29 C
Phnom Penh

រដ្ឋាភិបាល​ថា​កម្ពុជា​នឹង​ទទួល​បាន ៧០% នៃ​ប្រេងឆៅ​ដែល​គេ​លួច​កាលពី​ឆ្នាំ​មុន

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​ក្រសួង​រ៉ែ និង​ថាមពល អះអាង​ថា កម្ពុជា​នឹង​ទទួល​បាន​ចំណែក ៧០% នៃ​ប្រេងឆៅ​របស់​ខ្លួន​ក្នុង​ចំណោម​ប្រេង​ជិត ៣០​ម៉ឺន​បារ៉ែល​ដែល​ត្រូវ​គេ​លួច​ដឹក​តាម​កប៉ាល់​កាលពី​ឆ្នាំ​២០២១ កន្លងទៅ ក្រោយពី​បាន​ដឹក​យក​មក​រក្សា​ទុក​នៅ​ក្នុង​ប្រទេស​ថៃ។

រដ្ឋលេខាធិការ​ក្រសួង​រ៉ែ និង​ថាមពល លោក ម៉េង សក្តិធារ៉ា បាន​លើកឡើង​ក្នុង​សន្និសីទ​សារព័ត៌មាន​ស្ដីពី​សមិទ្ធផល​សម្រេច​បាន​រយៈពេល ៥​ឆ្នាំ​របស់​ក្រសួង​រ៉ែ និង​ថាមពល កាលពី​ថ្ងៃទី​៩ ខែ​សីហា ឆ្នាំ​២០២២ ថា ក្រុម​ការងារ​របស់​រដ្ឋាភិបាល​កម្ពុជា​បាន​ខិតខំ​ធ្វើ​ការ​ចរចា​យ៉ាង​សកម្ម​ជាមួយ​ភាគី​ម្ចាស់​កប៉ាល់ MT Strovolos ដែល​ដឹក​ប្រេង​កម្ពុជា​ទៅ និង​ម្ចាស់បំណុល​ធំ​របស់​ក្រុមហ៊ុន Kris Energy រហូត​ឈាន​ដល់​ការ​ចរចា​ចុះ​កិច្ចព្រមព្រៀង​បែងចែក​ផលប្រយោជន៍​ពី​ការ​លក់​ប្រេងឆៅ​ទាំង ២៩​ម៉ឺន ៥​ពាន់​បារ៉ែល​នៅ​ដំណាច់​ខែ​កញ្ញា ឆ្នាំ​២០២២ ខាងមុខ​នេះ។

លោក ម៉េង សក្តិធារ៉ា លើកឡើង​ថា ក្រៅពី​វិធានការ​ច្បាប់​ដែល​ខ្លួន​បាន​អនុវត្ត កម្ពុជា​បាន​ចរចា​ឡើងវិញ​អំពី​ការ​បែងចែក​ផលប្រយោជន៍​ប្រេង​ជិត ៣០​ម៉ឺន​បារ៉ែល​នោះ​ដែរ។ ក្នុង​នោះ គឺ​ត្រូវ​បាន​បែងចែក​ឲ្យ​ម្ចាស់បំណុល​ក្រុមហ៊ុន Kris Energy ៤% និង​ម្ចាស់​កប៉ាល់ ២៦% ដើម្បី​ទូទាត់​ថ្លៃ​កប៉ាល់​ដែល​គេ​បាន​ជួល ហើយ​ចំណែក​ដែល​នៅ​សល់ គឺ​នឹង​បាន​មក​កម្ពុជា​ទាំងអស់។

លោក​បញ្ជាក់​ថា តាម​ការ​ចរចា​បែងចែក​ផលប្រយោជន៍​នេះ កម្ពុជា​ទទួល​បាន​ផលប្រយោជន៍​ច្រើន​ជាង​មុន ព្រោះ​ថា​ក្រៅពី​ទទួល​បាន​ចំណែក ៧០% នេះ​ហើយ កម្ពុជា​ក៏​នឹង​ទទួល​បាន​ប្រាក់​តម្កល់ ៥​លាន​ដុល្លារ​អាមេរិក​របស់​ក្រុមហ៊ុន Kris Energy ថែម​ទៀត ស្រប​ពេល​ដែល​តម្លៃ​ប្រេង​កំពុង​កើនឡើង​ពី ៥០​ដុល្លារ​ក្នុង ១​បារ៉ែល​មក​ដល់​ជិត ១០០​ដុល្លារ​ក្នុង ១​បារ៉ែល ដូច្នេះ​កម្ពុជា​ក៏​នឹង​ទទួល​បាន​លុយ​ច្រើន​ផង​ដែរ​ពី​ប្រេងឆៅ​នេះ។

ការ​អះអាង​នេះ ធ្វើឡើង​បន្ទាប់ពី​ប្រេងឆៅ​របស់​កម្ពុជា​ជិត ៣០​ម៉ឺន​បារ៉ែល បើ​គិត​ជា​ទឹកប្រាក់​មាន​តម្លៃ​ប្រមាណ ២០​លាន​ដុល្លារ​អាមេរិក ត្រូវ​បាន​គេ​លួច​ដឹក​ចេញ​ទៅ​ដោយ​សុវត្ថិភាព​អស់​រយៈពេល​ជាង​មួយ​ឆ្នាំ​កន្លងទៅ​នេះ។

កាលពី​ថ្ងៃទី​២៩ ខែ​ធ្នូ ឆ្នាំ​២០២០ ប្រមុខ​រដ្ឋាភិបាល​កម្ពុជា​បាន​ប្រកាស​បើក​ឲ្យ​ដំណើរការ​ជា​ផ្លូវការ​នៃ​ដំណក់​ប្រេង​លើកដំបូង​នៅ​កម្ពុជា​ក្នុង​ប្លុក A ក្នុង​នោះ លោក ហ៊ុន សែន បញ្ជាក់​ថា ការ​ចាប់ផ្តើម​ផលិតកម្ម​ប្រេង​នេះ គឺជា​ពរជ័យ​សម្រាប់​កម្ពុជា និង​ជា​ការ​ចាប់ផ្ដើម​មួយ​ជំហាន​ដំបូង​ដ៏​សំខាន់​សម្រាប់​កម្ពុជា​ឆ្ពោះ​ទៅ​បង្កើត​បាន​នូវ​សមត្ថភាព​ជាតិ និង​ខឿន​ឧស្សាហកម្ម​ប្រេងកាត ឧស្ម័ន និង​ថាមពល​នៅ​កម្ពុជា​ផង​ដែរ។

ប្រេងឆៅ​របស់​កម្ពុជា​ចំនួន ២៩​ម៉ឺន ៥​ពាន់​បារ៉ែល ត្រូវ​បាន​ក្រុមហ៊ុន MT Strolovos លួច​ដឹក​ចេញពី​ដែនទឹក​កម្ពុជា កាលពី​ថ្ងៃទី​៤ ខែ​មិថុនា ឆ្នាំ​២០២១ កន្លងទៅ។ ការ​លួច​ដឹក​ប្រេង​របស់​កម្ពុជា​នេះ ភាគី​ក្រុមហ៊ុន និង​នាវា​ដឹក​ប្រេង​បាន​អះអាង​ថា ដោយសារតែ Kris Energy ដែល​ជា​ក្រុមហ៊ុន​ទទួល​បាន​សិទ្ធិ​បូម​ប្រេង​ក្នុង​ប្លុក A របស់​កម្ពុជា មិន​បាន​បង់​ប្រាក់​មក​ឱ្យ​ខ្លួន​ក្រោយ​ក្រុមហ៊ុន​នេះ​ប្រកាស​ក្ស័យ​ធន។

សកម្មជន​គណបក្ស​សង្គ្រោះ​ជាតិ លោក ហ៊ុន កុសល បាន​ប្រាប់ The Cambodia Daily នៅ​ថ្ងៃទី​១០ សីហា នេះ​ថា គ្រាន់តែ​រដ្ឋាភិបាល​ប្រកាស​ថា​ចោរ​អាច​លួច​ដឹក​ប្រេង​ពី​ព្រំដែន​របស់​ប្រទេស​មួយ​ដោយ​សុវត្ថិភាព​នោះ គឺជា​រឿង​អស់​សំណើច​មួយ​ទៅ​ហើយ​ដែល​អាជ្ញាធរ​ប្រេងកាត​កម្ពុជា រួម​ទាំង​ឆ្មាំ​ការពារ​ដែនសមុទ្រ​ដែល​ចំណុះ​ឱ្យ​ក្រសួង​ពាក់ព័ន្ធ​សុខ​សុវត្ថិភាព និង​សណ្ដាប់ធ្នាប់​របស់​ប្រទេស​មិន​អាច​ការពារ​ទ្រព្យសម្បត្តិ​ជាតិ​របស់​ខ្លួន​បាន។

លោក ហ៊ុន កុសល លើក​ជា​ចម្ងល់​ថា ហេតុ​អ្វី​បាន​ជា​រដ្ឋាភិបាល​កម្ពុជា​ចរចា​បែងចែក​ផលប្រយោជន៍​ប្រេងឆៅ​នេះ​ជាមួយ​ជនល្មើស​ដែល​បាន​លួច​ទ្រព្យសម្បត្តិ​របស់​ខ្លួន​ទៅវិញ។ លោក​អះអាង​ថា បើ​ការ​លួច​ដឹក​ប្រេង​នេះ​ជា​អំពើ​ខុសច្បាប់ ដោយ​គ្មាន​អំពើពុករលួយ​នៅ​ក្នុង​នោះ រដ្ឋាភិបាល​កម្ពុជា​ត្រូវតែ​ដាក់​ពាក្យ​បណ្តឹង​យក​ប្រេង​របស់​ខ្លួន​មក​វិញ​ទាំងអស់ ដើម្បី​បញ្ជាក់​ថា​ខ្លួន​មិន​បាន​ពាក់ព័ន្ធ​នឹង​ការ​លួច​ដឹក​ប្រេង​នេះ​ទេ។

សកម្មជន​បក្ស​ប្រឆាំង​រូប​នេះ​បញ្ជាក់​ថា ទំនង​ជា​មាន​ការ​បើក​ដៃ​ពី​អ្នក​ទទួល​ខុសត្រូវ​ជាន់ខ្ពស់​របស់​កម្ពុជា​ជាមិនខាន ដូច្នេះ​រវាង​ម្ចាស់​កប៉ាល់ MT Strovolos និង​អ្នក​ឃុបឃិត ប្រាកដ​ជា​មាន​ការ​ចុះ​កុងត្រា​គ្នា​លើ​បទល្មើស​នេះ ហើយ​បញ្ហា​នេះ បើ​រដ្ឋាភិបាល​វែក​មុខ​អ្នក​ប្រព្រឹត្តិ​តាមរយៈ​កិច្ចព្រមព្រៀង​របស់​ពួកគេ នោះ​ច្បាស់​ជា​អាច​ចាប់​ជនល្មើស​បាន​ជាមិនខាន។ ប៉ុន្តែ​លោក​ជឿជាក់​ថា រដ្ឋាភិបាល​នឹង​មិន​អាច​វែក​មុខ​ជនល្មើស​ឃើញ​ទេ បើ​អំពើ​ចោរកម្ម​នេះ​ពាក់ព័ន្ធ​នឹង​បទល្មើស​ពុករលួយ​កិបកេង​លួច​ជាតិ​ដោយ​អ្នក​មាន​អំណាច​ណា​ម្នាក់​នៅ​ពីក្រោយ​នោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស