32 C
Phnom Penh

អាមេរិក​ប្រកាស​អនុវត្ត​គម្រោង​ថវិកា​២៥​លាន​ដុល្លារ​ដើម្បី​លើក​កម្ពស់​វិស័យ​កសិកម្ម​នៅ​កម្ពុជា

ដោយ ឌឹ ខេមបូឌា ដេលី

បទវិភាគ

សហរដ្ឋ​អាមេរិក​បើក​ពិធី​ប្រកាស​ជា​ផ្លូវការ​នូវ​គម្រោង​ថ្មី​មួយ​ក្នុង​កញ្ចប់​ថវិកា ២៥​លាន​ដុល្លារ​អាមេរិក​ដែល​មាន​បំណង​ជំរុញ​កំណើន​សេដ្ឋកិច្ច​ឲ្យ​មាន​ភាព​ទូលំទូលាយ និង​ប្រកប​ដោយ​ចីរភាព តាមរយៈ​ការ​បង្កើន​កម្មវិធី​ប្រកួតប្រជែង​នៅ​ក្នុង​វិស័យ​កសិកម្ម​កម្ពុជា។

សេចក្តី​ប្រកាស​ព័ត៌មាន​របស់​ស្ថានទូត​អាមេរិក​ប្រចាំ​នៅ​កម្ពុជា ឲ្យ​ដឹង​ថា ថវិកា​ចំនួន ២៥​លាន​ដុល្លារ​អាមេរិក​នេះ​ស្ថិត​នៅ​ក្នុង​គម្រោង​មួយ​ដែល​មាន​ឈ្មោះ​ថា «កម្ពុជា​ហាវែស III» ជា​គម្រោង​មាន​រយៈពេល ៥​ឆ្នាំ ទទួល​បាន​ការ​គាំទ្រ​ថវិកា​ពី​គំនិត​ផ្ដួចផ្ដើម​សន្តិសុខ​ស្បៀង​សម្រាប់​អនាគត​របស់​អាមេរិក​ដែល​គ្រប់គ្រង​ដោយ​ទីភ្នាក់ងារ​ជំនួយ​អាមេរិក USAID។

ឯកអគ្គរដ្ឋទូត​អាមេរិក លោក Patrick Murphy មាន​ប្រសាសន៍​នៅ​ក្នុង​ពិធី​ប្រកាស​បញ្ចេញ​កញ្ចប់​ថវិកា ២៥​លាន​ដុល្លារ​នេះ​ថា «នៅ​ក្នុង​ប្រទេស​កម្ពុជា រដ្ឋាភិបាល​អាមេរិក​បាន​ផ្តល់​ថវិកា​ប្រមាណ​ជិត ១០០​លាន​ដុល្លារ​ក្នុង​រយៈពេល​ជាង​មួយ​សតវត្សរ៍​ចុងក្រោយ​នេះ ដើម្បី​លើក​ស្ទួយ​អាហារូបត្ថម្ភ និង​បង្កើន​ប្រាក់​ចំណូល​ក្នុង​គ្រួសារ​តាមរយៈ​ការ​ពង្រឹង​វិស័យ​កសិកម្ម»

លោក​បន្ត​ថា ក្នុង​ពេល​ដែល​ពិភពលោក​កំពុង​ជួប​វិបត្តិ​ស្បៀងអាហារ​នេះ កម្ពុជា​ចាំបាច់​ត្រូវតែ​ពង្រឹង​សុវត្ថិភាព​ស្បៀងអាហារ​របស់​ខ្លួន ដូច្នេះ​គម្រោង «កម្ពុជា​ហាវែស III» នេះ គឺ​បង្ហាញ​ឲ្យ​ឃើញ​ពី​ការ​ប្ដេជ្ញា​ចិត្ត​របស់​រដ្ឋាភិបាល​អាមេរិក​ក្នុង​ការ​សម្រេច​គោលដៅ​មួយ​នេះ។

គម្រោង «កម្ពុជា​ហាវែស III» ថ្មី​នេះ ត្រូវ​បាន​ប្រកាស​កាលពី​ថ្ងៃទី​៤ ខែ​សីហា ឆ្នាំ​២០២២ ដោយ​រដ្ឋមន្ត្រី​ការបរទេស​អាមេរិក លោក Antony Blinken ក្នុង​អំឡុង​ពេល​នៃ​ការ​ធ្វើ​ទស្សនកិច្ច​របស់​លោក​នៅ​កម្ពុជា។ គម្រោង «កម្ពុជា​ហាវែស III» នឹង​ធ្វើ​ការ​ជាមួយ​ដៃគូ​ក្នុង​វិស័យ​កសិកម្ម អ្នក​ផ្គត់ផ្គង់​បច្ចេកវិទ្យា ស្ថាប័ន​ហិរញ្ញវត្ថុ និង​ភាគី​ពាក់ព័ន្ធ​ដទៃ​ទៀត ដើម្បី​អភិវឌ្ឍ​នូវ​កម្លាំង​ការងារ​ជំនាញ បង្កើត​ការងារ និង​ចាប់​យក​ឱកាស​ទីផ្សារ​នានា​នៅ​ក្នុង​វិស័យ​កសិកម្ម តាមរយៈ​ការ​ចាប់​ដៃគូ​ជាមួយ​នឹង​វិស័យ​ឯកជន។

គម្រោង​នេះ​នឹង​បន្ត​ធ្វើ​ការ​អភិវឌ្ឍ​ទៅ​លើ​ការងារ​ដែល​ទីភ្នាក់ងារ​ជំនួយ​អាមេរិក USAID បាន​ធ្វើ​កន្លងមក​លើ​ការ​លើក​ស្ទួយ​ឱកាស​សេដ្ឋកិច្ច​ប្រកប​ដោយ​ចីរភាព និង​បច្ចេកវិទ្យា​កសិកម្ម​ឆ្លាតវៃ។ តាមរយៈ​កិច្ចសហការ​ជាមួយ​វិស័យ​ឯកជន​នៅ​ក្នុង​ទីផ្សារ​កសិកម្ម គម្រោង​នេះ​នឹង​ជួយ​លើក​កម្ពស់​ជីវភាព​រស់នៅ​របស់​ពលរដ្ឋ​ខ្មែរ ជាពិសេស​ស្ត្រី យុវជន និង​ពលរដ្ឋ​ងាយ​រងគ្រោះ។

ក្នុង​រយៈពេល​ប្រាំ​ឆ្នាំ​ខាងមុខ​នេះ ទីភ្នាក់ងារ​ជំនួយ​អាមេរិក USAID រំពឹង​ថា​នឹង​ជំរុញ​ឲ្យ​មាន​ការ​វិនិយោគ​ពី​ក្រុមហ៊ុន​ឯកជន​ក្នុង​ទឹកប្រាក់​ទំហំ ៣៨​លាន​ដុល្លារ បង្កើត​ការងារ​ជាង ៣០០០​កន្លែង និង​ជួយ​កសិករ និង​ក្រុមហ៊ុន​ឯកជន​ក្នុង​វិស័យ​កសិកម្ម​ឲ្យ​ទទួល​បាន​ហិរញ្ញវត្ថុ​លើ​វិស័យ​កសិកម្ម​ទំហំ ១៥​លាន​ដុល្លារ និង​បង្កើន​ការ​លក់​ផលិតផល​កសិកម្ម​ឲ្យ​បាន ១០០​លាន​ដុល្លារ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស