26 C
Phnom Penh

លោក ហ៊ុន សែន មិន​ចាត់​វិធានការ​លើ​ក្រុម​លោក ខឹម វាសនា ព្រោះ​គ្មាន​បំណង​ផ្តួល​រំលំ​រដ្ឋាភិបាល

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កម្ពុជា​ដែល​ចូលចិត្ត​ប្រើ​កណ្ដាប់ដៃ​ដែក​បង្ក្រាប​សកម្មជន​សិទ្ធិមនុស្ស លោក ហ៊ុន សែន អះអាង​ថា ការ​ប្រមូលផ្ដុំ​មនុស្ស​ប្រមាណ ២​ម៉ឺន​នាក់​មកពី​តាម​បណ្តា​ខេត្ត​ចំនួន​១៩ នៅ​កម្ពុជា​របស់​មេ​បក្ស​សម្ព័ន្ធ​ដើម្បី​ប្រជាធិបតេយ្យ លោក ខឹម វាសនា នៅ​តំបន់​ភ្នំ​គូលែន គឺជា​ទង្វើ​ខុស​ច្បាប់ ប៉ុន្តែ​លោក​នឹង​មិន​ចាត់​វិធានការ​ច្បាប់​នោះ​ទេ ព្រោះ​ថា​ការ​ប្រមូលផ្ដុំ​នេះ​មិនមែន​ដើម្បី​ផ្តួល​រំលំ​រដ្ឋាភិបាល គ្រាន់តែ​ស្ថិត​ក្នុង​ក្របខ័ណ្ឌ​អបិយ​ជំនឿ​តែប៉ុណ្ណោះ។

លោក ហ៊ុន សែន បាន​លើកឡើង​ក្នុង​ពិធី​បើក​ការដ្ឋាន​សាងសង់​ស្ពាន​អាកាស​ក្នុង​រាជធានី​ភ្នំពេញ នៅ​ថ្ងៃទី​៣១ ខែ​សីហា ឆ្នាំ​២០២២ នេះ​ថា មេ​បក្ស​ជួង​លោក ខឹម វាសនា មិនមែន​ជា​ក្រុម​ជ្រុល​និយម​នោះ​ទេ គ្រាន់តែ​ស្ថិត​ក្នុង​ក្របខ័ណ្ឌ​អបិយ​ជំនឿ​តែប៉ុណ្ណោះ។ លោក ហ៊ុន សែន បាន​ច្រានចោល​នូវ​ការ​លើកឡើង​ថា លោក​ជា​អ្នក​នៅ​ពីក្រោយ​នៃ​ការ​ប្រមូលផ្ដុំ​របស់​ក្រុម​អ្នកគាំទ្រ​លោក ខឹម វាសនា ដែល​ថា​ដើម្បី​បន្លប់​ស្ថានការណ៍​ទាក់ទង​ទៅ​នឹង​ទស្សនកិច្ច​របស់​លោក ហ៊ុន ម៉ាណែត នៅ​វៀតណាម និង​ករណី​ធ្វើ​របង​ព័ទ្ធ​ភ្នំ​តាម៉ៅ។

លោក ហ៊ុន សែន អំពាវនាវ​ឱ្យ​ពលរដ្ឋ​ដែល​កំពុង​ស្នាក់នៅ​ទីនោះ​វិលត្រឡប់​ទៅ​លំនៅឋាន​វិញ ក្នុង​នោះ​លោក ហ៊ុន សែន បញ្ជាក់​ថា លោក​ក៏​បាន​ចេញ​បទបញ្ជា​ឱ្យ​អាជ្ញាធរ​ការពារ​កុំ​ឱ្យ​មាន​បាតដៃ​ទី​៣ និង​ការ​ដណ្តើម​កាន់កាប់​ដី​របស់​អ្នក​ដទៃ​ពី​ក្រុម​របស់​លោក ខឹម វាសនា ដែល​កំពុង​ប្រមូលផ្ដុំ​គ្នា​នៅ​ទីនោះ។ លោក​បន្ថែម​ថា ក្រៅពី​នេះ គឺ​គ្មាន​ចំណាត់ការ​លើ​លោក ខឹម វាសនា ឬ​បំបែក​ការ​ប្រមូលផ្ដុំ​នេះ​ឡើយ បើ​ទោះបីជា​មេ​បក្ស​ជួង​រូប​នេះ​បាន​ប្រមាថ​ធ្ងន់ធ្ងរ​មក​លើ​លោក​ក៏ដោយ។

ការ​អះអាង​នេះ ធ្វើឡើង​បន្ទាប់ពី​ប្រធាន​គណបក្ស​ជួង​ដែល​តាំងខ្លួន​ជា​ព្រះព្រហ្ម បាន​ជេរ​ប្រមាថ​ទៅ​លើ​ប្រមុខ​រដ្ឋាភិបាល​កម្ពុជា លោក ហ៊ុន សែន ដោយ​ការ​ប្រើ​ពាក្យ​អសុរោះ​ធ្ងន់ធ្ងរ​កាលពី​យប់​ថ្ងៃ​អង្គារ ទី​៣០ សីហា។

កាលពី​ថ្ងៃទី​៣០ ខែ​សីហា ឆ្នាំ​២០២២ ប្រធាន​គណបក្ស​សម្ព័ន្ធ​ដើម្បី​ប្រជាធិបតេយ្យ លោក ខឹម វាសនា បាន​សរសេរ​លើ​គណនី​ហ្វេសប៊ុក​របស់​លោក​ប្រមាថ​ទៅ​លើ​ភាព​ពិការ​ភ្នែក​របស់​លោក ហ៊ុន សែន ហើយ​ថា​លោក ហ៊ុន សែន គឺជា​យួន​ដែល​ក្លែងបន្លំ​ខ្លួន​មក​ដឹកនាំ​កម្ពុជា។

អនុប្រធាន​វេទិកា​ពលរដ្ឋ លោក ម៉ែន ណាត បាន​ប្រាប់​សារព័ត៌មាន The Cambodia Daily នៅ​ថ្ងៃទី​៣១ សីហា នេះ​ថា ការ​មិន​ចាត់​វិធានការ​ច្បាប់​របស់​លោក ហ៊ុន សែន លើ​លោក ខឹម វាសនា គឺ​បង្ហាញ​ឱ្យ​ឃើញ​ថា ព្រឹត្តិការណ៍​នៃ​ការ​ប្រមូលផ្ដុំ​នេះ​បាន​ធ្វើ​ឱ្យ​លោក ហ៊ុន សែន ចំណេញ​នយោបាយ​របស់​គាត់ ដែល​លោក ហ៊ុន សែន កំពុង​ព្យាយាម​បិទបាំង​នៅ​ពេលនេះ​ដូចជា​ការ​បន្ធូរ​ការ​រិះគន់​ជុំវិញ​ការ​ព័ទ្ធ​របង​នៅ​តំបន់​ភ្នំ​តាម៉ៅ ជាដើម។

លោក ម៉ែន ណាត លើកឡើង​ថា ប្រវត្តិ​នយោបាយ​របស់​លោក ខឹម វាសនា បាន​ជួយ​ផ្តល់​ផល​ចំណេញ​ដល់​លោក ហ៊ុន សែន រហូត​មក ដូចជា​ការ​ជួយ​លើក​ដៃ​គាំទ្រ​ការ​អនុម័ត​សន្ធិសញ្ញា​បំពេញ​បន្ថែម​ឆ្នាំ​២០០៥ ក្នុង​នាម​ខ្លួន​ជា​តំណាងរាស្ត្រ​បក្ស​ប្រឆាំង ជួយ​វាយប្រហារ​គណបក្ស​ប្រឆាំង​ចាប់តាំងពី​បើក​គណបក្ស​តាំងពី​ឆ្នាំ​២០១៦ ជួយ​បោះឆ្នោត​ឱ្យ​ក្រុមប្រឹក្សា​ស្រុក​ឱ្យ​បក្ស​កាន់​អំណាច​ឆ្នាំ​២០១២ ដែល​លោក ខឹម វាសនា ធ្លាប់​ប្រកាស​លក់ ១​សន្លឹក ៥០០​ដុល្លារ ដើម្បី​ទិញ​នំ​បញ្ចុក ជាដើម។

ជាង​នេះ​ទៅ​ទៀត លោក ខឹម វាសនា ក៏​ធ្លាប់​ជួយ​លោក ហ៊ុន សែន ក្នុង​កា​រំលាយ​គណបក្ស​សង្គ្រោះ​ជាតិ​ដែរ តាមរយៈ​នៃ​ការ​ចេញ​លិខិត​គាំទ្រ​បន្ទាប់ពី​តុលាការ​កំពូល​ក្រុង​ភ្នំពេញ​ប្រកាស​រំលាយ​បក្ស​ប្រឆាំង​ដ៏​ធំ​មួយ​នេះ​កាលពី​ថ្ងៃទី​១៦ ខែ​វិច្ឆិកា ឆ្នាំ​២០១៧ កន្លងទៅ។

អនុប្រធាន​វេទិកា​ពលរដ្ឋ​រូប​នេះ​បញ្ជាក់​ថា ការ​អនុគ្រោះ​របស់​លោក ហ៊ុន សែន លើ​លោក ខឹម វាសនា គឺជា​រឿង​ដែល​គេ​មិន​គួរ​ប្រកាន់​នោះ​ទេ ប៉ុន្តែ​ទង្វើ​បែប​នេះ លោក ហ៊ុន សែន មិន​ដែល​ធ្វើ​ដាក់​អ្នក​នយោបាយ​ផ្សេង ឬ​ក្រុម​សកម្មជន​នានា ឬ​ក្រុម​កម្មករ​និយោជិត​ម្តង​ណា​ឡើយ គឺ​មាន​តែ​បង្ក្រាប​ប៉ុណ្ណោះ បើ​ទោះបីជា​អ្នក​ទាំងនោះ​ជួបជុំ​គ្នា​ដើម្បី​សិទ្ធិ​សេរីភាព​បញ្ចេញ​មតិ​ក្នុង​កម្រិត​តិចតួច​ក៏ដោយ។

នៅ​ថ្ងៃទី​៣១ ខែ​សីហា នេះ អាជ្ញាធរ​ខេត្ត​សៀមរាប បាន​ដាក់​កម្លាំង​ទៅ​ដល់​ដី​ចម្ការ​លោក ខឹម វាសនា ដើម្បី​ដឹកជញ្ជូន​ពលរដ្ឋ​ដែល​មាន​បំណង​ចេញ​ពី​ទីនោះ ក្នុង​នោះ​មាន​ពលរដ្ឋ​ខ្លះ​បាន​ចាកចេញ​តាម​ការ​ណែនាំ​របស់​អាជ្ញាធរ​ផង​ដែរ។

ទាក់ទិន​នឹង​បញ្ហា​នេះ អ្នក​នាំពាក្យ​ក្រសួង​ការងារ និង​បណ្តុះបណ្តាល​វិជ្ជាជីវៈ លោក ហេង សួរ បាន​អះអាង​នៅ​ថ្ងៃទី​៣១ សីហា នេះ​ថា ក្នុង​ចន្លោះ​ថ្ងៃទី​២៣ ដល់​ថ្ងៃទី​២៥ ខែ​សីហា កន្លង​ទៅ​នេះ នៅ​ប្រទេស​កូរ៉េ​ខាងត្បូង មាន​ពលរដ្ឋ​ខ្មែរ​ជាង ៤០០​នាក់ និង​នៅ​ជប៉ុន មាន​ពលរដ្ឋ​ខ្មែរ​ប្រហែល​ជា ១០០​នាក់ ក្នុង​នោះ​ក៏​មាន​និស្សិត​ថ្នាក់​បណ្ឌិត​រៀន​នៅ​តំបន់​កាន់សៃ ប្រទេស​ជប៉ុន ម្នាក់​ផង​ដែរ​ដែល​បាន​ត្រឡប់​មក​កម្ពុជា​វិញ​តាម​ការ​អំពាវនាវ​របស់​លោក ខឹម វាសនា កាលពី​ពេល​កន្លងទៅ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស