សមាជិកព្រឹទ្ធសភា និងជាប្រធានអនុគណៈកម្មាធិការព្រឹទ្ធសភាសហរដ្ឋអាមេរិក ទទួលបន្ទុកទំនាក់ទំនងការបរទេសអាស៊ីបូព៌ា ប៉ាស៊ីហ្វិក និងសន្តិសុខបច្ចេកវិទ្យាអ៊ីនធឺណិតអន្តរជាតិ ជំរុញឱ្យរាជរដ្ឋាភិបាលឯកបក្ស លោក ហ៊ុន សែន ទម្លាក់ចោលបទចោទលើមេដឹកនាំបក្សប្រឆាំង លោក កឹម សុខា និងបើកឱ្យគណបក្សសង្គ្រោះជាតិរស់ឡើងវិញ ដើម្បីទទួលបានសិទ្ធិចូលរួមការបោះឆ្នោតជាតិក្នុងឆ្នាំ២០២៣ ខាងមុខនេះ។
សមាជិកព្រឹទ្ធសភា និងជាប្រធានអនុគណៈកម្មាធិការព្រឹទ្ធសភាទទួលបន្ទុកទំនាក់ទំនងការបរទេស លោក Edward J. Markey បានសរសេរលើបណ្ដាញសង្គមធ្វីតធឺ (Twitter) របស់លោកកាលពីថ្ងៃទី១៨ ខែសីហា ឆ្នាំ២០២២ ថា ទោះបីជាមានការយាយី និងការចោទប្រកាន់ពីសំណាក់រដ្ឋាភិបាលបុរសខ្លាំងប្រើកណ្ដាប់ដៃដែក លោក ហ៊ុន សែន អស់រយៈពេលជិត ៥ឆ្នាំក៏ដោយ ក៏មេដឹកនាំគណបក្សប្រឆាំងនៅប្រទេសកម្ពុជា លោក កឹម សុខា នៅតែបន្តស្មារតីគាំទ្រឱ្យមានលំហសេរីភាពកាន់តែទូលំទូលាយនៅប្រទេសកម្ពុជាដដែល។
ប្រធានអនុគណៈកម្មាធិការព្រឹទ្ធសភាទទួលបន្ទុកទំនាក់ទំនងការបរទេសរូបនេះបញ្ជាក់ថា រាល់ការចោទប្រកាន់គ្រប់បែបយ៉ាងពីមេដឹកនាំបក្សកាន់អំណាច លោក ហ៊ុន សែន ទៅលើប្រធានគណបក្សសង្គ្រោះជាតិ លោក កឹម សុខា និងគណបក្សប្រឆាំងដ៏ធំនៅកម្ពុជា គួរតែត្រូវបានទម្លាក់ចោលភ្លាមៗ ហើយលោក កឹម សុខា និងគណបក្សសង្គ្រោះជាតិ គួរតែមានសេរីភាពពេញលេញឡើងវិញក្នុងការចូលរួមការបោះឆ្នោតជាតិក្នុងឆ្នាំ២០២៣ ខាងមុខ។
មេដឹកនាំបក្សប្រឆាំងដែលមិនទាន់មានសេរីភាពពេញលេញឡើងវិញ លោក កឹម សុខា បានសរសេរលើទំព័រហ្វេសប៊ុករបស់លោកនៅថ្ងៃទី១៩ សីហា នេះថា លោកបានជួបជាមួយគណៈប្រតិភូសភាសហរដ្ឋអាមេរិកដែលដឹកនាំដោយសមាជិកព្រឹទ្ធសភា លោក Edward J. Markey ដែលជាប្រធានអនុគណៈកម្មាធិការទំនាក់ទំនងកិច្ចការបរទេសនៃព្រឹទ្ធសភាសម្រាប់អាស៊ីបូព៌ា ប៉ាស៊ីហ្វិក និងសន្តិសុខបច្ចេកវិទ្យាអ៊ីនធឺណិតអន្តរជាតិ និងសមាជិករដ្ឋសភា លោក Alan Lowenthal ដែលជាសហប្រធានក្រុមការងារកិច្ចការកម្ពុជានៃរដ្ឋសភា និងសមាជិកសភា ៣រូបផ្សេងទៀតកាលពីថ្ងៃទី១៦ ខែសីហា ឆ្នាំ២០២២ នេះ។
ប្រធានគណបក្សសង្គ្រោះជាតិ បញ្ជាក់ថា ក្នុងជំនួបនេះ គណៈប្រតិភូសមាជិកសភាសហរដ្ឋអាមេរិកទាំង ៥រូប បានសម្ដែងនូវការកោតសរសើរចំពោះការលះបង់របស់លោក ដើម្បីបុព្វហេតុសិទ្ធិមនុស្ស និងលទ្ធិប្រជាធិបតេយ្យ ដែលតែងតែមានការអត់ធ្មត់ដោយប្រកាន់ខ្ជាប់នូវគោលការណ៍អហិង្សារហូតមក។
គណបក្សសង្គ្រោះជាតិ ត្រូវបានតុលាការកំពូលក្រុងភ្នំពេញ ប្រកាសរំលាយកាលពីខែវិច្ឆិកា ឆ្នាំ២០១៧ កន្លងទៅ ខណៈមេដឹកនាំបក្សប្រឆាំង លោក កឹម សុខា ក៏ត្រូវបានតុលាការក្រុងភ្នំពេញចោទប្រកាន់ពីបទឃុបឃិតជាមួយរដ្ឋបរទេស ដើម្បីផ្តួលរំលំរដ្ឋាភិបាលកម្ពុជារហូតឈានដល់ការចាប់ខ្លួនដាក់ពន្ធនាគារកាលពីខែកញ្ញា ឆ្នាំ២០១៧ កន្លងទៅផងដែរ។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី១៩ សីហា នេះថា ជម្លោះនយោបាយនៅប្រទេសកម្ពុជារវាងបក្សកាន់អំណាច និងគណបក្សបក្សសង្គ្រោះជាតិជិត ៥ឆ្នាំមកនេះ បានបង្កទៅជាវិបត្តិជាប់គាំងសេដ្ឋកិច្ចនៃកម្ពុជា និងបញ្ហានយោបាយការទូតលើឆាកអន្តរជាតិ ព្រមទាំងបង្កទៅជាការរឹតត្បិតសិទ្ធិសេរីភាពរបស់ពលរដ្ឋយ៉ាងធ្ងន់ធ្ងររហូតដល់សព្វថ្ងៃនេះ។
លោក មាជ សុវណ្ណារ៉ា អះអាងថា សហគមន៍អន្តរជាតិ ពិសេសសហរដ្ឋអាមេរិក សហភាពអឺរ៉ុប ជប៉ុន អូស្ត្រាលី និងអ្នករាយការណ៍ពិសេសអង្គការសហប្រជាជាតិប្រចាំកម្ពុជា ជាដើម តែងតែទាមទារឱ្យមានការទម្លាក់ចោលបទចោទប្រកាន់លោក កឹម សុខា ជាបន្តបន្ទាប់ ដោយការផ្តល់នូវសេរីភាពនយោបាយដែលអាចឱ្យលោកចូលរួមបោះឆ្នោតឆ្នាំ២០២៣ ខាងមុខនេះ។
មន្ត្រីជាន់ខ្ពស់គណបក្សសង្គ្រោះជាតិរូបនេះបញ្ជាក់ថា សហគមន៍អន្តរជាតិ ជាពិសេសប្រទេសលោកសេរីក្នុងរយៈពេលប៉ុន្មានខែចុងក្រោយនេះ បានបង្ហាញជំហរនយោបាយការទូតដូចៗគ្នាដោយចង់ឃើញប្រទេសកម្ពុជាត្រឡប់ទៅរកគន្លងសេរីភាពពេញលេញតាមគោលការណ៍លទ្ធិប្រជាធិបតេយ្យ និងការគោរពសិទ្ធិមនុស្សស្របតាមរបបប្រជាធិបតេយ្យសេរីពហុបក្ស ឆ្ពោះទៅរកការផ្សះផ្សាជាតិ។
ទាក់ទិននឹងបញ្ហានេះ កាលពីថ្ងៃទី៣១ ខែមីនា ឆ្នាំ២០២២ កន្លងទៅ តំណាងសហភាពអឺរ៉ុបបានថ្លែងក្នុងសម័យប្រជុំពេញអង្គនៃកិច្ចប្រជុំអន្តរសកម្មលើកទី៥០ ស្ដីពីស្ថានការណ៍សិទ្ធិមនុស្សនៅប្រទេសកម្ពុជាថា រាជាណាចក្រកម្ពុជាគួរបើកលំហឱ្យមេដឹកនាំបក្សប្រឆាំង លោក កឹម សុខា អាចចូលរួមការបោះឆ្នោតឆ្នាំ២០២៣ ដើម្បីធានាការបោះឆ្នោតមួយដែលប្រកបទៅដោយសេរី ត្រឹមត្រូវ និងយុត្តិធម៌៕