សកម្មជនអត្ថាធិប្បាយខ្លឹមសារសន្ធិសញ្ញាសន្តិភាពទីក្រុងប៉ារីស លោក ស្រ៊ុន ស្រ៊ន ថាបើរដ្ឋាភិបាលកម្ពុជាអនុវត្តកិច្ចព្រមព្រៀងស្ដីពីដំណោះស្រាយនយោបាយរួមមួយនៃជម្លោះនៅកម្ពុជា ២៣ ខែតុលា ឆ្នាំ១៩៩១ ឲ្យបានត្រឹមត្រូវ នោះនឹងមិនធ្វើឲ្យកម្ពុជាធ្លាក់ទៅក្នុងបំណុលបរទេសវ័ណ្ឌក ថែមទាំងមិនឲ្យរដ្ឋបរទេសណាមួយហ៊ានត្រួតត្រាអធិបតេយ្យកម្ពុជាបានផងដែរ។
សកម្មជនសង្គមដែលតែងតែអត្ថាធិប្បាយខ្លឹមសារកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន បានអះអាងកាលពីថ្ងៃទី៨ ខែមិថុនា ថា នៅពេលដែលកម្ពុជាកាន់តែអនុវត្តិកិច្ចព្រមព្រៀងនេះបានល្អ នោះប្រទេសហត្ថលេខីទាំងអស់កាន់តែគាំទ្រពលរដ្ឋខ្មែរឲ្យមានសិទ្ធិ និងអំណាចពេញលេញថែមទៀត។
មាត្រាជាច្រើននៃសន្ធិសញ្ញានេះ និងសេចក្តីថ្លែងការណ៍ស្ដីពីការស្ដារ និងការកសាងប្រទេសកម្ពុជាឡើងវិញទាំង ១៣ចំណុច តម្រូវឲ្យរដ្ឋាភិបាលកម្ពុជាកើតពីការបោះឆ្នោតដោយសេរី ត្រឹមត្រូវ និងយុត្តិធម៌ ព្រមទាំងប្រទេសហត្ថលេខី និងអង្គការសហប្រជាជាតិមានកាតព្វកិច្ចក្នុងការធានានូវការគោរពសិទ្ធិរបស់ពលរដ្ឋខ្មែរគ្រប់រូប។
លោក ស្រ៊ុន ស្រ៊ន លើកឡើងថា បើកម្ពុជាអនុវត្តសន្ធិសញ្ញាសន្តិភាពនេះបានពេញលេញ កម្ពុជានឹងមានលទ្ធភាពសងបំណុលបរទេសទាំងអស់ ទាំងបំណុលស្របច្បាប់ និងបំណុលខុសច្បាប់ ព្រោះថាប្រទេសហត្ថលេខីទាំងអស់នឹងនាំគ្នាមកដាក់ស្ថានទូត បង្កើតក្រុមហ៊ុនឯកជន បង្កើតអង្គការសង្គមស៊ីវិល អង្គការតំបន់ អង្គការអន្តរជាតិ ដែលជាចំណែកមួយក្នុងការជំរុញឲ្យសេដ្ឋកិច្ចកម្ពុជាលូតទៅមុខ ព្រមទាំងអាចទទួលបានជំនួយពីអង្គការសហប្រជាជាតិកាន់តែច្រើនថែមទៀត។
សកម្មជនសង្គមរូបនេះអះអាងថា ក្រៅពីមានលទ្ធភាពសងបំណុលបរទេស កម្ពុជាក៏អាចបញ្ចប់នូវសន្ធិសញ្ញា និងកិច្ចព្រមព្រៀងខុសច្បាប់ដែលប៉ះពាល់ដល់អធិបតេយ្យ ឯករាជ្យ បូរណភាព និងភាពមិនអាចរំលោភបាននៃដែនដីអព្យាក្រឹត និងឯកភាពជាតិខ្មែររបស់កម្ពុជាផងដែរ ដូចដែលមានចែងក្នុងមាត្រា១ និងមាត្រា២ នៃកិច្ចព្រមព្រៀងនេះ ជាដើម។
លោក ស្រ៊ុន ស្រ៊ន បញ្ជាក់ថា កិច្ចព្រមព្រៀងក្រុងប៉ារីស ឆ្នាំ១៩៩១ ក៏មានវិសាលភាពក្នុងការបកអាក្រាតការឈ្លានពានរបស់រដ្ឋបរទេសដែលបានប្រើលេសរំលោភដែនអធិបតេយ្យកម្ពុជា ក្រោមរូបភាពនៃការជួយរំដោះពលរដ្ឋខ្មែរឱ្យឃើញកាន់តែច្បាស់ ហើយពួកគេក៏ត្រូវធ្វើការប៉ះប៉ូវជាសំណងដល់ពលរដ្ឋខ្មែរគ្រប់យ៉ាង ដែលរដ្ឋបរទេសទាំងនោះបានបំផ្លាញកម្ពុជាកន្លងមកផងដែរ។
កិច្ចព្រមព្រៀងសន្តិភាពទីក្រុងប៉ារីស (Paris Peace Accords) គឺជាកិច្ចព្រមព្រៀងមួយស្ដីពីដំណោះស្រាយនយោបាយដើម្បីបញ្ចប់ជម្លោះនៅកម្ពុជា ធ្វើឡើងនៅទីក្រុងប៉ារីស ប្រទេសបារាំង កាលពីថ្ងៃទី២៣ ខែតុលា ឆ្នាំ១៩៩១ ក្នុងគោលបំណងឈានទៅរកការបង្រួបបង្រួមជាតិ គោរពសិទ្ធិមនុស្ស ឯករាជភាព បូរណភាពទឹកដី អធិបតេយ្យភាពជាតិកម្ពុជា ដែលនៅតែមានសុពលភាព ហើយប្រទេសហត្ថលេខីមិនអាចបដិសេធ និងកាតព្វកិច្ចនៅក្នុងកិច្ចព្រមព្រៀងបានឡើយ។
ប៉ុន្តែលោក ហ៊ុន សែន និងមន្ត្រីនៃរដ្ឋាភិបាលកម្ពុជា តែងតែអះអាងថា នៅក្នុងកិច្ចព្រមព្រៀងសន្តិភាពទីក្រុងប៉ារីស មិនបានចែងថា កម្ពុជានឹងនៅតែស្ថិតក្រោមអាណាព្យាបាលរបស់អន្តរជាតិបន្តទៀតនោះទេ បន្ទាប់ពីដំណាក់កាលបណ្ដោះអាសន្ន ពោលគឺបន្ទាប់ពីបេសកកម្មអ៊ុនតាក់ (UNTAC) ត្រូវបានបញ្ចប់នៅថ្ងៃទី២៤ ខែកញ្ញា ឆ្នាំ១៩៩៣ កន្លងទៅ។
ទោះជាបែបនេះក្តី កាលពីថ្ងៃទី១១ ខែឧសភា ឆ្នាំ២០២២ កន្លងទៅ មុនកិច្ចប្រជុំកំពូលអាស៊ាន-អាមេរិកមួយថ្ងៃ សភាជាន់ខ្ពស់របស់សហរដ្ឋអាមេរិក បានអនុម័តសេចក្តីសម្រេចចិត្តមួយដែលហៅថា Resolution S. 427 ដោយបង្ហាញយ៉ាងច្បាស់ថា កិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ នៅតែធរមាន ឬមានសុពលភាពនៅឡើយសម្រាប់ប្រទេសហត្ថលេខីទាំងអស់ ជាពិសេសកម្ពុជាតែម្តង មិនមែនអស់សុពលភាពដូចមន្ត្រីរដ្ឋាភិបាលកម្ពុជាអះអាងកន្លងមកនោះទេ៕