រយៈពេល ៧ខែនៃសង្គ្រាមវាយលុកប្រទេសអ៊ុយក្រែន ដើម្បីផ្ដួលរំលំរដ្ឋាភិបាលរបស់ប្រធានាធិបតី វូឡូឌីមៀ ហ្សេឡេនស្គី គឺទីក្រុងមូស្គូ ជួបរឿងបរាជ័យដ៏អាម៉ាស់បំផុត ២លើកមកហើយ។
ជាញឹកញាប់ តែងតែមានការចុះផ្សាយថា ទ័ពរុស្ស៊ី ត្រូវបានទ័ពអ៊ុយក្រែនវាយរុញច្រានចេញពីទឹកដីដែលទ័ពរុស្ស៊ីវាយបាន។ មានន័យថា រុស្ស៊ីដែលជាប្រទេសមហាអំណាចលំដាប់ទី២ នៃពិភពលោក នៅមានចំណុចខ្សោយក្នុងការធ្វើសង្គ្រាម។
នៅដំណាក់កាលចុងក្រោយនេះ ស្រាប់តែរុស្ស៊ីបាក់ទ័ពអាម៉ាស់បំផុតនៅសមរភូមិភាគខាងត្បូង និងភាគខាងកើតប្រទេស ហើយមិនតែប៉ុណ្ណោះ ទ័ពរុស្ស៊ីស្លាប់គរជើងគ្នា និងរត់ចោលសព្វាវុធ រថក្រោះ រថពាសដែក កាំភ្លើងធំ ប្រព័ន្ធរ៉ុក្កែតសរុបចំនួន ១២៥គ្រឿងនៅលើសមរភូមិ។ បន្ថែមពីនេះទៅទៀត សមាជិកសភាមួយចំនួនបានស្ដីបន្ទោស និងទាមទារឱ្យលោក វ៉្លាឌីមៀរ ពូទីន ចុះចេញពីតំណែង។
បរាជ័យទាំងនេះហើយដែលលោក ពូទីន ត្រូវស្ពាយជាប់នឹងខ្លួនទៅជួបជាមួយប្រធានាធិបតីចិន ដែលជាសមភាគីរបស់លោក គឺលោក ស៊ី ជីនពីង។
នៅក្នុងជំនួបកំពូលទ្វេភាគីដែលរៀបចំឡើងកាលពីថ្ងៃព្រហស្បតិ៍ ទី១៥ ខែកញ្ញា នៅក្រៅក្របខ័ណ្ឌនៃកិច្ចប្រជុំអង្គការសហប្រតិបត្តិការសៀងហៃ នៅប្រទេសអ៊ូបេគីស្ថាន ប្រធានាធិបតីចិន លោក ស៊ី ជីនពីង បានប្រាប់លោក ពូទីន ថា ចិនចង់ដើរតួនាទីជាមហាអំណាចពិភពលោកជាមួយរុស្ស៊ី.
នៅក្នុងជំនួបទល់មុខគ្នាដោយផ្ទាល់ជាលើកទី២ គឺស្ថានភាពនៃជំនួបពេលនេះមិនដូចជំនួបកាលដើមខែកុម្ភៈ ឆ្នាំ២០២២ នៅមុនរុស្ស៊ីលើកទ័ពឈ្លានពានអ៊ុយក្រែននោះទេ។ នៅក្នុងជំនួបពេលនោះ មេដឹកនាំទាំងពីរមានអារម្មណ៍សប្បាយរីករាយដាក់គ្នាជាខ្លាំង។
លោក ស៊ី បានសម្ដែងឆន្ទៈជាខ្លាំងគាំទ្រលោក ពូទីន ក្នុងការតាំងចិត្តប្រឈមមុខជាមួយសហរដ្ឋអាមេរិក និងក្រុមយោធាណាតូករណីប្រទេសអ៊ុយក្រែន។ ពួកគេទាំងពីរចាប់ដៃគ្នារលាក់ ហើយទឹកមុខញញឹមពព្រាយក្នុងក្ដីសង្ឃឹមទុកជាមុនថា ប្រាកដណាស់ រុស្ស៊ីនឹងឈ្នះសង្គ្រាមវាយផ្ដួលរំលំកាន់កាប់ប្រទេសអ៊ុយក្រែន គឺដូចវិមានក្រឹមឡាំងអួតអាងថា នឹងប្រើពេលតែ ៧២ម៉ោងប៉ុណ្ណោះនឹងវាយចូលរដ្ឋធានីគៀវ ហើយបញ្ចប់រដ្ឋាភិបាលរបស់លោក ហ្សេឡេនស្គី។ តែទីបំផុត សង្គ្រាមជិត ២១០ថ្ងៃមកនេះ រុស្ស៊ីមិនត្រឹមតែវាយមិនបានទឹកដីអ៊ុយក្រែនប៉ុណ្ណោះទេ គឺត្រូវបានទ័ពអ៊ុយក្រែនវាយបាក់ទ័ពថែមទៀត។
មកដល់ពេលនេះ រុស្ស៊ីវាយកាន់កាប់ទឹកដីអ៊ុយក្រែនបានត្រឹមតែ ១០ភាគរយប៉ុណ្ណោះ ដែលពីមុនរុស្ស៊ីវាយកាន់កាប់បាន ២០%។ នេះមានន័យថា ទ័ពអ៊ុយក្រែនវាយកាន់កាប់បានមកវិញ ១០% គឺនៅតំបន់ភាគខាងកើត និងភាគខាងត្បូងប្រទេស។
នៅក្នុងជំនួបកំពូលនេះ ប្រធានាធិបតីចិន និងប្រធានាធិបតីរុស្ស៊ី បាននិយាយសាទរចំណងយុទ្ធសាស្ត្ររួមរបស់ប្រទេសទាំងពីរទប់ទល់នឹងក្រុមបស្ចិមប្រទេស។ តែយ៉ាងណា ពុំមានចំណុចណាមួយដែលពួកគេកំពុងឈ្នះលើពួកបស្ចិមប្រទេសពិតប្រាកដនោះទេ។ គេអាចនិយាយថា លោក ពូទីន សាទរគឺដោយសារតែចិន មិនព្រមចូលរួមដាក់ទណ្ឌកម្មទៅលើរបបលោក។ ដូចនេះហើយ លោក ពូទីន សរសើរចិនថាបានធ្វើឱ្យមានតុល្យភាពទប់ទល់នឹងក្រុមបស្ចិមប្រទេស។ តែចំពោះស្ថានការណ៍សង្គ្រាមនៅលើទឹកដីអ៊ុយក្រែន គឺទាំងចិន និងរុស្ស៊ី សឹងតែនិយាយមិនចេញ។
អង្គុយទល់មុខប្រធានាធិបតីរុស្ស៊ី នៅតុមូលដ៏ធំមួយអមដោយមន្ត្រី ទីប្រឹក្សា អ្នកជំនួយការចិន និងរុស្ស៊ីជាច្រើនរូប លោកប្រធានាធិបតី ស៊ី ជីនពីង បាននិយាយប្រាប់សមភាគីរុស្ស៊ីថា ចិននឹងខំប្រឹងជាមួយរុស្ស៊ីដើម្បីឲ្យក្លាយជាមហាអំណាចដ៏មានឥទ្ធិពល គឺសំដៅធ្វើឲ្យពិភពលោកមានសណ្ដាប់ធ្នាប់។
ទោះជាបញ្ចេញទស្សនៈបែបនេះក្ដី តែទឹកមុខរបស់លោក ពូទីន នៅតែក្រៀមក្រំ ហើយទឹកមុខរបស់លោកហាក់ញញឹមមិនចេញនោះទេ គឺមើលទៅពួកគេជួបរឿងបរាជ័យដូចគ្នា។ បរាជ័យរបស់ចិន គឺនៅដើមខែសីហា ពុំហ៊ានលើកទ័ពវាយកាន់កាប់កោះតៃវ៉ាន់ ទោះបីចិនខំដំឡើងទ័ពឡោមព័ទ្ធដែនកោះនេះយ៉ាងខ្លាំង ក៏តៃវ៉ាន់មិនចាញ់ការគំរាមនោះឡើយ។ អ្វីដែលចិនមិនហ៊ានលើកទ័ពវាយតៃវ៉ាន់ ក៏ព្រោះតែខ្លាចផុងខ្លួនដូចរុស្ស៊ីលើកទ័ពវាយអ៊ុយក្រែន។ លោក ស៊ី ដឹងពិតណាស់ថា បើចិនលើកទ័ពវាយតៃវ៉ាន់ គឺមិនដូចអ៊ុយក្រែននោះទេ ដែលអាមេរិកត្រឹមតែជួយសព្វាវុធ គឺអាមេរិកនឹងលើកទ័ពជួយតៃវ៉ាន់ទៀតផង។
នៅក្នុងជំនួបពេលនេះ លោក ស៊ី មិនបានចេញមុខគាំទ្រលោក ពូទីន ចំពោះសង្គ្រាមលើទឹកដីអ៊ុយក្រែននោះទេ គឺខុសពីជំនួបកាលពីដើមខែកុម្ភៈ កន្លងទៅ។
តាមមើលទៅ លោក ពូទីន ពិតជាយល់ពីសំណួរចាក់ស្រេះ និងកង្វល់របស់លោក ស៊ី ដែលបង្ហាញអារម្មណ៍អវិជ្ជមានចំពោះជោគវាសនារបស់លោក ពូទីន និងឥទ្ធិពលរបស់រុស្ស៊ី នៅលើពិភពលោកទៅថ្ងៃខាងមុខ បើរុស្ស៊ីនៅបន្តចាញ់ប្រៀបពួកបស្ចិមប្រទេសករណីសង្គ្រាមអ៊ុយក្រែន។
ប្រធានាធិបតីរុស្ស៊ី ដែលកំពុងរងទណ្ឌកម្មសេដ្ឋកិច្ចដោយសារធ្វើសង្គ្រាមឈ្លានពានអ៊ុយក្រែន នៅបន្តរិះគន់ក្រុមបស្ចិមប្រទេសដែលប៉ុនប៉ងបង្កើតពិភពលោកប៉ូលតែមួយ។ នៅក្នុងជំនួបជាមួយលោក ស៊ី លោក ពូទីន បានបង្ហាញសាជាថ្មីពីជំហររបស់រុស្ស៊ី ក្នុងការគាំទ្រចិន ក្នុងសំណុំរឿងតៃវ៉ាន់ ដែលកំពុងក្លាយជាដើមចមនៃភាពតានតឹងកាន់តែខ្លាំងរវាងអាមេរិក និងចិន នៅក្រោយទស្សនកិច្ចរបស់ប្រធានសភាអាមេរិកដែលធ្វើដំណើរទៅតៃវ៉ាន់កាលពីថ្ងៃទី២ ខែសីហា។
ក្នុងការអនុវត្តគោលការណ៍ចិនតែមួយ ដែលមានន័យថា តៃវ៉ាន់ជាផ្នែកមួយនៃទឹកដីចិន លោក ពូទីន និយាយថា រុស្ស៊ីថ្កោលទោសសកម្មភាពញុះញង់របស់អាមេរិក។ និយាយមិនលាក់លៀមជាមួយប្រធានាធិបតីចិន លោក ពូទីន សង្ឃឹមថាជំនួបទ្វេភាគីលើកនេះ នឹងជួយជំរុញការពង្រឹងចំណងមិត្តភាពជាដៃគូយុទ្ធសាស្ត្រចិន-រុស្ស៊ី។
ចំពោះលោក ស៊ី បានប្រាប់លោក ពូទីន ថា ចិនត្រៀមធ្វើការជាមួយរុស្ស៊ី ដើម្បីគាំទ្រគ្នាទៅវិញទៅមកទាក់ទងនឹងផលប្រយោជន៍រួមរបស់ប្រទេសទាំងពីរ។ ចិនសន្យាផងដែរថា នឹងធ្វើការឱ្យស៊ីជម្រៅក្នុងផ្នែកសហប្រតិបត្តិការរវាងប្រទេសទាំងពីរក្នុងវិស័យកសិកម្ម ពាណិជ្ជកម្ម បច្ចេកវិទ្យា និងវិស័យផ្សេងទៀត។ តែលោក ស៊ី មិនបាននិយាយមួយម៉ាត់ឡើយអំពីជំនួយយោធាក្នុងការជួយរុស្ស៊ី ក្នុងសង្គ្រាមជាមួយអ៊ុយក្រែន។
ដំណាក់កាលចុងក្រោយនេះ រុស្ស៊ីស្ថិតក្នុងស្ថានភាពបាត់បង់លំនឹងនៃសង្គ្រាមក្នុងទឹកដីអ៊ុយក្រែន គឺភ័យខ្លាចអាមេរិកបញ្ជូនមីស៊ីលរយៈចម្ងាយឆ្ងាយទៅអ៊ុយក្រែន។
សង្គ្រាមដែលមហាអំណាចរុស្ស៊ីលើកទ័ពឈ្លានពានទឹកដីរបស់គេ គឺមានជិត ២១០ថ្ងៃមកហើយ។ អាវុធគ្រាប់រំសេវរបស់រុស្ស៊ីដែលបញ្ចេញធ្វើសង្គ្រាម គឺអស់ជិត ៦០% ទៅហើយ។
បើតាមប្រភពចារកម្មរបស់អង់គ្លេស និងសហរដ្ឋអាមេរិក ឲ្យដឹងថា រុស្ស៊ីនៅសល់អាវុធដើម្បីធ្វើសង្គ្រាមបន្តទៀតនោះ គឺអាវុធប្រភេទទើបផលិតចុងក្រោយប៉ុណ្ណោះ ដូចជាមីស៊ីលល្បឿនលឿនជាងសំឡេង មីស៊ីលរត់ចម្ងាយឆ្ងាយបំពាក់ដោយក្បាលគ្រាប់នុយក្លេអ៊ែរ។ ដូច្នេះហើយបានជារុស្ស៊ីស្វះស្វែងរកការទិញអាវុធពីប្រទេសមួយចំនួន ដើម្បីយកធ្វើសង្គ្រាមបន្តទៀតនៅលើទឹកដីអ៊ុយក្រែន។
បើតាមសារព័ត៌មាន Newsweek គឺរុស្ស៊ីទទួលបានហើយនូវការប្រើប្រាស់យន្តហោះដ្រូនពីប្រទេសអ៊ីរ៉ង់។ រុស្ស៊ីទិញយន្តហោះដ្រូនពីអ៊ីរ៉ង់នេះ គឺរាប់រយគ្រឿងឯណោះ។ បន្ថែមលើនេះ រុស្ស៊ីកំពុងតែស្នើទិញគ្រាប់រ៉ុក្កែត និងគ្រាប់កាំភ្លើងធំរាប់ម៉ឺនគ្រាប់ពីកូរ៉េខាងជើង។
ការបាត់បង់សព្វាវុធរបស់ប្រទេសមហាអំណាចនៅក្នុងសង្គ្រាមរយៈពេលជិត ២១០ថ្ងៃមកនេះ គឺច្រើនលើសលប់បំផុត ប៉ុន្តែការដែលធ្វើឱ្យមហាអំណាចមួយធ្វើសង្គ្រាមមិនបានជោគជ័យនៅលើទឹកដីនៅជាប់ទឹកដីរបស់ខ្លួន គឺដោយសារតែអ៊ុយក្រែនទទួលបានអាវុធធុនធ្ងន់ពីពួកបស្ចិមប្រទេស។ ប្រទេសដែលផ្ដល់អាវុធទៅឱ្យអ៊ុយក្រែនច្រើនជាងគេបំផុត គឺសហរដ្ឋអាមេរិក៕