ក្រុមយុវជនខ្មែរថាវរៈដែលគ្រោងធ្វើពិធីរំឭកខួបនៃមរណភាពបណ្ឌិត កែម ឡី នឹងធ្វើពិធីកោរសក់នៅផ្ទះរបស់បណ្ឌិត កែម ឡី នៅខេត្តតាកែវ ចំនួន ៤នាក់ រួមមានកញ្ញា ឈឿន ដារ៉ាវី លោក ហ៊ុន វណ្ណៈ លោក ស្វាយ សំណាង និងកញ្ញា ចំណាប់ ដោយកំណត់យកថ្ងៃទី៩ ខែកក្កដា ឆ្នាំ២០២២ ខាងមុខនេះ។
សមាជិកយុវជនខ្មែរថាវរៈ កញ្ញា ឈឿន ដារ៉ាវី បានប្រាប់សារព័ត៌មាន The Cambodia Daily នៅថ្ងៃទី៨ កក្កដា នេះថា ពិធីរំឭកខួបនៃមរណភាពបណ្ឌិត កែម ឡី នេះគឺមានការចូលរួមពីអង្គការសង្គមស៊ីវិលមួយចំនួនផងដែរ ដើម្បីបង្ហាញមជ្ឈដ្ឋានជាតិ និងអន្តរជាតិក្នុងការទាមទាររកយុត្តិធម៌ជូនបណ្ឌិត កែម ឡី តាមវិធីអហិង្សា និងដើម្បីជំរុញឱ្យរដ្ឋាភិបាលកម្ពុជាបន្តស្វែងរកឃាតកពិតមកកាត់ទោសចំពោះមុខច្បាប់ផងដែរ។
សមាជិកយុវជនខ្មែរថាវរៈ កញ្ញា ឈឿន ដារ៉ាវី លើកឡើងថា បើទោះបីជាតុលាការបានកាត់ទោសបុគ្គលដែលបានសារភាពថាខ្លួនជាឃាតកបាញ់សម្លាប់បណ្ឌិត កែម ឡី ក៏ដោយ ប៉ុន្តែសាធារណជននៅតែយល់ថា បុគ្គលនោះគ្រាន់តែជាឃាតកសិប្បនិមិត្តប៉ុណ្ណោះ ចំណែកឃាតកពិត និងអ្នកបញ្ជាពីក្រោយខ្នង នៅតែដើរហើរដោយសេរីក្រៅប្រព័ន្ធច្បាប់ដដែលក្នុងពេលបច្ចុប្បន្ននេះ។
ការកោរសក់របស់សកម្មជនសិទ្ធិមនុស្សនេះ ធ្វើឡើងដើម្បីរំឭកខួបនៃការបាញ់សម្លាប់បណ្ឌិត កែម ឡី ផង និងដើម្បីទាមទាររកយុត្តិធម៌ជូនលោកដែលត្រូវឃាតកបាញ់សម្លាប់កាលពីឆ្នាំ២០១៦ កន្លងទៅផងដែរ។
កាលពីថ្ងៃទី១០ ខែកក្កដា ឆ្នាំ២០១៦ បណ្ឌិត កែម ឡី ត្រូវបានខ្មាន់កាំភ្លើងបាញ់ចំនួនបីគ្រាប់ស្លាប់នៅនឹងកន្លែងវេលាម៉ោងប្រមាណ ៩ព្រឹកនៅក្នុងហាងស្តារម៉ាតនៃស្ថានីយប្រេងឥន្ធនៈកាល់តិច (Caltex) ត្រង់ចំណុចស្តុបបូកគោខណ្ឌចំការមន រាជធានីភ្នំពេញ។
ឃាតកម្មនេះកើតឡើង ២ថ្ងៃក្រោយពីបណ្ឌិត កែម ឡី បានលាតត្រដាងផែនការលក់ជាតិ និងការគ្រប់គ្រងជំនួញក្នុងប្រទេសកម្ពុជាស្ទើរតែទាំងអស់ដែលមានទឹកប្រាក់រាប់រយពាន់លានដុល្លារសហរដ្ឋអាមេរិករបស់បក្ខពួកក្រុមគ្រួសារត្រកូល «ហ៊ុន» តាមរបាយការណ៍អង្គការ គ្លបល វីនេស (global witness)។
កាលនៅមានជីវិត បណ្ឌិត កែម ឡី តែងតែផ្តាំកូនខ្មែរគ្រប់រូបថា នៅពេលដែលលោកវិភាគលើបញ្ហាសង្គមម្តងៗ លោកមិនដែលគិតថាលោកនឹងមានជីវិតរស់នៅនោះទេ ហើយលោកក៏បានត្រៀមលិខិតឆ្លងដែនដែលមានទិដ្ឋាការបីរួចជាស្រេចហើយដែរក្នុងដំណើរឆ្ពោះទៅរកការជួយប្រទេសជាតិរបស់លោក គឺ៖
- ទី១ ទៅមន្ទីរពេទ្យ
- ទី២ ទៅពន្ធនាគារ
- ទី៣ ទៅវត្តព្រះពុទ្ធ។
ក្រុមអ្នកសង្កេតការណ៍លើកឡើងថា ក្រោមការដឹកនាំជាង ៤០ឆ្នាំរបស់លោក ហ៊ុន សែន កន្លងមកនេះ អំពើឃាតកម្មធំៗក្រៅប្រព័ន្ធច្បាប់ជាច្រើនមិនត្រូវបានផ្តល់យុត្តិធម៌ពិតប្រាកដជូនជនរងគ្រោះ និងក្រុមគ្រួសារជនរងគ្រោះនោះឡើយ ហើយឃាតកម្មលើបណ្ឌិត កែម ឡី នេះក៏មិនមែនជាលើកចុងក្រោយនោះដែរឱ្យតែកម្ពុជាស្ថិតក្រោមការដឹកនាំរបស់បក្សកាន់អំណាចបន្តទៀតនោះ៕