30 C
Phnom Penh

រដ្ឋាភិបាល​ថា​ការ​ឈូស​ឆាយ​ដី​ព្រៃ​តំបន់​ភ្នំ​តាម៉ៅ​មិន​ប៉ះពាល់​ដល់​សត្វព្រៃ​កម្រ​នោះ​ទេ

ដោយ ឌឹ ខេមបូឌា ដេលី

បទវិភាគ

រដ្ឋបាល​ព្រៃឈើ​នៃ​ក្រសួង​កសិកម្ម បាន​ច្រានចោល​ចំពោះ​ប្រតិកម្ម​របស់​ពលរដ្ឋ និង​យុវជន​បរិស្ថាន ដោយ​អះអាង​ថា ការ​ឈូស​ឆាយ​ដី​ព្រៃ​នៅ​តំបន់​ភ្នំ​តាម៉ៅ មិន​ធ្វើ​ឲ្យ​ប៉ះពាល់​ដល់​ជម្រក​សត្វ និង​សត្វ​ព្រៃ​សំខាន់ៗ​ជិត​ផុត​ពូជ​នោះ​ទេ ដោយសារ​ព្រៃ​ដែល​ក្រុមហ៊ុន ឡេង ណាវ៉ាត្រា កំពុង​ឈូស​នោះ​ជា​ព្រៃ​មិន​ល្អ។

សេចក្តី​ប្រកាស​ព័ត៌មាន​របស់​រដ្ឋបាល​ព្រៃឈើ ចេញ​កាលពី​ថ្ងៃទី​០៤ ខែ​សីហា ឆ្នាំ​២០២២ បាន​លើកឡើង​ថា រដ្ឋាភិបាល​សម្រេច​យក​តំបន់​តាម៉ៅ​សម្រាប់​ធ្វើ​ការ​អភិវឌ្ឍ​នៅ​ក្បែរ​ទីក្រុង ក្បែរ​ព្រលាន​យន្តហោះ​ថ្មី និង​កៀក​តំបន់​ទេសចរណ៍​ទន្លេបាទី មិនមែន​ជា​ការ​លក់ដូរ​ទៅ​ឲ្យ​ក្រុមហ៊ុន​នោះ​ទេ។

រដ្ឋបាល​ព្រៃឈើ​ថា​តំបន់​ភ្នំ​តាម៉ៅ ជា​តំបន់​ស្ថានីយ​ស្ដារ​ព្រៃឈើ​មួយ​ដែល​មាន​ដំណាំ​ឈើ​ដាំ​ប្រភេទ​អាកាស្យា ប្រេងខ្យល់ និង​ឈើ​ធម្មជាតិ ហើយ​តំបន់​នេះ​ពោរពេញ​ទៅ​ដោយ​ដី​ខ្សាច់ និង​ព្រៃឈើ​ដែល​លូតលាស់​មិន​សូវ​ល្អ ទើប​រដ្ឋាភិបាល​យក​តំបន់​នេះ​ទៅ​អភិវឌ្ឍ។

បើ​តាម​រដ្ឋបាល​ព្រៃឈើ​បញ្ជាក់​ថា ការ​អភិវឌ្ឍ​របស់​ក្រុមហ៊ុន ឡេង ណាវ៉ាត្រា នេះ មិន​បាន​ប៉ះពាល់​ដល់​ជម្រក​សត្វ​ព្រៃ​ទាល់តែសោះ ដោយសារ​សត្វ​ព្រៃ​ដែល​បាន​ថែរក្សា​នៅ​ក្នុង​ឧទ្យាន​សួនសត្វ​ភ្នំ​តាម៉ៅ​ដោយ​មាន​សុវត្ថិភាព ១០០% ស្រប​ពេល​ដែល​ផ្ទៃដី​ព្រៃ​នៅ​ទីនោះ​ត្រូវ​បាន​ហ៊ុមព័ទ្ធ​ដោយ​របង​ជិត​ជាង ៤០០​ហិកតារ។ ហេតុ​ដូចនេះ តំបន់​ភ្នំ​តាម៉ៅ ក៏​មិន​មាន​សត្វ​ព្រៃ​សំខាន់ៗ​ជិត​ផុត​ពូជ និង​សត្វ​កម្រ​នោះ​ដែរ ខណៈ​ប្រភេទ​សត្វ​នៅ​ទីនោះ​ជា​សត្វ​ដែល​ពលរដ្ឋ​ចិញ្ចឹម​តែប៉ុណ្ណោះ។

បើ​តាម​រដ្ឋមន្ត្រី​ក្រសួង​កសិកម្ម លោក វេង សាខុន ឲ្យ​ដឹង​ថា ដី​ភ្នំ​តាម៉ៅ ១៥០០​ហិកតារ ត្រូវ​បាន​លោក ហ៊ុន សែន សម្បទាន​ឲ្យ​ក្រុមហ៊ុន ឡេង ណាវ៉ាត្រា អភិវឌ្ឍ​ដើម្បី​សង់​ផ្ទះ ដាំ​ស្មៅ និង​ចិញ្ចឹម​សត្វ​គោ​យក​ទឹកដោះ ជាដើម ខណៈ​បច្ចុប្បន្ន​ក្រុមហ៊ុន​នេះ​បាន​យក​គ្រឿងចក្រ​ជាច្រើន​ទៅ​ឈូស​ឆាយ​ដី​ព្រៃ​តំបន់​ភ្នំ​តាម៉ៅ។

យុវជន​បរិស្ថាន និង​ប្រជាពលរដ្ឋ បាន​នាំ​គ្នា​ធ្វើ​ពហិការ​ឈប់​គាំទ្រ ប្រើប្រាស់​ទំនិញ កសិផល ផលិតផល និង​អចលនវត្ថុ​គ្រប់​ប្រភេទ បើ​មាន​ឈ្មោះ​ឧកញ៉ា ឡេង ណាវ៉ាត្រា ដោយ​ថា​ក្រុមហ៊ុន ឡេង ណាវ៉ាត្រា នេះ​បាន​ឈូស​ឆាយ​ដី​ព្រៃ​ភ្នំ​តាម៉ៅ ដែល​ជា​ជម្រក​សត្វ។ ពួកគេ​ចាត់ទុក​ការ​ឈូស​ឆាយ​ដី​ព្រៃ​ដើម្បី​អភិវឌ្ឍ​នេះ ថា​ជា​ការ​បំផ្លាញ​ជម្រក​សត្វ និង​សម្បត្តិ​ធម្មជាតិ។

នាយក​កម្មវិធី​សង្គ្រោះ និង​ថែទាំ​សត្វព្រៃ​នៃ​អង្គការ​សម្ព័ន្ធមិត្ត​សត្វព្រៃ លោក និក ម៉ាក (Nick Marx) ក៏​បាន​ចេញ​សេចក្ដី​ថ្លែងការណ៍​មួយ​ដោយ​ស្នើ​ទៅ​លោក ហ៊ុន សែន ពិចារណា​ឡើងវិញ​ចំពោះ​ការ​លក់​ដី​ព្រៃ​នៅ​តំបន់​សួនសត្វ​មួយ​នេះ​ទៅ​ឲ្យ​វិស័យ​ឯកជន ដោយ​លោក​ចាត់ទុក​ការ​លក់​តំបន់​ភ្នំ​តាម៉ៅ​ថា​ជា​ការ​បំផ្លាញ​ដល់​ទីតាំង​អភិរក្ស​សត្វព្រៃ និង​ព្រៃឈើ​នៅ​ក្នុង​ប្រទេស​កម្ពុជា។

សារព័ត៌មាន ឌឹ ខេមបូឌា ដេលី មិន​អាច​ទាក់ទង​អ្នក​ដែល​ត្រូវ​ទទួល​បន្ទុក​លើ​ការ​ដោះដូរ គឺ​លោក កែវ អូម៉ាលីស្ស ប្រធាន​រដ្ឋបាល​ព្រៃឈើ និង​លោក ញ៉ឹក រតនៈពេជ្រ ប្រធាន​ឧទ្យាន​សួនសត្វ និង​មជ្ឈមណ្ឌល​សង្គ្រោះ​សត្វព្រៃ​ភ្នំ​តាម៉ៅ ដើម្បី​សុំ​ការ​អត្ថាធិប្បាយ​បាន​ទេ​រហូត​ដល់​ម៉ោង​ចេញ​ផ្សាយ​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស