សហមេធាវីការពារក្ដីឱ្យលោក កឹម សុខា អះអាងថា មេធាវីរដ្ឋាភិបាលបានចោទសួរលោក កឹម សុខា រឿងត្រូវរ៉ូវជាមួយលោក សម រង្ស៊ី ខណៈសំណុំរឿងដែលបទចោទប្រកាន់កូនក្ដីកន្លងមក គឺពាក់ព័ន្ធ «គប់គិតជាមួយបរទេស»។
សាលាដំបូងរាជធានីភ្នំពេញ នៅថ្ងៃពុធ ទី៨ មិថុនា បានបន្តបើកសវនាការសំណុំរឿងលោក កឹម សុខា លើកទី៤៣ ក្រោមបទចោទប្រកាន់ពីបទ «សន្ទិដ្ឋភាពត្រូវរ៉ូវជាមួយរដ្ឋបរទេស» ចង់ផ្តួលរំលំរដ្ឋាភិបាល។
បើតាមលោក ចាន់ ចេន សហមេធាវីការពារក្ដីឱ្យលោក កឹម សុខា បានប្រាប់សារព័ត៌មាន The Cambodia Daily ថា កន្លងមកចោទកូនក្ដីរបស់លោកត្រូវបានតុលាការចោទប្រកាន់ «គប់គិតជាមួយបរទេស» ប៉ុន្តែសវនាការនាថ្ងៃនេះ តំណាងអយ្យការ និងមេធាវីរដ្ឋាភិបាលមិនបានសួរសំណួរពាក់ព័ន្ធរឿងត្រូវរ៉ូវជាមួយបរទេសឡើយ។ លោកបន្តថា តំណាងអយ្យការ និងមេធាវីរដ្ឋាភិបាលមិនសួរសំណួររឿងត្រូវរ៉ូវជាមួយបរទេស ដោយសាររកមិនឃើញ ហើយសវនាការព្រឹកមិញនេះ តំណាងអយ្យការ មេធាវីរដ្ឋាភិបាល បានចោទសួរសំណួរទៅលោក កឹម សុខា រឿងត្រូវរ៉ូវជាមួយលោក សម រង្ស៊ី ទៅវិញ។
លោក ចាន់ ចេន បញ្ជាក់ថា ក្នុងបន្ទប់សវនាការ មេធាវីរដ្ឋាភិបាលបានលើកឡើងជាច្រើនដងថា លោក សម រង្ស៊ី មានអត្តចរិតហិង្សា អាក្រក់ ផ្តួលរលំ ហេតុអីលោក កឹម សុខា រួបរួមជាមួយ ធ្វើការជាមួយ? ឆ្លើយតបនឹងសំណួរមេធាវីរដ្ឋាភិបាល លោក កឹម សុខា បានលើកឡើងថា ការរួបរួមរបស់លោកជាមួយលោក សម រង្ស៊ី ដោយមានការស្នើសុំពីពលរដ្ឋដែលជាម្ចាស់ឆ្នោត ក៏ដូចជាអ្នកគាំទ្រទាំងពីរបក្ស ទើបមានការរួបរួមបង្កើតបានជា CNRP តែការរួបរួមនោះឈរលើគោលការណ៍ប្រជាធិបតេយ្យក្រោមច្បាប់រដ្ឋធម្មនុញ្ញ។
មួយវិញទៀត លោកថា អំឡុងពេលសវនាការនេះ ដោយគ្រាន់តែកូនក្ដីបានឯកភាពតាមសម្ដីលោក សម រង្ស៊ី ដោយនិយាយហើយចាប់ដៃកូនក្ដី ក៏ត្រូវមេធាវីរដ្ឋាភិបាលបានលើកឡើងដែរ។
ជាការឆ្លើយតបនឹងការលើកឡើងរបស់មេធាវីរដ្ឋាភិបាលនោះ កូនក្ដីរបស់គឺលោក កឹម សុខា ថាការដែលរូបលោកធ្វើការជាមួយគ្នា អង្គុយក្បែរគ្នា និងចាប់ដៃគូដោយលើកដៃឡើងទៅលើនោះទេ វាបង្ហាញពីសុជីវធម៌។ បន្ថែមពីនេះ នៅពេលដល់កន្លែងប្រជុំ លោក កឹម សុខា ឬគូភាគីបានលើកឡើងនូវចំណុចដែលមិនស្របគ្នាក្រោយពីតុលាការកំពូលបានរំលាយគណបក្សសង្គ្រោះជាតិ ហើយលោក សម រង្ស៊ី ក៏បានដើរចេញពីគោលការណ៍ និងស្មារតីរួបរួម ដោយចុងក្រោយបែរជានាំគ្នាទៅដំណើរការគណបក្សភ្លើងទៀនវិញ។
លោក កឹម សុខា ក៏បានចោទសួរទៅមេធាវីរដ្ឋាភិបាល និងតំណាងអយ្យការវិញថា បើគ្រាន់តែឃើញលោក សម រង្ស៊ី ចាប់ដៃ និងរួបរួមយកមកចោទប្រកាន់ដូច្នេះ តើហេតុអ្វីតុលាការមិនព្រមចោទប្រកាន់លោក សម រង្ស៊ី ដែលអង្គុយជាមួយលោក ហ៊ុន សែន ពិសាបាយជាមួយគ្នា ពិសានំបញ្ចុកជាមួយគ្នាផងទៅ? តើនេះជាការសន្ទិដ្ឋភាព ឬការត្រូវរ៉ូវគ្នារវាងលោក ហ៊ុន សែន និងលោក សម រង្ស៊ី ដែរឬទេ?
ជាមួយគ្នានោះ លោក កឹម សុខា ក៏បានសួរបន្ថែមថា អ្នកណាក៏ដឹងដែរ គណបក្សភ្លើងទៀនកើតចេញពីគណបក្ស សម រង្ស៊ី ជាទស្សនវិជ្ជានយោបាយរបស់លោក សម រង្ស៊ី ហើយមេធាវីរដ្ឋាភិបាល និងអយ្យការយល់ថាលោក សម រង្ស៊ី អាក្រក់ ហិង្សា ផ្តួលរលំ ចុះហេតុអ្វីរដ្ឋាភិបាល គ.ជ.ប ឱ្យបក្សភ្លើងទៀនចូលបោះឆ្នោត? តើវាជាការសន្ទិដ្ឋភាពគប់គិតត្រូវរ៉ូវគ្នាដែរឬទេ?
ក្រោយពីបើកសវនាការពេញមួយព្រឹកនាថ្ងៃនេះ តុលាការសម្រេចផ្អាកដោយនឹងបន្តសវនាការសំណុំរឿងនេះនៅថ្ងៃពុធ ទី១៥ ខែមិថុនា ខាងមុខ។ អំឡុងពេលតុលាការបើកសវនាការនោះ អ្នកគាំទ្រលោក កឹម សុខា ជាច្រើននាក់បាននាំគ្នាទៅប្រមូលផ្ដុំនៅមុខសាលាដំបូងរាជធានីភ្នំពេញ ដើម្បីឃ្លាំមើលដំណើរនៃសវនាការនេះ។
លោក កឹម សុខា ត្រូវបានរងការចោទប្រកាន់ពីបទ «សន្ទិដ្ឋភាពត្រូវរ៉ូវជាមួយរដ្ឋបរទេស» ចង់ផ្តួលរំលំរដ្ឋាភិបាល។ គិតមកដល់ពេលនេះ ប្រធានគណបក្សជំទាស់រូបនេះត្រូវបិទសិទ្ធិនយោបាយតាមផ្លូវតុលាការប្រមាណ ៤ឆ្នាំមកហើយ គិតចាប់ពីថ្ងៃចាប់ខ្លួនកាលពីខែកញ្ញា ឆ្នាំ២០១៧៕