សាលាដំបូងរាជធានីភ្នំពេញ សម្រេចផ្លាស់ប្ដូរថ្ងៃខែឆ្នាំកំណើតរបស់មេដឹកនាំបក្សកាន់អំណាច លោក ហ៊ុន សែន ពីថ្ងៃទី០៤ ខែមេសា ឆ្នាំ១៩៥១ មកថ្ងៃទី០៥ ខែសីហា ឆ្នាំ១៩៥២ ឬប្តូរពីឆ្នាំថោះ ទៅជាឆ្នាំរោង វិញ បន្ទាប់ពីសាមីខ្លួនបានប្រកាសស្នើសុំប្តូរ។
ប្រធានសាលាដំបូងរាជធានីភ្នំពេញ លោក តាំង ស៊ុនឡាយ បានចេញដីកាសម្រេចផ្លាស់ប្ដូរថ្ងៃខែឆ្នាំកំណើតរបស់មេដឹកនាំបក្សកាន់អំណាច លោក ហ៊ុន សែន ជាផ្លូវការកាលពីថ្ងៃទី២០ ខែមិថុនា ឆ្នាំ២០២២ បន្ទាប់ពីលោក គី តិច មេធាវីរបស់លោក ហ៊ុន សែន បានដាក់លិខិតស្នើសុំសាលាដំបូងរាជធានីភ្នំពេញកែតម្រូវថ្ងៃខែឆ្នាំកំណើតរបស់លោក ហ៊ុន សែន កាលពីដើមខែមិថុនា ឆ្នាំ២០២២ កន្លងទៅនេះ។
ការកែតម្រូវថ្ងៃខែឆ្នាំកំណើតរបស់មេដឹកនាំបក្សកាន់អំណាច លោក ហ៊ុន សែន នេះ ធ្វើឡើងត្រឹមតែរយៈពេល ២០ថ្ងៃប៉ុណ្ណោះបន្ទាប់ពីមេធាវីរបស់ប្រមុខរដ្ឋាភិបាលកម្ពុជាដាក់លិខិតស្នើសុំរួចមក។
កាលពីថ្ងៃទី១ ខែមិថុនា ឆ្នាំ២០២២ កន្លងទៅ មេធាវីរបស់លោក ហ៊ុន សែន គឺលោក គី តិច បានដាក់លិខិតស្នើសុំសាលាដំបូងរាជធានីភ្នំពេញកែតម្រូវថ្ងៃខែឆ្នាំកំណើតរបស់លោក ហ៊ុន សែន ដោយអះអាងថា នៅក្នុងឯកសារអត្រានុកូលដ្ឋាន និងឯកសារសម្គាល់អត្តសញ្ញាណផ្សេងៗ ដូចជាសំបុត្រកំណើត និងសៀវភៅគ្រួសារ ជាដើម បានចុះថ្ងៃខែឆ្នាំកំណើតនៅថ្ងៃទី០៤ ខែមេសា ឆ្នាំ១៩៥១ ប៉ុន្តែកាលបរិច្ឆេទនេះមិនមែនជាថ្ងៃខែឆ្នាំកំណើតពិតរបស់របស់លោក ហ៊ុន សែន នោះឡើយ។
លោក គី តិច អះអាងថា ការប្រើប្រាស់ថ្ងៃខែឆ្នាំកំណើតនៅថ្ងៃទី០៤ ខែមេសា ឆ្នាំ១៩៥១ កន្លងមក បាននាំឱ្យមានការភាន់ច្រឡំពីឥស្សរជនជាតិ និងអន្តរជាតិ ប្រជាពលរដ្ឋខ្មែរ ព្រមទាំងមហាជនទូទៅផងដែរដែលបានផ្ញើសារលិខិតជូនពរលោក ហ៊ុន សែន ដល់ទៅពីរដងឯណោះក្នុងមួយឆ្នាំ។
កាលពីថ្ងៃទី១៧ ខែឧសភា ឆ្នាំ២០២២ ក្នុងពិធីសំណេះសំណាលជាមួយក្រុមគ្រូពេទ្យស្ម័គ្រចិត្តព្យាបាលជំងឺកូវីដ-១៩ លោក ហ៊ុន សែន បានប្រកាសស្នើឱ្យតុលាការកែតម្រូវថ្ងៃ-ខែ-ឆ្នាំកំណើតផ្លូវការឱ្យត្រូវតាមថ្ងៃ-ខែ-ឆ្នាំកំណើតពិតរបស់លោកវិញ គឺចំថ្ងៃទី៥ ខែសីហា ឆ្នាំ១៩៥២ ដោយហេតុថា ថ្ងៃខែឆ្នាំកំណើតផ្លូវការបច្ចុប្បន្នមិនមែនជាថ្ងៃកំណើតពិតប្រាកដរបស់លោកនោះឡើយ។
ជុំវិញការផ្លាស់ប្ដូរថ្ងៃខែឆ្នាំកំណើតនេះ មេដឹកនាំបក្សកាន់អំណាច លោក ហ៊ុន សែន ធ្លាប់បានបញ្ជាក់ថា ការកំណត់យកថ្ងៃទី៤ ខែមេសា ឆ្នាំ១៩៥១ ជាថ្ងៃកំណើតនោះ ដោយសារតែលោកបានយកតាមថ្ងៃទី៤ ខែមេសា ឆ្នាំ១៩៧០ ជាថ្ងៃដែលលោកសម្រេចចូលព្រៃម៉ាគីធ្វើការតស៊ូប្រឆាំងការឈ្លានពានរបស់បរទេសប៉ុណ្ណោះ ហើយការប្តូរឆ្នាំកំណើតពីឆ្នាំ១៩៥២ មកឆ្នាំ១៩៥១ ដោយសារតែកំហុសមកពីអ្នកវាយអង្គុលីលេខដែលបានយកទៅផ្សព្វផ្សាយតាមវិទ្យុតាំងពីក្រោយថ្ងៃរំដោះ ឆ្នាំ១៩៧៩ ដូច្នេះលោកក៏សម្រេចប្រើឆ្នាំកំណើត ១៩៥១ នោះតែម្តងទៅ។
ទាក់ទិននឹងបញ្ហានេះ ក្រុមអ្នកសង្កេតការណ៍លើកឡើងថា ក្រោយរបបប្រល័យពូជសាសន៍ ប៉ុល ពត ពលរដ្ឋខ្មែរស្ទើរទូទាំងប្រទេសបានបាត់បង់លិខិតបញ្ជាក់ថ្ងៃ-ខែ-ឆ្នាំកំណើតគ្រប់គ្នា ដូច្នេះពួកគេបាននាំគ្នាផ្លាស់ប្ដូរថ្ងៃ-ខែ-ឆ្នាំកំណើតរបស់ខ្លួនទៅតាមការចងចាំឡើងវិញ និងនាំគ្នាទៅធ្វើលិខិតបញ្ជាក់ថ្ងៃ-ខែ-ឆ្នាំកំណើតពីសំណាក់អាជ្ញាធរមូលដ្ឋានឡើងវិញផងដែរ។ ប៉ុន្តែការធ្វើលិខិតបញ្ជាក់ថ្ងៃខែឆ្នាំកំណើតនេះ ពួកគេតែងតែតម្រូវឱ្យបង់លុយជូនអាជ្ញាធរមូលដ្ឋានដែលគ្រប់គ្រងដោយបក្សកាន់អំណាចរបស់លោក ហ៊ុន សែន។
ប្រភពដដែលលើកឡើងថា ការផ្លាស់ប្ដូរថ្ងៃខែឆ្នាំកំណើតរបស់លោក ហ៊ុន សែន ក៏អាចចាត់ទុកជាគំរូមួយសម្រាប់អាជ្ញាធរមូលដ្ឋានដែលមានតួនាទីបម្រើប្រជាពលរដ្ឋផងដែរ។ ពួកគេគួរតែធានានូវប្រព័ន្ធរដ្ឋបាលសាធារណៈរបស់គេឱ្យបានល្អប្រសើរ ដើម្បីជួយសម្រួលដល់ពលរដ្ឋក្នុងការធ្វើលិខិតបញ្ជាក់ថ្ងៃ-ខែ-ឆ្នាំកំណើតរបស់ពួកគេ យកទៅប្រើប្រាស់ក្នុងជីវិតប្រចាំថ្ងៃតាមតម្រូវការឱ្យបានទាន់ពេលវេលា ហើយចៀសវាងនូវការទាមទារលុយកាក់ពីពលរដ្ឋនៅតាមមូលដ្ឋាន៕