លោក ហ៊ុន សែន បន្តកាត់ផ្ទៃដីបឹងតាមោកបន្ថែមទៀត ដើម្បីប្រគល់ទៅឱ្យមន្ត្រីពាក់ផ្កាយ៤ និងមន្ត្រីផ្សេងទៀតធ្វើជាកម្មសិទ្ធិ ស្របពេលដែលផ្ទៃដីបឹងធម្មជាតិដែលនៅសល់ចុងក្រោយ ត្រូវបានរដ្ឋាភិបាលកាត់ និងដោះដូរអស់ជាង ២ពាន់ហិកតារហើយនោះ។
ក្នុងអនុក្រឹត្យមួយដែលចុះហត្ថលេខាដោយលោក ហ៊ុន សែន កាលពីថ្ងៃទី០១ ខែកុម្ភៈ ឆ្នាំ២០២២ បានឱ្យដឹងថា រដ្ឋាភិបាលសម្រេចកាត់ផ្ទៃដីបឹងតាមោកចំនួនពីរទីតាំងដែលមានទំហំជាង ៦ហិកតារ (៦១៨៣៦ម៉ែត្រក្រឡា) ស្ថិតនៅសង្កាត់ពញាពន់ ខណ្ឌព្រែកព្នៅ រាជធានីភ្នំពេញ ចេញពីផ្ទៃបឹងតាមោក (បឹងកប់ស្រូវ) ដើម្បីប្រគល់ឱ្យលោក សេង យូអ៊ាន់ ធ្វើជាកម្មសិទ្ធិ ដោយពន្ធ និងអាករផ្សេងៗជាបន្ទុករបស់រដ្ឋចាប់ពីថ្ងៃចុះហត្ថលេខាតទៅ។
លោក សេង យូអ៊ាន់ មានឋានន្តរស័ក្តិជានាយឧត្តមសេនីយ៍ (ផ្កាយ៤) ជាអគ្គនាយកនៃអគ្គនាយកដ្ឋានព័ស្តុភារ និងហិរញ្ញវត្ថុក្រសួងមហាផ្ទៃ។
បឹងតាមោកមានផ្ទៃដីសរុបជាង ៣ពាន់ហិកតារ (៣២៣៩ហិកតារ) ជាអាងស្ដុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងនេះត្រូវបានរដ្ឋាភិបាលចេញអនុក្រឹត្យមួយកាលពីដើមខែកុម្ភៈ ឆ្នាំ២០១៦ ដោយកំណត់បឹងធម្មជាតិមួយនេះជាសម្បត្តិសាធារណៈរបស់រដ្ឋ។
ប៉ុន្តែបើយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ចុងខែធ្នូ ឆ្នាំ២០២២ ផ្ទៃបឹងតាមោកសរុបជាង ២ពាន់ហិកតារហើយត្រូវបានរដ្ឋាភិបាលកាត់ ឬដោះដូរទៅឱ្យស្ថាប័នរដ្ឋ ក្រុមហ៊ុនឯកជន ដែលគេដឹងថាជាអ្នកមានប្រាក់ និងមានអំណាចសម្រាប់សាងសង់អគារ និងហេដ្ឋារចនាសម្ព័ន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួន។
ក្រៅពីកាត់ និងដោះដូរនោះ លោក ហ៊ុន សែន ក៏បានកាត់ដីបឹងតាមោក ឬទំនប់កប់ស្រូវ ស្ថិតក្នុងរាជធានីភ្នំពេញ ចំនួន ២០ហិកតារឱ្យប្អូនស្រីបង្កើតរបស់លោក គឺអ្នកស្រី ហ៊ុន សេងនី និងឧកញ៉ា ឡាញ់ ភារ៉ា។
បឹងនេះក៏ត្រូវបានកាត់ទៅឲ្យលោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទ លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងលោក យ៉ា គឹមអ៊ី មន្ត្រីជាន់ខ្ពស់នៃនាយកដ្ឋានអធិការកិច្ចនៃក្រសួងការពារជាតិ។
ក្រោយពីមានការកាត់ និងដោះដូរ រួមទាំងលុបបឹងធម្មជាតិធំៗនៅកណ្ដាលក្រុងមក រាជធានីភ្នំពេញបានរងការជន់លិចដោយសារជំនន់ទឹកភ្លៀង ទោះបីជាភ្លៀងធ្លាក់មិនដល់មួយម៉ោងក៏ដោយ។ ប៉ុន្តែលោកនាយករដ្ឋមន្ត្រី ហ៊ុន សែន បានថ្លែងថា បញ្ហាទឹកជំនន់ដែលបង្កឱ្យលិចរាជធានីភ្នំពេញ មិនមែនបណ្ដាលមកពីការលុបបឹងធម្មជាតិនោះទេ ដោយថាកន្លងមក ទោះបីជាមិនលុបបឹង រាជធានីភ្នំពេញក៏មានទឹកជំនន់ដែរ ដែលករណីនេះលោកថាគួរតែឈប់រិះគន់ពីបញ្ហានេះ។
របាយការណ៍មួយរបស់អង្គការសមាគមធាងត្នោត ដែលបានចេញផ្សាយនៅថ្ងៃទី១០ ខែកុម្ភៈ ឆ្នាំ២០២២ បានលើកឡើងថា គិតត្រឹមខែធ្នូ ឆ្នាំ២០២១ ផ្ទៃបឹងតាមោក ឬបឹងកប់ស្រូវ ជាង ២ពាន់ហិកតារ (២០៩៤,៧១៦៥ហិកតារ) ឬស្មើជិត ៦៥% ត្រូវបានរដ្ឋាភិបាលកាត់ឱ្យឧកញ៉ា ក្រុមហ៊ុនឯកជន និងស្ថាប័នសាធារណៈ ដែលសរុបនៃការកាត់ទាំងអស់មានចំនួន ៤៣ដង។
បើតាមផែនទីនោះ ផ្ទៃបឹងតាមោក ឬបឹងទំនប់កប់ស្រូវស្ទើរតែទាំងស្រុងត្រូវបានកាត់គ្រប់ទីកន្លែងនៃផ្ទៃបឹងទៅហើយ៕