31 C
Phnom Penh

អភិបាល​ខេត្ត​កំពង់ធំ​ថា​ប័ណ្ណ​ដីធ្លី​មាន​តម្លៃ​សម្រាប់​ពលរដ្ឋ​យក​ទៅ​ខ្ចី​ប្រាក់​ពី​ធនាគារ

ដោយ ឌឹ ខេមបូឌា ដេលី

បទវិភាគ

អភិបាល​ខេត្ត​កំពង់ធំ អះអាង​ថា ការ​ប្រគល់​ប័ណ្ណ​កម្មសិទ្ធិ​ដីធ្លី​ជូន​ប្រជាពលរដ្ឋ​ដែល​រាជរដ្ឋាភិបាល​សម្រេច​កាត់​ឆ្វៀល​ដី​តំបន់​ព្រៃ​លិច​ទឹក​បឹង​ទន្លេសាប ដោយ​ធ្វើ​ប្លង់​កម្មសិទ្ធិ​ជូន​ប្រជាពលរដ្ឋ គឺជា​ឯកសារ​គតិយុត្តិ និង​ជា​វត្ថុ​មាន​តម្លៃ​សម្រាប់​ពលរដ្ឋ​យក​ទៅ​ខ្ចី​ប្រាក់​ពី​ធនាគារ ដើម្បី​លើក​ស្ទួយ​ជីវភាព​គ្រួសារ និង​ចូលរួម​កាត់បន្ថយ​ភាព​ក្រីក្រ​ស្រប​តាម​យុទ្ធសាស្ត្រ​របស់​រាជរដ្ឋាភិបាល​កម្ពុជា។

អភិបាល​ខេត្ត​កំពង់ធំ លោក ងួន រតនៈ នៅ​ថ្ងៃទី​៣០ ខែ​ឧសភា ឆ្នាំ​២០២២ បាន​លើកឡើង​ក្នុង​ពិធី​ប្រគល់​វិញ្ញាបនបត្រ​ដល់​ម្ចាស់​អចលនវត្ថុ​ជូន​ប្រជាពលរដ្ឋ​ចំនួន​ជិត ៦០០​ប័ណ្ណ​នៅ​លើ​ទីតាំង​ដី​ដែល​លោក​នាយករដ្ឋមន្ត្រី ហ៊ុន សែន បាន​សម្រេច​កាត់​ឆ្វៀល​ចេញពី​តំបន់​២ មក​តំបន់​១ នៅ​ភូមិ​នាងសល្ងាច ឃុំ​កំពង់ចិនជើង ស្រុក​ស្ទោង ខេត្ត​កំពង់ធំ។

លោក ងួន រតនៈ អះអាង​ថា ប័ណ្ណ​កម្មសិទ្ធិ​នេះ​គឺជា​ឯកសារ​គតិយុត្តិ​ត្រូវ​បាន​ការពារ​ដោយ​ច្បាប់ និង​ធានា​ការ​ខុសត្រូវ​ដោយ​រដ្ឋ មិន​អាច​មាន​ជន​ណា​ម្នាក់​មក​លួច​បន្លំ រំលោភ​បំពាន​បាន​ឡើយ ដែល​ជា​វត្ថុ​មាន​តម្លៃ​សម្រាប់​យក​ទៅ​ដាក់​បញ្ចាំ​ធានា​នូវ​ការ​ខ្ចី​ប្រាក់​ពី​ធនាគារ ដើម្បី​លើក​ស្ទួយ​ជីវភាព​គ្រួសារ និង​ចូលរួម​កាត់បន្ថយ​ភាព​ក្រីក្រ​ស្រប​តាម​យុទ្ធសាស្ត្រ​របស់​រដ្ឋាភិបាល​កម្ពុជា។

ការ​ចែក​ប័ណ្ណ​កម្មសិទ្ធិ​ដីធ្លី​នេះ ត្រូវ​គេ​រិះគន់​ថា​ធ្វើឡើង​ដើម្បី​ទាក់ទាញ​សន្លឹកឆ្នោត​ពី​ប្រជាពលរដ្ឋ​ប៉ុណ្ណោះ មិនមែន​គិត​ពី​សុខទុក្ខ​របស់​ប្រជាពលរដ្ឋ​ដោយ​ពិតប្រាកដ​នោះ​ទេ។

កាលពី​ថ្ងៃទី​២៧ ខែ​ឧសភា ឆ្នាំ​២០២២ លោក ហ៊ុន សែន បាន​សម្រេច​កាត់​ឆ្វៀល​តំបន់​ដី​ព្រៃ​លិច​ទឹក​ជុំវិញ​បឹង​ទន្លេសាប​ទាំង ៦​ខេត្ត​ទៅ​ឱ្យ​ប្រជាពលរដ្ឋ​ដែល​ធ្លាប់​បាន​កាន់កាប់​អាស្រ័យ​ផល​យ៉ាង​តិច​បំផុត ១០​ឆ្នាំ ឬ​ដី​ដែល​មិនមែន​ជា​ដី​លិច​ទឹក​ដែល​អាច​ឲ្យ​ពលរដ្ឋ​ប្រកប​មុខរបរ​កសិកម្ម​បាន​ទៅ​តាម​ស្ថានភាព​ជាក់ស្តែង​របស់​ពួកគេ។

ជុំវិញ​បញ្ហា​នេះ ក្រុម​អ្នក​ឃ្លាំមើល​សង្គម​លើកឡើង​ថា ការ​ចែក​ប័ណ្ណ​កម្មសិទ្ធិ​ដីធ្លី​នេះ​មិនមែន​ដោយសារ​លោក ហ៊ុន សែន យកចិត្ត​ទុកដាក់​នឹង​កសិករ ឬ​ប្រជាពលរដ្ឋ​ខ្មែរ​នោះ​ឡើយ ប៉ុន្តែ​ខ្លឹមសារ​ពិត​នៃ​ការ​ចែក​ប័ណ្ណ​នេះ គឺ​បង្កប់​នូវ​ការ​កេង​ចំណេញ​នយោបាយ​របស់​បក្ស​កាន់​អំណាច​ប៉ុណ្ណោះ ក្នុង​នោះ​ក៏​ដើម្បី​បញ្ចេញ​ដី​ឱ្យ​ឈ្មួញ​ដែល​ជា​សេណារីយ៉ូ​របស់​បក្ស​កាន់​អំណាច​រាប់​សិប​ម៉ឺន​ហិកតារ ដើម្បី​កាន់កាប់​ជា​កម្មសិទ្ធិ​ផង​ដែរ។

ប្រភព​ដដែល​រិះគន់​ថា ការ​បែងចែក​ដី​ដើម្បី​ធានា​នូវ​ជីវភាព​ធូរធារ​របស់​ប្រជាពលរដ្ឋ​ជា​រឿង​ត្រឹមត្រូវ ប៉ុន្តែ​បើ​មេដឹកនាំ​ខ្មែរ​ដែល​ដឹកនាំ​ប្រទេស​ជាតិ​មួយ​ទាំងមូល​ដោយ​គ្មាន​ផែនការ​ច្បាស់លាស់​បែប​នេះ តើ​អនាគត​ប្រទេស​ជាតិ​នឹង​ទៅ​ជា​បែប​ណា ស្រប​ពេល​ដែល​ប្រជាពលរដ្ឋ​ក៏​នឹង​រងគ្រោះ​ពី​ការ​ដឹកនាំ​បែប​នេះ​ដោយ​ចៀស​មិន​ផុត​នោះ។

កាលពី​ថ្ងៃទី​២៨ ខែ​វិច្ឆិកា ឆ្នាំ​២០២១ បុរស​ខ្លាំង​នៅ​ប្រទេស​កម្ពុជា លោក ហ៊ុន សែន បាន​ដាក់​បទបញ្ជា​ឲ្យ​អភិបាល​ខេត្ត​ជាប់​បឹង​ទន្លេសាប ចាត់​វិធានការ​ទប់ស្កាត់ និង​បង្ក្រាប​រាល់​សកម្មភាព​កាប់​រាន​ព្រៃ​លិច​ទឹក​យក​ជា​កម្មសិទ្ធិ និង​ព្រមាន​វាយ​ខ្នោះ​ភ្លាមៗ​ចំពោះ​ជន​ណា​ដែល​រឹង​ទទឹង​មិន​ព្រម​ប្រគល់​ដី​ព្រៃ​លិច​ទឹក​ទាំងនោះ​មក​វិញ។ លោក ហ៊ុន សែន តម្រូវ​ឱ្យ​ប្រជាពលរដ្ឋ នាយទុន និង​មន្ត្រី​រាជការ​ដែល​បាន​កាន់កាប់​ដី​ក្នុង​តំបន់​នេះ ត្រូវតែ​ចេញ​មក​សារភាព​ជាដាច់ខាត​ទើប​រួច​ពី​ទោស​ទណ្ឌ។

អំឡុង​យុទ្ធនាការ​រយៈពេល ៦​ខែ​ដោយ​រាប់​ចាប់តាំងពី​ថ្ងៃទី​២៨ ខែ​វិច្ឆិកា ឆ្នាំ​២០២១ រហូត​ដល់​ថ្ងៃទី​២៨ ខែ​ឧសភា ឆ្នាំ​២០២២ នេះ មន្ត្រី​រាជការ​មួយ​ចំនួន​ត្រូវ​រង​នូវ​ការ​ដាក់​ពិន័យ​យ៉ាង​ធ្ងន់ធ្ងរ បន្ទាប់ពី​ពួកគេ​បាន​ចូល​ខ្លួន​សារភាព ខណៈ​ប្រជាពលរដ្ឋ​ដែល​ធ្លាប់​ប្រើប្រាស់​អាស្រ័យ​ផល​លើ​ដី​នេះ ក៏​ត្រូវ​ខកខាន​ក្នុង​ការ​ប្រកប​របរ​កសិកម្ម​របស់​ពួកគេ​ផង​ដែរ។

សេចក្តី​រាយការណ៍​របស់​ធនាគារ​ពិភពលោក (World Bank) ធ្លាប់​បាន​បង្ហាញ​កាលពី​ពេល​កន្លងទៅ​ថា ប្រទេស​កម្ពុជា​មាន​ផ្ទៃដី​កសិកម្ម​សរុប ៥​លាន ៥​សែន​ហិកតារ​ក្នុង​ឆ្នាំ​២០១៨ ក្នុង​ទំហំ​នោះ រាជរដ្ឋាភិបាល​កម្ពុជា​ក៏​បាន​ផ្តល់​ដី​សម្បទាន​ឱ្យ​ឈ្មួញ​រាប់​សិប​ម៉ឺន​ហិកតារ​ផង​ដែរ។ សេចក្តី​រាយការណ៍​ដដែល​នេះ​បញ្ជាក់​ថា ក្រុម​ឈ្មួញ​ដែល​មាន​ចំនួន​តិចតួច កំពុង​គ្រប់គ្រង​ដី​កសិកម្ម​ខ្មែរ​ទំហំ​ប្រមាណ ៥០%។ ចំណែក​ឯ​កសិករ​ខ្មែរ​មាន​ចំនួន​ច្រើន​លើសលប់ អាច​គ្រប់គ្រង​ដី​កសិកម្ម​បាន​ត្រឹមតែ ៥០% ស្មើ​នឹង​ឈ្មួញ​ទាំងនោះ​ប៉ុណ្ណោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស