ ខែឧសភា បានអះអាងថា កិច្ចប្រជុំកំពូលអាស៊ាន-អាមេរិកនឹងពង្រឹងទំនាក់ទំនងអាមេរិក និងអាស៊ានឱ្យកាន់តែខ្លាំងមួយកម្រិតទៀត ជាពិសេសដើម្បីពង្រឹងទំនាក់ទំនងទ្វេភាគីរវាងកម្ពុជា និងសហរដ្ឋអាមេរិកឱ្យកាន់តែល្អប្រសើរផងដែរ។
មុននឹងឈានដល់ថ្ងៃចូលរួមប្រជុំ លោក ហ៊ុន សែន មានកម្មវិធីជួបជាមួយសមាជិកព្រឹទ្ធសភាអាមេរិកផងដែរ ប៉ុន្តែតាំងពីមុនចាប់ផ្តើមកិច្ចប្រជុំរហូតកិច្ចប្រជុំត្រូវបានបញ្ចប់ និងវិលត្រឡប់មកដល់កម្ពុជាវិញ លោក ហ៊ុន សែន មិនត្រូវបានសហរដ្ឋអាមេរិកអនុញ្ញាតឱ្យមានជំនួបទ្វេភាគីជាមួយប្រធានាធិបតីអាមេរិក លោក ចូ បៃដិន ជុំវិញទំនាក់ទំនងរវាងកម្ពុជា និងអាមេរិកនោះទេ។
យ៉ាងណាក៏ដោយ ក្រុមអ្នកសង្កេតការណ៍លើកឡើងថា មេដឹកនាំខ្មែរ លោក ហ៊ុន សែន បានរងនូវភាពអាម៉ាស់យ៉ាងធ្ងន់ធ្ងរក្នុងការដឹកនាំកិច្ចប្រជុំកំពូលពិសេសអាស៊ាន-អាមេរិកនេះ ព្រោះថាអាមេរិកមិនបានផ្តល់តម្លៃឱ្យកម្ពុជាក្នុងនាមប្រធានអាស៊ានប្តូរវេន ឬតួនាទីជាសហប្រធានក្នុងកិច្ចប្រជុំនេះឡើយ ត្បិតអាមេរិកឱ្យតម្លៃតែទៅលើអាស៊ានប៉ុណ្ណោះ។
កាលពីថ្ងៃទី១៤ ខែមករា ឆ្នាំ២០២២ ប្រធានាធិបតីសហរដ្ឋអាមេរិក លោក ចូ បៃដិន បញ្ជាក់យ៉ាងច្បាស់ថា វត្ថុបំណងនៃកិច្ចប្រជុំកំពូលអាស៊ាន-អាមេរិក គឺសហរដ្ឋអាមេរិកគាំទ្រការសម្រេចរបស់អាស៊ាន ហើយអាមេរិកនឹងគាំទ្រឥតងាករេអំពីអាស៊ានជាស្នូល និងជាបេះដូងនៃតំបន់ឥណ្ឌូ-ប៉ាស៊ីហ្វិក៕