30 C
Phnom Penh

មេដឹកនាំ​បស្ចិម​ប្រទេស​សន្យា​ជួយ​អ៊ុយក្រែន​ការពារ​ទឹកដី ខណៈ​បារាំង​ចង់​ឃើញ​អ៊ុយក្រែន​ដណ្ដើម​តំបន់​គ្រីមៀ​មក​វិញ

ដោយ ឌឹ ខេមបូឌា ដេលី

បទវិភាគ

មេដឹកនាំ​ប្រទេស​លោក​សេរី​ចំនួន​បី និង​ជា​មេដឹកនាំ​នៃ​បណ្តា​ប្រទេស​ឧស្សាហកម្ម​ជឿនលឿន G-7 មាន​ប្រធានាធិបតី​បារាំង Emmanuel Macron អធិការបតី​អាល្លឺម៉ង់ លោក Olaf Scholz និង​នាយករដ្ឋមន្ត្រី​អ៊ីតាលី លោក Mario Draghi អម​ដំណើរ​ដោយ​ប្រធានាធិបតី​រូម៉ានី លោក Klaus Iohannis បាន​ធ្វើ​ដំណើរ​តាម​រថភ្លើង​ទៅ​ដល់​រដ្ឋធានី​គៀវ ប្រទេស​អ៊ុយក្រែន កាលពី​ថ្ងៃទី​១៦ ខែ​មិថុនា។

នេះ​ជា​ទស្សនកិច្ច​ចុងក្រោយ​ថ្មី​មួយ​ទៀត​នៃ​មេដឹកនាំ​បស្ចិម​ប្រទេស ដែល​សម្រេច​ទៅ​ជួប​ប្រធានាធិបតី​អ៊ុយក្រែន លោក Volodymyr Zelenskyy នៅ​ក្នុង​ប្រទេស​មួយ​ដែល​ងាយ​គ្រោះថ្នាក់​បំផុត​ចំពោះ​អាយុជីវិត​នៃ​ការ​បាញ់​ប្រហារ​ដោយ​គ្រាប់​មីស៊ីល​ពី​កងទ័ព​រុស្ស៊ី ព្រោះ​អ៊ុយក្រែន កំពុង​ធ្លាក់​ក្នុង​សង្គ្រាម​ឈ្លានពាន​ពី​រុស្ស៊ី​ជាង ៤​ខែ​មក​ហើយ។

នៅ​ក្នុង​ជំនួប​តុ​មូល​នៅ​វិមាន​ប្រធានាធិបតី​អ៊ុយក្រែន មេដឹកនាំ ៤​ប្រទេស​នេះ​បាន​សាសង​គ្នា​ដោយ​ផ្ទាល់​ជាមួយ​លោក Zelenskyy។

ក្នុង​ការ​ស្ទាបស្ទង់​ចិត្ត​លោក Zelenskyy អំពី​ទឹកចិត្ត​ចុងក្រោយ​នៃ​ការ​ប្រយុទ្ធ​ដើម្បី​ការពារ​ទឹកដី និង​សេរីភាព គឺ​មេដឹកនាំ ៣​ប្រទេស​នៃ​ក្រុម​បស្ចិម​ប្រទេស បាន​សន្យា​រួម​គ្នា​ជួយ​អ៊ុយក្រែន​ក្នុង​ការ​តស៊ូ​ដើម្បី​សេរីភាព និង​ទឹកដី។ នេះ​បើ​យោង​តាម​ទីភ្នាក់ងារ​ព័ត៌មាន AFP បាន​ចុះផ្សាយ​នៅ​ថ្ងៃ​សុក្រ ទី​១៧ ខែ​មិថុនា នេះ។

បើ​តាម​ប្រភព​ការទូត​របស់​ប្រទេស​បារាំង បាន​ឲ្យ​ដឹង​ថា ប្រធានាធិបតី Emmanuel Macron ចង់​ឱ្យ​អ៊ុយក្រែន ទទួល​ជោគជ័យ​ផ្នែក​យោធា​លើ​ប្រទេស​រុស្ស៊ី ដែល​អាច​បង្កើត​ឡើងវិញ​នូវ​បូរណភាព​ទឹកដី​របស់​អ៊ុយក្រែន ដែល​ក្នុង​នោះ​រួម​មាន​ទាំង​តំបន់ Crimea ដែល​រុស្ស៊ី​បាន​ដណ្ដើម​យក​កាលពី​ឆ្នាំ​២០១៤។ តែ​យ៉ាងណា លោក Macron ថា​វា​អាស្រ័យ​លើ​ប្រធានាធិបតី​អ៊ុយក្រែន នៅ​ក្នុង​ការ​កំណត់​ថា​តើ​ជ័យជម្នះ​បែប​ណា​ដែល​លោក Zelenskyy ចង់​បាន។

តែ​ជាមួយ​គ្នា​នេះ លោក Macron បាន​សាក​ចិត្ត​សួរ​ទៅ​លោក Zelenskyy ថា​តើ​ចង់​បាន​ការ​បញ្ចប់​សង្គ្រាម​ដោយ​ការ​ផ្ដល់​សម្បទាន​ទៅ​ឲ្យ​រុស្ស៊ី​ដែរ​ឬ​ទេ? សំណួរ​របស់​លោក Macron ពុំ​បាន​ទទួល​ចម្លើយ​ភ្លាមៗ​ពី​លោក Zelenskyy នោះ​ទេ។ តែ​យ៉ាងណា​ក៏ដោយ លោក Macron បញ្ជាក់​ថា រឿង​នេះ​គឺជា​សិទ្ធិ​សម្រេច​របស់​អ៊ុយក្រែន ថា​តើ​ត្រូវ​ធ្វើ​ការ​សម្របសម្រួល​ជាមួយ​នឹង​រុស្ស៊ី​ដែរ​ឬ​ទេ។

ចំណែក​អធិការបតី​អាល្លឺម៉ង់ លោក Olaf Scholz បាន​ស្នើ​ឲ្យ​លោក Zelenskyy ចូលរួម​កិច្ចប្រជុំ​នៃ​ក្រុម​ប្រទេស G-7 ដែល​នឹង​ធ្វើឡើង​ពី​ថ្ងៃ​ទី​២៦ ដល់​ថ្ងៃទី​២៨ ខែ​មិថុនា ខាងមុខ​នៅ​លើ​ទឹកដី​ប្រទេស​អាល្លឺម៉ង់។

ដោយឡែក​នាយករដ្ឋមន្ត្រី​អ៊ីតាលី លោក Mario Draghi បាន​និយាយ​ថា ហេដ្ឋារចនាសម្ព័ន្ធ​របស់​ប្រទេស​អ៊ុយក្រែន ដែល​រង​ការ​ខូចខាត និង​បំផ្លាញ​ដោយ​កងកម្លាំង​ឈ្លានពាន​របស់​រុស្ស៊ី នឹង​ត្រូវ​កសាង​ឡើងវិញ។ លោក Draghi បាន​ថ្លែង​ដូចនេះ​បន្ទាប់ពី​លោក​បាន​រួម​ដំណើរ​ជាមួយ​លោក Olaf Scholz លោក Macron និង​ប្រធានាធិបតី​រូម៉ានី លោក Klaus Iohannis ទៅ​ពិនិត្យ​មើល​ស្លាកស្នាម​នៃ​សោកនាដកម្ម​នៅ​សង្កាត់ Irpin ស្ថិតនៅ​ជាយ​រដ្ឋធានី​គៀវ ដែល​ត្រូវ​បាន​បំផ្លាញ និង​ផ្នូរ​សព​ជនស៊ីវិល​រាប់​រយ​នាក់​ដែល​បាន​ស្លាប់​ដោយ​គ្រាប់កាំភ្លើង​របស់​កងទ័ព​រុស្ស៊ី។

លោក Draghi បាន​ប្រាប់​អ្នក​សារព័ត៌មាន​ថា៖ «គេ​ត្រូវ​ជួយ​អ៊ុយក្រែន​ក្នុង​ការ​កសាង​អ្វីៗ​ទាំងអស់​ឡើងវិញ ព្រោះ​វា​ត្រូវ​បាន​កងទ័ព​រុស្ស៊ី​បំផ្លាញ ហើយ​សូម្បី​សាលា​មត្តេយ្យ​ក៏​ត្រូវ​បំផ្លាញ​ដែរ។ ទ័ព​រុស្ស៊ី​បាន​បំផ្លាញ​អ្វីៗ​ទាំងអស់​នេះ នឹង​ត្រូវ​កសាង​ឡើង​វិញ»

ថ្លែង​ក្នុង​សន្និសីទ​រួម​គ្នា​នៃ​ក្រុម​មេដឹកនាំ​បស្ចិម​ប្រទេស​ដែល​មាន​សក្ដានុពល បាន​រួម​គ្នា​ថ្កោលទោស​រុស្ស៊ី ដោយ​សន្យា​ជួយ​សព្វាវុធ​ដល់​អ៊ុយក្រែន​ថែម​ទៀត។

ចំពោះ​ប្រធានាធិបតី​អ៊ុយក្រែន លោក Volodymyr Zelenskyy វិញ​បាន​ថ្លែង​អំណរគុណ​មេដឹកនាំ​នៃ​ប្រទេស​បារាំង អាល្លឺម៉ង់ អ៊ីតាលី និង​រូម៉ានី ចំពោះ​ការ​បង្ហាញ​សាមគ្គីភាព​ជាមួយ​នឹង​ប្រទេស​របស់​លោក​តាមរយៈ​ការ​ធ្វើ​ទស្សនកិច្ច​ដ៏​អង់អាច​ក្លាហាន​មក​ជួប​នឹង​រូបលោក​ផ្ទាល់​នៅ​រដ្ឋធានី​គៀវ។

ក្រោយពី​ជំនួប លោក Zelenskyy បាន​សរសេរ​តាម Telegram ថា៖ «យើង​សូម​វាយតម្លៃ​ខ្ពស់​ចំពោះ​សាមគ្គីភាព​របស់​អស់លោក និង​ប្រជាជន​របស់​លោក ដែល​នៅតែ​បន្ត​ជួយ​ប្រជាជន​អ៊ុយក្រែន ក្នុង​ការ​ប្រយុទ្ធ​ដើម្បី​សេរីភាព និង​ទឹកដី»

ដោយ​ឆ្លើយតប​នឹង​ការ​សន្យា​ផ្ដល់​ជំនួយ​សព្វាវុធ​របស់​ពួក​បស្ចិម​ប្រទេស រដ្ឋាភិបាល​រុស្ស៊ី​បាន​ព្រមាន​ប្រឆាំង​នឹង​ការ​ផ្គត់ផ្គង់​សព្វាវុធ​ជា​ថ្មី​ទៀត​របស់​ក្រុម​បស្ចិម​ប្រទេស​ដល់​អ៊ុយក្រែន។

អ្នក​នាំពាក្យ​រដ្ឋាភិបាល​រុស្ស៊ី លោក Dmitry Peskov បាន​និយាយ​ថា៖ «មិន​គួរ​មេដឹកនាំ​នៃ​ប្រទេស​ទាំង​៣ នេះ និង​ប្រធានាធិបតី​រូម៉ានី ផ្ដោត​តែ​រឿង​ការ​គាំទ្រ​អ៊ុយក្រែន​តាមរយៈ​ការ​ផ្គត់ផ្គង់​សព្វាវុធ​បន្ថែម​ទៀត​ដល់​អ៊ុយក្រែន​នោះ​ទេ»។ លោក​រិះគន់​ថា «ការ​ធ្វើ​ដូច្នេះ​គឺ​គ្មាន​ប្រយោជន៍​អ្វី​ទាល់តែសោះ ហើយ​ផ្ទុយទៅវិញ​វា​បណ្ដាល​ឱ្យ​មាន​ការ​ខូចខាត​បន្ថែម​ទៀត​ដល់​ប្រទេស​អ៊ុយក្រែន​ទៅវិញ​ទេ»

ចំពោះ​អនុរដ្ឋមន្ត្រី​ការពារ​ជាតិ​អ៊ុយក្រែន អ្នកស្រី Hanna Malyar និយាយ​ថា គោលបំណង​យុទ្ធសាស្ត្រ​របស់​រុស្ស៊ី​នៅ​ក្នុង​សង្គ្រាម​នៅ​អ៊ុយក្រែន គឺ​ការ​បំផ្លាញ​ទាំងស្រុង​នូវ​ឋានៈ​ជា​ប្រទេស​ឯករាជ្យ និង​ប្រជាជាតិ​អ៊ុយក្រែន។ អ្នកស្រី​បញ្ជាក់​នៅ​ក្នុង​សន្និសីទ​កាសែត​មួយ​ថា ស្ថានការណ៍​នៅតែ​ពិបាក​សម្រាប់​កងទ័ព​អ៊ុយក្រែន ព្រោះ​រុស្ស៊ី​នៅ​ពេលនេះ គឺ​ការ​ដណ្ដើម​គ្រប់គ្រង​ឱ្យ​បាន​ទាំងស្រុង​លើ​តំបន់ Luhansk និង​តំបន់ Donetsk នៅ​ភាគ​ខាងកើត​ប្រទេស​អ៊ុយក្រែន។

អ្នកស្រី​បញ្ជាក់​ថា អ៊ុយក្រែន​នៅ​ក្រោម​ការ​ដឹកនាំ​របស់​លោក Zelenskyy នឹង​មិន​ប្រគល់​ទឹកដី​ដើម្បី​ជា​ថ្នូរ​នឹង​សន្តិភាព​នោះ​ទេ។

ជា​ការ​កត់សម្គាល់ មេដឹកនាំ​បស្ចិម​ប្រទេស​ដែល​បាន​ធ្វើ​ដំណើរ​ទៅកាន់​រដ្ឋធានី​គៀវ និង​បាន​ជួប​លោក Zelenskyy គឺ​មាន​នាយករដ្ឋមន្ត្រី​អង់គ្លេស មេដឹកនាំ​សហភាព​អឺរ៉ុប នាយករដ្ឋមន្ត្រី​ប្រទេស​កាណាដា អេស្ប៉ាញ ដាណឺម៉ាក ប៉ូឡូញ សាធារណរដ្ឋ​ឆេក សាធារណរដ្ឋ​ស្លូវើនៀ និង​បណ្តា​ប្រទេស​មួយ​ចំនួន​ទៀត រួម​ទាំង​អគ្គលេខាធិការ​អង្គការ​សហប្រជាជាតិ លោក អង់តូនីញូ ហ្គូតារ៉េ ផង​ដែរ។ ក្រៅ​ពី​នេះ មាន​ថ្នាក់​រដ្ឋមន្ត្រី​ការបរទេស និង​រដ្ឋមន្ត្រី​ការពារ​ជាតិ​នៃ​បណ្ដា​បស្ចិម​ប្រទេស និង​សហរដ្ឋ​អាមេរិក​ផង​ដែរ។

អ្នក​សង្កេតការណ៍​បាន​ហៅ​ជំនួប​របស់​មេដឹកនាំ​បស្ចិម​ប្រទេស​ដែល​ទៅ​ជួប​ប្រធានាធិបតី​អ៊ុយក្រែន លោក Zelenskyy គឺជា​សារ​មួយ​សំពង​ទៅលើ​ប្រធានាធិបតី​រុស្ស៊ី វ៉្លាឌីមៀរ ពូទីន ហើយ​ថា​កម្លាំង​សាមគ្គី​ដើម្បី​សេរីភាព​ប្រជាជន​អ៊ុយក្រែន នឹង​មិន​អាច​ចុះថយ​នោះ​ឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស