30 C
Phnom Penh

បទវិភាគ៖ តើ​ខ្មែរ​ត្រូវ​ពឹង​ខ្លួនឯង ឬ​ពឹង​អ្នក​ក្រៅពី​ខ្លួនឯង?

ដោយ ឌឹ ខេមបូឌា ដេលី

បទវិភាគ

រឿង​ខ្មែរ​ដែល​ខាតបង់​ប្រយោជន៍​ជាតិ​ធំ គឺ​មកពី​ការ​គិត​មិន​ត្រូវ ដើរ​មិន​ត្រូវ ធ្វើ​មិន​ត្រូវ ហៅថា​អយោនិសោមនសិការ ប៉ុន្តែ​មាន​អ្នក​ចាំ​បន្ទរ​រក​ប្រយោជន៍​ផ្ទាល់ខ្លួន ជួយ​ឧបកិច្ច​ថា​ជា​បញ្ញា​ភ្លឺស្វាង ត្រឹមត្រូវ​ទៅវិញ។

លោក ហាស់ សាន សូម​ជូន​បទវិភាគ​ព័ត៌មាន​មួយ ថា​តើ​ខ្មែរ​ត្រូវ​ពឹង​ខ្លួនឯង ឬ​ពឹង​អ្នក​ក្រៅពី​ខ្លួនឯង។

ហេតុការណ៍​នយោបាយ​ទាក់ទង​នឹង​ជាតិ​ខ្មែរ​មាន​តូច​មាន​ធំ​កើតឡើង​ក្នុង​ខែ​ឧសភា នេះ​ជាច្រើន​អន្លើ ច្រើន​កន្លែង ហើយ​សុទ្ធតែ​ចេញពី​ពាក្យ​សម្ដី អំពើ និង​ទង្វើ​របស់​មនុស្ស ទាំង​អ្នក​ដឹកនាំ ទាំង​អ្នក​តាម​ដង្ហែ ទាំង​អ្នក​ក្នុង​ស្រុក ទាំង​អ្នក​ក្រៅ​ស្រុក។ ម្នាក់ៗ​សុទ្ធតែ​និយាយ​រឿង​នយោបាយ​ទាក់ទង​នឹង​សង្គម​ជាតិ​ខ្មែរ​បច្ចុប្បន្ន​សម័យ។ មាន​អ្នក​ខ្លះ​ព្យាយាម​និយាយ​ធ្វើ​វិភាគ​បែប​ប្រកាន់​បក្ស ហើយ​យក​ត្រូវ​តែ​ម្នាក់​ឯង ឥត​ព្យាយាម​ពិចារណា​គំនិត​អ្នក​ដទៃ និង​ឥត​មាន​ធាតុ​ពិត មាន​តួលេខ មាន​ឯកសារ​យក​មក​បញ្ជាក់​ច្បាស់លាស់​ឡើយ។

ក្រៅពី​ហេតុការណ៍​គប់​ស្បែកជើង​តម្រង់​លោក​នាយករដ្ឋមន្ត្រី ហ៊ុន សែន ក្នុង​ឱកាស​ជួប​សំណេះសំណាល​ជាមួយ​សមាជិក អ្នកគាំទ្រ​លោក និង​បក្ស​ប្រជាជន​កម្ពុជា កាលពី​ទស្សនកិច្ច​ក្នុង​ជំនួប​កំពូល​អាស៊ាន-សហរដ្ឋ​អាមេរិក ថ្ងៃទី​១២-១៣ ខែ​ឧសភា លោក ហ៊ុន សែន ប្រាប់​មនុស្ស​ដែល​គេ​ជួល​ឲ្យ​ទៅ​ទទួល និង​ចូល​ទៅ​ស្តាប់​លោក​និយាយ​ក្នុង​សណ្ឋាគារ​ថា៖ «បង្គោល​ព្រំដែន​រវាង​ប្រទេស​កម្ពុជា និង​ប្រទេស​យៀកណាម បោះ​ជិត​អស់​រួចរាល់​ជា​ស្ថាពរ​ហើយ»។ បន្ទាប់​មក លោក​ថ្លែង​ថា «បើ​លោក​ឲ្យ​ដី​ទៅ​គេ ចាំបាច់​អ្វី​ទៅ​បោះ​បង្គោល​ព្រំដែន​បញ្ជាក់​កំណត់​ខណ្ឌ​សីមា​ជាមួយ​គ្នា

លោក ហ៊ុន សែន មិន​បាន​ប្រាប់​មនុស្ស​អង្គុយ​ស្តាប់​ទាំងអស់​នោះ​អំពី​មូលហេតុ​អ្វី​យក​ផែនទី​ខុស​ខ្នាត​ទៅ​ប្រើ​វាស់វែង​ព្រំដែន​ខ្មែរ មិន​បាន​និយាយ​អំពី​ទឹកដី​ត្រង់​ណា​ខាត​បាត់​ទៅ​គេ ត្រង់​ណា​ចំណេញ​បាន​មក​ខ្មែរ និង​ហេតុ​អ្វី​មិន​ឲ្យ​ក្រុម​ការងារ​ឯករាជ្យ​ខ្មែរ​ចូល​ទៅ​មើល​ត្រង់​ចំណុច​បោះ​បង្គោល​នោះ។ លោក​ទំនង​ជា​គិត​ថា បើ​លោក​និយាយ​ក៏​អ្នក​អង្គុយ​ស្តាប់​នោះ​មិន​យល់​ដែរ ឬ​មួយ​លោក​ដឹង​ខ្លួន​ថា លោក​ក៏​មិន​បាន​ដឹង​ច្បាស់​ខ្លួនឯង​ថា​តើ​ដី​បាត់ ឬ​ដី​នៅ​គង់វង្ស​ដូច​ដើម​នោះ​ដែរ។ រឿង​នេះ​វា​ទាក់ទង​នឹង​កិច្ចព្រមព្រៀង ឬ​សន្ធិសញ្ញា​ទ្វេភាគី​នា​ទសវត្ស​១៩៨០ ជាពិសេស​ឆ្នាំ​១៩៨៥ ក្រោយ​កងទ័ព​កុម្មុយនីស្ត​យៀកណាម​លុកលុយ ត្រួតត្រា កាន់កាប់​ទឹកដី​ខ្មែរ ហើយ​គូស​កំណត់​ផែនទី​ថ្មី​បន្ទាប់ពី​ជនជាតិ​វៀតណាម​បង្កើត​ភូមិលំនៅ​ក្នុង​ទឹកដី​ខ្មែរ​តាម​តំបន់​ព្រំដែន។

នាយករដ្ឋមន្ត្រី​វៀតណាម លោក ង្វ្រៀន តាន់យ៉ុង (Nguyen Tan Dung) [ឆ្វេង] និង​នាយករដ្ឋមន្ត្រី​កម្ពុជា លោក ហ៊ុន សែន ក្នុង​ឱកាស​សម្ពោធ​បង្គោល​ព្រំដែន​គោក​លេខ​៣១៤ នៅ​រវាង​ខេត្ត​កំពត ប្រទេស​កម្ពុជា និង​ខេត្ត​គៀងយ៉ាង ប្រទេស​វៀតណាម កាល​ពី​ថ្ងៃ​២៤ ខែ​មិថុនា ឆ្នាំ​២០១២។

ក្រៅ​តែ​ពី​ជួប​មេដឹកនាំ​អាមេរិកាំង​ក្នុង​កិច្ចប្រជុំ​កំពូល​ក្នុង​ទស្សនកិច្ច​នោះ ក្នុង​នាម​ជា​ប្រធាន​អាស៊ាន​ផ្លាស់​វេន ចៅហ្វាយ​ចាស់​ដែល​ជា​សមភាគី​របស់​លោក គឺ​នាយករដ្ឋមន្ត្រី​ប្រទេស​វៀតណាម ផាម មិញជីញ បាន​ឆ្លៀត​ជួប​លោក ហ៊ុន សែន រំឭក​អំពី​ករណីយកិច្ច​ជួយ​សម្រួល​ជីវភាព​ជនជាតិ​វៀតណាម​រស់នៅ​ក្នុង​ប្រទេស​កម្ពុជា​ឲ្យ​ស្រប​ច្បាប់​ឆាប់​រហ័ស​ផង។ នេះ​វា​ទាក់ទង​នឹង​សារាចរ​ណែនាំ​ពី​លោក ហ៊ុន សែន នា​ថ្ងៃទី​២៦ ខែ​កុម្ភៈ ឆ្នាំ​១៩៨៦ គ្រា​កងទ័ព និង​ជំនាញការ​វៀតណាម​កំពុង​បញ្ជា​កម្មាភិបាល​ខ្មែរ​ពេល​នោះ។

នាយករដ្ឋមន្ត្រី​កម្ពុជា លោក ហ៊ុន សែន ជួប​ពិភាក្សា​ការងារ​ជាមួយ​នាយករដ្ឋមន្ត្រី​វៀតណាម លោក ផាម មិញជីញ នា​ទីក្រុង​វ៉ាស៊ីនតោន សហរដ្ឋ​អាមេរិក កាលពី​ល្ងាច​ថ្ងៃ​ទី​១១ ខែ​ឧសភា ឆ្នាំ​២០២២ (ម៉ោង​នៅ​ទីក្រុង​វ៉ាស៊ីនតោន សហរដ្ឋ​អាមេរិក)។

កិច្ចប្រជុំ​កំពូល​អាស៊ាន-សហរដ្ឋ​អាមេរិក គេ​ផ្ដោត​លើ​បញ្ហា​ប្រឈម​នានា ដូចជា​ខាង​សន្តិសុខ​ក្នុង​តំបន់ សេដ្ឋកិច្ច ពាណិជ្ជកម្ម សេរីភាព សកលភាវូបនីយកម្ម ជាដើម។ បន្ទាប់​មក គេ​បង្កើត​ជា​ក្រុម​ប្រទេស​ធ្វើ​កិច្ច​សហប្រតិបត្តិការ​ជាមួយ​គ្នា​លើ​វិស័យ​ជាច្រើន ភាគច្រើន​ជា​មិត្ត​សហរដ្ឋ​អាមេរិក ហៅ​ថា​ក្របខ័ណ្ឌ​សេដ្ឋកិច្ច​ឥណ្ឌូ-ប៉ាស៊ីហ្វិក (Indo-Pacific Economic Framework, IPEF)។ តាម​សេចក្តី​ប្រកាស​ពី​សេតវិមាន​នៅ​ថ្ងៃទី​២៣ ឧសភា ក្រុម​ថ្មី​នេះ​មាន​ប្រទេស​ចំនួន ១៣ ចូលរួម មាន​សមាជិក​អាស៊ាន ៧ ផង គឺ៖

  1. សហរដ្ឋ​អាមេរិក
  2. អូស្ត្រាលី
  3. ប្រ៊ុយណេ
  4. ដារុសសាឡាម
  5. ឥណ្ឌា
  6. ឥណ្ឌូនេស៊ី
  7. ជប៉ុន
  8. កូរ៉េ​ខាងត្បូង
  9. ម៉ាឡេស៊ី
  10. នូវែលហ្សេឡង់
  11. ហ្វីលីពីន
  12. សិង្ហបុរី
  13. ថៃឡង់ដ៍
  14. និង​វៀតណាម។

គេ​មិន​បាន​បញ្ចូល​ប្រទេស​កម្ពុជា​ក្នុង​សម្ពន្ធភាព​សេដ្ឋកិច្ច​ថ្មី​នេះ​ទេ។

ប្រទេស​ទាំងអស់​នេះ​ប្ដេជ្ញា​ចិត្ត​ដូចៗ​គ្នា​ពន្លឿន​ភាព​រស់​រវើក​ឡើងវិញ ភាព​ទ្រាំទ្រ​ជា​និរន្តរ៍ ភាព​ផ្គុំ​បញ្ចូល​គ្នា កំណើន​សេដ្ឋកិច្ច យុត្តិធម៌​ស្មើ​គ្នា ភាព​ប្រកួតប្រជែង​គ្នា​ក្នុង​សេដ្ឋកិច្ច​នៃ​ប្រទេស​រៀងៗ​ខ្លួន។

ក្នុង​ទិសដៅ​នេះ គេ​ក៏​ប្ដេជ្ញា​ចិត្ត​ធ្វើ​ច្បាប់​អនុវត្ត​ច្បាប់​ពន្ធដារ ច្បាប់​បំបាត់​ការ​ប្រើ​លុយ​កខ្វក់​ធ្វើ​ចរាចរ​ក្នុង​សេដ្ឋកិច្ច ច្បាប់​បំបាត់​ការ​ស៊ីសំណូក​សូកប៉ាន់ បង្កើត​ប្រព័ន្ធ​មាន​តម្លាភាព និង​ការ​ទទួល​ខុសត្រូវ។

គេ​អាច​និយាយ​ថា ប្រទេស​កម្ពុជា លាវ និង​ភូមា មិន​ស្ថិត​ក្នុង​ភូមិសាស្ត្រ​ឥណ្ឌូ-ប៉ាស៊ីហ្វិក ប៉ុន្តែ​បើ​គេ​មើល​មួយ​ជ្រុង​ទៀត គឺ​មកពី​ប្រទេស​ទាំង​បី​នេះ​មាន​ឥទ្ធិពល​ចិន​ក្នុង​នយោបាយ និង​យោធា​ខ្លាំង​ពេក ពោល​គឺ​មិន​អាច​ប្រកាន់​ជំហរ​អព្យាក្រឹត​បាន។ លើស​ពី​នេះ​ទៀត ប្រទេស​កម្ពុជា និង​លាវ ក៏​ស្ថិត​ក្រោម​ឥទ្ធិពល​វៀតណាម​ដែរ ដែល​ក្រុង​ហាណូយ អាច​ដើរ​តួ​ជំនួស​លើ​ឆាក​អន្តរជាតិ។

ថ្លែង​បែប​ខកចិត្ត លោក ហ៊ុន សែន រំឭក​ប្រទេស​ជា​សមាជិក​អាស៊ាន​ថា មិន​គួរ​នាំគ្នា​គិត​តែ​រឿង​ឥណ្ឌូ-ប៉ាស៊ីហ្វិក ហើយ​មិន​គិត​ប្រយោជន៍​អាស៊ាន​នោះ​ទេ។

ទាំង​ពេល​កំពុង​ស្នាក់​នៅ​សហរដ្ឋ​អាមេរិក ទាំង​ពេល​ធ្វើ​ទស្សនកិច្ច​នៅ​ប្រទេស​ស្វីស នាយករដ្ឋមន្ត្រី​ខ្មែរ​ប្រាប់​ពលរដ្ឋ​ដែល​គេ​ចេញ​លុយ និង​ស្ម័គ្រចិត្ត​ទៅ​ទទួល​នោះ​ថា លោក​ចង់​ធ្វើ​មិត្ត​ជាមួយ​មហាអំណាច​សហរដ្ឋ​អាមេរិក ហេតុ​អ្វី​ពិបាក​ម្ល៉េះ? កាល​លោក ហ៊ុន សែន នៅ​ស្រុក​ខ្មែរ​មិនទាន់​ជាន់​ដី​សហរដ្ឋ​អាមេរិក លោក​ធ្លាប់​រិះគន់​តិះដៀល​ចោទ​សហរដ្ឋ​អាមេរិក​ជាច្រើន​បែប​ច្រើន​យ៉ាង។ រួច​ហើយ​ទៅ​សុំ​គេ​ធ្វើ​មិត្ត? លោក​និយាយ​ទំនង​ជា​សំដៅ​លើ​រឿង​ចិន​គ្រប់គ្រង​កំពង់ផែ​រាម។

លោក​នាយករដ្ឋមន្ត្រី ហ៊ុន សែន និង​កូនប្រុស​ច្បង​របស់​លោក គឺ​លោក ហ៊ុន ម៉ាណែត ជួប​ប្រធានាធិបតី​ចិន លោក ស៊ី ជីនពីង (Xi Jinping) នា​ពេល​កន្លង​មក។ (រូបថត​ឯកសារ)

ពលរដ្ឋ​ខ្មែរ​ទៅ​ស្តាប់​លោក ហ៊ុន សែន ឮ​លោក ហ៊ុន សែន មាន​ប្រសាសន៍​យ៉ាង​ណា​ក៏​មក​និយាយ​តាម​លោក​យ៉ាង​នោះ។ លោក​បាន​បញ្ចៀស​រឿង​អន់​ខ្សោយ​ក្នុង​កិច្ច​ដឹកនាំ​ជាតិ បាត់​ប្រយោជន៍​ជាតិ​ធំៗ​ក្នុង​រយៈកាល​ជិត​កន្លះ​សតវត្ស​របស់​លោក ក៏​គ្មាន​មនុស្ស​ឆ្ងល់។ នេះ​មកពី​ទម្លាប់​មួយ​ដែល​ជាតិ​សាសន៍​យើង​បណ្តោយ​តាម​វាសនា ទុកចិត្ត​មេដឹកនាំ​ម្នាក់​ឥត​ពិចារណា​ឲ្យ​ដឹក​ទៅ​ខាង​ណា ក៏​ដឹក​ទៅ ទោះជា​ដឹក​ទៅ​ដឹក​មក​ដូច​វិល​ជុំវិញ​ក្រោលគោ​ក៏ដោយ។

មិន​ត្រឹមតែ​ប៉ុណ្ណឹង​ទេ ក្រុម​មនុស្ស​ជា​ខ្មែរ​សុទ្ធ​ក្តី ជា​ខ្មែរ​កូនកាត់​ក្តី​ដែល​ទទួល​បាន​ប្រយោជន៍ លាភ​សក្ការៈ​ផ្សេងៗ​ពី​របប​បច្ចុប្បន្ន​នេះ ថែមទាំង​ជួយ​ទ្រទ្រង់ ការពារ ហែហម លើក​តម្កើង កោត​សរសើរ​អ្នក​ដឹកនាំ​បម្រើ​ប្រយោជន៍​បរទេស ថា​ពូកែ​គិត​បាន​ត្រឹមត្រូវ​ទៀត​ផង។ បើ​ក្រុម​មនុស្ស​ជា​ខ្មែរ​ជាតិ​និយម ជា​ខ្មែរ​ស្នេហា​ជាតិ ឥត​គិត​អត្តទត្ថ​ប្រយោជន៍ និយាយ​រឿង​គ្រោះថ្នាក់​ពិត​ដល់​ជាតិ​សាសន៍​ខ្មែរ មាន​ទាំង​ឯកសារ​ពិត មាន​តួលេខ​បង្ហាញ​ទៀត គេ​ចោទ​ថា​ជា​ក្រុម​បំពុល​សង្គម ជា​ក្រុម​មាន​គំនិត​ជ្រុល​និយម ប៉ុនប៉ង​បំផ្លាញ​សន្តិភាព។ នេះ​ជា​គំនិត​ខ្លីៗ មើល​ឃើញ​សម្បក​ឈើ​ស្រាយ ថា​ឈើ​ខ្លឹម។

អ្នកស្រី Simone Lucie Ernestine Marie Bertrand de Beauvoir ឬ​ហៅ​ខ្លី​ថា Simone de Beauvoir ទស្សនវិទូ​បារាំង សកម្មជន​គាំទ្រ​ស្ត្រី​ភេទ (ពី​ឆ្នាំ​១៩០៨ ដល់​ឆ្នាំ​១៩៨៦) រំឭក​ថា៖ «អ្នក​ជិះ​ជាន់​គេ​នឹង​មិន​ខ្លាំង​ដល់​ម្ល៉ឹង​ទេ ប្រសិនបើ​អ្នក​ហ្នឹង​គ្មាន​អ្នក​ជួយ​ប្រព្រឹត្ត​ឧក្រិដ្ឋកម្ម​ពី​ចំណោម​មនុស្ស​ត្រូវ​គេ​ជិះ​ជាន់​ដូច​គ្នា​ទេ​នោះ»

បើ​ពុទ្ធសាសនិកជន​ខ្មែរ​ត្រងត្រាប់​យល់​ច្បាស់ ប្រតិបត្តិ​តាម​ព្រះពុទ្ធ​ឱវាទ​គ្រប់​គ្នា ជន​អន្យតិរ្ថិយ​ក៏​មិន​អាច​ជិះ​ជាន់​សង្កត់​សង្កិន​មនុស្ស​ក្នុង​សង្គម​ដែរ។

ដទៃ​ពី​នយោបាយ​បង្វិល​ពលរដ្ឋ​ខ្មែរ​ឲ្យ​វិលវល់​ដូច​គ្រាប់​អាប៉ោង​ស្ទើរតែ​វង្វេង​កំណើត​ពី​អ្នក​ដឹកនាំ​អន្តរជាតិ​និយម​ក្នុង​សង្គម​ខ្មែរ ពលរដ្ឋ​មួយ​ចំនួន​ធំ​ទៀត​ក៏​ជួយ​ចាក់​បណ្តោយ​កំដរ​ដំណើរ​នយោបាយ​បំភ័ន្ត​ភ្នែក​នៃ​អ្នក​ដឹកនាំ​ប្រទេស​សព្វថ្ងៃ​នេះ​ដែរ។ ព្រះសង្ឃ​គ្រប់​គណៈ គ្រប់​សមណស័ក្តិ​ក្នុង​ប្រទេស មិន​ហ៊ាន​ទេសនា​ដាស់តឿន​អ្នក​ដឹកនាំ​ឲ្យ​មាន​សីលានុស្សតិ ឬ​ការ​នឹក​រំពឹង​ដល់​សីល អំពើ​វៀរចាក​បាបកម្ម​នោះ​ទេ។ ព្រះមហាក្សត្រ​រំឭក​ប្រជាពលរដ្ឋ​ឲ្យ​ទៅ​បោះឆ្នោត ទោះជា​ព្រះអង្គ​ឈ្វេងយល់​ទត​ឃើញ​ថា ការ​បោះឆ្នោត​រាល់​សម័យ​កាល​មិន​សេរី មិន​យុត្តិធម៌ មិន​ស្មើភាព​គ្នា​ក៏ដោយ។ គេ​អាច​និយាយ​បាន​ថា ព្រះអង្គ​ក៏​មាន​ព្រះរាជ​បំណង​រស់រាន​ជាមួយ​នឹង​អ្នក​ដឹកនាំ​នយោបាយ​បង្ហិនបង្ហោច​ជាតិ​សាសន៍​ខ្មែរ​ដែរ។

ចំណែកឯ​ពលរដ្ឋ​ខ្មែរ​មួយ​ក្រុម​ធំ​ទៀត ទាំង​ក្នុង​ស្រុក ទាំង​ក្រៅ​ស្រុក ទាំង​អ្នក​រកស៊ី​ធ្វើ​នយោបាយ ទាំង​អ្នក​ដើរ​តាម ទាំង​អ្នកគាំទ្រ​បក្ស​នយោបាយ ក៏​មិន​ហ៊ាន​និយាយ​រឿង​ជាតិ​អ្វី​ធំ​ដុំ​ក្រៅ​តែ​អំពី​គិត​ធ្វើ​ឃោសនា​យ៉ាង​ណា​ឲ្យ​ពលរដ្ឋ​បោះឆ្នោត​ឲ្យ​បក្ស​ខ្លួន​ប៉ុណ្ណោះ។ បក្ស​ណា​ក៏​ចង់​ឲ្យ​ពលរដ្ឋ​បោះឆ្នោត​ឲ្យ​ខ្លួន ព្រោះ​ថា​ខ្លួន​ប្រសើរ​ជាង​បក្ស​ដទៃ។ ប៉ុន្តែ​បក្ស​នយោបាយ​នីមួយៗ​មិន​ហ៊ាន​លើក​រឿង​បាត់បង់​អធិបតេយ្យ​ជាតិ ឯករាជភាព អព្យាក្រឹតភាព បូរណភាព​ទឹកដី​ខ្មែរ​មក​និយាយ​ទៀត​ទេ មិន​ហ៊ាន​សិក្សា​ស្រាវជ្រាវ​ប្រមូល​ឯកសារ​បកស្រាយ​អំពី​រឿង​អាថ៌កំបាំង​ដែល​បំពាន​រដ្ឋធម្មនុញ្ញ​ប្រទេស​ជាតិ​នោះ​ទេ។ គេ​ទុក​ឲ្យ​ក្រុម​អង្គការ​សង្គម​ស៊ីវិល​និយាយ​ជំនួស ឬ​ចូល​គុក​ជំនួស។ សមាជិក​កងកម្លាំង​ប្រដាប់​អាវុធ​គ្រប់​អង្គភាព ក៏​បិទ​ភ្នែក​ជិត​ដើរ​តាម​មេ​ដើម្បី​ស័កិ្តយស​របស់​ខ្លួន។

ពាក្យ​សាមញ្ញ​ខ្មែរ​ហៅ​ស្ថានភាព​នេះ​ថា “ទៅ​ទាំង​ប៉ី​ទាំង​ស្គរ!” ដំរី​ក៏​ខ្វាក់ ទម័ក​ក៏​ឆ្កួត!

ក្រុម​ខ្មែរ​អ្នក​ចង់​ឃើញ​ចង់​បាន​ការ​ផ្លាស់ប្ដូរ​ពី​ស្ថានភាព​បច្ចុប្បន្ន​ទៅ​រក​សេចក្តី​ប្រសើរ​គាប់​សម្រាប់​សង្គម​ខ្មែរ គិត​តែ​ចង់​ឲ្យ​បរទេស​ជួយ​ស្ដារ​លទ្ធិប្រជាធិបតេយ្យ ឲ្យ​មាន​ការ​គោរព​សិទ្ធិមនុស្ស ឲ្យ​មាន​សេរីភាព យុត្តិធម៌​សង្គម បំបាត់​អំពើពុករលួយ រំលោភ​ជិះជាន់​គ្រប់​បែប​យ៉ាង។ សំណួរ​ថា​តើ​ចង់​ឲ្យ​បរទេស​ណា​មួយ​មក​ជួយ​ខ្មែរ? តើ​មាន​ចងចាំ​ព្រះពុទ្ធដីកា​ថា ខ្លួន​ទីពឹង​ខ្លួន​ឬ​ទេ?

ខណៈ​ពលរដ្ឋ​ខ្មែរ​ទាំងអស់​កំពុង​រស់នៅ​ក្នុង​ស្ថានភាព​គ្មាន​អ្វី​រឹងមាំ​ប្រាកដប្រជា ចាំ​តែ​វេលា​បែកធ្លាយ​រលាយ​រូប​ដូច​ពពុះ​ធាតុ​រាវ អង់គ្លេស​ហៅ​ថា bubble លោក​នាយករដ្ឋមន្ត្រី ហ៊ុន សែន ឆក់​ឱកាស​ថតរូប​ជាមួយ​ប្រធានាធិបតី​សហរដ្ឋ​អាមេរិក ចូ បៃដិន (Joe Biden) ដើម្បី​យក​ទៅ​បង្ហាញ​បង្អួត​ពលរដ្ឋ​ខ្មែរ​ឲ្យ​កាន់តែ​មាន​ជំនឿ​លើ​លោក​ថា សហរដ្ឋ​អាមេរិក​នៅតែ​ចងមិត្ត​នឹង​លោក មិន​បោះបង់​លោក ឬ​ក៏​ថា​លោក​ជា​ជម្រើស​ដែល​ក្រុង​វ៉ាស៊ីនតុន​ចង់​បាន។ រូបភាព​នោះ​ធ្វើ​ឲ្យ​អ្នក​ខ្លះ​យល់​ថា មហាអំណាច​លោក​សេរី បិតា​ប្រជាធិបតេយ្យ​សុខចិត្ត​ឱបក្រសោប​ជន​ផ្ដាច់ការ ជាជាង​ក្រុម​ជំទាស់​ដែល​ទន់ជ្រាយ មិន​ដឹង​ចង់​ធ្វើ​អ្វី ចង់​បាន​អ្វី​ពិតប្រាកដ ដូច​ចែវ​ទូក​រេ​ពេញ​ទន្លេ មិន​ដឹង​តម្រង់​ទិស​ទៅ​ទីណា​នោះ។

នាយករដ្ឋមន្ត្រី​កម្ពុជា លោក ហ៊ុន សែន និង​ប្រធានាធិបតី​សហរដ្ឋ​អាមេរិក លោក ចូ បៃដិន (Joe Biden) ស្វាគមន៍​គ្នា​នៅ​សហរដ្ឋ​អាមេរិក ថ្ងៃ​ទី​១២ ខែ​ឧសភា ឆ្នាំ​២០២២។

យើង​បាន​ផ្សាយ​ច្រើន​ដង​ហើយ​អំពី​គោល​នយោបាយ​ការបរទេស​ប្រជាជាតិ​នីមួយៗ៖ គ្មាន​ទេ​មិត្ត​អចិន្ត្រៃយ៍ គ្មាន​ទេ​បច្ចាមិត្ត​អចិន្ត្រៃយ៍ មាន​តែ​ប្រយោជន៍​ទេ​ឋិតថេរ​អចិន្ត្រៃយ៍។ ឲ្យ​អ្នក​ណា​ទៅ​សើរើ​រឿង​កិច្ចព្រមព្រៀង​សន្តិភាព​ក្រុង​ប៉ារីស ២៣ តុលា? បើ​គេ​កំពុង​មាន​ប្រយោជន៍​នឹង​គ្នា គេ​មិន​នាំ​អំពល់​ដល់​ខ្លួន​គេ​ទេ។

បើ​លោក ហ៊ុន សែន ចេះ​ធ្វើ​ខ្លួន​ឲ្យ​ប្រយោជន៍​ដល់​លោក​សេរី​ផង គេ​ចាប់​ខាង​រូបលោក មិន​ចាប់​ខាង​ក្រុម​ជំទាស់​ឡើយ ទោះជា​ក្រុម​ជំទាស់​ខំប្រឹង​និយាយ​រឿង​ប្រជាធិបតេយ្យ សិទ្ធិមនុស្ស អត់​សេរីភាព អត់​យុត្តិធម៌ អំពើពុករលួយ​ពេញ​ស្រុក បាត់បង់​អធិបតេយ្យ​ជាតិ បូរណភាព​ដែនដី​ក៏ដោយ ព្រោះ​ថា​ទាំងអស់​ហ្នឹង​ជា​រឿង​យើង រឿង​ខ្មែរ មិន​មែន​រឿង​របស់​គេ​ទេ។ គេ​គ្រាន់តែ​ជួយ​រំឭក​តាមរយៈ​ការ​ប្រើ​ភាសា​នយោបាយ​ការទូត​ប៉ុណ្ណោះ។ លើស​ពី​នេះ ខ្មែរ​ជា​អ្នក​សម្រេច​វាសនា​ខ្លួន​ដោយ​ខ្លួនឯង។

យើង​សួរ​ខ្លួនឯង​ថា តើ​ចង់​រស់​បែប​ហ្នឹង ផ្សង​តាម​ព្រេង​តាម​សំណាង តាម​កម្មផល តាម​យថាកម្ម រង់ចាំ​ព្រះឥន្ទ ព្រះព្រហ្ម ជួយ​សង្គ្រោះ ស្រោចស្រង់ ឬ​ចង់​រស់​តាម​ផ្លូវ​អាណាចក្រ​ក្នុង​ឱវាទ​ព្រះពុទ្ធ​បរម​សាស្ដា។ ផែនដី​វិល​លឿន​ណាស់។ ខ្មែរ​គប្បី​គិត​ជាថ្មី​ឡើងវិញ​ឆាប់​បំផុត ក្រែង​រួច​ផុត​ពី​ត្រូវ​ទំនាយ​ក្លាយជា​កម្ពុជា​ក្រោម​ទី​ពីរ។

អត្ថបទ​វិភាគ​ព្រឹត្តិការណ៍​នយោបាយ​នេះ ជា​អត្ថបទ​របស់​ខ្ញុំ​ផ្ទាល់ មិន​ឆ្លុះបញ្ចាំង​អំពី​ទស្សនៈ​សារព័ត៌មាន The Cambodia Daily ទេ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស