 បានអះអាងថា រយៈពេល ៥ថ្ងៃនៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ បានប្រព្រឹត្តទៅដោយរលូន និងគ្មានអំពើហិង្សា។){kind=link}
គណៈកម្មាធិការជាតិរៀបចំការបោះឆ្នោត (គ.ជ.ប) បានអះអាងថា រយៈពេល ៥ថ្ងៃនៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ បានប្រព្រឹត្តទៅដោយរលូន និងគ្មានអំពើហិង្សា។
យោងតាមការចេញផ្សាយរបស់ គ.ជ.ប នៅថ្ងៃទី២២ ឧសភា នេះ បានអះអាងថា រយៈពេល ៥ថ្ងៃនៃយុទ្ធនាការឃោសនាបោះឆ្នោតនេះ បានប្រព្រឹត្តទៅដោយរលូន មានសន្តិសុខ សុវត្ថិភាព សណ្ដាប់ធ្នាប់ល្អ គ្មានអំពើហិង្សា និងពុំមានបាតុភាពណាមួយកើតឡើងគួរឱ្យកត់សម្គាល់ឡើយ។
ប្រភពដដែលបានអះអាងថា ក្នុងដំណើរការឃោសនា គណបក្សប្រជាជនកម្ពុជាបានចេញយុទ្ធនាការទ្រង់ទ្រាយធំនៅថ្ងៃដំបូង ក្នុងក្រុងភ្នំពេញ និងតាមបណ្ដាខេត្តមួយចំនួន និងបន្តឃោសនាជាបន្តបន្ទាប់នៅគ្រប់រាជធានី-ខេត្ត។
ជាមួយគ្នានេះដែរ គណបក្សឆន្ទៈខ្មែរ គណបក្សកម្លាំងជាតិ និងគណបក្សហ៊្វុនស៊ិនប៉ិច ឃោសនាទ្រង់ទ្រាយតូច ដោយមានការជួបជុំជាមួយសមាជិក និងអ្នកគាំទ្របក្ស រួមជាមួយការចាក់មេក្រូផ្សព្វផ្សាយនៅទីស្នាក់ការតាមបណ្ដារាជធានី-ខេត្ត។
គ.ជ.ប បានអះអាងថា ការឃោសនាបោះឆ្នោតបានចាប់ផ្ដើមកាលពីថ្ងៃទី១៧ ឧសភា ដោយមានបក្សនយោបាយ ៤ បានរៀបចំឃោសនាបោះឆ្នោត ដូចជា គណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ និងគណបក្សហ៊្វុនស៊ិនប៉ិច។ ចំណែកឯគណបក្សខ្មែររួបរួមជាតិ ពុំទាន់មានសកម្មភាពឃោសនានៅឡើយទេ។
នៅក្នុងសារលិខិតចុះថ្ងៃទី១៧ ខែឧសភា ឆ្នាំ២០២៤ ក្នុងឱកាសបើកយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សា ក្រុង ស្រុក ខណ្ឌ អាណត្តិទី៤ លោក ហ៊ុន សែន បានអំពាវនាវឲ្យក្រុមប្រឹក្សាឃុំ-សង្កាត់ទាំងអស់ បោះឆ្នោតឲ្យគណបក្សប្រជាជនកម្ពុជា។
ក្រុមអ្នកឃ្លាំមើលសង្គមបានលើកឡើងថា មុនការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ ជិតមកដល់ គេសង្កេតឃើញថា រយៈពេលចុងក្រោយនេះ គណបក្សកម្លាំងជាតិរងនូវការធ្វើទុក្ខបុកម្នេញពីរដ្ឋាភិបាលបក្សកាន់អំណាចជាបន្តបន្ទាប់ ក្នុងនោះ សមាជិក និងមន្ត្រីគណបក្សកម្លាំងជាតិ ត្រូវបានសមត្ថកិច្ចចាប់ឃុំខ្លួនជាហូរហែ។
ជាក់ស្តែង កាលពីថ្ងៃទី៩ ខែឧសភា ឆ្នាំ២០២៤ ប្រធានគណបក្សកម្លាំងជាតិលោក ស៊ុន ចន្ធី ត្រូវសមត្ថកិច្ចកម្ពុជាចាប់ខ្លួននៅព្រលានយន្តហោះអន្តរជាតិភ្នំពេញ ក្រោមបទចោទ ញុះញង់បង្កឱ្យមានភាពវឹកវរដល់សន្តិសុខសង្គម តាមដីកាសាលាដំបូងរាជធានីភ្នំពេញ បន្ទាប់ពីលោកបានលើកឡើងអំពីការចែកបណ្ណសមធម៌ និងការអភិវឌ្ឍពីរាជរដ្ឋាភិបាលថាមានភាពលម្អៀងទៅខាងបក្សកាន់អំណាច។
ចំណែកមន្ត្រីគណបក្សកម្លាំងជាតិ ខេត្តកំពង់ចាម គឺលោក មី សេងហ៊ ហៅ គា វិសាល និងលោក អ៊ុំ វីរៈរដ្ឋ មន្ត្រីជាន់ខ្ពស់គណបក្សកម្លាំងជាតិប្រចាំខេត្តកំពង់ស្ពឺ ក៏ត្រូវបានសមត្ថកិច្ចចាប់ខ្លួនដែរកាលខែមីនា ឆ្នាំ២០២៤ កន្លងទៅនេះ ហើយពួកគេក៏កំពុងត្រូវបានឃុំខ្លួនក្នុងពន្ធនាគារដូចគ្នាដែរសព្វថ្ងៃនេះ។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily កន្លងមកថា ការចាប់ខ្លួនមន្ត្រីគណបក្សកម្លាំងជាតិ គឺចំពេលដែលត្រៀមចូលរួមការប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សារាជធានី-ខេត្តនៅពេលនេះ ដូច្នេះគឺចេតនាគំរាមកំហែងខាងនយោបាយយ៉ាងពិតប្រាកដ។
ការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៤ នឹងប្រព្រឹត្តទៅនៅថ្ងៃអាទិត្យ ទី២៦ ខែឧសភា ឆ្នាំ២០២៤ ដោយមានគណបក្សនយោបាយចូលរួមចំនួន ៥គណបក្ស គឺគណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ គណបក្សហ៊្វុនស៊ិនប៉ិច និងគណបក្សខ្មែររួបរួមជាតិ។ ចំណែកអង្គបោះឆ្នោតមានសរុបចំនួន ១១៦២២នាក់ និងការិយាល័យបោះឆ្នោតចំនួន ២០៩ នៅទូទាំង ២៥រាជធានី-ខេត្ត៕