ប្រជាសហគមន៍ព្រៃឡង់ខេត្តព្រះវិហារ អះអាងថា សកម្មភាពកាប់ និងដឹកជញ្ជូនឈើនៅតែបន្តកើតមាន បើទោះបីជាលោក សៅ សុខា អគ្គមេបញ្ជាការរងនៃកងយោធពលខេមរភូមិន្ទព្រមានចាប់ និងដកហូតតួនាទីលោកវរសេនីយ៍ឯក ចាប សារ៉ន ពីអនុប្រធានការិយាល័យបំភាន់អក្ខរៈនៃកងរាជអាវុធហត្ថលើផ្ទៃប្រទេសក៏ដោយ។
សមាជិកបណ្ដាញសហគមន៍ព្រៃឡង់ លោក ខេម សុឃី បានឲ្យដឹងថា សកម្មភាពកាប់ និងដឹកជញ្ជូនឈើចេញពីតំបន់ព្រៃឡង់នៅតែបន្តកើតមានឥតឈប់ឈរ បើទោះបីជាមានការស្រែកព្រមានពីគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិយ៉ាងណាក្ដី។
លោកបន្ថែមទៀតថា ក្រុមអ្នករកស៊ីឈើទាំងអស់នោះហាក់មិនខ្លាចញញើតពាក្យសម្ដីព្រមានរបស់លោក សៅ សុខា ឡើយ។ ក្រុមឈ្មួញទាំងនោះថែមទាំងបានព្រមានចាប់ប្រជាសហគមន៍ណាដែលហ៊ានថតរូបសកម្មភាពអំពីការកាប់ និងដឹកឈើរបស់ពួកគេទៀតផង។
ប្រជាសហគមន៍ព្រៃឡង់ ឈ្មោះ ឃៀង បានឲ្យដឹងថា បើទោះបីជាមានបទបញ្ជាពីថ្នាក់ដឹកនាំគណៈកម្មាធិការជាតិក៏ដោយ ក៏សកម្មភាពកាប់ និងដឹកជញ្ជូនឈើចេញពីតំបន់ព្រៃឡង់នៅតែបន្តកើតមានជារៀងរាល់ថ្ងៃ។ លោកបានត្រឹមតែឈរមើលការដឹកជញ្ជូនឈើតែប៉ុណ្ណោះ ដោយលោកគ្មានដែនសមត្ថកិច្ចណាមួយអាចទៅទប់ស្កាត់បាននោះទេ។
ប្រជាសហគមន៍ព្រៃឡង់ ថាក្រុមហ៊ុនមួយនេះមានមេការ និងអ្នកគ្រប់គ្រង គឺលោក ចាប សារ៉ន ដែលជាអនុប្រធានការិយាល័យបំភាន់អក្ខរៈនៃកងរាជអាវុធហត្ថលើផ្ទៃប្រទេស ដូច្នេះហើយបានជាក្រុមហ៊ុនមួយនេះចូលទៅកាប់ និងដឹកជញ្ជូនឈើចេញពីតំបន់ព្រៃអភិរក្សព្រៃឡង់ដោយមិនមានសមត្ថកិច្ចណាហ៊ានបង្ក្រាប។
ក្រុមហ៊ុន ម៉ាឃល ឡូជីចស្ទីក របស់លោក សយ សុផល ទទួលបានសិទ្ធិប្រមូលផលអនុផលព្រៃឈើពីក្រុមហ៊ុនវៀតណាម PNT នៅឆ្នាំ២០១៨ ដោយបង់ពន្ធសួយសារអាករទៅរដ្ឋជាង ១០ម៉ឺនដុល្លារ និងជាង ៣០០លានរៀល ដើម្បីប្រមូលឈើនៅក្នុងដីសម្បទានសេដ្ឋកិច្ច។
កាលពីពេលថ្មីៗនេះ លោក សៅ សុខា ជាប្រធានគណៈកម្មាធិការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានចេញបញ្ជាទៅមេបញ្ជាការកងរាជអាវុធហត្ថតាមខេត្តទាំងអស់ឲ្យស្រាវជ្រាវ និងចាត់វិធានការលើមន្ត្រីអាវុធហត្ថណាដែលប្រព្រឹត្តបទល្មើសធនធានធម្មជាតិ។ ក្នុងសារសំឡេងដែលមានរយៈពេលប្រមាណ ៤នាទី អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា បានលើកឡើងថា អនុប្រធានការិយាល័យបំភាន់អក្ខរៈនៃកងរាជអាវុធហត្ថលើផ្ទៃប្រទេស លោក ចាប សារ៉ន កំពុងរកស៊ីឈើខុសច្បាប់។
លោកបន្តថា មន្ត្រីខ្លះទោះបីជាដឹងអនុប្រធានការិយាល័យរូបនេះកំពុងរកស៊ីខុសច្បាប់ក្ដី ប៉ុន្តែមិនមានមន្ត្រីណាមួយធ្វើរបាយការណ៍ទៅលោកឡើយ។ លោកបានសង្កត់ធ្ងន់ៗថា រូបលោកនឹងចាត់វិធានការលើលោក ចាប សារ៉ន និងមន្ត្រីកងរាជអាវុធហត្ថផ្សេងទៀត បើសិនជាទុកមន្ត្រីទាំងនោះឲ្យបន្តធ្វើការទៀត វានឹងបង្កភាពចង្រៃបង្កើតរឿងនៅក្នុងកងរាជអាវុធហត្ថមិនខាន។
កាលពីថ្ងៃទី១៩ ខែសីហា ឆ្នាំ២០២២ ក្រសួងការពារជាតិបានចេញលិខិតមួយដោយយល់ព្រមឱ្យវរសេនីយ៍ឯក ចាប សារ៉ន នាយករងការិយាល័យបំភ័ន្តអក្ខរៈកងរាជអាវុធហត្ថលើផ្ទៃប្រទេស ចូលរួមបង្ហាញភស្តុតាង និងបង្ហាញមុខតាមសំណើរបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ស្នើសុំ ពាក់ព័ន្ធករណីកាប់ឈើ និងប្រមូលទិញឈើក្នុងដែនជម្រកសត្វព្រៃឡង់ ក្នុងខេត្តព្រះវិហារ និងបង្ហាញមុខតាមការកោះហៅរបស់សមត្ថកិច្ច។
ទាក់ទិននឹងបញ្ហានេះ សកម្មជនការពារព្រៃឈើ លោក ហេង ស្រស់ រិះគន់ថា ការដែលមន្ត្រីថ្នាក់ក្រោមអាចកាប់ឈើទៅបាន លុះត្រាតែមន្ត្រីរដ្ឋាភិបាលថ្នាក់លើអនុញ្ញាត ដូច្នេះអ្នកដែលជាប់ពាក់ព័ន្ធទាំងអស់ត្រូវតែទទួលខុសត្រូវទៅតាមច្បាប់ ជាពិសេសមន្ត្រីរបស់ក្រសួងបរិស្ថាន ហេតុអ្វីបានជាបណ្ដោយឲ្យមានការកាប់ឈើនៅក្នុងតំបន់ព្រៃឡង់។
អង្គការលើកលែងទោសអន្តរជាតិ (Amnesty International) បានចេញរបាយការណ៍មួយកាលពីថ្ងៃទី២៨ ខែមករា ឆ្នាំ២០២២ បានរកឃើញថា ព្រៃឈើចំនួន ៦២៧១ហិកតារត្រូវបានកាប់បំផ្លាញនៅក្នុងដែនជម្រកសត្វព្រៃចំនួនពីរ ក្នុងនោះមានដែនជម្រកសត្វព្រៃព្រៃឡង់ និងដែនជម្រកសត្វព្រៃព្រះរការ ដោយការកាប់ឈើខុសច្បាប់យ៉ាងច្រើនសន្ធឹកសន្ធាប់ កំពុងប៉ះពាល់ធ្ងន់ធ្ងរដល់សិទ្ធិ និងវប្បធម៌របស់ជនជាតិដើមភាគតិចក្នុងពេលបច្ចុប្បន្ននេះ៕