25 C
Phnom Penh

ក្រុម​អ្នក​ច្បាប់​អំពាវនាវ​ឱ្យ​បង្វែរ​សំណុំរឿង​លោក កឹម សុខា ទៅ​ដោះស្រាយ​តាម​ផ្លូវ​នយោបាយ​វិញ

ដោយ ឌឹ ខេមបូឌា ដេលី

បទវិភាគ

សហ​មេធាវី​ការពារ​ក្តី​ប្រធាន​គណបក្ស​សង្គ្រោះ​ជាតិ លោក កឹម សុខា អំពាវនាវ​ឱ្យ​តុលាការ​ក្រុង​ភ្នំពេញ​បង្វែរ​សំណុំរឿង​របស់​លោក កឹម សុខា ដែល​កំពុង​ដំណើរការ​សវនាការ​លើក​ទី​៥៤ នៅ​ពេលនេះ យក​ទៅ​ដោះស្រាយ​តាម​ផ្លូវ​នយោបាយ​វិញ​ទើប​អាច​បញ្ចប់​សំណុំរឿង​បាន។

សហ​មេធាវី​ការពារ​ក្តី​មេដឹកនាំ​បក្ស​ប្រឆាំង លោក ផែង ហេង បាន​ប្រាប់​អ្នក​សារព័ត៌មាន​នៅ​មុខ​សាលាដំបូង​រាជធានី​ភ្នំពេញ បន្ទាប់ពី​សវនាការ​លើ​សំណុំរឿង​លោក កឹម សុខា នៅ​ថ្ងៃទី​៣១ ខែ​សីហា ឆ្នាំ​២០២២ នេះ​ថា វិធី​ល្អ​បំផុត​ដើម្បី​បញ្ចប់​សំណុំរឿង​លោក កឹម សុខា ឱ្យ​បាន​ឆាប់ គឺ​ត្រូវ​ដោះស្រាយ​រវាង​អ្នក​នយោបាយ​កំពូល​របស់​កម្ពុជា។

លោក ផែង ហេង អះអាង​ថា ប្រសិនបើ​ការ​បើក​សវនាការ​នេះ​ធ្វើឡើង​ដើម្បី​គ្រាន់តែ​អូស​បន្លាយ​ពេលវេលា​ក្នុង​ចេតនា​កុំ​ឱ្យ​លោក កឹម សុខា អាច​ចូលរួម​ប្រកួតប្រជែង​ការ​បោះឆ្នោត​ជាតិ​ក្នុង​ឆ្នាំ​២០២៣ ខាងមុខ​នេះ​បាន នោះ​គឺ​រឹតតែ​បញ្ជាក់​កាន់តែ​ច្បាស់​ថា សំណុំរឿង​នេះ​គឺ​ពាក់ព័ន្ធ​នឹង​នយោបាយ។ ដូច្នេះ គឺ​ពិត​ជា​មិន​អាច​ដោះស្រាយ​តាម​ផ្លូវ​ផ្សេង​ក្រៅពី​អ្នក​នយោបាយ​បាន​ឡើយ។

មេធាវី​រូប​នេះ​បញ្ជាក់​ថា តំណាង​អយ្យការ​បាន​ព្យាយាម​លើក​សំណួរ​ផ្សេងៗ​សួរ​លោក កឹម សុខា ក្រៅពី​ការ​សាកសួរ​ទៅលើ​អង្គហេតុ​ដែល​តុលាការ​បាន​ចោទប្រកាន់​ពី​បទ សន្ទិដ្ឋភាព​ជាមួយ​រដ្ឋ​បរទេស បន្ទាប់ពី​ពួកគេ​រក​មិន​ឃើញ​ភស្តុតាង​ដែល​ខ្លួន​បាន​ចោទប្រកាន់​លោក កឹម សុខា កន្លងមក ដែល​ធ្វើ​ឱ្យ​ប៉ះពាល់​ដល់​ពេលវេលា និង​ផ្លូវចិត្ត​របស់​លោក កឹម សុខា យ៉ាង​ធ្ងន់ធ្ងរ។

លោក ផែង ហេង អំពាវនាវ​ឱ្យ​តុលាការ​លើក​ពេល​នៃ​ការ​បើក​សវនាការ​លើ​សំណុំរឿង​របស់​លោក កឹម សុខា ទៅ​ថ្ងៃ​ចុង​សប្តាហ៍ ឬ​ថ្ងៃ​ដើម​សប្តាហ៍​វិញ ប្រសិនបើ​តុលាការ​មាន​បំណង​ពន្យារ​ពេល​ឱ្យ​កាន់តែ​យូរ​នៃ​ការ​ជំនុំជម្រះ​លើ​សំណុំរឿង​របស់​ប្រធាន​គណបក្ស​សង្គ្រោះ​ជាតិ​នេះ។

ការ​អះអាង​នេះ ធ្វើឡើង​បន្ទាប់ពី​សវនាការ​របស់​មេដឹកនាំ​បក្ស​ប្រឆាំង លោក កឹម សុខា ត្រូវ​បាន​អូស​បន្លាយ​ពេល​ប្រមាណ​ជិត ៥​ឆ្នាំ​ចាប់​តាំងពី​ឆ្នាំ​២០១៧ មក។

អាជ្ញាធរ​របស់​រដ្ឋាភិបាល​លោក ហ៊ុន សែន សម្រុក​ចូល​ចាប់​ខ្លួន​លោក កឹម សុខា ទាំង​កណ្ដាល​អាធ្រាត្រ​ឈាន​ចូល​ថ្ងៃទី​៣ ខែ​កញ្ញា ឆ្នាំ​២០១៧ ក្នុង​ពេល​លោក​កំពុង​មាន​អភ័យ​ឯកសិទ្ធិ​សភា​នៅឡើយ។ ចំណែក​តុលាការ​ក្រុង​ភ្នំពេញ ក៏​បាន​ចោទប្រកាន់​មេ​បក្ស​ប្រឆាំង​រូប​នេះ​ពី​បទ​ត្រូវរ៉ូវ​គ្នា​ជាមួយ​សហរដ្ឋ​អាមេរិក ដើម្បី​ផ្ដួល​រំលំ​រដ្ឋាភិបាល​កម្ពុជា និង​បាន​ឃុំ​ខ្លួន​លោក​ក្នុង​ពន្ធនាគារ​ត្រពាំងផ្លុង​ជិត​ព្រំដែន​ប្រទេស​វៀតណាម​ជាង ១​ឆ្នាំ ហើយ​បន្ត​ឃុំ​ខ្លួន​ក្នុង​ផ្ទះ​របស់​លោក​រយៈពេល​មួយ​ឆ្នាំ​ថែម​ទៀត។

ប៉ុន្តែ​ក្រោយពី​មាន​សម្ពាធ និង​ការ​រិះគន់​ពី​សហគមន៍​ជាតិ និង​អន្តរជាតិ​ជា​បន្តបន្ទាប់ តុលាការ​ក្រុង​ភ្នំពេញ​បាន​អនុញ្ញាត​ឱ្យ​លោក កឹម សុខា អាច​ធ្វើ​ដំណើរ​ក្នុង​ប្រទេស ប៉ុន្តែ​មិន​ឱ្យ​ចាកចេញ​ពី​កម្ពុជា ហើយ​ក៏​មិន​អនុញ្ញាត​ឲ្យ​លោក​ធ្វើ​សកម្មភាព​នយោបាយ​ដែរ។

ទាក់ទិន​នឹង​បញ្ហា​នេះ កាលពី​ថ្ងៃទី​១៨ ខែ​សីហា ឆ្នាំ​២០២២ សមាជិក​ព្រឹទ្ធសភា និង​ជា​ប្រធាន​អនុ​គណៈកម្មការ​ព្រឹទ្ធសភា​ទទួល​បន្ទុក​ទំនាក់ទំនង​ការបរទេស លោក Edward J. Markey បាន​ជំរុញ​ឱ្យ​រដ្ឋាភិបាល​កម្ពុជា​ទម្លាក់​ចោល​បទ​ចោទ​លើ​មេដឹកនាំ​បក្ស​ប្រឆាំង លោក កឹម សុខា និង​បើក​ឱ្យ​គណបក្ស​សង្គ្រោះ​ជាតិ​រស់​ឡើងវិញ ដើម្បី​ទទួល​បាន​សិទ្ធិ​សេរីភាព​ពេញលេញ​ក្នុង​ការ​ចូលរួម​ការ​បោះឆ្នោត​ជាតិ​ក្នុង​ឆ្នាំ​២០២៣ ខាងមុខ​នេះ។ លោក Edward J. Markey ក៏​បាន​ប្រសិទ្ធិនាម​ដល់​លោក កឹម សុខា ថា​ជា «មហាត្មះ គន្ធី (Mahatma Gandhi)» របស់​កម្ពុជា​ថែម​ទៀត​ផង។

ក្រុម​អ្នក​ឃ្លាំមើល​សង្គម​លើកឡើង​ថា រឿង​ក្តី​ក្ដាំ​ចោទប្រកាន់​មេ​បក្ស​ប្រឆាំង​លោក កឹម សុខា បាន​ក្លាយ​ទៅ​ជា​សំណុំរឿង​នយោបាយ​ដ៏​រសើប​ធំ​បំផុត​មួយ​ដែល​ល្បី​រន្ទឺ និង​ចាប់អារម្មណ៍​យ៉ាង​ខ្លាំង​ពី​បណ្តា​ប្រទេស​លោក​សេរី ដែល​គេ​មើល​ឃើញ​ថា​ជា​ការ​រំលោភ​គោលការណ៍​លទ្ធិប្រជាធិបតេយ្យ និង​សិទ្ធិមនុស្ស ក្រោម​ការ​ដឹកនាំ​ដែល​ប្រើ​អំណាច​ហួស​ដែន​កំណត់​របស់​បុរស​ខ្លាំង​កម្ពុជា​សព្វថ្ងៃ​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស