មន្ត្រីសង្គមស៊ីវិលដែលតាមដានសវនាការលើកទី៥០ របស់ប្រធានគណបក្សសង្គ្រោះជាតិ នៅថ្ងៃពុធ ទី២៧ កក្កដា នេះ ជំរុញឱ្យអ្នកនយោបាយដោះស្រាយសំណុំរឿងរបស់មេដឹកនាំបក្សប្រឆាំង លោក កឹម សុខា តាមផ្លូវនយោបាយ ជាជាងយកមករកយុត្តិធម៌តាមផ្លូវតុលាការដែលនឹងបន្តអូសបន្លាយពេលវេលាកាន់តែយូរ។
មន្ត្រីឃ្លាំមើលរបស់សមាគមការពារសិទ្ធិមនុស្សអាដហុក លោក យី សុខសាន្ត បានប្រាប់ក្រុមអ្នកសារព័ត៌មាននៅមុខសាលាដំបូងរាជធានីភ្នំពេញ បន្ទាប់ពីសវនាការពេញមួយព្រឹកនៅថ្ងៃទី២៧ ខែកក្កដា ឆ្នាំ២០២២ នេះថា ក្នុងសវនាការពេញមួយព្រឹកនេះ គឺមានភាពតានតឹងខ្លាំងចាប់តាំងពីចាប់ផ្តើមសំណួររបស់តំណាងអយ្យការជុំវិញការធ្វើបាតុកម្មនៅក្នុងទីក្រុងភ្នំពេញ ត្រង់ចំណុចទីតាំងស្ទឹងមានជ័យ កាលពីឆ្នាំ២០១៣ កន្លងទៅ ប៉ុន្តែលោក កឹម សុខ បានបដិសេធនូវការលើកឡើងនូវសំណួរនោះទាំងអស់ ថាមិនបានជាប់ពាក់ព័ន្ធនឹងរូបលោកនោះឡើយ។
លោក យី សុខសាន្ត ជំរុញឱ្យអ្នកនយោបាយដោះស្រាយសំណុំរឿងរបស់មេដឹកនាំបក្សប្រឆាំង លោក កឹម សុខា តាមផ្លូវនយោបាយ ជាជាងរកយុត្តិធម៌តាមផ្លូវតុលាការដែលនឹងបន្តអូសបន្លាយពេលវេលាកាន់តែយូរទៅមុខទៀត ព្រោះថាសវនាការដែលបានដំណើរការរហូតមកដល់លើកទី៥០ នេះ នៅតែគ្មានភាពជឿនលឿនដូចមុនដដែល។
មន្ត្រីឃ្លាំមើលរបស់សមាគមការពារសិទ្ធិមនុស្សអាដហុករូបនេះ អំពាវនាវឱ្យអ្នកនយោបាយគ្រប់ភាគីទាំងអស់ គួរតែបញ្ចប់បញ្ហារបស់ខ្លួនក្នុងការយកឈ្នះយកចាញ់គ្នា និងងាកមករកការចរចា ដើម្បីរកការផ្សះផ្សាមួយដែលនឹងចេញជាផលប្រយោជន៍សម្រាប់ជាតិជំនួសវិញ ព្រោះថាជម្លោះរបស់អ្នកនយោបាយនៅកម្ពុជានៅពេលនេះ នាំឲ្យតែខាតប្រយោជន៍ជាតិប៉ុណ្ណោះ។ ជាក់ស្តែង នៅពេលនេះ សហរដ្ឋអាមេរិកកំពុងជំរុញឱ្យមានច្បាប់ស្ដីពីប្រជាធិបតេយ្យ និងសិទ្ធិមនុស្ស ដើម្បីដាក់ទណ្ឌកម្មលើកម្ពុជា ជាដើម។
នៅថ្ងៃទី២៧ ខែកក្កដា ឆ្នាំ២០២២ នេះ សាលាដំបូងរាជធានីភ្នំពេញ បានបើកសវនាការលើសំណុំរឿងប្រធានគណបក្សសង្គ្រោះជាតិ លោក កឹម សុខា លើអង្គហេតុប្រទូសរ៉ាយ ក្នុងនោះព្រះរាជអាជ្ញាបានលើកយកវីដេអូបាតុកម្មក្នុងឆ្នាំ២០១៣ ដែលបានធ្វើឡើងនៅកណ្តាលទីក្រុងភ្នំពេញត្រង់ចំណុចទីតាំងស្ទឹងមានជ័យ ប៉ុន្តែត្រូវលោក កឹម សុខា បដិសេធថាបាតុកម្មនោះមិនជាប់ពាក់ព័ន្ធនឹងរូបលោកនោះទេ។
សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់អ្នកសារព័ត៌មាននៅមុខសាលាដំបូងរាជធានីភ្នំពេញនៅថ្ងៃទី២៧ កក្កដា នេះថា ការលើកយកវីដេអូចាស់ៗ ហើយបង្កើតជាសំណួរមកចោទសួរលោក កឹម សុខា ក្នុងសវនាការនៅព្រឹកនេះ គ្រាន់តែជាការពន្យារពេល និងអូសបន្លាយសំណុំរឿងនេះតែប៉ុណ្ណោះ ហើយក៏ជាចេតនាពិតប្រាកដរបស់តុលាការកម្ពុជាលើសំណុំរឿងនេះ។
លោក ហ៊ុន កុសល បញ្ជាក់ថា ការធ្វើបាតុកម្មនៅទីតាំងស្ទឹងមានជ័យ កាលពីឆ្នាំ២០១៣ មិនជាប់ពាក់ព័ន្ធនឹងមេដឹកនាំបក្សប្រឆាំង លោក កឹម សុខា នោះឡើយ ព្រោះថាបាតុកម្មនៅពេលនោះគឺធ្វើឡើងដោយកម្មករនិយោជិតដែលទាមទារឱ្យថៅកែក្រុមហ៊ុន និងរដ្ឋាភិបាលជួយដំឡើងប្រាក់ខែឱ្យពួកគេតែប៉ុណ្ណោះ។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ ពីបទ ឃុបឃិតជាមួយរដ្ឋបរទេស ដើម្បីផ្តួលរំលំរដ្ឋាភិបាលកម្ពុជា ប៉ុន្តែរហូតមកទល់នឹងពេលនេះ តុលាការកម្ពុជាមិនទាន់អាចកាត់ទោសលោកពីបទល្មើសណាមួយនៅឡើយទេ ខណៈរដ្ឋបរទេសដែលតុលាការបានចោទថាបានឃុបឃិតជាមួយលោក កឹម សុខា នោះ ក៏តុលាការមិនបានបញ្ជាក់ថាជារដ្ឋបរទេសមួយណានោះដែរ៕