តំណាងរាស្ត្រអាមេរិកាំងដ៏មានឥទ្ធិពលដែលតែជំរុញឲ្យស្ដារលទ្ធិប្រជាធិបតេយ្យ និងសិទ្ធិមនុស្សនៅកម្ពុជា ទម្លាយថា បុរសខ្លាំងកម្ពុជា លោក ហ៊ុន សែន គេចវេះមិនហ៊ានប្រឈមមុខតទល់ជាមួយនឹងក្រុមតំណាងរាស្ត្រអាមេរិកាំងមួយក្រុមដែលបាននាំគ្នាទៅធ្វើទស្សនកិច្ចនៅកម្ពុជាកាលពីពេលថ្មីៗនេះ។
តំណាងរាស្ត្រសហព័ន្ធសហរដ្ឋអាមេរិកប្រចាំរដ្ឋកាលីហ្វ័រញ៉ាពីខាងគណបក្សប្រជាធិបតេយ្យ លោក Alan Lowenthal បានប្រាប់សារព័ត៌មាន The Cambodia Daily នៅក្នុងពិធីទទួលទានភោជនាហារសាមគ្គី ដើម្បីអបអរសាទរ និងផ្តល់កិត្តិយសសម្រាប់ការចូលនិវត្តន៍របស់លោកកាលពីថ្ងៃទី១០ ខែកញ្ញា ដែលរៀបចំឡើងដោយសហគមន៍ខ្មែរក្នុងទីក្រុងឡងប៊ិច ថា លោក ហ៊ុន សែន ខ្លាចក្រុមតំណាងរាស្ត្រអាមេរិកាំងដែលបាននាំគ្នាទៅពិនិត្យអំពីស្ថានការណ៍នយោបាយ សិទ្ធិមនុស្ស និងប្រជាធិបតេយ្យនៅកម្ពុជាដោយផ្ទាល់ កាលពីខែសីហា កន្លងទៅ ដែលជាហេតុនាំឲ្យលោក ហ៊ុន សែន មិនហ៊ានជួបពួកគេ។
ទោះជាយ៉ាងណាក៏ដោយ លោក Alan Lowenthal នៅតែបន្តជំរុញឲ្យរដ្ឋាភិបាលឯកបក្សនៅកម្ពុជា គោរពសិទ្ធិមនុស្ស និងស្ដារលទ្ធិប្រជាធិបតេយ្យឡើងវិញ ដើម្បីធានានូវសិទ្ធិមូលដ្ឋានរបស់ពលរដ្ឋដូចដែលមានចែងក្នុងរដ្ឋធម្មនុញ្ញរបស់ខ្លួន។
លោក Alan Lowenthal បានបង្ហាញជំហរយ៉ាងម៉ឺងម៉ាត់ថា កិច្ចការរបស់លោក គឺទាមទារឲ្យរដ្ឋាភិបាលឯកបក្សនៅកម្ពុជាបើកលំហសេរីភាព ធ្វើឲ្យមាននូវយុត្តិធម៌សង្គមសម្រាប់ពលរដ្ឋខ្មែរក្នុងប្រទេសកម្ពុជា ដើម្បីឲ្យប្រទេសនេះមាននីតិរដ្ឋពេញលេញទៅថ្ងៃអនាគត។ លោកបញ្ជាក់ថា អ្វីៗទាំងអស់ដែលលោកបានធ្វើ គឺដើម្បីគាំទ្រដល់អ្នកដែលតស៊ូដើម្បីសិទ្ធិមនុស្ស ដើម្បីលទ្ធិប្រជាធិបតេយ្យ ជាពិសេសគឺដើម្បីឲ្យមានការបោះឆ្នោតប្រកបដោយសេរី ត្រឹមត្រូវ និងយុត្តិធម៌ពិតប្រាកដនៅកម្ពុជា ក្នុងអាណត្តិទី៧ នៅឆ្នាំ២០២៣ ខាងមុខនេះ។
សមាជិករដ្ឋសភា លោក Alan Lowenthal ដែលជាសហប្រធានក្រុមការងារកិច្ចការកម្ពុជានៃរដ្ឋសភាសហព័ន្ធសហរដ្ឋអាមេរិក រួមជាមួយសមាជិកព្រឹទ្ធសភាអាមេរិកាំង លោក Edward J. Markey ដែលជាប្រធានអនុគណៈកម្មការទំនាក់ទំនងកិច្ចការបរទេសនៃព្រឹទ្ធសភាសម្រាប់អាស៊ីបូព៌ា ប៉ាស៊ីហ្វិក និងសន្តិសុខបច្ចេកវិទ្យាអ៊ីនធឺណិតអន្តរជាតិ និងសមាជិកសភាសហព័ន្ធមួយចំនួនទៀត បានធ្វើទស្សនកិច្ចទៅកាន់ប្រទេសកម្ពុជាកាលពីថ្ងៃទី១៦ ខែសីហា ឆ្នាំ២០២២ កន្លងទៅនេះ។
ក្នុងដំណើរទស្សនកិច្ចទៅកាន់ប្រទេសកម្ពុជានេះ គណៈប្រតិភូសហរដ្ឋអាមេរិកទាំងនោះមានបំណងជួបជាមួយមេដឹកនាំបក្សកាន់អំណាច លោក ហ៊ុន សែន ដែរ ប៉ុន្តែបំណងនេះមិនត្រូវបានរដ្ឋាភិបាលកម្ពុជាស្វាគមន៍នោះទេ។
យ៉ាងណាក៏ដោយ គណៈប្រតិភូសហរដ្ឋអាមេរិកទាំងនោះបានត្រឹមតែជួបជាមួយក្រុមតំណាងរាស្ត្រមួយចំនួនពីខាងបក្សកាន់អំណាចនៅកម្ពុជា ហើយក៏បានជួបពិភាក្សាជាមួយមេដឹកនាំបក្សប្រឆាំងលោក កឹម សុខា ដោយបានពិភាក្សាគ្នាអំពីដំណើរការប្រជាធិបតេយ្យ និងសិទ្ធិមនុស្សយ៉ាងច្រើនផងដែរ។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១៣ កញ្ញា នេះថា ផ្អែកតាមការអះអាងរបស់លោក Alan Lowenthal បានបង្ហាញថា កម្ពុជានៅតែស្ថិតក្នុងក្រសែភ្នែករបស់មហាអំណាចអាមេរិកដដែល។ លោកបន្ថែមថា ការឃ្លាំមើលនេះ គឺដើម្បីជួយជ្រោមជ្រែងកម្ពុជាឱ្យរក្សាបាននូវការដឹកនាំតាមបែបប្រជាធិបតេយ្យពេញលេញ ស្របតាមកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ និងរដ្ឋធម្មនុញ្ញរបស់ខ្លួន។
លោក សេក សុជាតិ អះអាងថា ប្រសិនបើកម្ពុជាធ្វើកំណែទម្រង់ការដឹកនាំស្របតាមរដ្ឋធម្មនុញ្ញឱ្យកាន់តែល្អនោះ វាគឺជាកាដូមួយដែលមានតម្លៃមហាសាលសម្រាប់ពលរដ្ឋ និងសង្គមជាតិខ្មែរទាំងមូល ជាពិសេសការដោះស្រាយវិបត្តិនយោបាយដែលជាប់គាំងឱ្យជ្រះស្រឡះ ដូចជាករណីសំណុំរឿងមេដឹកនាំបក្សប្រឆាំង លោក កឹម សុខា អ្នកទោសនយោបាយផ្សេងៗទៀត សកម្មជនសង្គម សកម្មជនបរិស្ថាន និងការរំលោភសិទ្ធិការងារលើកម្មករនិយោជិត ជាដើម ដើម្បីឱ្យកម្ពុជាទទួលបានការសាទរ និងកោតសរសើរចំពោះការដឹកនាំរបស់ខ្លួនក្នុងនាមជាប្រទេសមួយដែលមានវប្បធម៌ និងអរិយធម៌ខ្ពង់ខ្ពស់ក្នុងអតីតកាល។
ស្ថាបនិកអង្គការអភិវឌ្ឍន៍ផ្នត់គំនិតរូបនេះជំរុញឱ្យកម្ពុជា សម្របសម្រួល និងដោះស្រាយបញ្ហាផ្ទៃក្នុងនយោបាយជាតិឱ្យបានឆាប់រហ័ស ដើម្បីឱ្យលំហប្រជាធិបតេយ្យនៅកម្ពុជាវិលទៅរកភាពប្រក្រតីវិញ នោះកម្ពុជានឹងទទួលបានសន្តិភាពមួយដ៏ពិតប្រាកដហើយ៕