 នៅថ្ងៃទី២២ ខែកញ្ញា ឆ្នាំ២០២២ នេះបានសម្រេចតម្កល់សាលក្រម និងទោសជាប់ពន្ធនាគារជាលើកទី២ នៃអតីតប្រធានរដ្ឋខ្មែរក្រហមឈ្មោះ ខៀវ សំផន ពីបទប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ ហើយនិងបទរំលោភធ្ងន់ធ្ងរប្រឆាំងនឹងអនុសញ្ញាទីក្រុងហ្សឺណែវ។){kind=link}
តុលាការកំពូលនៃអង្គជំនុំជម្រះវិសាមញ្ញក្នុងសាលាក្ដីខ្មែរក្រហមនៅកម្ពុជា (ECCC) នៅថ្ងៃទី២២ ខែកញ្ញា ឆ្នាំ២០២២ នេះបានសម្រេចតម្កល់សាលក្រម និងទោសជាប់ពន្ធនាគារជាលើកទី២ នៃអតីតប្រធានរដ្ឋខ្មែរក្រហមឈ្មោះ ខៀវ សំផន ពីបទប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ ហើយនិងបទរំលោភធ្ងន់ធ្ងរប្រឆាំងនឹងអនុសញ្ញាទីក្រុងហ្សឺណែវ។
សេចក្តីថ្លែងការណ៍របស់ស្ថានទូតសហរដ្ឋអាមេរិក ប្រចាំនៅកម្ពុជា បានចេញផ្សាយនៅថ្ងៃទី២២ កញ្ញា នេះថា ក្នុងពេលដែលសាលាក្ដីខ្មែរក្រហមបិទបញ្ចប់ករណីចុងក្រោយរបស់ខ្លួននៅក្នុងដំណើរការក្តីដែលអូសបន្លាយអស់ជាង ១៧ឆ្នាំមកនេះ ECCC បានបន្សល់ទុកជាកេរដំណែលមួយដែលបង្ហាញច្បាស់លាស់នូវបទឧក្រិដ្ឋដ៏អាក្រក់បំផុតប្រឆាំងនឹងមនុស្សជាតិនៅក្នុងប្រវត្តិសាស្ត្រសម័យទំនើប និងការរួមវិភាគទានចំពោះការស្វែងរកការពិត ការផ្សះផ្សាគ្នា និងយុត្តិធម៌នៅព្រះរាជាណាចក្រកម្ពុជា។
ដោយបានធ្វើការជិតស្និទ្ធជាមួយអង្គការសហប្រជាជាតិ និងដៃគូដទៃទៀត និងអ្នកពាក់ព័ន្ធនានាខាងកម្ពុជា សហរដ្ឋអាមេរិកបានធ្វើការវិនិយោគសំខាន់ៗផ្នែកការងារទូត និងហិរញ្ញវត្ថុសម្រាប់ការបង្កើត និងសកម្មភាពនៃតុលាការកាត់ក្តីខ្មែរក្រហម។
ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា លោក Patrick Murphy បាននិយាយនៅក្នុងសេចក្តីថ្លែងការណ៍នេះថា លោកមានមោទកភាពចំពោះការវិនិយោគទាំងឡាយ ហើយសូមអរគុណចំពោះការរួមចំណែកនៅក្នុងរយៈពេលជាច្រើនឆ្នាំមកនេះរបស់អ្នកការទូតរបស់អាមេរិក សមាជិកសភាសហរដ្ឋអាមេរិក និងអ្នកជំនាញផ្នែកច្បាប់ ផ្នែកសិក្សាស្រាវជ្រាវ សង្គមស៊ីវិល និងអ្នកជំនាញផ្នែកសិទ្ធិមនុស្សរបស់អាមេរិក ដោយរួមទាំងការជួយក្នុងការបង្ហាញនូវទំហំនៃបទឧក្រិដ្ឋរបស់របបខ្មែរក្រហម និងអំពើយង់ឃ្នងនៃរបបនេះ។
លោកបន្តថា កម្មវិធីផ្តល់ជំនួយបរទេសរបស់អាមេរិក នឹងបន្តជួយដល់ជនរងគ្រោះ និងអ្នករួចជីវិតពីឧក្រិដ្ឋកម្មទាំងនេះ។ លោកសុំឲ្យអាជ្ញាធរកម្ពុជា បន្តរក្សាការទទួលខុសត្រូវរបស់គេដ៏សំខាន់ក្នុងការជួយការពារកេរដំណែលនៃតុលាការនេះ ពិសេសដោយអភិរក្ស និងបង្ហាញដល់សាធារណជននូវឯកសារ និងព័ត៌មានដ៏ច្រើនស្ដីពីការពិតដែល ECCC បានចងក្រង និងផលិត។
លោក Patrick Murphy បន្តថា មនុស្សជំនាន់ក្រោយត្រូវការមើលឯកសារដែលសហរដ្ឋអាមេរិកបានរក្សាទុកសម្រាប់ធ្វើការស្រាវជ្រាវ និងសិក្សា ដើម្បីឲ្យមានការចងចាំជានិច្ចនូវជនរងគ្រោះដោយបទឧក្រិដ្ឋដ៏អាក្រក់ទាំងនេះ មិនភ្លេចអ្វីដែលបានកើតឡើង ហើយខិតខំធ្វើយ៉ាងណាកុំឲ្យបទឧក្រិដ្ឋទាំងនេះកើតឡើងជាថ្មីនៅកម្ពុជា ក៏ដូចជានៅគ្រប់កន្លែងក្នុងពិភពលោក៕