25 C
Phnom Penh

លោក ស ខេង ថា​ការ​បោះឆ្នោត​នៅ​កម្ពុជា​ស្រប​តាម​គោលការណ៍​ប្រជាធិបតេយ្យ​ជានិច្ច

ដោយ ឌឹ ខេមបូឌា ដេលី

បទវិភាគ

អនុប្រធាន​បក្ស​កាន់​អំណាច លោក ស ខេង អះអាង​ថា ការ​បោះឆ្នោត​នៅ​កម្ពុជា​ពី​មួយ​អាណត្តិ​ទៅ​មួយ​អាណត្តិ​ស្រប​តាម​គោលការណ៍​ប្រជាធិបតេយ្យ​ជានិច្ច និង​ប្រព្រឹត្ត​ទៅ​ដោយ​គ្មាន​អំពើ​ហិង្សា ហើយ​ពលរដ្ឋ​បាន​ចូលរួម​ដោយ​សេរី។

រដ្ឋមន្ត្រី​ក្រសួង​មហាផ្ទៃ លោក ស ខេង បាន​លើកឡើង​ក្នុង​ជំនួប​ជាមួយ​អ្នក​រាយការណ៍​ពិសេស​សិទ្ធិមនុស្ស​របស់​អង្គការ​សហប្រជាជាតិ​ប្រចាំ​នៅ​កម្ពុជា លោក វីទិត ម៉ុនតាប៊ន កាលពី​ថ្ងៃទី​២៤ ខែ​សីហា ឆ្នាំ​២០២២ ថា កម្ពុជា​តែង​អនុវត្ត​យ៉ាង​ខ្ជាប់ខ្ជួន​នូវ​សិទ្ធិ​ពលរដ្ឋ និង​សិទ្ធិ​នយោបាយ​ដែល​មាន​ចែង​ក្នុង​រដ្ឋធម្មនុញ្ញ​របស់​ខ្លួន ក្នុង​នោះ កម្ពុជា​បាន​អនុវត្ត​នូវ​ការ​បោះឆ្នោត​យ៉ាង​ទៀងទាត់ ទាំង​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់ ការ​បោះឆ្នោត​ជាតិ និង​ការ​បោះឆ្នោត​ព្រឹទ្ធសភា ជាដើម។

លោក ស ខេង អះអាង​ថា បច្ចុប្បន្ន​នេះ​មាន​គណបក្ស​នយោបាយ​ចំនួន ៤៥​គណបក្ស បាន​ចុះបញ្ជី​នៅ​ក្រសួង​មហាផ្ទៃ ព្រមទាំង​មាន​អង្គការ​ក្រៅ​រដ្ឋាភិបាល​ជាច្រើន​ទៀត​ដែល​កំពុង​អនុវត្ត​សកម្មភាព​ទៅ​តាម​មុខងារ​របស់​ពួកគេ​រៀងៗ​ខ្លួន​បាន​ដោយ​រលូន​ផង​ដែរ។

ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ ប្រាប់​សារព័ត៌មាន The Cambodia Daily នៅ​ថ្ងៃទី​២៥ សីហា នេះ​ថា លោក​មិន​យល់ស្រប​ទៅ​នឹង​ការ​លើកឡើង​របស់​លោក ស ខេង ទាំងស្រុង​នោះ​ទេ ព្រោះ​ថា​នីតិវិធី​របស់ គ.ជ.ប សព្វថ្ងៃ​នេះ គឺ​បង្ក​ភាព​ស្មុគស្មាញ​ដល់​គណបក្ស​ក្រៅ​រដ្ឋាភិបាល​យ៉ាង​ខ្លាំង ដូចជា​ការ​កែប្រែ​នីតិវិធី​របស់​ទម្រង់ ១១០២ និង​ការ​បិទ​ទ្វារ​ការិយាល័យ​រាប់​សន្លឹកឆ្នោត​កាលពី​បោះឆ្នោត​ឃុំ-សង្កាត់​កន្លង​ទៅ​ថ្មីៗ​នេះ ជាដើម។

លោក​បន្ថែម​ថា ក្រៅពី​នីតិវិធី​របស់ គ.ជ.ប ដែល​រឹតត្បិត​ទៅ​គណបក្ស​នយោបាយ អាជ្ញាធរ​មូលដ្ឋាន​ដូចជា​មេភូមិ ជាដើម ក៏​ជា​តួអង្គ​មួយ​ដែល​បង្ក​ការ​ភ័យខ្លាច​ទៅដល់​ពលរដ្ឋ​ផង​ដែរ ព្រោះ​ថា​ពួកគេ​បាន​ប្រើ​តួនាទី​ជា​មេភូមិ​ទៅ​ជា​ជា​មេ​បក្ស​ប្រចាំ​ភូមិ សម្រាប់​តាម​ពលរដ្ឋ​ដែល​មាន​និន្នាការ​មិន​គាំទ្រ​ដល់​បក្ស​កាន់​អំណាច ជាជាង​បម្រើ​ពលរដ្ឋ​សព្វថ្ងៃ​នេះ។

បណ្ឌិត យ៉ង សាំងកុមារ លើកឡើង​ថា ដើម្បី​ធានា​ឲ្យ​មាន​គណបក្ស​ចម្រុះ​ក្នុង​រដ្ឋសភា​ស្រប​តាម​ទម្រង់​លទ្ធិប្រជាធិបតេយ្យ រដ្ឋាភិបាល​គួរតែ​ប្រើ​រូបមន្ត​គណនា​អាសនៈ​មធ្យម​ខ្ពស់​បំផុត​ដូច​ឆ្នាំ​១៩៩៣ ដែល​បង្កើត​ឡើង​ដោយ​អ៊ុនតាក់ (UNTAC) វិញ ត្បិត​រូបមន្ត​គណនា​អាសនៈ​សព្វថ្ងៃ​នេះ​មិន​អាច​ជួយ​ឲ្យ​គណបក្ស​ដែល​ជា​សំឡេង​ភាគតិច​មាន​តំណាង​ក្នុង​រដ្ឋសភា​បាន​នោះ​ទេ។

លោក​បន្ថែម​ទៀត​ថា លើស​ពី​នេះ រដ្ឋាភិបាល​ក៏​គួរតែ​ពិចារណា​កែ​មាត្រា​២៧ នៃ​ច្បាប់​ស្ដីពី​ការ​បោះឆ្នោត​ជាតិ​ផង​ដែរ ដែល​តម្រូវ​ឲ្យ​គណបក្ស​នយោបាយ​នីមួយៗ​រៀប​បក្ខជន​ឈរ​ឈ្មោះ​ឲ្យ​បាន ១​ភាគ​៣ ដែល​ស្មើ​នឹង ៤១​រូប សម្រាប់​ចូលរួម​ការ​បោះឆ្នោត ដែល​ជា​មូលហេតុ​បង្ក​ការ​លំបាក​ដល់​គណបក្ស​ដែល​មាន​សំឡេង​ភាគតិច​យ៉ាង​ខ្លាំង​ក្នុង​ការ​ចូលរួម​ប្រកួតប្រជែង​នៅ​ពេល​បោះឆ្នោត ដែល​ពួកគេ​ត្រូវតែ​រៀប​បេក្ខជន​រហូត​ដល់​ទៅ​ជិត​ពាក់កណ្តាល​នៃ​មណ្ឌល​បោះឆ្នោត​ដែល​មាន​សរុប ២៥​នៅ​ទូទាំង​ប្រទេស​ក្នុង​ពេល​បច្ចុប្បន្ន​នេះ។

យោង​តាម​មាត្រា​២៧ នៃ​ច្បាប់​ស្ដីពី​ការ​បោះឆ្នោត​ជាតិ ចែង​ថា បញ្ជី​បេក្ខជន​ឈរ​ឈ្មោះ​បោះឆ្នោត​ត្រូវតែ​មាន​បេក្ខជន​ពេញ​សិទ្ធិ​ចំនួន​យ៉ាងតិច ១​ភាគ​៣ នៃ​ចំនួន​អាសនៈ​ក្នុង​រដ្ឋសភា៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស