រដ្ឋសភាឯកបក្សនៃគណបក្សប្រជាជនកម្ពុជា សម្រេចអនុម័តកែរដ្ឋធម្មនុញ្ញ និងច្បាប់ធម្មនុញ្ញបន្ថែមចំនួន ៨មាត្រា ដោយសំឡេង ១០៥លើ១០៦ តាមសំណើលោកនាយករដ្ឋមន្ត្រី ហ៊ុន សែន ដើម្បីបំពេញចំណុចខ្វះចន្លោះនៃរដ្ឋធម្មនុញ្ញដើម ធ្វើឲ្យស្ថាប័នកំពូលជាតិដំណើរការទៅដោយរលូន មិនជាប់គាំង និងធានាស្ថិរភាពនយោបាយ។
ការសម្រេចអនុម័តលើសេចក្ដីព្រាងស្ដីពីការធ្វើវិសោធនកម្មលើកទី១០ នេះ បានធ្វើឡើងក្នុងអង្គប្រជុំពេញអង្គនៃរដ្ឋសភា នាព្រឹកថ្ងៃទី២៨ ខែកក្កដា ឆ្នាំ២០២២ ដោយសំឡេង ១០៥លើ១០៦។ ក្នុងចំណោមសមាជិករដ្ឋសភាចំនួន ១០៦នាក់ ក្នុងនោះចំនួន ១០៥ បានគាំទ្រចំពោះការកែរដ្ឋធម្មនុញ្ញ ខណៈសមាជិកម្នាក់ទៀតអវត្តមាន។
កិច្ចប្រជុំពេញអង្គអនុម័តកែរដ្ឋធម្មនុញ្ញ និងច្បាប់ធម្មនុញ្ញបន្ថែមទាំង ៨មាត្រា ដឹកនាំដោយប្រធានរដ្ឋសភា លោក ហេង សំរិន និងមេដឹកនាំគណបក្សកំពូលៗផ្សេងទៀត ក្នុងនោះក៏មានលោក ហ៊ុន សែន ជាប្រធានគណបក្សប្រជាជនកម្ពុជា លោក ស ខេង ជាអនុប្រធានដែរ។
មាត្រាទាំង៨ នៃរដ្ឋធម្មនុញ្ញ និងច្បាប់ធម្មនុញ្ញបន្ថែមដែលរដ្ឋសភាអនុម័តទាំងស្រុងឲ្យកែនោះ មានមាត្រា១៩ថ្មី(មួយ) មាត្រា៨៩ មាត្រា៩៨ មាត្រា១០២ថ្មី មាត្រា១១៩ថ្មី(មួយ) និងមាត្រា១២៥ថ្មី នៃរដ្ឋធម្មនុញ្ញ និងមាត្រា៣ថ្មី និងមាត្រា៤ថ្មី នៃច្បាប់ធម្មនុញ្ញបន្ថែម។
រដ្ឋមន្ត្រីក្រសួងយុត្តិធម៌ និងជាសមាជិកជាន់ខ្ពស់គណបក្សប្រជាជនកម្ពុជា លោក កើត រិទ្ធ បានឡើងការពារក្នុងកិច្ចប្រជុំពេញអង្គនៅក្នុងរដ្ឋសភាថា ការកែរដ្ឋធម្មនុញ្ញ និងច្បាប់ធម្មនុញ្ញបន្ថែមលើកនេះធ្វើឡើងបំពេញចំណុចខ្វះចន្លោះនៃរដ្ឋធម្មនុញ្ញដើម ដើម្បីឲ្យស្ថាប័នកំពូលជាតិដំណើរការទៅដោយរលូន មិនជាប់គាំង និងធានាស្ថិរភាពនយោបាយ និងការពារប្រយោជន៍ជាតិ។
លោក កើត រិទ្ធ ក៏បានច្រានចោលក្ដីកង្វល់របស់គណបក្សចំនួន៤ ដែលបានដាក់ញត្តិ និងក្រុមអង្គការសង្គមស៊ីវិលជាង ១០០ស្ថាប័ន ស្នើពិចារណាកុំឲ្យរដ្ឋសភាអនុម័តសេចក្ដីព្រាងរដ្ឋធម្មនុញ្ញ និងច្បាប់ធម្មនុញ្ញ ដោយគិតថាជាការបំភ្លៃការពិត ដើម្បីបានតថ្លៃនយោបាយជាប្រយោជន៍ដែលពួកគេចង់បានតែប៉ុណ្ណោះ។ ម្យ៉ាងទៀត គណបក្សនយោបាយទាំង៤ មើលឃើញថា ការកែរដ្ឋធម្មនុញ្ញលើកទី១០ នេះ បានកាត់បន្ថយអំណាចសភា និងរារាំងដល់ដំណើរការប្រជាធិបតេយ្យ សេរីពហុបក្ស ផ្ទុយនឹងស្មារតីរដ្ឋធម្មនុញ្ញដើម។
សមាជិកសភាអាស៊ានដើម្បីសិទ្ធិមនុស្ស ឬហៅកាត់ថា APHR កាលពីថ្ងៃទី២៧ ខែកក្កដា បានចេញសេចក្ដីថ្លែងការណ៍សម្ដែងការព្រួយបារម្ភចំពោះការស្នើឱ្យមានការធ្វើវិសោធនកម្មរដ្ឋធម្មនុញ្ញដោយរដ្ឋាភិបាលលោកនាយករដ្ឋមន្ត្រី ហ៊ុន សែន ដោយពួកគេចាត់ទុកថាវាជាការសម្លាប់លទ្ធិប្រជាធិបតេយ្យនៅក្នុងប្រទេសនេះ។
សមាជិកក្រុមប្រឹក្សាភិបាលនៃក្រុមសមាជិកសភាអាស៊ានដើម្បីសិទ្ធិមនុស្ស (APHR) និងជាអតីតរដ្ឋមន្ត្រីការបរទេសថៃ លោក កាស៊ីត ភិរម្យ (Kasit Piromya) បានលើកឡើងថា រដ្ឋាភិបាលអះអាងថា ចេតនានៃការកែប្រែរដ្ឋធម្មនុញ្ញនេះ គឺដើម្បីធានាឱ្យបាននូវរដ្ឋាភិបាលមួយដែលដំណើរការទៅដោយរលូន ប៉ុន្តែក្នុងចំណុចនៃការស្នើនេះភាគច្រើន គឺត្រូវបានរៀបចំឡើងដើម្បីតែពង្រឹងអំណាចរបស់លោក ហ៊ុន សែន និងបក្ខពួករបស់លោកតែប៉ុណ្ណោះ តាមរយៈការផ្ដល់អំណាចបន្ថែមដល់អង្គនីតិប្រតិបត្តិដែលនាំឱ្យខូចខាតដល់អង្គនីតិប្បញ្ញត្តិ។
សេចក្ដីព្រាងច្បាប់ស្ដីពីការធ្វើវិសោធនកម្មរដ្ឋធម្មនុញ្ញមាត្រា៩៨ថ្មី(មួយ) ចែងថា រដ្ឋសភាអាចទម្លាក់សមាជិកគណៈរដ្ឋមន្ត្រី ឬទម្លាក់រាជរដ្ឋាភិបាលពីតំណែង ដោយអនុម័តញត្តិបន្ទោសតាមសំឡេងឆ្នោតភាគច្រើនដាច់ខាតនៃចំនួនសមាជិករដ្ឋសភាទាំងមូល។ ក្នុងករណីរាជរដ្ឋាភិបាលត្រូវបានទម្លាក់ពីមុខតំណែងដោយរដ្ឋសភា រាជរដ្ឋាភិបាលដែលត្រូវចេញពីមុខតំណែងនេះមានតែភារកិច្ចដឹកនាំការងារប្រចាំថ្ងៃតែប៉ុណ្ណោះ រហូតដល់មានរាជរដ្ឋាភិបាលថ្មីចូលកាន់តំណែង។
ចំណែកក្នុងវាក្យខណ្ឌទី២ នៃមាត្រា៩៨ ដដែលថា ញត្តិបន្ទោសរដ្ឋាភិបាលត្រូវបានលើកឡើងជូនរដ្ឋសភាដោយតំណាងរាស្ត្រចំនួនមួយភាគបី ឬស្មើនឹង ៤២រូបនៃចំនួនសមាជិកសភាចំនួន ១២៥រូប អាចលើកយកមកពិភាក្សាបាន ខណៈមាត្រា៩៨ចាស់ បានកំណត់ថា ញត្តិបន្ទោសរាជរដ្ឋាភិបាលត្រូវបានលើកឡើងជូនរដ្ឋសភាដោយតំណាងរាស្ត្រចំនួន ៣០នាក់តែប៉ុណ្ណោះ៕