មេដឹកនាំបក្សកាន់អំណាច លោក ហ៊ុន សែន សម្រេចបន្តផ្តល់ថវិកាផ្ទាល់ខ្លួនចំនួន ៣៦ម៉ឺនដុល្លាររយៈពេល ៣ឆ្នាំទៅដល់សហភាពសហព័ន្ធអ្នកសារព័ត៌មានកម្ពុជា ដើម្បីលើកកម្ពស់គុណតម្លៃនៃសេរីភាពសារព័ត៌មាននៅកម្ពុជាឲ្យកាន់តែទូលំទូលាយថែមទៀត។
ប្រធានសហភាពសហព័ន្ធអ្នកសារព័ត៌មានកម្ពុជា លោក ហ៊ុយ វណ្ណៈ និងជារដ្ឋលេខាធិការក្រសួងមហាផ្ទៃ បានលើកឡើងលើទំព័រហ្វេសប៊ុករបស់ខ្លួននៅថ្ងៃទី២១ ខែកក្កដា ឆ្នាំ២០២២ នេះថា ការសម្រេចផ្តល់ថវិកាដ៏ច្រើនលើសលប់នេះបានបញ្ជាក់ពីការយកចិត្តទុកដាក់គ្រប់ទិដ្ឋភាព និងគ្រប់ជ្រុងជ្រោយរបស់ប្រមុខរដ្ឋាភិបាលកម្ពុជាលើគ្រប់វិស័យ រួមទាំងការលើកកម្ពស់គុណភាពព័ត៌មាន និងការផ្សព្វផ្សាយការលើកកម្ពស់គុណតម្លៃនៃសេរីភាពសារព័ត៌មាននៅកម្ពុជាឲ្យកាន់តែទូលំទូលាយថែមទៀត។
លោក ហ៊ុយ វណ្ណៈ បញ្ជាក់ថា លោក ហ៊ុន សែន បានគាំទ្រសហភាពសហព័ន្ធអ្នកសារព័ត៌មានកម្ពុជាតាំងពីពេលស្ថាប័ននេះចាប់ផ្តើមដំណើរការក្នុងឆ្នាំ២០១៦ មកម្ល៉េះ ដែលធ្វើឲ្យសហភាពសហព័ន្ធអ្នកសារព័ត៌មានកម្ពុជាមានភាពរឹងមាំ និងមានលទ្ធភាពជួយឲ្យវិស័យសារព័ត៌មាននៅកម្ពុជាមានភាពទូលំទូលាយដូចសព្វថ្ងៃនេះ។
កាលពីថ្ងៃទី១៩ ខែកក្កដា ឆ្នាំ២០២២ សម្ព័ន្ធអ្នកសារព័ត៌មានកម្ពុជា ខេមបូចា (CamboJA) បានចេញផ្សាយរបាយការណ៍ប្រចាំត្រីមាសរបស់ខ្លួនស្ដីពីស្ថានភាពអ្នកសារព័ត៌មាននៅកម្ពុជាថា សេរីភាពសារព័ត៌មាននៅកម្ពុជាគ្មានភាពប្រសើរឡើងនោះទេ គឺមានតែវិវឌ្ឍទៅរកស្ថានភាពអាក្រក់ទៅៗ ក្នុងនោះបញ្ហាប្រឈមជាច្រើនដែលអ្នកសារព័ត៌មានកម្ពុជាកំពុងជួបប្រទះនោះ គឺការភ័យខ្លាចចំពោះបញ្ហាផ្លូវច្បាប់ដែលនៅតែបន្តកើតមានលើពួកគេក្នុងពេលដែលចុះបំពេញការងារសព្វថ្ងៃនេះ។
របាយការណ៍ដដែលលើកឡើងថា អ្នកសារព័ត៌មាននៅកម្ពុជាតែងតែមានការបំភិតបំភ័យ និងគំរាមកំហែងពីសំណាក់រដ្ឋាភិបាលកម្ពុជាជាប់ជានិច្ច ដូចជាការហាមឃាត់អ្នកកាសែតមិនឲ្យថតសកម្មភាពដែលអាជ្ញាធរបានរារាំងការបញ្ចេញមតិរបស់ពលរដ្ឋ។ ជាងនេះទៀត ក៏មានការចាត់វិធានការផ្លូវច្បាប់ចំពោះអ្នកសារព័ត៌មានដែលបានស៊ើបអង្កេតលើករណីស៊ើប ដូចជាការប្រព្រឹត្តអំពើពុករលួយធ្ងន់ធ្ងររបស់មន្ត្រីជាន់ខ្ពស់នៃរដ្ឋាភិបាលកម្ពុជាផងដែរ។
សម្ព័ន្ធអ្នកសារព័ត៌មានកម្ពុជា ខេមបូចា បញ្ជាក់ថា ចាប់តាំងពីខែមេសា ដល់ខែមិថុនា ឆ្នាំ២០២២ នេះ ខ្លួនបានកត់ត្រាករណីបៀតបៀនអ្នកសារព័ត៌មានបានចំនួន ១១ករណីហើយ ក្នុងនោះអ្នកកាសែត ៥នាក់ត្រូវរដ្ឋាភិបាលកម្ពុជាចាប់ខ្លួនដែលកំពុងប្រឈមមុខនឹងផ្លូវច្បាប់ ចំណែក ៦នាក់ផ្សេងទៀតកំពុងរងការយាយីដោយការគំរាមកំហែងពីអាជ្ញាធរកម្ពុជាជាប់រហូតមក។
ទាក់ទិននឹងបញ្ហានេះ អង្គការអ្នកសារព័ត៌មានគ្មានព្រំដែន (Reporters Without Borders) បានដាក់ចំណាត់ថ្នាក់សេរីភាពសារព័ត៌មាននៅកម្ពុជាសម្រាប់ឆ្នាំ២០២២ ស្ថិតក្នុងលំដាប់លេខរៀងទី១៤២ ក្នុងចំណោមប្រទេស១៨០ ដែលចំណាត់ថ្នាក់នេះបង្ហាញអំពីសេរីភាពសារព័ត៌មាននៅកម្ពុជានៅតែមិនអាចងើបចេញពីចំណាត់ថ្នាក់មិនល្អដដែល។
ជុំវិញបញ្ហានេះ អង្គការអ្នកកាសែតគ្មានព្រំដែន ធ្លាប់បានបង្ហាញរបាយការណ៍របស់ខ្លួនថា រដ្ឋាភិបាលកម្ពុជាបានបិទស្ថានីយវិទ្យុចំនួន ៣២ស្ថានីយ បង្ខំឱ្យបិទទ្វារកាសែត ឌឹ ខេមបូឌា ដេលី និងការផ្លាស់ប្ដូរម្ចាស់កាសែតភ្នំពេញប៉ុស្តិ៍ ជាដើម។
ជាក់ស្តែង កូនស្រីលោក ហ៊ុន សែន គឺអ្នកស្រី ហ៊ុន ម៉ាណា ត្រូវគេរកឃើញថាជាប្រធានក្រុមហ៊ុនដ៏ធំសម្បើមមួយដែលកាន់កាប់កាសែត ទស្សនាវដី្ត ស្ថានីយវិទ្យុ បណ្ដាញទូរទស្សន៍ និងគេហទំព័រអ៊ីនធឺណិតនៅកម្ពុជាទាំងអស់ ដែលជាស្ថាប័នឃោសនាឱ្យរដ្ឋាភិបាលកម្ពុជារហូតមក ខណៈសហភាពសហព័ន្ធអ្នកសារព័ត៌មានកម្ពុជាដែលលោក ហ៊ុន សែន ផ្តល់ថវិការហូតមកនេះក៏ត្រូវគេមើលឃើញថា ជាស្ថាប័នបម្រើឲ្យរដ្ឋាភិបាលកម្ពុជាផងដែរ៕