មជ្ឈមណ្ឌលសិទ្ធិមនុស្សកម្ពុជា (CCHR) នឹងរៀបចំពិធីបែបសាសនា និងចាក់សម្រង់សម្ដីបណ្ឌិត កែម ឡី ពេញមួយខែកក្កដា ខាងមុខនេះ ដើម្បីរម្លឹកខួប ៦ឆ្នាំនៃមរណភាពបណ្ឌិត កែម ឡី។
ក្នុងសេចក្ដីប្រកាសព័ត៌មានរបស់មជ្ឈមណ្ឌលសិទ្ធិមនុស្សកម្ពុជា ចេញផ្សាយកាលពីថ្ងៃទី២៧ ខែមិថុនា ឱ្យដឹងថា ខួប ៦ឆ្នាំនៃមរណភាពបណ្ឌិត កែម ឡី អង្គការនេះនឹងរៀបចំកម្មវិធីពេញមួយខែកក្កដា ចាប់ផ្ដើមពីថ្ងៃទី០១ រហូតដល់ថ្ងៃទី៣១ ខែកក្កដា ឆ្នាំ២០២២។
CCHR ឲ្យដឹងទៀតថា ចាប់ពីថ្ងៃទី២៧ ខែមិថុនា ដល់ថ្ងៃទី៤ ខែកក្កដា ខាងមុខនេះ សាធារណជនអាចចូលរួមប្រកួតប្រជែងកំណាព្យដើម្បីរំឭកដល់ការចងចាំបណ្ឌិត កែម ឡី ហើយចាប់ពីថ្ងៃទី១ ដល់ថ្ងៃទី៣១ ខែកក្កដា CCHR នឹងប្ដូរគម្របទំព័រហ្វេសប៊ុករបស់ស្ថាប័នខ្លួនដោយដាក់រូបភាពបណ្ឌិត កែម ឡី ជំនួសវិញ។
ចំណែកថ្ងៃទី២ ដល់ថ្ងៃទី៧ ខែកក្កដា មជ្ឈមណ្ឌលសិទ្ធិមនុស្សកម្ពុជា នឹងបង្ហោះសម្រង់សម្ដីរបស់បណ្ឌិត កែម ឡី លើទំព័រហ្វេសប៊ុករបស់ខ្លួន ខណៈថ្ងៃទី៦ នឹងរៀបចំពិធីសូត្រមន្តរាប់បាត្រដើម្បីឧទ្ទិសរំឭកខួប ៦ឆ្នាំនៃមរណភាពរបស់បណ្ឌិត កែម ឡី។
មួយវិញទៀត នៅថ្ងៃទី៩ និងទី១០ ខែកក្កដា CCHR នឹងចាក់ផ្សាយឡើងវិញនូវវីដេអូដែលមានចំណងជើងថា «កែម ឡី៖ ដំណើរជីវិតរបស់គាត់» ខណៈថ្ងៃទី១១ ដល់ថ្ងៃទី៣១ ខែកក្កដា ស្ថាប័ននេះនឹងបង្ហោះសារជាសំឡេងនៃការចងចាំរបស់ពីសាធារណជន រួមទាំងបង្ហោះសម្រង់សម្ដីរបស់លោកក្នុងទម្រង់ជាវីដេអូសំឡេងនៅលើទំព័រហ្វេសប៊ុករបស់ខ្លួន។
បណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់ក្នុងហាងស្ដារម៉ាតស្តុបបូកគោ រាជធានីភ្នំពេញ កាលពីថ្ងៃទី១០ ខែកក្កដា ឆ្នាំ២០១៦ ប៉ុន្តែចាប់តាំងពីឆ្នាំ២០១៦ ដល់ឆ្នាំ២០២២ នេះ សមត្ថកិច្ចចាប់ខ្លួនបានឃាតកតែម្នាក់គត់ គឺឈ្មោះ អឿត អាង ហៅខ្លួនឯង «ជួប សម្លាប់» ដែលត្រូវតុលាការផ្ដន្ទាទោសឱ្យជាប់គុកអស់មួយជីវិត។
យ៉ាងណាក៏ដោយ ការបាញ់សម្លាប់បណ្ឌិត កែម ឡី ដែលជាអ្នកស្រាវជ្រាវការអភិវឌ្ឍសង្គម និងជាអ្នកវិភាគនយោបាយ បានធ្វើឡើងបន្ទាប់ពីលោកបានធ្វើអត្ថាធិប្បាយជុំវិញរបាយការណ៍របស់អង្គការ Global Witness ដែលមានឈ្មោះថា «អាណាចក្រអាជីវកម្មត្រកូល ហ៊ុន នៅកម្ពុជា»។
ក្នុងរបាយការណ៍នោះ បានលាតត្រដាងអំពីការក្ដោបក្ដាប់អាជីវកម្មរបស់ក្រុមគ្រួសារលោក ហ៊ុន សែន ដែលមានតម្លៃរាប់រយលានដុល្លារ។
ទោះបីជាតុលាការកម្ពុជាបានផ្ដន្ទាទោសបុរសឈ្មោះ អឿត អាង ឬ ជួប សម្លាប់ ដែលត្រូវតុលាការផ្ដន្ទាទោសឱ្យជាប់គុកអស់មួយជីវិតក្ដី ប៉ុន្តែក្រុមគ្រួសារ និងសង្គមស៊ីវិលជាតិ រួមទាំងអន្តរជាតិ នៅតែអំពាវនាវទៅរដ្ឋាភិបាលកម្ពុជាឱ្យស្វែងរកអ្នកពាក់ព័ន្ធផ្សេងទៀតនៃការបាញ់សម្លាប់បណ្ឌិត កែម ឡី មកផ្ដន្ទាទោសតាមច្បាប់ ដើម្បីផ្ដល់យុត្តិធម៌ដល់ជនរងគ្រោះ និងគ្រួសារ រួមទាំងលុបបំបាត់វប្បធម៌និទ្ទណ្ឌភាពនៅកម្ពុជាផងដែរ៕