ក្រុមសហជីពទាមទារឲ្យរដ្ឋាភិបាលបញ្ឈប់សកម្មភាពលាបពណ៌ និងចោទប្រកាន់រាល់ទង្វើទាំងឡាយណាដែលជ្រៀតជ្រែកលើវិវាទការងារតំណាងសហជីព ដែលបំពេញតួនាទីតាមវិជ្ជាជីវៈរបស់ខ្លួន ក្រោយពីក្រសួងការងារចេញលិខិតព្រមានអ្នកស្រី យ៉ាង សុភ័ណ្ឌ ឲ្យបញ្ឈប់រាល់សកម្មភាពខ្លួនដែលក្រសួងចោទថាល្មើសច្បាប់។
ក្នុងសេចក្ដីថ្លែងការណ៍រួមដែលចេញដោយសហជីពចំនួន ២៤ស្ថាប័ន កាលពីថ្ងៃទី៩ ខែសីហា ឆ្នាំ២០២២ បានបដិសេធចំពោះការលើកឡើងរបស់ក្រសួងការងារ ដែលបានចេញលិខិតព្រមានចំពោះអ្នកស្រី យ៉ាង សុភ័ណ្ឌ ក្នុងចេតនាបញ្ជាឲ្យបញ្ឈប់រាល់សកម្មភាពដែលក្រសួងចោទថាល្មើសច្បាប់នោះ។
ក្រុមសហជីពថា អ្នកស្រី យ៉ាង សុភ័ណ្ឌ មិនមែនជាអ្នកដឹកនាំការតវ៉ារបស់កម្មករនិយោជិតណាហ្គាវើលដ៍ឡើយ ប៉ុន្តែការតវ៉ារបស់ក្រុមកូដកររយៈពេល ៧ខែមកនេះ កើតចេញពីការមិនគោរពច្បាប់របស់ក្រុមហ៊ុនណាហ្គាវើលដ៍ និងការគ្មានវិធានការឲ្យក្រុមហ៊ុនគោរពច្បាប់ទៅវិញទេ។
សេចក្ដីថ្លែងការណ៍ដដែលថា រហូតមកដល់ពេលនេះ ក្រសួងការងារគ្មានវិធានការណាមួយធ្វើឲ្យណាហ្គាវើលដ៍គោរពច្បាប់ជាតិ និងច្បាប់អន្តរជាតិ ដែលកម្ពុជាបានផ្ដល់សច្ចាប័នឡើយ ក្រៅពីបង្ខំដាក់សម្ពាធតំណាងសហជីព កម្មករនិយោជិតឱ្យទទួលសំណងដែលក្រុមហ៊ុនណាហ្គាវើលដ៍ផ្ដល់ឲ្យកម្មករ ដើម្បីលុបបំបាត់សហជីពឯករាជ្យក្នុងក្រុមហ៊ុនខ្លួន។
ជាមួយគ្នានេះ ក្រសួងការងារមិនបានជំរុញឲ្យក្រុមហ៊ុនដោះស្រាយ និងគោរពច្បាប់ហើយ បែរជាយកច្បាប់ស្ដីពីសហជីពដើម្បីមកចោទប្រកាន់លើអ្នកស្រី យ៉ាង សុភ័ណ្ឌ ដោយពុំមានភស្តុតាង និងអង្គហេតុពិតបញ្ជាក់ថា អ្នកស្រីជាអ្នកដឹកនាំ និងធ្វើសកម្មភាពក្រៅពីផែនការអនុវត្តវិជ្ជាជីវៈឡើយ។
ក្រុមសហជីពស្នើទៅក្រសួងការងារឲ្យចំណាយពេលវេលាគិតរកដំណោះស្រាយដោយឈរលើស្មារតីការពារការរំលោភបំពាន ភាពអយុត្តិធម៌ដែលកម្មករកំពុងជួបប្រទះ។ ជំរុញឲ្យភាគីនិយោជកត្រូវគោរពច្បាប់ និងសេរីភាពសហជីពដាច់ខាត នៅក្រោមស្មារតីអនុសញ្ញាស្នូលរបស់អង្គការអន្តរជាតិ ដើម្បីបញ្ចប់វិវាទការងារនៅក្រុមហ៊ុន ដោយទទួលយកតំណាង និងសមាជិកសហជីពចូលធ្វើការវិញជាមួយប្រាក់រំឭក ដើម្បីស្ដារកិត្តិយសជាតិ និងក្រុមហ៊ុនណាហ្គាវើលដ៍។
បើតាមសេចក្ដីថ្លែងការណ៍ឲ្យដឹងថា ក្រុមសហជីពបានតាមដានចំពោះកូដកម្មចាប់តាំងពីថ្ងៃទី១៨ ខែធ្នូ ឆ្នាំ២០២១ រហូតដល់មានការចោទប្រកាន់ថ្នាក់ដឹកនាំ និងសមាជិកសហជីព រួមមានចាប់ឃុំខ្លួនពួកគេជាបន្តបន្ទាប់ ទាំងដែលការធ្វើកូដកម្មរបស់កម្មករនិយោជិត គឺធ្វើឡើងដោយគ្មានការបង្ខិតបង្ខំពីសំណាក់បុគ្គលណាម្នាក់។
បន្ថែមពីលើនេះ ការធ្វើកូដកម្មរបស់កម្មករធ្វើឡើងតាមនីតិវិធីច្បាប់ជាធរមានដែលមានចែងក្នុងច្បាប់ស្ដីពីការងារ (៣២៤ និង ៣២៧) និងច្បាប់ស្ដីពីសហជីព (មាត្រា១៣) ដូចជាការបោះឆ្នោតជាសម្ងាត់សម្រេចធ្វើកូដកម្ម និងការជូនដំណឹងធ្វើកូដកម្មជាដើម ដូច្នេះ «ការធ្វើកូដកម្មមិនមែនជាបទល្មើសឧក្រិដ្ឋ»។
កាលពីថ្ងៃទី២៣ ខែកក្កដា រដ្ឋបាលរាជធានីភ្នំពេញបានចេញសេចក្ដីប្រកាសព័ត៌មានមួយដោយបានចោទប្រកាន់ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក វន់ ពៅ និងអ្នកស្រី យ៉ាង សុភ័ណ្ឌ ថាបានញុះញង់ឱ្យកូដករណាហ្គាវើលដ៍ បុកទម្លុះបារ៉ាស់របស់សមត្ថកិច្ចរហូតមានអំពើហិង្សាកើតឡើង ប៉ុន្តែការចោទប្រកាន់នេះ ត្រូវបានសហជីព និងក្រុមអង្គការសង្គមស៊ីវិលច្រានចោល៕