មន្ត្រីជាន់ខ្ពស់គណបក្សសង្គ្រោះជាតិ លើកឡើងថា ការចូលរួមមហាសន្និបាតអង្គការសហប្រជាជាតិលើកទី៧៧ ដើម្បីដោះស្រាយបញ្ហាសកលរបស់លោកនាយករដ្ឋមន្ត្រី ហ៊ុន សែន គឺជារឿងសំខាន់ ប៉ុន្តែការដោះស្រាយវិបត្តិនយោបាយផ្ទៃក្នុងរបស់កម្ពុជាខ្លួនឯងរឹតតែសំខាន់ ដើម្បីធ្វើឲ្យប្រទេសនៃមហាសន្និបាតមានទំនុកចិត្តមកលើកម្ពុជា។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី២០ កញ្ញា នេះថា ពិតមែនថាមហាសន្និបាតអង្គការសហប្រជាជាតិលើកទី៧៧ នេះ ផ្ដោតទៅលើការរួមសហការគ្នាប្រយុទ្ធប្រឆាំងនឹងការគំរាមកំហែងផ្នែកសុខភាពជាសកល និងការប្រែប្រួលអាកាសធាតុ ជាដើម គឺជារឿងសំខាន់ ប៉ុន្តែកម្ពុជាក៏មិនត្រូវទុកឱ្យបញ្ហារបស់ខ្លួនក្លាយជាឧបសគ្គកាន់តែរីកធំសម្រាប់ពលរដ្ឋរបស់ខ្លួននោះដែរ។
លោកបន្ថែមថា ដើម្បីឱ្យពិភពលោកទទួលស្គាល់កម្ពុជាពេញមុខពេញមាត់ក្នុងការរួមសហការគ្នាប្រយុទ្ធប្រឆាំងនឹងការគំរាមកំហែងផ្នែកសុខភាពជាសកល ការពង្រឹងប្រព័ន្ធពាណិជ្ជកម្មពហុភាគី និងសេដ្ឋកិច្ចបៃតង ជាដើម កម្ពុជាចាំបាច់ត្រូវតែកែប្រែមុខមាត់របស់ខ្លួនឱ្យល្អលើឆាកអន្តរជាតិជាមុនសិន។
លោក មាជ សុវណ្ណារ៉ា អះអាងថា កម្ពុជានៅតែជាប់គាំងវិបត្តិនយោបាយ វិបត្តិសិទ្ធិមនុស្ស និងវិបត្តិជាន់ឈ្លីលទ្ធិប្រជាធិបតេយ្យនៅឡើយ ទោះកម្ពុជាខំបញ្ចុះបញ្ចូល ឬនិយាយទៅកាន់ពិភពលោកក្នុងន័យលើកតម្កើងខ្លួនឯង ជាពិសេសក្នុងមហាសន្និបាតអង្គការសហប្រជាជាតិលើកទី៧៧ ខាងមុខនេះយ៉ាងណាក៏ដោយ ក៏មិនអាចឱ្យប្រទេសទាំងនោះមានទំនុកចិត្តរួមសហការជាមួយខ្លួនបានដែរ។
មន្ត្រីជាន់ខ្ពស់បក្សប្រឆាំងរូបនេះបញ្ជាក់ថា កម្ពុជាគួរប្រើឱកាសនេះបញ្ជាក់ជំហររបស់ខ្លួនទៅកាន់ពិភពលោកអំពីការប្ដេជ្ញាចិត្តក្នុងការលើកស្ទួយលទ្ធិប្រជាធិបតេយ្យ និងការគោរពសិទ្ធិមនុស្សផងដែរ មុននឹងការបោះឆ្នោតជាតិឈានមកដល់នៅឆ្នាំក្រោយនេះ ជាពិសេសត្រូវដោះស្រាយវិបត្តិនយោបាយករណីលោក កឹម សុខា ដែលពិភពលោកកំពុងទាមទារឱ្យរដ្ឋាភិបាលកម្ពុជាបើកលំហសិទ្ធិសេរីភាពជូនលោក ដើម្បីអាចវិលចូលក្នុងឆាកនយោបាយឱ្យបានមុនការបោះឆ្នោតឆ្នាំ២០២៣ ខាងមុខ។
នៅថ្ងៃទី២០ ខែកញ្ញា នេះ លោក ហ៊ុន សែន បានសរសេរលើទំព័រហ្វេសប៊ុករបស់លោកថា លោកនឹងដឹកនាំគណៈប្រតិភូទៅចូលរួមមហាសន្និបាតអង្គការសហប្រជាជាតិលើកទី៧៧ នៅទីក្រុងញីវយ៉ក លើទឹកដីអាមេរិក នៅថ្ងៃទី២១ ខែកញ្ញា ឆ្នាំ២០២២ នេះ។
បុរសខ្លាំងរូបនេះអះអាងថា ក្រៅពីចូលរួមមហាសន្និបាតអង្គការសហប្រជាជាតិ លោកក៏នឹងទៅបំពេញទស្សនកិច្ចនៅសាធារណរដ្ឋគុយបា និងទៅចូលរួមពិធីបុណ្យសពរបស់អតីតនាយករដ្ឋមន្ត្រីជប៉ុន លោក ស៊ីនហ្សូ អាបេ ផងដែរ។
អំឡុងពេលចូលរួមមហាសន្និបាតអង្គការសហប្រជាជាតិលើកទី៧៧ នៅថ្ងៃទី២១ ខែកញ្ញា ឆ្នាំ២០២២ នេះ ប្រមុខរដ្ឋាភិបាលកម្ពុជានឹងជួបជាមួយអគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូទែរ៉េស និងមេដឹកនាំប្រទេសមួយចំនួនទៀតផងដែរ៕