កូនស្រីច្បងមេដឹកនាំបក្សប្រឆាំង កញ្ញា កឹម មនោវិទ្យា អះអាងថា សំណួររបស់តំណាងអយ្យការក្នុងសវនាការលោក កឹម សុខា កាលពីថ្ងៃពុធ ទី១៥ មិថុនា ដែលបានសួរលោក កឹម សុខា ពីមូលហេតុនៃការរួបរួមជាមួយលោក សម រង្ស៊ី គឺជាសំណួរបង្កប់ចេតនាទុច្ចរិតក្នុងគោលបំណងបំភ្លៃការពិតនៃការរួបរួមឱ្យមានគណបក្សសង្គ្រោះជាតិ។
កូនស្រីច្បងមេដឹកនាំបក្សប្រឆាំង កញ្ញា កឹម មនោវិទ្យា បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី១៥ ខែមិថុនា ឆ្នាំ២០២២ ថា តុលាការមិនចាំបាច់សួរសំណួរបែបឡប់ឡែបន្តទៀតនោះទេ ព្រោះថាចាប់តាំងពីសង្គ្រោះជាតិបង្កើតរហូតដល់ពេលដែលតុលាការបានរំលាយ គណបក្សសង្គ្រោះជាតិ ក៏ដូចជាអតីតមេដឹកនាំប្រឆាំង លោក សម រង្ស៊ី មិនដែលប្រព្រឹត្តទង្វើខុសច្បាប់ឡើយ ដូច្នេះគ្មានមូលហេតុអ្វីដែលលោក កឹម សុខា មិនអាចរួមជាមួយសម រង្ស៊ី នៅពេលនោះទេ។
កូនស្រីច្បងរបស់មេដឹកនាំបក្សប្រឆាំងរូបនេះអះអាងថា ការរួបរួមបង្កើតបានជាគណបក្សសង្គ្រោះជាតិ គឺដោយសារមានការជំរុញពីពលរដ្ឋខ្មែរស្រឡាញ់លទ្ធិប្រជាធិបតេយ្យក្នុងគោលដៅប្រមូលផ្តុំកម្លាំងអ្នកស្នេហាជាតិ ដើម្បីធ្វើការផ្លាស់ប្ដូរតាមរយៈនៃការបោះឆ្នោតជាវិជ្ជមាននៅកម្ពុជា។ ប៉ុន្តែសំណួររបស់តំណាងអយ្យការក្នុងសវនាការរបស់លោក កឹម សុខា កាលពីថ្ងៃទី១៥ មិថុនា គឺជាសំណួរឡប់ឡែក្នុងគោលបំណងបើកឱកាសឱ្យភាគីដែលបែកចេញពីគណបក្សសង្គ្រោះជាតិ វាយប្រហារលោក កឹម សុខា តែប៉ុណ្ណោះ។
កញ្ញា កឹម មនោវិទ្យា បញ្ជក់ថា ស្មារតីគណបក្សសង្គ្រោះជាតិ និងលោក កឹម សុខា នៅតែរក្សាសកម្មភាពសុចរិតត្រឹមត្រូវស្របច្បាប់រហូតមក ក្នុងនោះលោក កឹម សុខា ក៏ធ្លាប់បានបង្ហាញពីការមិនគាំទ្រជំហរនយោបាយរបស់លោក សម រង្ស៊ី មួយចំនួនផងដែរ បន្ទាប់ពីគណបក្សសង្គ្រោះជាតិត្រូវបានរំលាយ ដោយសារតែអ្នកទាំងនោះធ្វើសកម្មភាពប្រាសចាកពីជំហរគណបក្សសង្គ្រោះជាតិ រហូតពួកគេបង្ហាញសកម្មភាពដើរចេញពីគណបក្សប្រឆាំងកាលពីចុងខែវិច្ឆិកា ឆ្នាំ២០២១ កន្លងទៅនោះ។
ការអះអាងនេះ ធ្វើឡើងបន្ទាប់ពីសវនាការរបស់មេដឹកនាំបក្សប្រឆាំងកាលពីថ្ងៃពុធកន្លងទៅ ត្រូវបានតំណាងអយ្យការសាកសួរលោក កឹម សុខា នូវសំណួរជាច្រើនជុំវិញទំនាក់ទំនងរវាងលោក កឹម សុខា និងលោក សម រង្ស៊ី សព្វថ្ងៃនេះ ដោយភ្ជាប់ទៅនឹងការរួបរួមរបស់ពួកគេកាលពីឆ្នាំ២០១២ កន្លងទៅ។
កាលពីថ្ងៃទី១៥ ខែមិថុនា ឆ្នាំ២០២២ បន្ទាប់ពីសវនាការប្រធានគណបក្សសង្គ្រោះជាតិ លោក កឹម សុខា ក៏ត្រូវបានគេទម្លាយសំឡេងភ្លាមៗត្រង់ចំណុចដែលលោក កឹម សុខា បានឆ្លើយតបនឹងសំណួររបស់តំណាងអយ្យការ លោក ប្លង់ សុផល ថាលោកនឹងគ្មានទំនាក់ទំនងអ្វីទាំងអស់ជាមួយលោក សម រង្ស៊ី ចាប់ពីពេលនេះតទៅ។
ជុំវិញការទម្លាយសំឡេងប្រធានគណបក្សសង្គ្រោះជាតិ លោក កឹម សុខា នេះ បានធ្វើឱ្យមានការរិះគន់ និងវាយប្រហារពីភាគីលោក សម រង្ស៊ី យ៉ាងចាស់ដៃតាមបណ្ដាញទំនាក់ទំនងសង្គម ខណៈភាគីអ្នកគាំទ្រលោក កឹម សុខា នៅតែបង្ហាញពីជំហរដែលរួបរួមក្រោមស្មារតីរបស់គណបក្សសង្គ្រោះជាតិបន្តទៀត។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានសរសេរលើគណនីហ្វេសប៊ុករបស់លោកនៅថ្ងៃទី១៦ មិថុនា នេះថា ក្នុងនាមជាអ្នកដឹកនាំកំពូលម្នាក់ ត្រូវតែហ៊ានស៊ី ហ៊ានសង ក្នុងការបង្ហាញជំហរនយោបាយអហិង្សារបស់ខ្លួន ស្របពេលដែលលោក សម រង្ស៊ី នៅពេលនេះកំពុងដឹកនាំទៅរកការបង្កើតគំនុំសងសឹក ហិង្សាជ្រុលនិយម ដោយការប្រើវោហារស័ព្ទបែបអសុរោះដាក់គ្នាជាមួយមេដឹកនាំបក្សកាន់អំណាច លោក ហ៊ុន សែន យ៉ាងអានាធិបតេយ្យទៅហើយនោះ។
លោក មាជ សុវណ្ណារ៉ា លើកឡើងថា ការវាយប្រហារលើលោក កឹម សុខា ជុំវិញសារសំឡេងដែលបែកធ្លាយនោះ គឺមិនប៉ះពាល់ដល់កេរ្តិ៍ឈ្មោះ និងសកម្មភាពតស៊ូដើម្បីប្រជាធិបតេយ្យ និងការគោរពសិទ្ធិដែលគាត់កំពុងតែប្រឹងប្រែងតស៊ូសព្វថ្ងៃនេះទេ។ ដូច្នេះ ការព្យាយាមបញ្ចេញសារសំឡេងនេះ គឺគ្រាន់តែជាការញុះញង់ឱ្យមានការវាយប្រហារពីភាគីលោក សម រង្ស៊ី ដែលគណបក្សកាន់អំណាចចង់បានតែប៉ុណ្ណោះ ព្រោះថាទង្វើបែបនេះគ្រាន់តែជាល្បិចកលនយោបាយទុច្ចរិតដែលគេធ្លាប់ប្រើដើម្បីយកឈ្នះដៃគូនយោបាយរបស់ពួកគេប៉ុណ្ណោះ។
មន្ត្រីជាន់ខ្ពស់បក្សប្រឆាំងរូបនេះបញ្ជាក់ថា ការលេងល្បែងដដែលៗរបស់បក្សកាន់អំណាចបែបនេះ គឺគ្មានលទ្ធផលល្អសម្រាប់ជាតិមាតុភូមិនោះទេ គឺមានតែនាំឱ្យមានការបែកបាក់ជាតិកាន់តែធ្ងន់ធ្ងរប៉ុណ្ណោះ ដូច្នេះក្នុងនាមជាអ្នកដឹកនាំកំពូលៗគួរតែនាំគ្នាគិតគូរពីប្រយោជន៍ជាតិ ជាជាងនាំគ្នាលេងល្បែងគំនុំបុគ្គលបន្តទៀត។
ក្រោយពីរំលាយគណបក្សសង្គ្រោះជាតិ កាលពីដើមខែវិច្ឆិកា ឆ្នាំ២០១៧ រដ្ឋាភិបាលកម្ពុជាត្រូវរងការរិះគន់ពីសហគមន៍ជាតិ និងអន្តរជាតិ ថាកំពុងសម្លាប់ផ្តាច់ឫសគល់លទ្ធិប្រជាធិបតេយ្យដែលកំពុងតែលូតលាស់នៅកម្ពុជាសព្វថ្ងៃនេះ៕