29 C
Phnom Penh

មេធាវី​រដ្ឋាភិបាល​ច្រានចោល​ការ​អះអាង​របស់​លោក កឹម សុខា លើ​ភស្តុតាង​ឃ្លីប​វីដេអូ

ដោយ ឌឹ ខេមបូឌា ដេលី

បទវិភាគ

ក្រុម​មេធាវី​រដ្ឋាភិបាល​កម្ពុជា បដិសេធ​នូវ​ការ​អះអាង​របស់​ប្រធាន​គណបក្ស​សង្គ្រោះ​ជាតិ លោក កឹម សុខា ដែល​បាន​ចោទ​ថា ក្រុម​មេធាវី​តំណាង​ឱ្យ​ដើមបណ្ដឹង​រដ្ឋប្បវេណី​បាន​យក​ឃ្លីប​វីដេអូ​មក​ចោទប្រកាន់​លើ​រូបលោក​ទាំង​បំពាន​ការពិត។

ក្រុម​មេធាវី​រដ្ឋាភិបាល​កម្ពុជា​ដែល​តំណាង​ឱ្យ​ដើមបណ្ដឹង​រដ្ឋប្បវេណី ត្រូវ​បាន​សារព័ត៌មាន​ដែល​ស្និទ្ធ​នឹង​លោក ហ៊ុន សែន គឺ Fresh News ដកស្រង់​សម្ដី​ចុះផ្សាយ​កាលពី​ថ្ងៃ​អាទិត្យ ទី​១២ មិថុនា ថា ពួកគេ​បដិសេធ​នូវ​ការ​អះអាង​របស់​លោក កឹម សុខា ដោយ​មូលហេតុ​ថា ភស្តុតាង​ជា​ឃ្លីប​វីដេអូ​ដែល​ក្រុម​មេធាវី​ដើមបណ្ដឹង​រដ្ឋប្បវេណី​បាន​លើក​យក​មក​សួរ​បញ្ជាក់​លោក កឹម សុខា ក្នុង​សវនាការ​កាលពី​ថ្ងៃទី​៨ ខែ​មិថុនា ឆ្នាំ​២០២២ កន្លងទៅ​នេះ គឺជា​វីដេអូ​មាន​នៅ​ក្នុង​សំណុំរឿង​ដែល​មាន​ស្រាប់​ប៉ុណ្ណោះ មិន​មែន​ជា​វីដេអូ​មកពី​ណា​ផ្សេង​នោះ​ទេ។

ក្រុម​មេធាវី​ទាំងនោះ​អះអាង​ថា ភស្តុតាង​ដែល​ជា​វីដេអូ​ឃ្លីប​នេះ​ត្រូវ​បាន​ស្រាវជ្រាវ និង​ប្រមូល​ដោយ​ចៅក្រម​ស៊ើបសួរ​នៅ​ក្នុង​ដំណាក់កាល​នៃ​ការ​ស៊ើបសួរ​ទាំងអស់។ ម្យ៉ាង​វិញ​ទៀត រាល់​ភស្តុតាង​ដែល​បាន​ដាក់​ចូល​ក្នុង​សំណុំរឿង​សុទ្ធតែ​ត្រូវ​បាន​ដាក់​ឲ្យ​ពិនិត្យ​ពិភាក្សា​ពី​គ្រប់​ភាគី​ទាំងអស់​រួច​ជា​ស្រេច​ផង​ដែរ។

ប្រភព​ដដែល​បន្ថែម​ថា មេដឹកនាំ​បក្ស​ប្រឆាំង​លោក កឹម សុខា មាន​ការ​ព្រួយបារម្ភ​នឹង​ឃ្លីប​វីដេអូ​នេះ ដោយសារ​តែ​វីដេអូ​នេះ​ជា​ភស្តុតាង​រឹងមាំ​មួយ​បង្ហាញ​ពី​ចេតនា​របស់​ជន​ជាប់ចោទ​ក្នុង​ការ​ប្រកាស​ដោយ​ហិង្សា​បង្ក​កម្លាំង​ខុសច្បាប់ ក្នុង​គោលដៅ​ប្តូរ​ថ្នាក់​ដឹកនាំ​ជាតិ​ដែល​កើត​ចេញពី​ការ​បោះឆ្នោត​ស្រប​ច្បាប់ ហើយ​ផ្អែក​តាម​ភស្តុតាង​នេះ និង​ភស្តុតាង​ផ្សេង​ទៀត គឺ​មាន​ភាព​រឹងមាំ​អាច​ដាក់​បន្ទុក​ធ្ងន់ធ្ងរ​ទៅ​លើ​លោក កឹម សុខា បាន។

ក្រុម​មេធាវី​ទាំងនោះ​បញ្ជាក់​ថា ការ​បដិសេធ​របស់​លោក កឹម សុខា នេះ គឺ​ដោយសារតែ​គាត់​ព្យាយាម​រក​លេស​ដោយ​អគតិ ដោះ​បន្ទុក និង​បាន​ធ្វើ​ការ​ចោទប្រកាន់​ដោយ​ពុំ​ត្រឹមត្រូវ​ទៅ​លើ​ក្រុម​មេធាវី​តំណាង​ឱ្យ​ដើមបណ្ដឹង​រដ្ឋប្បវេណី​ប៉ុណ្ណោះ។ យ៉ាងណា​ក៏ដោយ ក្រុម​មេធាវី​ទាំងនោះ​ថា​លោក កឹម សុខា គួរតែ​ព្យាយាម​ស្វែងរក​ភស្តុតាង​ដោះ​បន្ទុក​ខ្លួនឯង ជាជាង​ស្រែក​ប្រកូក​ប្រកាស​បំភ្លៃ​ការពិត​ចោទប្រកាន់​ទម្លាក់​កំហុស​លើ​ក្រុម​មេធាវី​ដើមបណ្ដឹង​រដ្ឋប្បវេណី​បែប​នេះ​បន្ត​ទៀត។

កាលពី​ថ្ងៃទី​៨ ខែ​មិថុនា ឆ្នាំ​២០២២ ប្រធាន​គណបក្ស​សង្គ្រោះ​ជាតិ លោក កឹម សុខា អំឡុង​ពេល​ជំនុំជម្រះ​ក្នុង​សវនាការ​លើក​ទី​៤៣ បាន​អះអាង​ថា មេធាវី​តំណាង​ដោយ​រដ្ឋាភិបាល​បាន​យក​ភស្តុតាង​ដាក់​បន្ទុក​ប្រឆាំង​រូបលោក​ទាំង​បំពាន​ខុសពី​ការពិត ក្នុង​ពេល​ដែល​ឃ្លីប​វីដេអូ​យក​មក​ដាក់​បន្ទុក​ចំពោះ​រូបលោក​នេះ​ខុស​ទាំង​ទីតាំង និង​ពេលវេលា​នៃ​ថ្ងៃ​កើតហេតុ​ទាំងស្រុង។

មេដឹកនាំ​បក្ស​ប្រឆាំង លោក កឹម សុខា អះអាង​ថា ឃ្លីប​វីដេអូ​នៅ​ជិត​ផ្សារ​ស្លាបលែង ក្នុង​ឃុំ​ស្វាយរំពារ ស្រុក​បរសេដ្ឋ ខេត្ត​កំពង់ស្ពឺ នោះ គឺ​លោក​ពាក់​អាវ​គគីរ​ដៃខ្លី ហើយ​ពុំ​បាន​ថ្លែង​សារ​នយោបាយ​អ្វី​នោះ​ទេ ប៉ុន្តែ​ឃ្លីប​វីដេអូ​ដែល​សហ​មេធាវី​តំណាង​រដ្ឋាភិបាល​យក​មក​ចោទប្រកាន់​លើ​រូបលោក បែរជា​ស្ថិត​ក្នុង​សម្លៀកបំពាក់​ពាក់​អាវ​ស មាន​ពាក់​កម្រង​ផ្កាម្លិះ​ទៅវិញ។ ដូច្នេះ​ភស្តុតាង​នេះ គឺជា​ភស្តុតាង​មិន​ត្រឹមត្រូវ​ដាច់ខាត​ក្នុង​ការ​លើក​យក​មក​ដាក់​បន្ទុក​ប្រឆាំង​នឹង​រូបលោក។

ប្រធាន​គណបក្ស​សង្គ្រោះ​ជាតិ លោក កឹម សុខា ត្រូវ​បាន​តុលាការ​កម្ពុជា​ចោទប្រកាន់​ពី​បទ​ឃុបឃិត​ជាមួយ​រដ្ឋ​បរទេស​ដើម្បី​ផ្តួល​រំលំ​រដ្ឋាភិបាល​កម្ពុជា កាលពី​ឆ្នាំ​២០១៧ កន្លងទៅ ដោយ​ផ្អែក​លើ​ភស្តុតាង​របស់​មេធាវី​ដើមបណ្ដឹង​រដ្ឋប្បវេណី​ប្រវែង​ជាង ២​នាទី ដែល​បាន​កាត់​ត​ចេញពី​វីដេអូ​ដើម​ជាង​មួយ​ម៉ោង​របស់​លោក ដែល​បាន​ថ្លែង​ទៅ​កាន់​អ្នកគាំទ្រ​គណបក្ស​សង្គ្រោះ​ជាតិ កាលពី​ឆ្នាំ​២០១៣ កន្លងទៅ។

តុលាការ​បាន​អូស​បន្លាយ​សវនាការ​អស់​ជិត ៥​ឆ្នាំ​ហើយ នៅតែ​មិន​ទាន់​អាច​កាត់ទោស​លោក​ពី​បទល្មើស​ណា​មួយ​នៅឡើយ ខណៈ​សេរីភាព​របស់​លោក​ក៏​ត្រូវ​ដាក់​ឱ្យ​ស្ថិត​ក្រោម​ការ​តាមដាន​របស់​តុលាការ​រហូត​មក៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស