សាខាគណបក្សសង្គ្រោះជាតិប្រចាំសហរដ្ឋអាមេរិក ឬហៅថា CNRP-USA ព្រមានថា សំណួរអយ្យការដែលបានសាកសួរប្រធានគណបក្សសង្គ្រោះជាតិ លោក កឹម សុខា គឺមានចេតនាផ្តល់ឱកាសឱ្យក្រុមអតីតមេដឹកនាំប្រឆាំង លោក សម រង្ស៊ី មានលេសវាយប្រហារ និងមួលបង្កាច់លើលោក កឹម សុខា ដើម្បីធ្វើឱ្យបាត់បង់ប្រជាប្រិយភាព។
សេចក្តីថ្លែងការណ៍របស់ CNRP-USA កាលពីថ្ងៃទី១៥ ខែមិថុនា ឆ្នាំ២០២២ បានកត់សម្គាល់ថា មានហេតុផលមួយចំនួនដែលតំណាងអយ្យការប្រឹងជជីកសួរលោក កឹម សុខា ឱ្យឆ្លើយនឹងសំណួររបស់ខ្លួនដែលបានបង្ហាញចេតនាយ៉ាងច្បាស់របស់ពួកគេ ដែលបង្កប់នូវគោលបំណងរបស់បក្សកាន់អំណាចក្នុងការខ្ចីដៃក្រុមអ្នកគាំទ្រលោក សម រង្ស៊ី វាយប្រហារលោក កឹម សុខា ចំពោះចម្លើយរបស់លោក។
ប្រភពដដែលអះអាងថា តាមរយៈចម្លើយរបស់មេដឹកនាំបក្សប្រឆាំង លោក កឹម សុខា បានដឹងជាមុនហើយថា លោកនឹងទទួលរងនូវការវាយប្រហារ និងមួលបង្កាច់ពីក្រុមអ្នកគាំទ្រលោក សម រង្ស៊ី ជាក់ជាមិនខាន ប៉ុន្តែលោកនៅតែជឿជាក់ថា ពលរដ្ឋខ្មែរនឹងផ្តល់ការវិនិច្ឆ័យដោយយុត្តិធម៌ជូនរូបលោកដែលតែងតែការពារស្មារតីសង្គ្រោះជាតិរហូតមក។
ជាងនេះទៀត ទោះបីលោក កឹម សុខា ដឹងច្បាស់ពីគោលបំណងរបស់អយ្យការដែលចង់ឱ្យអ្នកគាំទ្រលោក សម រង្ស៊ី វាយប្រហារលើរូបលោកក៏ដោយ ក៏លោកនៅតែឆ្លើយទៅនឹងសំណួរនេះដដែល ព្រោះថាក្នុងនាមលោកជាមេដឹកនាំកំពូលមួយរូប ត្រូវតែហ៊ាននិយាយ និងធ្វើកិច្ចការរបស់ខ្លួនឱ្យបានច្បាស់លាស់ និងត្រឹមត្រូវ ស្អាតស្អំ ស្របតាមច្បាប់របស់កម្ពុជាដែលមានចែង។
ក្នុងសវនាការលើកទី៤៤ កាលពីថ្ងៃទី១៥ ខែមិថុនា ឆ្នាំ២០២២ កន្លងទៅ ប្រធានគណបក្សសង្គ្រោះជាតិ លោក កឹម សុខា ត្រូវបានជជីកសួរពីតំណាងអយ្យការ លោក ប្លង់ សុផល ជុំវិញទំនាក់ទំនងជាមួយអតីតមេដឹកនាំប្រឆាំង លោក សម រង្ស៊ី ដែលបានរួបរួមគ្នាបង្កើតជាគណបក្សសង្គ្រោះជាតិរហូតដល់លោក សម រង្ស៊ី ត្រូវបានតុលាការកាត់ទោសឱ្យជាប់ពន្ធនាគាររយៈពេល ៨ឆ្នាំដោយចោទប្រកាន់ពីបទ «ក្បត់ជាតិ» កាលពីពេលថ្មីៗនេះ។
ឆ្លើយនឹងសំណួររបស់តំណាងអយ្យការ លោក កឹម សុខា បានបដិសេធនូវទំនាក់ទំនងជាមួយលោក សម រង្ស៊ី ជុំវិញសំណុំរឿងលោក សម រង្ស៊ី ដែលតុលាការបានចោទប្រកាន់ និងកាត់ទោសកាលពីដើមសប្តាហ៍នេះ ប៉ុន្តែចម្លើយរបស់លោក កឹម សុខា ត្រូវបានគេលួចថតជាសារសំឡេងយកទៅចែកចាយលើបណ្ដាញសង្គមហ្វេសប៊ុក ដែលនាំឱ្យក្រុមអ្នកគាំទ្រលោក សម រង្ស៊ី វាយប្រហារលើលោក កឹម សុខា យ៉ាងធ្ងន់ធ្ងរ។
អតីតអគ្គទីប្រឹក្សាស្ថានទូតខ្មែរប្រចាំប្រទេសឥណ្ឌូនេស៊ី បណ្ឌិត សូ ណារ៉ូ បានសរសេរលើគណនីហ្វេសប៊ុករបស់លោកកាលពីថ្ងៃទី១៦ មិថុនា ថា ប្រធានគណបក្សសង្គ្រោះជាតិ លោក កឹម សុខា ពិតជាមិនបានគាំទ្រឱ្យអតីតមេដឹកនាំប្រឆាំង លោក សម រង្ស៊ី ប្រព្រឹត្តទង្វើល្មើសនឹងច្បាប់កម្ពុជានោះទេ ព្រោះថាលោកតែងតែប្រកាន់នូវសកម្មភាពនយោបាយអហិង្សារហូតមក។
បណ្ឌិត សូ ណារ៉ូ អះអាងថា សកម្មភាពហិង្សា និងទង្វើល្មើសច្បាប់របស់លោក សម រង្ស៊ី បានលេចឡើងនៅពេលដែលប្រធានរបស់ខ្លួន គឺលោក កឹម សុខា ត្រូវបានអាជ្ញាធរលោក ហ៊ុន សែន ចាប់ឃុំខ្លួនកាលពីឆ្នាំ២០១៧ កន្លងទៅ ក្នុងនោះលោក សម រង្ស៊ី បានប្រកាសផ្តួលរំលំរដ្ឋាភិបាលលោក ហ៊ុន សែន ក្នុងផែនការថ្ងៃទី៩ ខែវិច្ឆិកា ឆ្នាំ២០១៩ និងការប្រមាថអង្គព្រះមហាក្សត្រកាលពីខែធ្នូ ឆ្នាំ២០២០ ជាដើម។
ចំណែកអតីតនាយកខុទ្ទកាល័យប្រធានគណបក្សសង្គ្រោះជាតិ លោក មុត ចន្ថា បានអះអាងថា លោក សម រង្ស៉ី និងក្រុមរបស់គាត់បានបង្ហាញនូវការផ្តាច់ទំនាក់ទំនងជាមួយប្រធានគណបក្សសង្គ្រោះជាតិ លោក កឹម សុខា ភ្លាមៗបន្ទាប់ពីគាត់ត្រូវបានចាប់ខ្លួននៅយប់ថ្ងៃទី៣ ខែកញ្ញា ឆ្នាំ២០១៧ មកម្ល៉េះ។
លោក មុត ចន្ថា អះអាងថា នៅថ្ងៃទី៤ ខែកញ្ញា ឆ្នាំ២០១៧ លោក សម រង្ស៉ី បានអំពាវនាវឱ្យអ្នកនយោបាយដែលគាំទ្ររូបលោកចាប់ពីសមាជិករដ្ឋសភា ព្រឹទ្ធសភា ក្រុមប្រឹក្សាខេត្ត ក្រុមប្រឹក្សាស្រុក រហូតដល់ថ្នាក់ឃុំ-សង្កាត់ នាំគ្នារត់ចេញទៅក្រៅប្រទេសចាកចោលលោក កឹម សុខា ទាំងអស់ ដោយគ្មានការតវ៉ាទាមទាររកយុត្តិធម៌ឱ្យមេដឹកនាំរបស់ខ្លួនដែលកំពុងរងការចោទប្រកាន់ទាំងអយុត្តិធម៌នោះឡើយ។
ក្នុងបន្ទប់សវនាការសាលាដំបូងរាជធានីភ្នំពេញកាលពីថ្ងៃទី១៥ ខែមិថុនា ប្រធានគណបក្សសង្គ្រោះជាតិ លោក កឹម សុខា បានបញ្ជាក់ថា ការរួបរួមគ្នានៅខែកក្កដា ឆ្នាំ២០១២ គឺបានធ្វើឡើងតាមឆន្ទៈរបស់ពលរដ្ឋខ្មែរ មិនមែនតាមបរទេសណាប្រាប់ឱ្យធ្វើ ឬបង្គាប់បញ្ជាឡើយ។ លោកបន្តថា ការរួបរួមនោះផ្អែកលើគោលការណ៍អហិង្សា លក្ខន្តិកៈ និងបទបញ្ជាផ្ទៃក្នុងគណបក្ស និងច្បាប់ជាតិជាធរមាន។
លោក កឹម សុខា បានប្រកាសបញ្ជាក់ជំហរយ៉ាងច្បាស់ថា ទំនាក់ទំនងរវាងរូបលោក និងលោក សម រង្ស៉ី គ្មានអ្វីជាប់ពាក់ព័ន្ធគ្នាទៀតនោះទេ គឺបានបញ្ចប់ហើយ ខណៈលោក សម រង្ស៊ី នៅពេលនេះបានអះអាងថា លោកកំពុងជ្រកក្រោមដំបូលគណបក្សភ្លើងទៀន៕