 ស្នើឱ្យរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ គាំទ្រការអនុម័តអនុសញ្ញាបំពេញបន្ថែមរបស់អង្គការអន្តរជាតិខាងការងារ (ILO) ក្នុងសន្និសីទការងារអន្តរជាតិឆ្នាំ២០២៥ ស្ដីពីការធ្វើឲ្យសម្រេចបាននូវការងារសមរម្យសម្រាប់កម្មករក្នុងប្រព័ន្ធឌីជីថល។){kind=link}
សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ស្នើឱ្យរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ គាំទ្រការអនុម័តអនុសញ្ញាបំពេញបន្ថែមរបស់អង្គការអន្តរជាតិខាងការងារ (ILO) ក្នុងសន្និសីទការងារអន្តរជាតិឆ្នាំ២០២៥ ស្ដីពីការធ្វើឲ្យសម្រេចបាននូវការងារសមរម្យសម្រាប់កម្មករក្នុងប្រព័ន្ធឌីជីថល។
សមាគម IDEA បានផ្សព្វផ្សាយលិខិតដាក់ជូនរដ្ឋមន្ត្រីក្រសួងការងារ កាលពីចុងសប្តាហ៍នេះថា ខ្លួនជឿជាក់ថាអនុសញ្ញាបំពេញបន្ថែមនេះ គឺជាជម្រើសដ៏ល្អបំផុតដើម្បីជំរុញរដ្ឋាភិបាលបង្កើតនូវបទប្បញ្ញត្តិសម្រាប់ប្រតិបត្តិការលើក្រុមហ៊ុនឌីជីថលនៅកម្រិតជាតិ ដើម្បីធានាបាននូវការប្រកួតប្រជែងការងារ បទប្បញ្ញត្តិ និងគោលនយោបាយ។
ប្រភពដដែល លើកឡើងថា សព្វថ្ងៃនេះ ប្រាក់ចំណេញនៃរបរនេះកំពុងហូរទៅរកក្រុមហ៊ុនបច្ចេកវិទ្យាធំៗដែលបានបង្កើតក្រុមហ៊ុនឌីជីថលទាំងនេះ ចំណែកឯហានិភ័យផ្សេងៗបានកើតឡើងចំពោះកម្មករ ហើយដោយសារតែទំនាក់ទំនងការងារមិនល្អនៅក្នុងក្រុមហ៊ុនឌីជីថលនេះ រដ្ឋាភិបាលក៏កំពុងបាត់បង់នូវភាគទានផ្នែកសន្តិសុខសង្គមពីថៅកែក្រុមហ៊ុនដែលជាតម្រូវការចាំបាច់ផងដែរ។
IDEA បញ្ជាក់ថា លិខិតុបករណ៍ ILO នេះ អាចផ្តល់នូវតុល្យភាព ការការពារកម្មករ និងបង្កើតឱកាសការងារជាច្រើនថែមទៀត ខណៈកម្មករនិយោជិតរំពឹងថាលិខិតុបករណ៍នាពេលអនាគតនេះ ក៏នឹងដាក់ចេញនូវគោលការណ៍ជាកំហិតសម្រាប់ការពារកម្មករឌីជីថលទាំងអស់ផងដែរ។
នៅថ្ងៃទី២ ខែមិថុនា ឆ្នាំ២០២៥ នេះ រដ្ឋសភា និងព្រឹទ្ធសភា បានប្រជុំសមាជលើកដំបូងដោយពិភាក្សាលើប្រព័ន្ធគាំពារសង្គម ដូចជា ការថែទាំសុខភាព ក្របខ័ណ្ឌគោលនយោបាយជាតិគាំពារសង្គម និងសេដ្ឋកិច្ចក្រៅប្រព័ន្ធផងដែរ។
កាលពីអំឡុងខែតុលា ឆ្នាំ២០២២ អង្គការអន្តរជាតិខាងការងារ (ILO) បានកោះប្រជុំអ្នកជំនាញដើម្បីដោះស្រាយបញ្ហាប្រឈមដែលបង្កឡើងចំពោះសហជីព និងកម្មករក្នុងប្រព័ន្ធឌីជីថល ដែលបានក្លាយជាផ្នែកដ៏សំខាន់មួយនៃទីផ្សារការងារសម័យទំនើប។
អំឡុងពេលនៃការពិភាក្សានេះ រដ្ឋាភិបាលជាច្រើនប្រទេស បានសម្ដែងការព្រួយបារម្ភអំពីគម្លាតបទប្បញ្ញត្តិដែលមានស្រាប់ និងបានសង្កត់ធ្ងន់លើតម្រូវការដ៏សំខាន់សម្រាប់បទប្បញ្ញត្តិនៅកម្រិតអង្គការអន្តរជាតិខាងការងារ (ILO)៕
© 2025, ឌឹ ខេមបូឌា ដេលី. All rights reserved.