ក្រោយពីសង្គ្រាមបានដើររំលងផុតរយៈពេល ១០០ថ្ងៃ គេសង្កេតឃើញមានការវិវឌ្ឍថ្មីៗជាច្រើនទៀតក្នុងស្ថានការណ៍សឹកនៅលើទឹកដីអ៊ុយក្រែន។
រដ្ឋាភិបាលអ៊ុយក្រែន កាលពីថ្ងៃអាទិត្យ ទី៥ មិថុនា បានរាយការណ៍អំពីសំឡេងផ្ទុះយ៉ាងកក្រើកជាច្រើននៅក្នុងរដ្ឋធានីគៀវ គឺតែមួយថ្ងៃប៉ុណ្ណោះបន្ទាប់ពីក្រុមមន្ត្រីអ៊ុយក្រែន អះអាងថា កងទ័ពរបស់ខ្លួនដណ្ដើមបានមកវិញនូវទឹកដីមួយចំនួនក្នុងសមរភូមិទីក្រុង Sievierodonetsk ពីរុស្ស៊ី។
ទីភ្នាក់ងារសារព័ត៌មាន Reuters បានឱ្យដឹងនៅថ្ងៃទី៦ មិថុនា នេះថា នៅក្នុងសារមួយបង្ហោះលើ Twitter របស់អភិបាលក្រុងគៀវ លោក Vitali Klitschko បានបញ្ជាក់ថា សូរសំឡេងផ្ទុះជាច្រើនត្រូវបានគេរាយការណ៍លាន់ឮនៅក្នុងតំបន់ Darnytskyi និង Dniprovskyi នៃទីក្រុងគៀវ។
បើតាមលោក Vitali Klitschko មនុស្សម្នាក់ត្រូវបានបញ្ជូនទៅកាន់មន្ទីរពេទ្យ ខណៈក្រុមមន្ត្រីអ៊ុយក្រែនខ្លះទៀតអះអាងថា សូរសំឡេងផ្ទុះនេះជាការវាយប្រហារដោយផ្លោងគ្រាប់របស់រុស្ស៊ីមានគោលដៅលើបណ្ដាញប្រព័ន្ធផ្លូវដែករបស់ទីក្រុងនេះ។ លោកបញ្ជាក់ថា រុស្ស៊ីមានផែនការជាថ្មីទៀតដើម្បីវាយកម្ទេចផ្លូវដែកដែលមាននៅជាយក្រុងនេះ ព្រោះជាការទប់ស្កាត់មិនឱ្យអ៊ុយក្រែនប្រើខ្សែរថភ្លើងនេះដើម្បីដឹកអាវុធទៅកាន់ភាគខាងកើតប្រទេស។
បើតាមការអះអាងពីអាជ្ញាធរអ៊ុយក្រែន គឺកងទ័ពរុស្ស៊ីបានចាប់ផ្តើមបាញ់មីស៊ីលឡើងវិញមកលើទីក្រុងគៀវ។ ចំណែកនៅតាមទីតាំងជាច្រើនផ្សេងទៀត សំឡេងស៊ីរ៉ែនប្រកាសអាសន្នពីការទម្លាក់គ្រាប់បែកពីលើអាកាស បានបន្លឺលាន់ឡើងយ៉ាងខ្លាំង។
រដ្ឋធានីគៀវ បានស្ថិតក្នុងភាពស្ងប់ស្ងាត់បានប៉ុន្មានសប្តាហ៍វិញហើយ ស្រាប់តែនៅម៉ោង ២រំលងអាធ្រាត្រឈានចូលថ្ងៃអាទិត្យ ទី៥ មិថុនា ស៊ីរ៉ែនបានបន្លឺកងរំពងពេញទីក្រុង។
យោងតាមលោក Vitali Klitschko អភិបាលទីក្រុងគៀវ ឲ្យដឹងថា យ៉ាងហោចណាស់មានសំឡេងផ្ទុះចេញពីសង្កាត់ចំនួនពីរនៅវេលាទៀបភ្លឺព្រឹកថ្ងៃអាទិត្យ បង្កឲ្យមានមនុស្សយ៉ាងហោចម្នាក់រងរបួស។
របបក្រុងមូស្គូ បាននិយាយថា ការវាយប្រហារតាមអាកាសរបស់រុស្ស៊ី បានបំផ្លាញរថក្រោះដែលផ្គត់ផ្គង់ដោយបរទេសនៅក្នុងរដ្ឋធានីគៀវ។
ឧត្តមសេនីយ៍ឯក Igor Konashenkov មេទ័ពម្នាក់របស់រុស្ស៊ី បាននិយាយនៅក្នុងសន្និសីទខ្លីមួយថា កងទ័ពរុស្ស៊ីបានធ្វើការវាយប្រហារតាមផ្លូវអាកាសនៅជាយក្រុងគៀវ ដោយបានបំផ្លាញរថក្រោះប្រភេទ T-72 ជាច្រើនគ្រឿង និងអាវុធផ្សេងទៀតដែលផ្គត់ផ្គង់ដោយបណ្តាប្រទេសនៅអឺរ៉ុបខាងកើត។ តែសម្រាប់ភាគីខាងកងទ័ពអ៊ុយក្រែនវិញអះអាងថា ការវាយដណ្តើមបានមកវិញនូវទឹកដីមួយចំនួននៃទីក្រុង Sievierodonetsk ក្នុងតំបន់ដុនបាស គឺជារឿងដ៏លំបាក ដោយទទួលស្គាល់ថានៅដែនដីភាគច្រើនទៀតនៅតែស្ថិតក្នុងដៃកងទ័ពរុស្ស៊ីនៅឡើយ។
អភិបាលតំបន់ Luhansk គឺលោក Serhiy Gaidai ជាភាគីអ៊ុយក្រែន បាននិយាយថា កងទ័ពអ៊ុយក្រែនដណ្តើមបានមកវិញ គឺជាង ២០% នៃទឹកដីដែលបានបាត់បង់នាពេលកន្លងមកនេះនៅក្នុងទីក្រុង Sievierodonetsk។ លោក Gaidai អះអាងថា ទីក្រុង Sievierodonetsk មិនអាចធ្លាក់ទៅក្នុងដៃរុស្ស៊ីវិញទេ បើទោះបីជារុស្ស៊ីបង្កើនការវាយបកមកវិញក៏ដោយ។
សង្គ្រាមដែលរុស្ស៊ីឈ្លានពានអ៊ុយក្រែន បានឈានចូលដល់ជាង ១០០ថ្ងៃហើយនៅពេលនេះ។ ក្នុងអំឡុងនៃសង្គ្រាមនេះ ប្រជាជនរាប់សែននាក់បានបាត់បង់ជីវិត រាប់លាននាក់បានបាត់បង់ទីជម្រក ហើយចំនួនជនភៀសខ្លួនកើនឡើងជិត ៨លាននាក់។
ស្របពេលនេះដែរ ប្រធានាធិបតីរុស្ស៊ី វ្ល៉ាឌីមៀរ ពូទីន (Vladimir Putin) បានចេញមុខព្រមានថា លោកនឹងបញ្ជាឲ្យបង្កើនការវាយប្រហារលើគោលដៅថ្មីៗជាច្រើន ដោយរួមទាំងរដ្ឋធានីគៀវ ប្រសិនបើសហរដ្ឋអាមេរិកចាប់ផ្ដើមបញ្ជូនមីស៊ីលវង់ប្រតិបត្តិការឆ្ងាយមកឱ្យអ៊ុយក្រែន។
ទីភ្នាក់ងារសារព័ត៌មាន TASS របស់រុស្ស៊ី បានស្រង់សម្ដីរបស់លោក ពូទីន ដែលបានផ្ដល់បទសម្ភាសន៍ជាមួយទូរទស្សន៍រដ្ឋ Rossiya-1 ថា ប្រសិនបើមីស៊ីលប្រភេទនេះត្រូវបានបញ្ជូនដល់ទឹកដីអ៊ុយក្រែនពិតមែន គឺរុស្ស៊ីនឹងបង្កើនការវាយប្រហារលើគោលដៅដែលចាំបាច់ ហើយគោលដៅនោះមិនធ្លាប់រងការវាយប្រហារពីមុនមក។ លោក ពូទីន ព្រមានថា ការបញ្ជូនអាវុធឱ្យអ៊ុយក្រែនពីសំណាក់បណ្ដាប្រទេសលោកខាងលិច គឺមានគោលដៅអូសបន្លាយសង្គ្រាម ហើយសម្រាប់រុស្ស៊ីនឹងបន្តសង្គ្រាមរហូតពួកបស្ចិមប្រទេសបញ្ឈប់ការផ្ដល់អាវុធមកឱ្យអ៊ុយក្រែន។
ការព្រមានរបស់លោក ពូទីន គឺជាការឆ្លើយតបយ៉ាងពិតប្រាកដទៅនឹងប្រធានាធិបតីអាមេរិក លោក ចូ បៃដិន (Joe Biden) ដែលបានយល់ព្រមប្រគល់មីស៊ីលចម្ងាយមធ្យម HIMARS ឱ្យអ៊ុយក្រែនកាលពីពេលថ្មីៗនេះក្រោយពីទីក្រុងគៀវ សន្យាថានឹងមិនប្រើមីស៊ីលនេះដើម្បីវាយប្រហារលើគោលដៅនៅក្នុងទឹកដីរុស្ស៊ីឡើយ។ ប៉ុន្តែក្រោយមកទៀត ក្រុងវ៉ាស៊ីនតោន ប្រកាសថានឹងបញ្ជូនមីស៊ីលមួយប្រភេទទៀតដែលបាញ់បានជាង ៣០០គីឡូម៉ែត្រឱ្យអ៊ុយក្រែន ហើយមីស៊ីលនេះងាយបំផុតនៃការបាញ់។
តែយ៉ាងណា ទីប្រឹក្សាប្រធានាធិបតីអ៊ុយក្រែន បាននិយាយថា ទីក្រុងគៀវមិនមានផែនការដើម្បីប្រើប្រាស់ប្រព័ន្ធបាញ់មីស៊ីលនេះក្នុងការវាយសន្ធប់លើទ័ពរុស្ស៊ីនោះទេ លើកលែងតែករណីចាំបាច់ប៉ុណ្ណោះ។
លោក Mykhailo Podolyak ជាទីប្រឹក្សារបស់លោក វ៉ូឡូឌីមៀ ហ្សេឡេនស្គី បានបញ្ជាក់តាម Twitter របស់លោកថា អ៊ុយក្រែនកំពុងធ្វើសង្គ្រាមសម្រាប់តែការពារខ្លួនឯងប៉ុណ្ណោះ ដោយមិនមានផែនការប្រើប្រាស់ប្រព័ន្ធមីស៊ីលនេះដើម្បីវាយប្រហារចូលដីរុស្ស៊ីនោះទេ។ ចំពោះប្រទេសអាល្លឺម៉ង់វិញ បានប្រកាសថា ក្រុងប៊ែរឡាំង ក៏បានសម្រេចបញ្ជូនមីស៊ីលវង់ប្រតិបត្តិការមធ្យម និងប្រព័ន្ធកាំភ្លើងធំទៅឱ្យអ៊ុយក្រែនដែរ។
ដោយឡែកមេដឹកនាំអង្គការ NATO លោក Jens Stoltenberg ព្រមានថា បណ្ដាប្រទេសលោកខាងលិចចាំបាច់ត្រៀមខ្លួនសម្រាប់សង្គ្រាមរ៉ាំរ៉ៃនៅអ៊ុយក្រែនចាប់ពីពេលនេះតទៅ ព្រោះអ៊ុយក្រែនចាប់ផ្ដើមមានអាវុធប្រភេទធុនធ្ងន់កាន់តែច្រើនហើយនៅពេលនេះ៕