 ឱ្យបានត្រឹមត្រូវស្របទៅតាមច្បាប់ស្ដីពីការងារកម្ពុជា ខណៈការចរចាលើកទី១៣ នេះនៅបន្តជាប់គាំងដដែល។){kind=link}
ក្រសួងការងារ អះអាងថា ខ្លួននឹងព្យាយាមដើរតួនាទីក្នុងការសម្របសម្រួលវិវាទការងារនៃបុគ្គលិកក្រុមហ៊ុនណាហ្គាវើលដ៍ (Naga World) ឱ្យបានត្រឹមត្រូវស្របទៅតាមច្បាប់ស្ដីពីការងារកម្ពុជា ខណៈការចរចាលើកទី១៣ នេះនៅបន្តជាប់គាំងដដែល។
ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងស្ដីពីដំណើរការនៃការដោះស្រាយវិវាទការងាររួមនៅក្រុមហ៊ុនណាហ្គាវើលដ៍ កាលពីថ្ងៃទី៦ ខែកក្កដា ឆ្នាំ២០២២ ថា តំណាងភាគីកម្មករនិយោជិតបានសំណូមពរទៅកាន់តំណាងក្រុមហ៊ុនឱ្យទទួលយកកម្មករនិយោជិតដែលខ្លួនបានបញ្ឈប់ចូលធ្វើការងារវិញ ដោយដោះដូរជាមួយកម្មករនិយោជិតដែលកំពុងបម្រើការងារស្ម័គ្រចិត្តលាឈប់ជំនួសប្រហែល ៣០០នាក់ ប៉ុន្តែភាគីខាងក្រុមហ៊ុនត្រូវអនុវត្តទៅតាមច្បាប់ការងាររបស់កម្ពុជាផងដែរ។ ជាងនេះទៀត តំណាងភាគីកម្មករនិយោជិតក៏បានស្នើសុំឱ្យតំណាងក្រុមហ៊ុនទម្លាក់ចោលរាល់បទចោទទាំងអស់លើថ្នាក់ដឹកនាំសហជីព និងសមាជិកដែលត្រូវបានចោទប្រកាន់។
ពួកគេក៏បានស្នើសុំឱ្យក្រុមហ៊ុនបញ្ឈប់ការរើសអើងកូដករតាមរយៈនៃការផ្អាកវិភាគទាន ប.ស.ស ដែលក្រុមហ៊ុនបានផ្តាច់អត្ថប្រយោជន៍លើស្ត្រីមានផ្ទៃពោះ ស្ត្រីដែលសម្រាក និងកំពុងលំហែមាតុភាពចាប់តាំងពីពួកគេបានចូលរួមធ្វើកូដកម្មមក។
ក្រសួងការងារកម្ពុជា អះអាងថា ខាងភាគីតំណាងក្រុមហ៊ុនណាហ្គាវើលដ៍ បានច្រានចោលទាំងស្រុងនូវសំណើទាំងអស់របស់តំណាងភាគីកម្មករនិយោជិត និងជំរុញឱ្យកម្មករនិយោជិតដែលខ្លួនបានបញ្ឈប់ទៅទទួលយកការសម្របសម្រួលរបស់ក្រសួងការងារ ដើម្បីបញ្ចប់វិវាទនេះផងដែរ។
ការចរចារកដំណោះស្រាយវិវាទរវាងបុគ្គលិកនៃក្រុមណាហ្គាវើលដ៍ជាមួយថៅកែក្រុមហ៊ុននេះ បានធ្វើឡើងជាង ១០លើករួចមកហើយ ប៉ុន្តែភាគីខាងក្រុមហ៊ុនបានច្រានចោលសំណើរបស់កម្មករនិយោជិតរហូតមក។
កាលពីខែមេសា ឆ្នាំ២០២១ កម្មករនិយោជិតនៃក្រុមហ៊ុនណាហ្គាវើលដ៍ ចំនួន ៣៦៥នាក់ ត្រូវបានបញ្ឈប់ពីការងារដោយបង្ខំ និងមិនបានផ្តល់សំណងទៅតាមច្បាប់ការងាររហូតមកដល់ពេលនេះមានរយៈជាង ១ឆ្នាំហើយ។
ការរំលោភសិទ្ធិការងាររបស់ក្រុមហ៊ុនណាហ្គាវើលដ៍នេះ នៅតែបន្តដោយគ្មានដោះស្រាយជូនកម្មករនិយោជិតពីអាជ្ញាធរពាក់ព័ន្ធ ដូចជាក្រសួងការងារកម្ពុជា ជាដើម។ ជាងនេះទៀត មិនត្រឹមតែគ្មានដំណោះស្រាយនោះទេ កម្មករដែលធ្វើកូដកម្មទាមទាររកយុត្តិធម៌ទាំងនោះ ក៏ត្រូវអាជ្ញាធរកម្ពុជាចាប់ខ្លួន និងបង្ក្រាបដោយហិង្សាថែមទៀត ក្នុងនោះមានកម្មការិនីខ្លះត្រូវបានអាជ្ញាធរវាយនឹងដំបងរហូតដល់រលូតកូនថែមទៀតផង។
កាលពីថ្ងៃទី៥ ខែកក្កដា ឆ្នាំ២០២២ សហភាពសហជីព បណ្ដាញសហគមន៍ អង្គការសង្គមស៊ីវិលចំនួន ៤០ស្ថាប័ន បានចេញលិខិតចំហថា ការពន្យារពេលមិនព្រមដោះស្រាយវិវាទការងាររបស់កម្មករនិយោជិតនៃក្រុមហ៊ុនណាហ្គាវើលដ៍ គឺជាចេតនាបំបាក់ស្មារតីចលនាសហជីពឯករាជ្យប្រកបដោយវិជ្ជាជីវៈ ដែលធានាដោយអនុសញ្ញាស្នូលផ្នែកការងារ រដ្ឋធម្មនុញ្ញកម្ពុជា ច្បាប់ស្ដីពីការងារ និងច្បាប់ស្ដីពីសហជីពយ៉ាងធ្ងន់ធ្ងរ។
មាត្រា៣៤ នៃច្បាប់ស្ដីពីការងារ បានចែងថា អធិការកិច្ចការងារត្រូវមានបេសកកម្មធានាដល់ការអនុវត្តច្បាប់ការងារ និងត្រួតពិនិត្យការអនុវត្តបទបញ្ញត្តិដែលទាក់ទងនឹងលក្ខខណ្ឌជីវភាពនៃកម្មករនិយោជិត និងគ្រួសារនៃជនទាំងនោះ ប៉ុន្តែការអនុវត្តរបស់ក្រសួងការងារកន្លងមក គឺធ្វើឡើងផ្ទុយស្រឡះពីមាត្រានៃច្បាប់ការងារដែលបានចែងនេះទាំងស្រុង៕