លោក ស ខេង រដ្ឋមន្ត្រីក្រសួងមហាផ្ទៃ និងជាអនុប្រធានបក្សកាន់អំណាច លើកឡើងថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ គឺជាការលើកស្ទួយសិទ្ធិពលរដ្ឋដែលមានសិទ្ធិសេរីភាពពេញលេញក្នុងការជ្រើសរើសអ្នកដឹកនាំរបស់ខ្លួននៅមូលដ្ឋាន មិនមែនថ្នាក់លើណាមួយជាអ្នកតែងតាំងនោះទេ។
លោក ស ខេង បានសរសេរលើទំព័រហ្វេសប៊ុករបស់លោកកាលពីម្សិលមិញ (២៣ ឧសភា) នេះថា គណបក្សកាន់អំណាចបានប្រកាន់ឧត្តមគតិស្នេហាជាតិពិតប្រាកដ នៅជាមួយពលរដ្ឋគ្រប់កាលៈទេសៈ តស៊ូតាំងពីប្រទេសធ្លាក់ក្នុងចំណុចសូន្យស្ថិតក្នុងការហ៊ុមព័ទ្ធសេដ្ឋកិច្ច និងនយោបាយ រហូតបង្កើតបានសុខសន្តិភាព និងការអភិវឌ្ឍឈរស្មើមុខស្មើមាត់នៅលើឆាកអន្តរជាតិ។
លោក ស ខេង បានលើកឡើងអំពីគុណតម្លៃនៃសន្តិភាពថា សន្តិភាពដែលកម្ពុជាដណ្ដើមបានមកនេះ គឺបានមកពីការធ្វើពលិកម្មបង្ហូរឈាមស្រស់សាច់ស្រស់របស់ពលរដ្ឋកម្ពុជា និងឥស្សរជននានា ជាពិសេសថ្នាក់ដឹកនាំគណបក្សប្រជាជនកម្ពុជា ដូច្នេះពលរដ្ឋខ្មែរត្រូវតែរួមគ្នាអរគុណសន្តិភាព និងការពារសន្តិភាពឱ្យបានដាច់ខាត។
អនុប្រធានបក្សកាន់អំណាច លោក ស ខេង បញ្ជាក់ថា អាជ្ញាធរដែនដីទាំងអស់ត្រូវតែខិតខំធ្វើអំពើល្អជាមួយពលរដ្ឋ និងត្រូវចាត់ទុកពលរដ្ឋជាអ្នកដែលត្រូវយកចិត្តទុកដាក់ខ្ពស់បំផុត។ ជាងនេះទៀត អាជ្ញាធរមូលដ្ឋានទាំងនោះត្រូវតែចូលរួមការពារនូវការបោះឆ្នោតនេះឱ្យប្រព្រឹត្តទៅក្នុងបរិយាកាសសុខសន្តិភាព គ្មានអំពើហិង្សា និងការគំរាមកំហែង ដើម្បីពង្រឹង និងលើកស្ទួយដំណើរការលទ្ធិប្រជាធិបតេយ្យនៅកម្ពុជាបន្តទៀត។
ការអះអាងនេះ ធ្វើឡើងស្របពេលដែលការបោះឆ្នោតនៅកម្ពុជាកាន់តែខិតជិតមកដល់ ខណៈការបោះឆ្នោតនេះមិនត្រូវបានទទួលការទុកចិត្តពីពលរដ្ឋ និងសហគមន៍អន្តរជាតិនោះឡើយ។
ការបោះឆ្នោតក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២ នឹងប្រព្រឹត្តទៅនៅថ្ងៃទី៥ ខែមិថុនា ខាងមុខនេះ ប៉ុន្តែការបោះឆ្នោតនេះត្រូវគេរិះគន់ថា គ្រាន់តែជាការរៀបចំឧក្រិដ្ឋកម្មបោះឆ្នោតមួយដើម្បីបន្លំភ្នែកអន្តរជាតិ និងពលរដ្ឋម្ចាស់ប្រទេសក្នុងគោលដៅបន្តឧក្រិដ្ឋកម្មសម្លាប់ប្រជាធិបតេយ្យនៅកម្ពុជាធ្ងន់ធ្ងរប៉ុណ្ណោះ។
កាលពីថ្ងៃទី៥ ខែឧសភា ឆ្នាំ២០២២ អនុប្រធានសហភាពអឺរ៉ុប ដែលតំណាងឱ្យរដ្ឋសមាជិកទាំង ២៧រដ្ឋក្នុងសហគមន៍អឺរ៉ុប លោក ចូសឹប បូរ៉ែល (Josep Borrell) ជំរុញឱ្យរដ្ឋាភិបាលកម្ពុជាគោរពនីតិរដ្ឋដោយការធានាឱ្យបាននូវការបោះឆ្នោតតាមបែបប្រជាធិបតេយ្យនៅឆ្នាំ២០២២ ខាងមុខនេះ តាមរយៈនៃការបើកឱ្យមានគណបក្សប្រឆាំងមួយដែលមានតម្លៃផ្លូវច្បាប់ពេញលេញ ជាពិសេសគឺត្រូវផ្តល់ដំណោះស្រាយបន្ទាន់លើសំណុំរឿងប្រធានគណបក្សសង្គ្រោះជាតិ លោក កឹម សុខា ផងដែរ។
ចំណែកវេទិកាពលរដ្ឋ កាលពីថ្ងៃច័ន្ទ ទី២៣ ឧសភា អះអាងថា លទ្ធផលបោះឆ្នោតនាពេលខាងមុខនេះ ត្រូវលោក ហ៊ុន សែន និងគណៈកម្មាធិការជាតិរៀបចំការបោះឆ្នោត (គ.ជ.ប.) កំណត់ទុកជាមុនរួចទៅហើយ។
ប្រភពដដែលបញ្ជាក់ថា ការបោះឆ្នោតឃុំ-សង្កាត់ខាងមុខនេះមិនមែនត្រឹមតែជាការលួចសន្លឹកឆ្នោតប៉ុណ្ណោះទេ ប៉ុន្តែជាឧក្រិដ្ឋកម្មប្លន់លទ្ធផលនៃការបោះឆ្នោតតែម្ដង ពីព្រោះអ្វីៗគឺស្ថិតក្នុងការគ្រប់គ្រងរបស់បក្សកាន់អំណាចគ្រប់បែបយ៉ាងទាំងអស់៕