26 C
Phnom Penh

ប្អូនស្រី​លោក ហ៊ុន សែន ព្រមាន​ប្តឹង​លោក ផែង វណ្ណៈ ពី​បទ​ញុះញង់​ឱ្យ​មាន​ការ​រើសអើង

ដោយ ឌឹ ខេមបូឌា ដេលី

បទវិភាគ

លោកស្រី ហ៊ុន ស៊ីណាត ប្អូនស្រី​បង្កើត​បុរស​ខ្លាំង​កម្ពុជា លោក ហ៊ុន សែន ព្រមាន​ប្តឹង​អ្នក​ធ្វើ​អត្ថាធិប្បាយ​គាំទ្រ​គណបក្ស​ប្រជាជន​កម្ពុជា​មួយ​រូប​តាម​បណ្ដាញ​សង្គម​ហ្វេសប៊ុក​ឈ្មោះ Pheng Vannak ពី​បទ​ញុះញង់​ឱ្យ​មាន​ការ​រើសអើង និង​គំរាម​មិន​យោគយល់​ជាដាច់ខាត​ចំពោះ​អ្នក​ហ៊ាន​អន្តរាគមន៍។

ប្អូនស្រី​បង្កើត​មេដឹកនាំ​បក្ស​កាន់​អំណាច អ្នកស្រី ហ៊ុន ស៊ីណាត បាន​ផ្សាយ​ផ្ទាល់​លើ​ទំព័រ​ហ្វេសប៊ុក​ខ្លួន​កាលពី​ថ្ងៃទី​៧ ខែ​កក្កដា ឆ្នាំ​២០២២ ដោយ​គំរាម​ថា ប្រសិនបើ​មាន​អ្នក​ណា​ហ៊ាន​អន្តរាគមន៍​លើ​បណ្តឹង​របស់​អ្នកស្រី​ដែល​ប្តឹង​លោក ផែង វណ្ណៈ អ្នកស្រី​នឹង​មិន​យោគយល់​ជាដាច់ខាត ព្រោះ​ថា​លោក ផែង វណ្ណៈ បាន​រិះគន់​វាយប្រហារ​លើ​សេចក្តី​ថ្លៃថ្នូរ​របស់​លោកស្រី​យ៉ាង​ធ្ងន់ធ្ងរ​ដែល​មិន​អាច​លើកលែង​ឱ្យ​បាន។

លោកស្រី ហ៊ុន ស៊ីណាត អះអាង​ថា ការ​លើកឡើង​របស់​លោក ផែង វណ្ណៈ បាន​ចោទ​អ្នកស្រី​ថា​ជា​ខ្នង​បង្អែក​ជនល្មើស​ច្បាប់​មួយ​រូប​ដែល​ជា​អ្នក​ធ្វើ​អត្ថាធិប្បាយ​បាល់ទាត់​ឈ្មោះ​ថា ជឿន ប៊ុនចក់ ហៅ ជីងចក់ កាលពី​ពេល​ថ្មីៗ​នេះ។

អ្នកស្រី​ចាត់ទុក​ការ​ចោទប្រកាន់​របស់​លោក ផែង វណ្ណៈ ថា​ជា​ការ​ញុះញង់​ឱ្យ​មាន​ការ​រើសអើង​ចំពោះ​អ្នកស្រី​យ៉ាង​ខ្លាំង។

ប្អូនស្រី​បង្កើត​របស់​លោក ហ៊ុន សែន រូប​នេះ​បាន​បដិសេធ​ដាច់អហង្ការ​ថា អ្នកស្រី​មិនមែន​ជា​អ្នក​នៅ​ពីក្រោយ​ជនល្មើស​ណា​មួយ​នោះ​ទេ ប៉ុន្តែ​អ្នក​ដែល​ចង់​ជួប​អ្នកស្រី ឬ​ចង់​ធ្វើ​កម្មវិធី​មនុស្សធម៌​នានា​ជាមួយ​អ្នកស្រី គឺ​អ្នកស្រី​មិន​ដែល​ហាមឃាត់​ឡើយ ព្រោះ​ថា​អ្នកស្រី​តែង​ប្រកាន់​ឥរិយាបថ​បង្កើត​ទំនាក់ទំនង​មិត្តភាព​ដោយ​គ្មាន​ការ​រើសអើង ហើយ​ក៏​មិនមែន​ជា​ខ្នងបង្អែក​ឱ្យ​បុគ្គល​ល្មើស​ច្បាប់​ណា​មួយ​ដូច​ការ​ចោទប្រកាន់​របស់​លោក ផែង វណ្ណៈ នោះ​ដែរ។

កាលពី​ថ្ងៃទី​៦ ខែ​កក្កដា ឆ្នាំ​២០២២ អ្នក​ធ្វើ​អត្ថាធិប្បាយ​លើ​បណ្ដាញ​សង្គម​គាំទ្រ​លោក ហ៊ុន សែន លោក ផែង វណ្ណៈ បាន​ផ្សាយ​លើ​គណនី​ហ្វេសប៊ុក​របស់​ខ្លួន​ជុំវិញ​ជម្លោះ​ប្តី​ប្រពន្ធ​មួយ​គូ គឺ​អ្នក​លក់​ផលិតផល​អនឡាញ អ្នកនាង ទ្រិញ ផល្លា និង​អ្នក​ធ្វើ​អត្ថាធិប្បាយ​កម្មវិធី​បាល់ទាត់​តាម​បណ្ដាញ​សង្គម​ដែល​ត្រូវ​ជា​ប្តី គឺ​លោក ជឿន ប៊ុនចក់ ហៅ ជីងចក់ ថា​ពួកគេ​ម្នាក់ៗ​មិន​គួរ​ទៅ​នាំគ្នា​ទៅ​រក​អ្នក​ជួយ​ពីក្រោយ​ខ្នង​រៀងៗ​ខ្លួន​នោះ​ទេ គួរតែ​ទុក​ឱ្យ​ច្បាប់​ជា​អ្នក​ដោះស្រាយ​ចំពោះ​ជម្លោះ​របស់​ខ្លួន​ទើប​ជា​រឿង​ត្រឹមត្រូវ។

លោក ផែង វណ្ណៈ លើកឡើង​ថា ប្តី​ប្រពន្ធ​មួយ​គូ​នេះ​នៅ​ពេល​មាន​ជម្លោះ​នាំគ្នា​រត់​រក​អ្នក​ធំ​ឱ្យ​ជួយ​ដូច​គ្នា ក្នុង​នោះ​អ្នកនាង ទ្រិញ ផល្លា រត់​ទៅ​រក​លោក ហ៊ុន សែន ឱ្យ​ជួយ ចំណែក​បុរស​ជា​ប្តី​រត់​ទៅ​រក​អ្នកស្រី ហ៊ុន ស៊ីណាត ដែល​ជា​ប្អូនស្រី​បង្កើត​របស់​លោក ហ៊ុន សែន ឱ្យ​ជួយ ប៉ុន្តែ​កន្លងមក លោក ហ៊ុន សែន តែង​ណែនាំ​កុំ​ឱ្យ​ពួកគេ​ឈ្លោះ​ហែកហួរ​គ្នា​តាម​បណ្ដាញ​សង្គម​ហ្វេសប៊ុក។

ទាក់ទិន​នឹង​ការ​ព្រមាន​ប្តឹង​នេះ កាលពី​ដើម​ខែ​មេសា ឆ្នាំ​២០១៩ លោក ផែង វណ្ណៈ ធ្លាប់​ត្រូវ​សមត្ថកិច្ច​ចាប់​ឃុំ​ខ្លួន​អស់​រយៈពេល​ជាង ២​ខែ​ម្តង​រួច​មក​ហើយ ក្រោយពី​មាន​បណ្តឹង​មួយ​ក្រោម​បទ​ចោទ​ជាច្រើន​ករណី ដូចជា​បទ​បរិហារកេរ្តិ៍​ជា​សាធារណៈ បទ​ជេរ​ប្រមាថ​ជា​សាធារណៈ និង​បទ​គំរាមកំហែង​កេរ្តិ៍ ជាដើម។

សារព័ត៌មាន The Cambodia Daily នៅ​មិនទាន់​អាច​ទាក់ទង​សុំ​ការ​បំភ្លឺ​ពី​លោក ផែង វណ្ណៈ បាន​នៅឡើយ​ទេ ខណៈ​គណនី​ហ្វេសប៊ុក​របស់​លោក​ក៏​មិនទាន់​មាន​ការ​បកស្រាយ ឬ​ការ​ឆ្លើយតប​ណា​មួយ​ទៅ​កាន់​អ្នកស្រី ហ៊ុន ស៊ីណាត នោះ​ដែរ។

យ៉ាងណាក៏ដោយ អ្នកស្រី ហ៊ុន ស៊ីណាត ក៏​ធ្លាប់​បាន​សារភាព​ផង​ដែរ​ថា អ្នក​ដែល​មាន​មុខរបរ​ធំៗ​មួយ​ចំនួន​នៅ​កម្ពុជា ជាពិសេស​អ្នក​ប្រកប​របរ​តាម​អនឡាញ​តែងតែ​មក​ពឹងពាក់​អ្នកស្រី​តាមរយៈ​នៃ​ការ​ផ្តល់​ជូន​នូវ​វត្ថុ​មាន​តម្លៃ​ផ្សេងៗ និង​លុយកាក់​ឱ្យ​ធ្វើ​ជា​ខ្នងបង្អែក​លើ​មុខរបរ​អាជីវកម្ម​របស់​ពួកគេ ដើម្បី​ជា​ទីពឹង​ពំនាក់​ក្នុង​ការ​ប្រកួតប្រជែង​ទីផ្សារ​ផង និង​បញ្ចៀស​ពី​ការ​រំខាន​នៃ​ប្រព័ន្ធ​អំពើពុករលួយ​របស់​សមត្ថកិច្ច​កម្ពុជា​ផង៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស