អគ្គស្នងការរងនគរបាលជាតិ លោក ឆាយ គឹមខឿន ណែនាំឱ្យមន្ត្រីនគរបាលដែលទើបបញ្ចប់វគ្គបណ្តុះបណ្តាលវិជ្ជាជីវៈជិត ៣០០នាក់ រក្សាឲ្យបានក្រមសីលធម៌វិជ្ជាជីវៈរបស់ខ្លួន និងលើកកម្ពស់ការគោរពសិទ្ធិមនុស្ស ការគោរពសិទ្ធិសេរីភាពរបស់ប្រជាពលរដ្ឋ។
អគ្គស្នងការរងនគរបាលជាតិ លោក ឆាយ គឹមខឿន បានលើកឡើងក្នុងពិធីបិទវគ្គបណ្តុះបណ្តាលវិជ្ជាជីវៈនគរបាលចំនួន ២៥៧នាក់នៅសាលានគរបាលមិត្តភាពកម្ពុជា-វៀតណាម កាលពីថ្ងៃទី២១ ខែកញ្ញា ឆ្នាំ២០២២ នេះថា ក្នុងនាមជាមន្ត្រីអនុវត្តច្បាប់ ត្រូវមានភាពស្មោះត្រង់ក្នុងវិជ្ជាជីវៈ ប្រកាន់ខ្ជាប់នូវវិន័យ និងភាពស្អាតស្អំក្នុងការបម្រើពលរដ្ឋដោយស្មើភាព ដើម្បីថែរក្សា និងលើកកម្ពស់ជាប្រចាំនូវជំនឿរបស់ពលរដ្ឋមកលើកម្លាំងនគរបាលជាតិ ក្នុងការរក្សាសន្តិសុខសណ្ដាប់ធ្នាប់របៀបរៀបរយសង្គមប្រកបដោយប្រសិទ្ធភាពខ្ពស់។
លោក ឆាយ គឹមខឿន លើកឡើងថា មន្ត្រីនគរបាលទាំងអស់ត្រូវតែអនុវត្តគោលនយោបាយភូមិ-ឃុំមានសុវត្ថិភាពឲ្យបានកាន់តែរឹងមាំថែមទៀតនូវសន្តិសុខ សុវត្ថិភាព សណ្ដាប់ធ្នាប់សាធារណៈ ដើម្បីផ្តល់ភាពកក់ក្តៅជូនពលរដ្ឋ ក្នុងគោលដៅទប់ស្កាត់បទល្មើសគ្រឿងញៀន ល្បែងស៊ីសងខុសច្បាប់ សកម្មភាពលួច ឆក់ ប្លន់ ជាពិសេសអំពើប្លន់ប្រដាប់អាវុធ និងការប្រើប្រាស់អាវុធខុសច្បាប់ ការបង្ក្រាបបទល្មើសព្រៃឈើ និងធនធានធម្មជាតិ បទល្មើសនេសាទនៅបឹងទន្លេសាប និងការរឹតបន្តឹងការអនុវត្តច្បាប់ចរាចរណ៍ផ្លូវគោកផងដែរ។
អគ្គស្នងការរងនគរបាលជាតិរូបនេះបញ្ជាក់ថា ដើម្បីធានានូវសុខសុវត្ថិភាពជូនពលរដ្ឋ អង្គភាពនានាត្រូវតែប្រើប្រាស់គ្រប់មធ្យោបាយ បង្ក្រាបឲ្យបានទាន់ពេលវេលាចំពោះហេតុការណ៍ដែលកើតឡើងក្នុងមូលដ្ឋានរបស់ខ្លួន ជាពិសេសអំពើប្លន់ប្រដាប់អាវុធ ឃាតកម្ម អំពើហិង្សានានាដែលបង្កឲ្យបាត់សណ្ដាប់ធ្នាប់សាធារណៈ ទោះក្រោមរូបភាពណាក៏ដោយ ត្រូវខិតខំស្រាវជ្រាវរកឲ្យឃើញជនប្រព្រឹត្តិ ដើម្បីនាំខ្លួនមកផ្ដន្ទាទោសតាមច្បាប់ជាធរមាន។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី២២ កញ្ញា នេះថា ការណែនាំរបស់លោក ឆាយ គឹមខឿន គឺជារឿងត្រឹមត្រូវដែលមន្ត្រីអនុវត្តច្បាប់ត្រូវតែប្រកាន់ខ្ជាប់ជានិច្ច ប៉ុន្តែបញ្ហាគឺស្ថិតនៅត្រង់ថា ការអនុវត្តជាក់ស្តែងរបស់អាជ្ញាធរតែងតែខុសពីទ្រឹស្ដីទាំងស្រុង ដូចជាការរើសអើងប្រជាពលរដ្ឋដោយសារនិន្នាការនយោបាយ រើសអើងសកម្មជនសង្គម និងការធ្វើទុក្ខបុកម្នេញលើសកម្មជននយោបាយបក្សប្រឆាំង ជាដើមនាពេលកន្លងមក។
លោក ស៊ឹង សែនករុណា លើកឡើងថា ដើម្បីធានានូវការអនុវត្តច្បាប់ឱ្យមានប្រសិទ្ធភាព ក្រសួងត្រូវតែមានពិន័យនៅពេលដែលរកឃើញមន្ត្រីណាម្នាក់បានប្រព្រឹត្តល្មើសទៅតាមច្បាប់ដែលមានចែង ដើម្បីធ្វើជាគំរូដល់មន្ត្រីអនុវត្តច្បាប់ដទៃ។ បន្ថែមពីនេះ ក៏ត្រូវចៀសវាងនូវការឃុបឃិតគ្នានៅពេលល្មើសច្បាប់ផងដែរ ដែលជាហេតុនាំឱ្យរីករាលដាលនូវទង្វើទាំងនេះចូលទៅក្នុងសង្គមជាតិកាន់តែខ្លាំងរហូតក្លាយទៅជាអំពើពុករលួយដែលមិនអាចព្យាបាលបាន។
មន្ត្រីជាន់ខ្ពស់សង្គមស៊ីវិលរូបនេះ អំពាវនាវឱ្យអាជ្ញាធរមានសមត្ថកិច្ច និងស្ថាប័នអនុវត្តច្បាប់ទាំងអស់ ត្រូវប្រកាន់ខ្ជាប់នូវក្រមសីលធម៌វិជ្ជាជីវៈរបស់ខ្លួន ដើម្បីបង្កើននូវទំនុកចិត្តរបស់ពលរដ្ឋឱ្យកាន់តែច្រើន ព្រោះថាការអនុវត្តជាក់ស្តែងរបស់អាជ្ញាធរកន្លងមក បានបង្ហាញឱ្យឃើញនូវការអនុវត្តច្បាប់ដែលមានស្តង់ដារពីរប៉ុណ្ណោះ ហើយមូលហេតុនេះ នឹងធ្វើឱ្យប្រជាពលរដ្ឋបាត់បង់ការជឿទុកចិត្តលើស្ថាប័នអនុវត្តច្បាប់ទៅថ្ងៃក្រោយជាមិនខាន។
ក្រុមអ្នកឃ្លាំមើលសង្គមរិះគន់ថា ឧក្រិដ្ឋជនល្មើសច្បាប់នៅកម្ពុជាសព្វថ្ងៃនេះ មិនត្រឹមតែមិនត្រូវបានយកទៅកាត់ទោសតាមច្បាប់នោះទេ ប៉ុន្តែពួកគេបែរជាត្រូវបានដំឡើងឋានន្តរសក្តិក្នុងជួរមន្ត្រីរាជការជាន់ខ្ពស់ទៅវិញ ក្នុងនោះឧកញ៉ា លីម ប៊ុណ្ណា ហៅឧកញ៉ា ខ្នា ដែលល្បីខាងរកស៊ីឈើខុសច្បាប់ ត្រូវបានតែងតាំងជាជំនួយការលោក ហ៊ុន សែន ក្នុងឋានៈជាប្រធានគណបក្សប្រជាជនកម្ពុជា។
ជាងនេះទៀត នាយករងការិយាល័យបំភ័ន្តអក្ខរៈនៃកងរាជអាវុធហត្ថលើផ្ទៃប្រទេស លោក ចាប សារ៉ន ដែលជាឧក្រិដ្ឋជនបំផ្លាញព្រៃឈើនៅតំបន់ព្រៃឡង់ ក៏ត្រូវបានដំឡើងឋានន្តរស័ក្ដិពីវរសេនីយ៍ឯកទៅជាឧត្តមសេនីយ៍ត្រីផងដែរ ដោយឡែកលោក ឈូក បណ្ឌិត ដែលធ្លាប់បានប្រើប្រាស់កាំភ្លើងបាញ់រះទៅលើកម្មករ ក៏ត្រូវបានដំឡើងឋានន្តរស័ក្តិពីមន្ត្រីថ្នាក់លេខ៣ មកជាឧត្តមមន្ត្រីថ្នាក់លេខ៤ នៃក្របខ័ណ្ឌមន្ត្រីរដ្ឋបាលជាន់ខ្ពស់របស់ក្រសួងមហាផ្ទៃ កាលពីថ្ងៃទី១៨ ខែមីនា ឆ្នាំ២០២២ នេះថែមទៀត៕