26.2 C
Phnom Penh

គ.ជ.ប ថា​ខ្លួន​តែង​ប្រកាន់​ខ្ជាប់​នូវ​គោលការណ៍​ស្មើ​ភាព​ដល់​គ្រប់​គណបក្ស​នយោបាយ

ដោយ ឌឹ ខេមបូឌា ដេលី

បទវិភាគ

គណៈកម្មាធិការ​ជាតិ​រៀបចំ​ការ​បោះឆ្នោត ដែល​ហៅ​កាត់​ថា គ.ជ.ប ច្រានចោល​នូវ​ការ​ចោទប្រកាន់​គ្មាន​មូលដ្ឋាន​របស់​លោក សុន ឆ័យ តំណាង​គណបក្ស​ភ្លើង​ទៀន ដោយ​អះអាង​ថា ខ្លួន​តែងតែ​ប្រកាន់​ខ្ជាប់​នូវ​គោលការណ៍​ស្មើ​ភាព និង​ឥត​លម្អៀង​ជាមួយ​គ្រប់​គណបក្ស​នយោបាយ​ទាំងអស់ ដើម្បី​ធានា​បាន​នូវ​ការ​រៀបចំ​កិច្ចការ​បោះឆ្នោត​មួយ​ប្រកប​ដោយ​សេរី ត្រឹមត្រូវ និង​យុត្តិធម៌។

គណៈកម្មាធិការ​ជាតិ​រៀបចំ​ការ​បោះឆ្នោត បាន​ចេញ​សេចក្តី​បំភ្លឺ​កាលពី​ថ្ងៃទី​១ ខែ​មិថុនា ឆ្នាំ​២០២២ នេះ​ថា ក្រុម​ប្រតិកម្ម​ព័ត៌មាន​នៃ​គណៈកម្មាធិការ​ជាតិ​រៀបចំ​ការ​បោះឆ្នោត បាន​ច្រានចោល​នូវ​ការ​ចោទប្រកាន់​គ្មាន​មូលដ្ឋាន​របស់​លោក សុន ឆ័យ តំណាង​គណបក្ស​ភ្លើង​ទៀន ដែល​បាន​អះអាង​កាលពី​ថ្ងៃទី​៣១ ខែ​ឧសភា ឆ្នាំ​២០២២ ថា គណៈកម្មាធិការ​ជាតិ​រៀបចំ​ការ​បោះឆ្នោត​បាន​សហការ​គ្នា​ជាមួយ​បក្ស​កាន់​អំណាច​ក្នុង​ដំណើរការ​នៃ​ការ​បោះឆ្នោត​នេះ។

គ.ជ.ប អះអាង​ថា ការ​លើកឡើង​បែប​នេះ គឺ​មិន​ឆ្លុះបញ្ចាំង​ពី​ការពិត​ជា​ដាច់ខាត ហើយ​ផ្ទុយ​ពី​ជំហរ​របស់​ខ្លួន​ទាំងស្រុង ដែល​គណៈកម្មាធិការ​ជាតិ​រៀបចំ​ការ​បោះឆ្នោត តែងតែ​រក្សា និង​ប្រកាន់​ខ្ជាប់​នូវ​គោលការណ៍​ស្មើ​ភាព និង​ឥត​លម្អៀង​ជាមួយ​គណបក្ស​នយោបាយ​ទាំងអស់ ទោះបីជា​គណបក្ស​នោះ​តូច​ក្តី ឬ​ធំ​ក្តី គឺ​គ្មាន​ការ​រើសអើង​ណា​មួយ​ឡើយ។

គណៈកម្មាធិការ​នេះ​បញ្ជាក់​ថា ដើម្បី​ធានា​នូវ​ភាព​មិន​លម្អៀង​ក្នុង​ដំណើរការ​នៃ​អាណត្តិ​របស់​ខ្លួន គណៈកម្មាធិការ​ជាតិ​រៀបចំ​ការ​បោះឆ្នោត​បាន​រៀបចំ​ឱ្យ​មាន​យន្តការ​ដោះស្រាយ​បណ្តឹង ៣​ថ្នាក់​ពី​ប្រជាពលរដ្ឋ និង​គណបក្ស​នយោបាយ គឺ​នៅ​ថ្នាក់​គណៈកម្មាធិការ​ឃុំ-សង្កាត់​រៀបចំ​ការ​បោះឆ្នោត គណៈកម្មការ​រាជធានី-ខេត្ត​រៀបចំ​ការ​បោះឆ្នោត និង​នៅ​ថ្នាក់​គណៈកម្មាធិការ​ជាតិ​រៀបចំ​ការ​បោះឆ្នោត​ដោយ​ផ្ទាល់​ផង​ដែរ។

ការ​អះអាង​បែប​នេះ ធ្វើឡើង​ដើម្បី​ឆ្លើយតប​ទៅ​នឹង​ការ​ចោទប្រកាន់​ថា គណៈកម្មាធិការ​ជាតិ​រៀបចំ​ការ​បោះឆ្នោត​បាន​ត្រូវរ៉ូវ​គ្នា​ជាមួយ​គណបក្ស​កាន់​អំណាច​ក្នុង​ដំណើរការ​នៃ​ការ​បោះឆ្នោត​ឃុំ-សង្កាត់​អាណត្តិ​ទី​៥ ឆ្នាំ​២០២២ នេះ។

សកម្មជន​គណបក្ស​សង្គ្រោះ​ជាតិ លោក ហ៊ុន កុសល បាន​ប្រាប់​សារព័ត៌មាន The Cambodia Daily នៅ​ថ្ងៃទី​២ មិថុនា នេះ​ថា បច្ចុប្បន្ន​នេះ​ប្រជាពលរដ្ឋ​ខ្មែរ​រូប​ណា​ក៏​មើល​ឃើញ​ថា គណៈកម្មាធិការ​ជាតិ​រៀបចំ​ការ​បោះឆ្នោត និង​គណបក្ស​កាន់​អំណាច គឺ​មាន​ភាព​ស៊ីចង្វាក់​គ្នា​ដែរ ចំណែក​ខ្លួន​លោក​ផ្ទាល់​ក៏​មិន​ឃើញ​ថា គណៈកម្មការ​នេះ​មាន​ភាព​ឯករាជ្យ និង​ធ្វើ​ការ​បម្រើ​ប្រជាពលរដ្ឋ​ដោយ​យុត្តិធម៌​នោះ​ដែរ។

លោក ហ៊ុន កុសល លើកឡើង​ថា ជា​រឿង​ដ៏​អាម៉ាស់​របស់​លោក សុន ឆ័យ និង​គណបក្ស​ភ្លើង​ទៀន ដែល​ដឹង​ច្បាស់​ហើយ​ថា គ.ជ.ប មិន​ឯករាជ្យ គ្មាន​ភាព​យុត្តិធម៌ លំហ​លទ្ធិប្រជាធិបតេយ្យ​ត្រូវ​គេ​បិទ និង​មិន​ទាន់​ស្ដារ​តាម​ការ​ទាមទារ​ពី​សហគមន៍​អន្តរជាតិ ប៉ុន្តែ​នៅតែ​ប្រឹង​ធ្វើ​សកម្មភាព​បម្រើ​ប្រយោជន៍​នយោបាយ​ដល់​បក្ស​កាន់​អំណាច ដោយ​ក្បត់​ឆន្ទៈ​ប្រជាពលរដ្ឋ និង​បំបែក​កម្លាំង​រួបរួម​របស់​គណបក្ស​សង្គ្រោះ​ជាតិ​តាម​ផែនការ​របស់​បក្ស​កាន់​អំណាច​ទាំង​គ្មាន​ភាព​អៀនខ្មាស។

សកម្មជន​បក្ស​ប្រឆាំង​រូប​នេះ​បញ្ជាក់​ថា ការ​ចូលរួម​បោះឆ្នោត​ដែល​សូម្បីតែ​សហគមន៍​អន្តរជាតិ​គេ​មិន​គាំទ្រ ដូច្នេះ​គណបក្ស​ភ្លើង​ទៀន​ដែល​ចូលរួម​ការ​បោះឆ្នោត​នៅ​ពេលនេះ កំពុង​តែ​ចូល​ដៃ​ជាមួយ​បក្ស​កាន់​អំណាច​ដើម្បី​សម្លាប់​លទ្ធិប្រជាធិបតេយ្យ​កម្ពុជា​យ៉ាង​ពិតប្រាកដ។

ទោះជា​យ៉ាង​ណា​ក៏ដោយ កាលពី​ថ្ងៃទី​២៤ ខែ​ឧសភា ឆ្នាំ​២០២២ អ្នក​នាំពាក្យ​គណបក្ស​កាន់​អំណាច លោក សុខ ឥសាន បាន​អះអាង​ថា គណៈកម្មាធិការ​ជាតិ​រៀបចំ​ការ​បោះឆ្នោត ពិតជា​ត្រូវ​បាន​ទទួលស្គាល់​តាម​ផ្លូវ​ច្បាប់​យ៉ាង​ពេញលេញ បន្ទាប់ពី​គណបក្ស​នយោបាយ​ទាំង​១៧ ព្រម​ទទួល​យក​ការ​ប្រកួតប្រជែង​រក​សន្លឹកឆ្នោត​សម្រាប់​អាណត្តិ​ទី​៥ ឆ្នាំ​២០២២ នេះ។

គណៈកម្មាធិការ​ជាតិ​រៀបចំ​ការ​បោះឆ្នោត​បច្ចុប្បន្ន​នេះ ត្រូវ​គេ​មើល​ឃើញ​ថា មិន​ត្រូវ​បាន​ទទួល​ស្គាល់ និង​បង្ក​ទំនុកចិត្ត​ដល់​ប្រជាពលរដ្ឋ​ខ្មែរ និង​សហគមន៍​អន្តរជាតិ​នោះ​ទេ ព្រោះ​ថា​សមាសភាព​ទាំង ៩​រូប​របស់​ស្ថាប័ន​នេះ សុទ្ធសឹងតែ​មកពី​គណបក្ស​កាន់​អំណាច​ទាំងអស់ ក្នុង​នោះ​រួម​មាន​លោក ប្រាជ្ញ ចន្ទ ជា​ប្រធាន លោក នុត សុខុម ជា​អនុប្រធាន និង​លោក ហង្ស ពុទ្ធា ជា​សមាជិក ជាដើម។

រីឯ​សហភាព​អឺរ៉ុប បាន​អះអាង​កាលពី​ថ្ងៃទី​២០ ខែ​ឧសភា ឆ្នាំ​២០២២ ថា ខ្លួន​មិន​បាន​ស្នើសុំ​ឱ្យ​មាន​បេសកកម្ម​សង្កេតការណ៍​បោះឆ្នោត​សម្រាប់​ដំណើរការ​បោះឆ្នោត​នា​ពេល​ខាងមុខ​នេះ​ទេ ព្រោះ​ថា​សហគមន៍​អឺរ៉ុប​មាន​ការ​យកចិត្ត​ទុកដាក់​យ៉ាង​ខ្លាំង​ចំពោះ​តែ​ការ​បោះឆ្នោត​ដោយ​សេរី និង​យុត្តិធម៌ និង​សិទ្ធិ​នៅ​ក្នុង​ការ​ចូលរួម​ដែល​ជា​មូលដ្ឋានគ្រឹះ​នៃ​លទ្ធិប្រជាធិបតេយ្យ​នៅ​ប្រទេស​កម្ពុជា​តែប៉ុណ្ណោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស