ក្រសួងការបរទេសអះអាងថា ប្រមុខរដ្ឋាភិបាលកម្ពុជា លោក ហ៊ុន សែន នឹងចូលរួមពិធីបើកជាផ្លូវការនៃកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធក្នុងក្របខ័ណ្ឌអាស៊ាន ដែលនឹងចាប់ផ្តើមដំណើរការចាប់ពីថ្ងៃទី៣១ ខែកក្កដា ឆ្នាំ២០២២ នេះនៅក្នុងប្រទេសកម្ពុជា។
ក្រសួងការបរទេស និងសហប្រតិបត្តិការអន្តរជាតិកម្ពុជា បានចេញសេចក្តីប្រកាសព័ត៌មានកាលពីថ្ងៃទី២៨ ខែកក្កដា ឆ្នាំ២០២២ ថា កិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធ ដែលនឹងធ្វើឡើងនៅចុងខែកក្កដា នេះ រួមមាន៖
- កិច្ចប្រជុំគណៈកម្មការតំបន់អាស៊ីអាគ្នេយ៍គ្មានអាវុធនុយក្លេអ៊ែរ
- កិច្ចប្រជុំរវាងរដ្ឋមន្ត្រីការបរទេសអាស៊ានជាមួយតំណាងគណៈកម្មការអន្តររដ្ឋាភិបាលអាស៊ាន
- និងកិច្ចប្រជុំស្ដីពីសិទ្ធិមនុស្សរដ្ឋមន្ត្រីការបរទេសអាស៊ានលើកទី៥៥ ជាដើម។
ប្រភពដដែលបញ្ជាក់ថា ក្រៅពីកិច្ចប្រជុំខាងលើ ក៏មានសន្និសីទក្រោយកិច្ចប្រជុំរដ្ឋមន្ត្រីការបរទេសអាស៊ានជាមួយដៃគូសន្ទនារបស់អាស៊ាន កិច្ចប្រជុំរដ្ឋមន្ត្រីការបរទេសអាស៊ានបូកបីលើកទី២៣ កិច្ចប្រជុំរដ្ឋមន្ត្រីការបរទេសនៃកិច្ចប្រជុំកំពូលអាស៊ី-បូព៌ាលើកទី១២ និងកិច្ចប្រជុំវេទិកាតំបន់អាស៊ានលើកទី២៩ ផងដែរ។
កាលពីថ្ងៃទី២៧ ខែកក្កដា ឆ្នាំ២០២២ ប្រធានលេខាធិការដ្ឋានគណៈកម្មការជាតិរៀបចំកិច្ចប្រជុំកំពូលអាស៊ាន លោក លុយ ដាវីត អះអាងថា រដ្ឋមន្ត្រីការបរទេសអាមេរិក លោក អ៊ែនថូនី ប្លីងខិន (Antony Blinken) រួមទាំងទីប្រឹក្សារដ្ឋ និងជារដ្ឋមន្ត្រីការបរទេសចិន លោក វ៉ាង យី (Wang Yi) ក៏នឹងមកចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ នេះដែរ។
កិច្ចប្រជុំរដ្ឋមន្ត្រីការបរទេសអាស៊ានលើកទី៥៥ ដែលកម្ពុជាធ្វើជាម្ចាស់ផ្ទះនៅឆ្នាំនេះ នឹងត្រូវរៀបចំឡើងនៅទីក្រុងភ្នំពេញដែលមានរយៈពេល ១សប្តាហ៍ ដោយគិតចាប់ពីថ្ងៃទី៣១ ខែកក្កដា រហូតដល់ថ្ងៃទី៦ ខែសីហា ឆ្នាំ២០២២ នេះតាមទម្រង់ដោយផ្ទាល់។
ប្រធានវេទិកាពលរដ្ឋ លោក គឹម សុខ បានប្រាប់ The Cambodia Daily នៅថ្ងៃទី២៩ កក្កដា ថា ការដែលសហរដ្ឋអាមេរិកបញ្ជូនរដ្ឋមន្ត្រីការបរទេសរបស់ខ្លួនឲ្យទៅចូលរួមប្រជុំរដ្ឋមន្ត្រីការបរទេសអាស៊ានបែបនេះ គឺមានន័យថា សហរដ្ឋអាមេរិកស្ថិតក្នុងជំហរថ្លឹងថ្លែងខ្លាំងណាស់ចំពោះការដឹកនាំអាស៊ាន ដែលធ្វើឱ្យមានបញ្ហានយោបាយការទូតក្នុងតំបន់របស់លោក ហ៊ុន សែន នាពេលកន្លងមក។
លោកបន្ថែមថា ត្រឹមមុខមាត់រដ្ឋាភិបាលលោក ហ៊ុន សែន សហរដ្ឋអាមេរិកអាចទម្លាក់រូបភាពការទូតឲ្យទាបជាងនេះ។ ឧទាហរណ៍ជាក់ស្តែង សហរដ្ឋអាមេរិកក៏ធ្លាប់ទម្លាក់កិត្តិយសឲ្យលោក ហ៊ុន សែន អង្គុយទន្ទឹមនឹងអនុរដ្ឋមន្ត្រីក្រសួងការបរទេសអាមេរិក ក្នុងកិច្ចប្រជុំពិសេសសហរដ្ឋអាមេរិក-អាស៊ាន ម្តងរួចមកហើយ។ ប៉ុន្តែវត្តមានរបស់រដ្ឋមន្ត្រីការបរទេសសហរដ្ឋអាមេរិកនៅពេលនេះ ជាការបង្ហាញថា សហរដ្ឋអាមេរិកនៅមានការយល់យោគដល់អាស៊ានទាំងមូល ជាពិសេសប្រទេសជាមិត្តដែលជិតស្និទ្ធនឹងអាមេរិកក្នុងសមាគមអាស៊ាននេះ។
លោក គឹម សុខ អះអាងថា វត្តមានរបស់រដ្ឋមន្ត្រីការបរទេសសហរដ្ឋអាមេរិក ក៏អាចជួយឱ្យលោក ហ៊ុន សែន មិនសូវបាក់មុខក្នុងកិច្ចប្រជុំនេះផងដែរ បន្ទាប់ពីការបរាជ័យទាំងស្រុងក្នុងការដឹកនាំអាស៊ាន ដូចជាវិបត្តិសមុទ្រចិនខាងត្បូង និងវិបត្តិរដ្ឋប្រហារនៅភូមា ដែលបានអនុវត្តទោសប្រហារជីវិតនៅក្រោយអំនួតនយោបាយការទូតក្រោមតុរបស់លោក ហ៊ុន សែន ជាមួយមេរដ្ឋប្រហារភូមា លោក មីន អ៊ុងឡាំង កាលពីដើមឆ្នាំ២០២២ កន្លងទៅនេះ។
លោក គឹម សុខ លើកឡើងថា ប្រសិនបើលោក ហ៊ុន សែន ប្រកាសរកដំណោះស្រាយនូវក្រមប្រតិបត្តិសមុទ្រចិនខាងត្បូង គឺត្រូវតែប្រកាសនូវជំហរឲ្យត្រូវបំណងរបស់រដ្ឋដែលជាសមាជិកអាស៊ាន ដែលជាជំហរមួយផ្ទុយពីការចង់បានរបស់ចិន ខណៈលោក ហ៊ុន សែន មិនហ៊ានធ្វើឲ្យខុសចិត្តចិន ដែលកំពុងដំឡើងបំពង់កដាក់អាមេរិកនៅពេលនេះទេ។
ASEAN Foreign Ministers’ Meeting (AMM) ត្រូវបានបង្កើតឡើងកាលពីឆ្នាំ១៩៦៧ ដោយសេចក្ដីថ្លែងការណ៍រាជធានីបាងកក បន្ទាប់ពីអាស៊ានត្រូវបានបង្កើតឡើង។ AMM នេះ ត្រូវបានកំណត់ប្រជុំយ៉ាងហោចណាស់ ៤ដងក្នុងមួយឆ្នាំ ព្រមទាំងអាចកោះប្រជុំពិសេសនៅពេលចាំបាច់ ដើម្បីពិភាក្សាអំពីបញ្ហាដែលទាមទារឲ្យមានការយកចិត្តទុកដាក់បន្ទាន់ពីអាស៊ាន ក្នុងនោះ AMM ក៏នឹងពិនិត្យ ពិភាក្សាជាទៀងទាត់អំពីកិច្ចខិតខំប្រឹងប្រែងកសាងសហគមន៍អាស៊ាន និងទិសដៅជាយុទ្ធសាស្ត្ររបស់ខ្លួន ក៏ដូចជាការប្រព្រឹត្តទៅនៃទំនាក់ទំនងខាងក្រៅរបស់អាស៊ានផងដែរ៕