25 C
Phnom Penh

លោក ហេង សំរិន ជំរុញ​ឱ្យ​មន្ត្រី​បក្ស​ទប់ស្កាត់​ការ​ប៉ុនប៉ង​បង្ក​ចលាចល​របស់​ក្រុម​ប្រឆាំង​ជ្រុល​និយម

ដោយ ឌឹ ខេមបូឌា ដេលី

បទវិភាគ

ប្រធាន​រដ្ឋសភា លោក ហេង សំរិន ជំរុញ​ឱ្យ​មន្ត្រី​គណបក្ស​កាន់​អំណាច​ទាំងអស់​ការពារ​ដាច់ខាត​នូវ​សន្តិភាព ស្ថិរភាព​នយោបាយ សន្តិសុខ សណ្ដាប់ធ្នាប់​សង្គម​ឱ្យ​បាន​ដាច់ខាត​ដោយ​គ្មាន​ករណី​លើកលែង​ឡើយ ចំពោះ​ការ​ប៉ុនប៉ង​បង្ក​ចលាចល​របស់​ក្រុម​ប្រឆាំង​ជ្រុល​និយម។

លោក ហេង សំរិន បាន​ព្រមាន​នៅ​ក្នុង​កិច្ចប្រជុំ​បូក​សរុប​លទ្ធផល​ការងារ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​អាណត្តិ​ទី​៥ នៅ​ទីស្នាក់ការ​គណបក្ស​កាន់​អំណាច​ក្នុង​ខេត្ត​ត្បូងឃ្មុំ កាលពី​ថ្ងៃទី​២៣ ខែ​កក្កដា ឆ្នាំ​២០២២ ថា ត្រូវ​ការពារ​ឱ្យ​មាន​នូវ​ស្ថិរភាព​នយោបាយ សន្តិសុខ​សណ្ដាប់ធ្នាប់​សង្គម ដើម្បី​បង្ហាញ​ពី​ភាព​ចាស់ទុំ​នៃ​ដំណើរការ​ប្រជាធិបតេយ្យ​សេរី​ពហុបក្ស​ស្រប​តាម​រដ្ឋធម្មនុញ្ញ និង​ច្បាប់​របស់​កម្ពុជា​ផង​ដែរ។

លោក ហេង សំរិន អំពាវនាវ​ឱ្យ​មន្ត្រី​បក្ស​កាន់​អំណាច​គ្រប់​ជាន់ថ្នាក់​របស់​ខ្លួន ជំរុញ​ការ​អភិវឌ្ឍ​គោល​នយោបាយ​ភូមិ-ឃុំ​មាន​សុវត្ថិភាព​ឱ្យ​បាន​ល្អ​ប្រសើរ និង​ខិតខំ​ដោះស្រាយ​ជម្លោះ​ដីធ្លី​ក្រៅ​ប្រព័ន្ធ​តុលាការ​ឱ្យ​បាន​ឆាប់​រហ័ស និង​រក្សា​ការ​ផ្សារភ្ជាប់​ជាមួយ​ប្រជាជន ឈ្វេងយល់​ពី​ទុក្ខ​លំបាក​របស់​ពួកគេ និង​ខិតខំ​ដោះស្រាយ​សំណូមពរ​របស់​ពលរដ្ឋ​ឱ្យ​បាន​ទាន់​ពេលវេលា​ផង​ដែរ។

អតីត​នាយក​ប្រតិបត្តិ​អង្គការ​អភិវឌ្ឍន៍​ផ្នត់គំនិត លោក សេក សុជាតិ បាន​ប្រាប់ The Cambodia Daily នៅ​ថ្ងៃទី​២៥ កក្កដា នេះ​ថា បើ​មេដឹកនាំ​គណបក្ស​នយោបាយ​នៅ​កម្ពុជា​នៅតែ​បន្ត​ប្រើ​សារ​នយោបាយ ដូចជា​ការ​ប្រើ​ពាក្យ​ទប់ស្កាត់​ចលនា​បះបោរ ជាដើម នោះ​កម្ពុជា និង​ពលរដ្ឋ​ខ្មែរ​គ្មាន​ថ្ងៃ​ស្គាល់​ពី​សន្តិភាព​ពិតប្រាកដ​នោះ​ទេ ពោល​គឺ​គ្រាន់តែ​បាន​ឮ​ត្រឹម​ទ្រឹស្ដី​សន្តិភាព​ដែល​មេដឹកនាំ​នយោបាយ​ធំៗ​មួយ​ចំនួន​នាំគ្នា​សូត្រ​ឱ្យ​រត់​មាត់​ប៉ុណ្ណោះ។

លោក សេក សុជាតិ លើកឡើង​ថា ការ​បញ្ចេញ​សារ​នយោបាយ​របស់​មេដឹកនាំ​ខ្មែរ​ដោយ​ចោទ​ជាតិ​សាសន៍​ខ្លួនឯង ឬ​ក្រុម​អ្នក​ប្រឆាំង​ថា​ជា​ក្រុម​ចលនា​ជ្រុល​និយម ជាដើម គឺជា​គំនិត​ផ្ដួចផ្ដើម​មួយ​ដែល​នាំ​ទៅ​រក​ការ​បែងចែក​វណ្ណៈ​នយោបាយ ដែល​ជា​ហានិភ័យ និង​ជា​គ្រោះថ្នាក់​នៃ​ការ​បែកបាក់​សាមគ្គី​ជាតិ​ដ៏​ធំធេង​ទៅ​ថ្ងៃ​មុខ។

អតីត​នាយក​ប្រតិបត្តិ​អង្គការ​អភិវឌ្ឍន៍​ផ្នត់គំនិត​រូប​នេះ​អះអាង​ថា បើ​ពិនិត្យ​ទៅ​លើ​សកម្មភាព​របស់​មេ​ដឹកនាំ​គណបក្ស​នយោបាយ​ភាគច្រើន គឺ​មិន​បាន​ការពារ ឬ​លើក​តម្កើង​នីតិរដ្ឋ​របស់​ប្រទេស​ជាតិ​ប៉ុន្មាន​នោះ​ទេ ហើយ​សមាជិក​ថ្នាក់​ក្រោម​នៃ​គណបក្ស​ទាំងនោះ​មិន​ត្រូវ​បាន​គេ​ផ្តល់​សិទ្ធិ​សម្រេច​ទៅ​លើ​ជោគវាសនា​អនាគត​ប្រទេស​ជាតិ​របស់​ខ្លួន​នោះ​ដែរ ព្រោះ​ថា​មេដឹកនាំ​គណបក្ស​ទាំងនោះ​បាន​ចាត់ទុក​ពួកគេ​ត្រឹមតែ​ជា​អ្នក​ដើរ​តាម និង​ហែហម​គណបក្ស​តែប៉ុណ្ណោះ។

លោក សេក សុជាតិ បញ្ជាក់​ថា ដើម្បី​បញ្ចៀស​នូវ​ការ​បែកបាក់​សាមគ្គី​ជាតិ​នៅ​កម្ពុជា និង​បញ្ចប់​នូវ​ការ​បែងចែក​វណ្ណៈ​នយោបាយ​នៅ​ក្នុង​សង្គម គ្រប់​ភាគី​ពាក់ព័ន្ធ​ទាំងអស់​គួរ​រៀបចំ​ក្រម​នីតិប្រតិបត្តិ​នយោបាយ ដោយ​បញ្ឈប់​ការ​យក​ជាតិ​ឯង​ជា​សត្រូវ និង​លះបង់​ចោល​នូវ​គំនិត​បំផ្លាញ​អ្នកដទៃ​ដើម្បី​តែ​អំណាច ដោយ​ប្តូរ​មក​វិញ​នូវ​ការ​តម្កល់​ផលប្រយោជន៍​ជាតិ​ជា​ធំ នោះ​ទើប​សង្គម​ខ្មែរ​ទទួល​បាន​នូវ​សុខ​សន្តិភាព សុភមង្គល និង​រក្សា​បាន​នូវ​នីតិរដ្ឋ​ពិតប្រាកដ។

ក្រុម​អ្នក​ឃ្លាំមើល​សង្គម​លើកឡើង​ថា កម្ពុជា​ក្រោម​ការ​ដឹកនាំ​របស់​បុរស​ខ្លាំង​ដែល​ឧស្សាហ៍​ប្រើ​កណ្ដាប់ដៃ​ដែក លោក ហ៊ុន សែន គឺ​មាន​តែ​ការ​តាម​កម្ទេច ការ​សម្លាប់ និង​ការ​ចាប់​ខ្លួន​ប៉ុណ្ណោះ។ ជាក់ស្តែង កាលពី​ថ្ងៃទី​១៩ ខែ​វិច្ឆិកា ឆ្នាំ​២០១៧ លោក ហ៊ុន សែន ធ្លាប់​បាន​អះអាង​ក្នុង​ពិធី​ជួបជុំ​សមាជិក​របស់​ខ្លួន​នៅ​មជ្ឈមណ្ឌល​កោះពេជ្រ​ថា លោក​ពិត​ជា​មាន​ការ​ស្តាយ​ណាស់​ដែល​លោក​មិន​បាន​សម្លាប់​មេដឹកនាំ​នយោបាយ​ក្រុម​ប្រឆាំង ដើម្បី​ឆ្លើយតប​ទៅ​នឹង​ផែនការ​របស់​ពួកគេ​ដែល​បាន​កំណត់​យក​ថ្ងៃទី​២៩ ខែ​ធ្នូ ឆ្នាំ​២០១៣ ជា​ថ្ងៃ​ផ្តាច់ព្រ័ត្រ​រំលំ​រដ្ឋាភិបាល​របស់​លោក៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស