ក្រសួងការពារជាតិរុស្ស៊ី បានប្រកាសនៅថ្ងៃពុធ ទី១ មិថុនា ថា កងកម្លាំងនុយក្លេអ៊ែររុស្ស៊ី កំពុងធ្វើសមយុទ្ធប្រតិបត្តិការនៅក្នុងខេត្ត Ivanovo ដែលស្ថិតនៅភាគឦសាននៃទីក្រុងមូស្គូ។ នេះបើយោងតាមការចុះផ្សាយដោយទីភ្នាក់ងារព័ត៌មាន Interfax នៅថ្ងៃពុធ ទី១ ខែមិថុនា នេះ។
ទីភ្នាក់ងារព័ត៌មាន Interfax បានស្រង់សម្ដីរបស់ប្រភពពីក្រសួងការពារជាតិរុស្ស៊ី បានឲ្យដឹងទៀតថា កងទ័ពរុស្ស៊ីប្រហែល ១០០០នាក់បានចូលរួមក្នុងសមយុទ្ធ ដោយប្រើរថយន្តយោធាជាង ១០០គ្រឿង រួមទាំងប្រព័ន្ធមីស៊ីលផ្លោងអន្តរទ្វីបផងដែរ។
ការធ្វើសមយុទ្ធនៃកងកម្លាំងនុយក្លេអ៊ែររុស្ស៊ី កើតមានឡើងខណៈកងទ័ពរុស្ស៊ីកំពុងបង្កើនការវាយលុកលើតំបន់ដុនបាស នៃភាគខាងកើតប្រទេសអ៊ុយក្រែនយ៉ាងសន្ធាប់ ហើយបើតាមដំណឹងមកថា រុស្ស៊ីបានវាយកាន់កាប់ទីក្រុងថ្មីមួយទៀត គឺទីក្រុង Sievierodonetsk បន្ទាប់ពីទីក្រុង Lyman បានធ្លាក់ក្រោមកងទ័ពរុស្ស៊ីកាលពីថ្ងៃទី២៩ ឧសភា។ ទីក្រុងពីរនេះសុទ្ធតែនៅក្នុងតំបន់ដុនបាស នៅភាគខាងកើតប្រទេស។
បើតាមប្រភពចារកម្មរបស់យោធាលោកខាងលិច ទីក្រុងមូស្គូបានដកកងទ័ពរបស់ខ្លួនមួយផ្នែកចេញពីតំបន់ភាគខាងកើតឱ្យមកជួយវាយយកទីក្រុង Sievierodonetsk។ រីឯអភិបាលខេត្តលុយហាន់ លោក Serhiy Gaidai ដែលជាភាគីអ៊ុយក្រែន បាននិយាយថា ហេដ្ឋារចនាសម្ព័ន្ធសំខាន់ៗស្ទើរតែទាំងស្រុងនៅក្នុងទីក្រុង Sievierodonetsk នេះត្រូវបានបំផ្លាញយ៉ាងធ្ងន់ធ្ងរ។
លោកបានបញ្ជាក់ថា ទីក្រុងនេះមិនស្ថិតក្រោមការឡោមព័ទ្ធនោះទេ ប៉ុន្តែស្ថានការណ៍ពេលនេះ គឺមិនអាចទាយទុកមុនបានឡើយ ស្របពេលដែលកងទ័ពអ៊ុយក្រែនបានដកតាមក្បួនយុទ្ធសាស្ត្ររបស់ខ្លួន ដើម្បីរកមធ្យោបាយវាយបកវិញ។
តែជាមួយគ្នានេះ ទីភ្នាក់ងារសារព័ត៌មាន Reuters បានឱ្យដឹងថា ការធ្វើសមយុទ្ធនៃកងកម្លាំងទ័ពនុយក្លេអ៊ែរ ធ្វើឡើងបន្ទាប់ពីរុស្ស៊ីប្រតិកម្មនឹងសហរដ្ឋអាមេរិកដែលសម្រេចបញ្ជូនប្រព័ន្ធមីស៊ីលរយៈចម្ងាយឆ្ងាយទៅឱ្យអ៊ុយក្រែន។ ប្រព័ន្ធមីស៊ីលផ្លោងរយៈចម្ងាយឆ្ងាយប្រភេទ HIMARS វាអាចហោះបាន ៣០០គីឡូម៉ែត្រ។ បើគេអូសវាទៅដល់តំបន់ដុនបាស គឺវាអាចបាញ់ដល់ទឹកដីរុស្ស៊ី។ រដ្ឋការលោក បៃដិន ដែលសម្រេចបញ្ជូនប្រព័ន្ធមីស៊ីលនេះ គឺបន្ទាប់ពីអ៊ុយក្រែនសន្យាថានឹងមិនបាញ់ទៅលើទឹកដីរុស្ស៊ីនោះទេ គឺយកមកដើម្បីវាយបកលើទ័ពរុស្ស៊ី ដែលកំពុងវាយសន្ធប់នៅភាគខាងកើតប្រទេស គឺតំបន់ដុនបាស។
បើតាមការបញ្ជាក់របស់លោក បៃដិន ការយល់ព្រមបញ្ជូនប្រព័ន្ធមីស៊ីលដ៏ទំនើបនេះ គឺស្ថិតនៅក្រោមកញ្ចប់ជំនួយយោធាមានទំហំទឹកប្រាក់ ៧០០លានដុល្លាររបស់រដ្ឋាភិបាល ដើម្បីជួយទីក្រុងគៀវ បង្ខំឱ្យរុស្ស៊ីត្រឡប់មករកតុចរចាវិញ។ ទោះជាយ៉ាងនេះក្តី ក្រុងមូស្គូ សម្ដែងការខកចិត្តចំពោះក្រុងវ៉ាស៊ីនតោន ដែលសម្រេចបញ្ជូនប្រព័ន្ធមីស៊ីល guided cruise missile បាញ់បង្ហោះទាបៗដាក់ចំណុចដៅទៅឲ្យអ៊ុយក្រែន។
អនុរដ្ឋមន្ត្រីការបរទេសរុស្ស៊ី បាននិយាយថា ការសម្រេចរបស់សហរដ្ឋអាមេរិក ក្នុងការផ្គត់ផ្គង់ប្រព័ន្ធមីស៊ីលរយៈចម្ងាយឆ្ងាយ និងគ្រាប់រំសេវដល់អ៊ុយក្រែន គឺជាការបង្ហាញពីភាពអវិជ្ជមានជាខ្លាំង ហើយជាការនាំទៅរកការប្រឈមមុខដាក់គ្នាកាន់តែខ្លាំងឡើង។
អនុរដ្ឋមន្ត្រីការបរទេសរុស្ស៊ី លោក Sergei Ryabkov បានប្រាប់ទីភ្នាក់ងារសារព័ត៌មានរុស្ស៊ី RIA តែត្រូវបានទីភ្នាក់ងារសារព័ត៌មាន Reuters ស្រង់មកចុះផ្សាយបន្តថា ទីក្រុងមូស្គូ ចាត់ទុកជំនួយយោធារបស់សហរដ្ឋអាមេរិកដល់អ៊ុយក្រែនលើកនេះ គឺពិតជាមានភាពអវិជ្ជមានយ៉ាងខ្លាំង។
យ៉ាងណា ការសម្រេចរបស់សហរដ្ឋអាមេរិកដែលបញ្ជូនប្រព័ន្ធមីស៊ីលអាចបាញ់ដល់ទឹកដីនៃប្រទេសរុស្ស៊ី បន្ទាប់ពីលោកប្រធានាធិបតីអ៊ុយក្រែន ប្រកាសថា កងទ័ពរុស្ស៊ីបង្កើនការវាយប្រហារមកលើតំបន់ដុនបាសដោយអាវុធធ្ងន់ធ្ងរមានទាំងមីស៊ីល និងការវាយប្រហារដោយបាញ់រះពីយន្តហោះ។ លោក វូឡូឌីមៀ ហ្សេឡេនស្គី បានស្នើសុំឱ្យអាមេរិក និងក្រុមបស្ចិមប្រទេស សូមផ្ដល់អាវុធធុនធ្ងន់ជាបន្ទាន់ ដូចជាមីស៊ីលបាញ់យន្តហោះ និងមីស៊ីលបាញ់នាវា ជាដើម។
ក្រសួងការពារជាតិរុស្ស៊ី បានអះអាងកាលពីថ្ងៃទី៣១ ឧសភា ថា កងទ័ពរុស្ស៊ីបានបាញ់ធ្លាក់យន្តហោះចម្បាំង Su-25 មួយគ្រឿងរបស់អ៊ុយក្រែននៅក្នុងតំបន់ Mykolaiv នៃប្រទេសអ៊ុយក្រែន និងបានទម្លាក់គ្រាប់បែកលើស្ថានីយរ៉ាដាមួយកន្លែង ព្រមទាំងឃ្លាំងស្តុកគ្រាប់ចំនួនពីរកន្លែងនៅភាគខាងកើតប្រទេសអ៊ុយក្រែន។
ទោះជារុស្ស៊ីបានវាយសន្ធប់លើកងទ័ពអ៊ុយក្រែនក្ដី តែផ្នែកស៊ើបការណ៍សម្ងាត់យោធាចក្រភពអង់គ្លេស បានអះអាងថា កងទ័ពរុស្ស៊ីបានរុលទៅមុខយឺតៗចូលទៅក្នុងតំបន់ Luhansk ក្នុងតំបន់ដុនបាស។
ស្របពេលដែលរុស្ស៊ីកំពុងធ្វើសមយុទ្ធកងទ័ពនុយក្លេអ៊ែរ ប្រទេសសម្ពន្ធមិត្តមួយរបស់ខ្លួន គឺប្រទេសបេឡារុស បានប្រកាសធ្វើសមយុទ្ធយោធាពង្រឹងសមត្ថភាពកងទ័ពនៃប្រទេសនេះនៅក្បែរព្រំដែនជាប់នឹងប្រទេសអ៊ុយក្រែន ចាប់ពីថ្ងៃទី២២ ខែមិថុនា រហូតដល់ថ្ងៃទី១ ខែកក្កដា។
មេបញ្ជាការយោធាតំបន់ព្រំដែននៃប្រទេសបេឡារុស លោក Andrey Krivonosov បាននិយាយថា សមយុទ្ធនេះសំដៅបណ្ដុះបណ្ដាលកងទ័ពផង និងបង្វឹកស្មារតីនៃការប្រយុទ្ធក្នុងស្ថានការណ៍សឹកណាមួយអាចកើតឡើងផង។
បេឡារុស បានអះអាងថា កងទ័ពរបស់ខ្លួននឹងមិនចូលរួមក្នុងសង្គ្រាមនៅអ៊ុយក្រែនសព្វថ្ងៃនេះទេ តែអ៊ុយក្រែនព្រមានថា បើដឹងថាទ័ពបេឡារុសជួយកងទ័ពរុស្ស៊ី នោះអ៊ុយក្រែនមានសមត្ថភាពវាយទប់ទល់ ហើយអាចវាយរុលចូលទឹកដីបេឡារុសទៀតផង។ មេដឹកនាំបេឡារុស គឺលោក Alexander Lukashenko គឺជាមិត្តដ៏ស្និទ្ធស្នាលនឹងប្រធានាធិបតីរុស្ស៊ី លោក វ៉្លាឌីមៀរ ពូទីន។ លោកត្រូវបានពួកបស្ចិមប្រទេសសង្ស័យថាបានជួយសម្រួល និងបើកដៃឱ្យកងទ័ពរុស្ស៊ីឆ្លងកាត់ព្រំដែនរបស់ខ្លួន ដើម្បីបើកការវាយប្រហារលើអ៊ុយក្រែន ក្នុងប្រតិបត្តិការសឹករបស់លោក ពូទីន ដែលចាប់ផ្ដើមកាលពីថ្ងៃទី២៤ ខែកុម្ភៈ៕