ប្រធានគណបក្សសង្គ្រោះជាតិដែលត្រូវបានតុលាការកំពូលរំលាយ លោក កឹម សុខា បានប្រតិកម្មទៅនឹងព្រះរាជអាជ្ញាតុលាការក្រុងភ្នំពេញ ដែលបានចោទសួរ និងភ្ជាប់រូបលោកទៅនឹងករណីលោក សម រង្ស៊ី។ លោកបានឆ្លើយតបថា លោកមិនមានទំនាក់ទំនងអ្វីជាមួយលោក សម រង្ស៊ី ទៀតនោះឡើយ ក្រោយពេលបក្សភ្លើងទៀនរបស់លោក សម រង្ស៊ី បានដើរចេញពីស្មារតីរួបរួមរបស់គណបក្សសង្គ្រោះជាតិ ដើម្បីចូលរួមបោះឆ្នោតឃុំ-សង្កាត់។
លោក កឹម សុខា បាននិយាយទៅកាន់តំណាងអយ្យការសាលាដំបូងរាជធានីភ្នំពេញ នៅព្រឹកថ្ងៃទី១៥ ខែមិថុនា ថា លោកនឹងគ្មានទំនាក់ទំនងអ្វីទាំងអស់ជាមួយលោក សម រង្ស៊ី ដែលកំពុងជាប់ទោសនោះទេ។
លោក កឹម សុខា ក៏បានឆ្លើយថា រូបលោក និងលោក សម រង្ស៊ី មិនមែនជាមនុស្សតែមួយដូចដែលលោក សម រង្ស៊ី ធ្លាប់បានលើកឡើងទៀតនោះទេ។ លោកបន្តថា គ្រប់សកម្មភាពដែលលោក សម រង្ស៊ី បានធ្វើកន្លងទៅ ជាពិសេសយុទ្ធនាការចូលស្រុកចាប់លោកនាយករដ្ឋមន្ត្រី ហ៊ុន សែន នោះ លោកក៏មិនដែលបានគាំទ្រនោះដែរ ហើយលោកថែមទាំងបានប្រាប់ដល់សហការីរបស់លោកមិនឱ្យពាក់ព័ន្ធនឹងរឿងនេះថែមទៀត។ លោកបន្តថា មួយរយៈពេលចុងក្រោយនេះ លោក សម រង្ស៊ី បានវាយប្រហាររូបលោកថា «មានកំហុសធ្ងន់ធ្ងរដែលមិនចេញទៅបោះឆ្នោតឲ្យបក្សភ្លើងទៀន កាលពីថ្ងៃទី៥ ខែមិថុនា ឆ្នាំ២០២២» កន្លងទៅ។
សារព័ត៌មាន The Cambodia Daily មិនអាចទាក់ទងលោក សម រង្ស៊ី ដើម្បីធ្វើការអត្ថាធិប្បាយបន្ថែមជុំវិញការលើកឡើងរបស់លោក កឹម សុខា បានទេរហូតដល់ម៉ោងចេញផ្សាយនេះ។
ប៉ុន្តែអ្នកនាំពាក្យបក្សកាន់អំណាច លោក សុខ ឥសាន ថ្លែងថា កន្លងមកក្រុមលោក សម រង្ស៊ី និងលោក កឹម សុខា ប្រៀបបានដូចទឹក និងប្រេង ដែលមិនអាចចុះសម្រុងគ្នាបានឡើយ។ លោកថា ការបែកបាក់សម្ពន្ធភាពនេះ នឹងផ្ដល់ផលប្រយោជន៍សម្រាប់គណបក្សប្រជាជនកម្ពុជា។ លោកបញ្ជាក់ថា ទោះជាលោក កឹម សុខា បែកបាក់គ្នាជាមួយលោក សម រង្ស៊ី ក៏ដោយ ក៏មិនទាន់អាចនិយាយបានថា លោក កឹម សុខា នឹងមានសិទ្ធិធ្វើនយោបាយដើម្បីប្រកួតប្រជែងជាមួយគណបក្សប្រជាជនកម្ពុជានោះដែរ។
ចំណែកប្រធានវេទិកាពលរដ្ឋ និងជាអ្នកវិភាគនយោបាយ លោក គឹម សុខ យល់ថា ការបែកបាក់គ្នារវាងលោក សម រង្ស៊ី និងលោក កឹម សុខា បានលេចសញ្ញាតាំងពីមុនយុទ្ធនាការចូលស្រុករបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩ មកម្ល៉េះ គឺនៅពេលដែលលោក សម រង្ស៊ី បោះសម្ដីដោយមិនឱ្យតម្លៃលើការលះបង់របស់លោក កឹម សុខា ដូចជាការប្រើពាក្យថា «គាត់មិនល្ងង់ឲ្យគេចាប់ដាក់គុកដូចលោក កឹម សុខា» ជាដើម។
លោកបន្តថា ការបែកបាក់នេះបានលេចរូបភាពច្បាស់នៅពេលលោក សម រង្ស៊ី ធ្វើជាខ្នងបង្អែកឱ្យមានដំណើរការឡើងវិញនៃគណបក្សភ្លើងទៀន ដែលបែកចេញពីបក្សសង្គ្រោះជាតិ និងបានចូលរួមបោះឆ្នោតលម្អអំណាចផ្ដាច់ការរបស់លោក ហ៊ុន សែន។
លោក គឹម សុខ បន្តថា លោក សម រង្ស៊ី លេងល្បែងសកម្មភាពបែកបាក់នៅពេលគាត់ចេញមុខបន្ទោសលោក កឹម សុខា ដែលមិនចូលរួមឧក្រិដ្ឋកម្មបោះឆ្នោត រីឯលោក កឹម សុខា គ្រាន់តែនិយាយបញ្ជាក់រឿងរ៉ាវបែកបាក់នេះទៅកាន់តុលាការប៉ុណ្ណោះ បន្ទាប់ពីលោក សម រង្ស៊ី បានធ្វើការបំបែកជាក់ស្ដែងរួចទៅហើយនោះ។
លោក គឹម សុខ អះអាងថា លោកនៅមិនទាន់ដឹងថា អ្នកដែលប្រាថ្នាប្រជាធិបតេយ្យរូបណានៅកម្ពុជាអាចធ្វើការជាមួយលោក សម រង្ស៊ី ទៀតបាននោះទេ បើលោក សម រង្ស៊ី មិនព្រមកែចរិតនយោបាយជាអ្នកដឹកនាំរបស់គាត់ ដូចជាចរិតជេរប្រមាថពីចម្ងាយដើម្បីបានសំឡេងប្រជាភិថុតិ និងល្បែងយករឿងបុគ្គលធ្វើជាមូលដ្ឋាននយោបាយ រួមទាំងល្បែងកម្ទេចគ្នាឯង ប្រសិនបើគាត់មិនបានធ្វើធំលើគេនោះ។
គណបក្សសិទ្ធិមនុស្សរបស់លោក កឹម សុខា បានច្របាច់បញ្ចូលគ្នាជាមួយគណបក្សភ្លើងទៀន ដែលពេលនោះត្រូវបានគេស្គាល់ថាជាគណបក្ស សម រង្ស៊ី បន្ទាប់ពីជំនួបកាលពីខែកក្កដា ឆ្នាំ២០១២ រវាងប្រធានបក្សទាំងពីរនៅរដ្ឋធានីម៉ានីល ប្រទេសហ្វីលីពីន។ មេដឹកនាំបក្សប្រឆាំងដ៏លេចធ្លោទាំងពីរបានច្របាច់បញ្ចូលគណបក្សរបស់ខ្លួនបង្កើតជាគណបក្សសង្គ្រោះជាតិ ដើម្បីប្រកួតប្រជែងជាមួយគណបក្សកាន់អំណាច។
សម្ពន្ធភាពនេះបានបង្ហាញនូវភាពជោគជ័យជាខ្លាំង ដែលជាការគំរាមដល់គណបក្សកាន់អំណាចរបស់លោក ហ៊ុន សែន ហើយនៅទីបញ្ចប់ គណបក្សប្រជាជនកម្ពុជាបានរកលេសដើម្បីរំលាយគណបក្សនេះតាមរយៈការចោទប្រកាន់មេដឹកនាំរបស់គណបក្សសង្គ្រោះជាតិ លោក កឹម សុខា «ពីបទក្បត់ជាតិ»៕