ប្រធានាធិបតីឥណ្ឌូនេស៊ី បានបិទបញ្ចប់បេសកកម្មរបស់លោកហើយបន្ទាប់ពីលោកបានជួបទាំងសមភាគីអ៊ុយក្រែន នៅទីក្រុងគៀវ និងបានជួបសមភាគីរុស្ស៊ី នៅទីក្រុងមូស្គូ។
ប្រធានាធិបតីឥណ្ឌូនេស៊ី លោក ចូកូ វីដូដូ ក៏បានជូនលិខិតរបស់លោក ហ្សេឡេនស្គី ដល់ដៃលោក ពូទីន ទៀតផងដែរ។ លោក ចូកូ បានថ្លែងក្នុងសន្និសីទកាសែតរួមគ្នាជាមួយលោកប្រធានាធិបតី ពូទីន ថា លិខិតរបស់លោក ហ្សេឡេនស្គី គឺលោកបានជូនទៅលោក ពូទីន រួចហើយ។
តាមសារព័ត៌មាន Coconuts Jakarta ដែលចុះផ្សាយនៅថ្ងៃទី១ កក្កដា បានឱ្យដឹងថា លោក ចូកូ បានទៅជួបលោក ហ្សេឡេនស្គី នៅទីក្រុងគៀវ នៅថ្ងៃទី២៩ មិថុនា ហើយបានទៅជួបលោក ពូទីន នៅថ្ងៃទី៣០ មិថុនា។ ប្រធានាធិបតីឥណ្ឌូនេស៊ី លោក ចូកូ គឺជាមេដឹកនាំអាស៊ីដំបូងគេដែលបានទៅកាន់ទឹកដីមួយនៅអឺរ៉ុប ដែលធ្លាក់ក្នុងសមរភូមិសង្គ្រាមដ៏ធ្ងន់ធ្ងរដោយសារមហាអំណាចរុស្ស៊ី លើកទ័ពឈ្លានពានអ៊ុយក្រែន ក្រោមការបញ្ជារបស់លោក ពូទីន។
ដំណើរបេសកកម្មរបស់មេដឹកនាំមួយនៃសមាគមអាស៊ានរូបនេះ ត្រូវបានគេមើលឃើញថា មេដឹកនាំប្រទេសដ៏ធំមួយនេះចង់ធ្វើជាស្ពានដើម្បីតភ្ជាប់ឡើងវិញនូវទំនាក់ទំនងរវាងលោក ហ្សេឡេនស្គី ប្រធានាធិបតីអ៊ុយក្រែន និងលោក ពូទីន ប្រធានាធិបតីរុស្ស៊ី ហើយឈានទៅរកការចរចាដើម្បីសន្តិភាព និងការបញ្ចប់សង្គ្រាម។
តែយ៉ាងណា គឺជាការចម្លែកជាងគេបន្តិចបើនិយាយអំពីមេដឹកនាំមួយចំនួន រួមទាំងលោកអគ្គលេខាធិការអង្គការសហប្រជាជាតិផង ដែលបានទៅជួបលោក ហ្សេឡេនស្គី គឺពួកគាត់បានទៅកាន់ទីក្រុងមូស្គូ មុននឹងទៅទីក្រុងគៀវ។ មានន័យថា មេដឹកនាំទាំងនោះជួបលោក ពូទីន មុននឹងជួបលោក ហ្សេឡេនស្គី។ តែសម្រាប់លោក ចូកូ ត្រូវទៅជួបលោក ហ្សេឡេស្គី មុននឹងលោកទៅជួបលោក ពូទីន។ ដូចនេះហើយបានជាលោក ហ្សេឡេនស្គី សម្រេចផ្ញើលិខិតតាមរយៈលោក ចូកូ ទៅជូនលោក ពូទីន។
បើតាមលោក ចូកូ គឺលោក ពូទីន បានទទួលលិខិតរបស់លោក ហ្សេឡេនស្គី ពីដៃលោកដោយផ្ទាល់។
យ៉ាងណាក៏ដោយ លោក ចូកូ មិនបានអះអាងថា តើខ្លឹមសារក្នុងលិខិតរបស់លោក ហ្សេឡេនស្គី ដែលផ្ញើជូនលោក ពូទីន បានសរសេររៀបរាប់អ្វីខ្លះនោះទេ គ្រាន់តែលោកសង្ឃឹមថា តាមរយៈលិខិតនេះអាចនឹងនាំឲ្យមានការចាប់ផ្ដើមទំនាក់ទំនងគ្នារវាងក្រុងមូស្គូ និងក្រុងគៀវ ឡើងវិញ ទោះជាសង្គ្រាមកំពុងមានសភាពធ្ងន់ធ្ងរក៏ដោយ។
ប្រធានាធិបតីឥណ្ឌូនេស៊ី លោក ចូកូ បានបញ្ជាក់ដូចនេះថា៖ «ទោះបីជាស្ថានការណ៍លំបាកយ៉ាងនេះក្ដី គឺត្រូវតែឈានទៅរកការចរចានឹងគ្នា ប្រសើរជាងការធ្វើសង្គ្រាមជាមួយគ្នា»។ លោកបន្តថា «បើយោងតាមរដ្ឋធម្មនុញ្ញឥណ្ឌូនេស៊ី គឺបានតម្រូវឲ្យប្រទេសរបស់លោកជួយរកសន្តិភាពសម្រាប់ពិភពលោក។ ដូចនេះហើយបានជាលោកត្រូវទៅជួបមេដឹកនាំប្រទេសពីរនេះ»។
ការបញ្ជាក់របស់លោក ចូកូ មាននៅលើទំព័រទ្វីតធើរបស់លោក។ លោកអះអាងថា នេះជាបេសកកម្មឆន្ទៈរបស់លោកដែលចង់ឱ្យសង្គ្រាមត្រូវបញ្ចប់ក្នុងពេលឆាប់ៗនេះ។
ក្រោយពីលោក ពូទីន បានថ្លែងអំណរគុណចំពោះលោក ចូកូ គឺប្រធានាធិបតីនៃប្រទេសមួយនៃសមាគមអាស៊ានរូបនេះនៅតែប្ដេជ្ញារឹតចំណងទាក់ទងទ្វេភាគីរុស្ស៊ី-ឥណ្ឌូនេស៊ីទៅមុខទៀត។
បើតាមសារព័ត៌មាន Coconuts Jakarta លោក ចូកូ បានស្នើឱ្យរុស្ស៊ីបើកផ្លូវសមុទ្រដើម្បីដឹកស្បៀង និងគ្រាប់ធញ្ញជាតិ និងស្រូវសាលីរបស់អ៊ុយក្រែន ទៅកាន់ទីផ្សារនៅអាស៊ី និងអាហ្វ្រិក ដែលលោកថានៅពេលដែលរុស្ស៊ី និងអ៊ុយក្រែន ឈ្លោះគ្នា គឺបណ្តាលឲ្យទំនិញទូទៅឡើងថ្លៃជាខ្លាំង ជាពិសេសគឺប្រេងឥន្ធនៈ ហើយសម្រាប់ឥណ្ឌូនេស៊ី ក៏រងផលប៉ះពាល់ខ្លាំងដែរ។
តែជាមួយគ្នានេះ ឥណ្ឌូនេស៊ី ដែលជាប្រធានប្តូរវេននៃកិច្ចប្រជុំរបស់ប្រទេសមានសេដ្ឋកិច្ចជឿនលឿន G-20 គឺត្រូវដឹកនាំការប្រជុំទាំងថ្នាក់រដ្ឋមន្ត្រីសេដ្ឋកិច្ច ប្រមុខរដ្ឋ និងប្រមុខរដ្ឋាភិបាលនៃប្រទេសទាំង ២០ នេះនៅខែវិច្ឆិកា ឆ្នាំ២០២២ ខាងមុខនេះ។
តាមការបញ្ជាក់របស់លោក ចូកូ គឺលោកទៅជួបលោក ពូទីន និងលោក ហ្សេឡេនស្គី ដើម្បីអញ្ជើញពួកគេទៅចូលរួមកិច្ចប្រជុំនេះនៅលើកោះបាលី ប្រទេសឥណ្ឌូនេស៊ី នៅខែវិច្ឆិកា ខាងមុខនេះ។ ចំណែកលោក ហ្សេឡេនស្គី ត្រូវបានអញ្ជើញឲ្យចូលរួមក្នុងឋានៈជាភ្ញៀវ ព្រោះអ៊ុយក្រែនពុំទាន់ក្លាយជាសមាជិកនៃប្រទេស G-20 នៅឡើយទេ។
សម្រាប់ប្រធានាធិបតីអ៊ុយក្រែន លោក ហ្សេឡេនស្គី បានសាទរចំពោះការអញ្ជើញឱ្យលោកថ្លែងអំពីការអភិវឌ្ឍប្រទេសអ៊ុយក្រែន។ លោក ហ្សេឡេនស្គី បានប្រាប់លោក ចូកូ ថា លោកនឹងចូលរួមជំនួបកំពូលរបស់ក្រុមប្រទេសដែលមានសេដ្ឋកិច្ចជឿនលឿនទាំង ២០ នេះ ប៉ុន្តែលោកថាការចូលរួមរបស់លោកនឹងអាស្រ័យលើស្ថានភាពសន្តិសុខនៃប្រទេសអ៊ុយក្រែន។
ចំពោះលោក ពូទីន វិញ ពុំបាននិយាយថាទៅ ឬមិនទៅនោះទេ តែអ្នកនាំពាក្យវិមានក្រឹមឡាំង លោក ឌីមីទ្រី ផេស្កូវ ថ្លែងថា ការចូលរួមប្រជុំ G-20 របស់លោក ពូទីន គឺអាស្រ័យនឹងស្ថានការណ៍ជាក់ស្តែងតែប៉ុណ្ណោះ។
យ៉ាងនេះក្ដី មេដឹកនាំសហរដ្ឋអាមេរិក អង់គ្លេស ជប៉ុន អូស្ត្រាលី និងប្រទេសជាច្រើនទៀតមិនចង់ឃើញវត្តមានលោក ពូទីន នៅលើវេទិកានោះទេ។ ពួកគេព្រមានថានឹងធ្វើពហិការនៃកិច្ចប្រជុំកំពូលនៅខែវិច្ឆិកា បើមានវត្តមានរបស់លោក ពូទីន ឬក៏ពួកគេអាចដើរចេញពីវេទិកានេះនៅពេលលោក ពូទីន ឡើងលើវេទិកាថ្លែងសុន្ទរកថា៕