នាយករដ្ឋមន្ត្រីតពូជកម្ពុជា លោក ហ៊ុន ម៉ាណែត លើកឡើងថា ជាច្រើនឆ្នាំកន្លងមកនេះ កងកម្លាំងនគរបាលជាតិបានសម្រេចនូវស្នាដៃជាច្រើនក្នុងការជួយរដ្ឋាភិបាល ជាពិសេសការជួយទប់ស្កាត់ការវិលត្រឡប់មកវិញនៃរបបប្រល័យពូជសាសន៍។
លោក ហ៊ុន ម៉ាណែត បានចេញលិខិតក្នុងទិវារំលឹកខួបអនុស្សាវរីយ៍លើកទី៨០ នៃថ្ងៃកំណើតនគរបាលជាតិកម្ពុជា កាលពីថ្ងៃទី៥ ឧសភា ដែលទើបត្រូវបានផ្សព្វផ្សាយនៅថ្ងៃទី១៤ ឧសភា នេះថា ក្រោយថ្ងៃរំដោះ ៧មករា ឆ្នាំ១៩៧៩ កងកម្លាំងនគរបាលជាតិត្រូវបានរៀបចំបង្កើតឡើងវិញ ដើម្បីរក្សាសន្តិសុខសាធារណៈបន្ទាប់ពីប្រទេសជាតិត្រូវបានសង្គ្រោះពីរបបប្រល័យពូជសាសន៍ ប៉ុល ពត។
កូនប្រុសមេដឹកនាំបក្សកាន់អំណាចរូបនេះលើកឡើងថា កងកម្លាំងនគរបាលជាតិបានចូលរួមជួយរដ្ឋាភិបាលយ៉ាងច្រើននាពេលកន្លងមក រួមមាន ការការពារសន្តិសុខជាតិ ស្ថិរភាពផ្ទៃក្នុង សុវត្ថិភាពសង្គម រហូតមកដល់ដំណាក់កាលសន្តិភាពសព្វថ្ងៃនេះ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី១៤ ឧសភា នេះថា ការលើកឡើងរបស់លោក ហ៊ុន ម៉ាណែត ក្នុងពេលនេះ គឺជាចេតនាមួយដែលគាត់ចង់បញ្ជាក់ថា អ្នកដែលតវ៉ានឹងបក្សកាន់អំណាច គឺសុទ្ធតែមានបំណងឱ្យរបបប្រល័យពូជសាសន៍វិលត្រឡប់មកវិញទាំងអស់ ដែលជាហេតុធ្វើឱ្យខ្មែរឈ្លោះគ្នាមិនចេះចប់។
លោកថា ការលើកឡើងបែបនេះ គឺផ្ទុយទៅនឹងស្មារតីនៃកិច្ចព្រមព្រៀងសន្តិភាពទីក្រុងប៉ារីស និងរដ្ឋធម្មនុញ្ញ ដែលបានចែងអំពីការបង្រួបបង្រួមជាតិ ស្របពេលដែលកងកម្លាំងនគរបាលជាតិកន្លងមក ត្រូវបានប្រើប្រាស់ក្រោមល្បិចកលនយោបាយរបស់បក្សកាន់អំណាចរហូតមក។
អ្នកឃ្លាំមើលសង្គមរូបនេះបញ្ជាក់ថា កងកម្លាំងនគរបាលជាតិសព្វថ្ងៃនេះ មិនអាចរក្សាអព្យាក្រឹត្យក្នុងការអនុវត្តតួនាទីរបស់ខ្លួនបានទេ ដោយសារតែប្រព័ន្ធរដ្ឋបាលជាតិទាំងមូលត្រូវបានគ្រប់គ្រងដោយប្រព័ន្ធគ្រប់គ្រងរបស់បក្សកាន់អំណាចទៅហើយនោះ។
កងកម្លាំងនគរបាលជាតិ ត្រូវបានបង្កើតឡើងដោយព្រះករុណា ព្រះបាទសម្តេច ព្រះនរោត្តម សីហនុ នៅថ្ងៃទី១៦ ខែឧសភា ឆ្នាំ១៩៤៥។ កងកម្លាំងនគរបាលជាតិ មានតួនាទីរក្សាសណ្ដាប់ធ្នាប់នៃសកម្មភាពបាតុកម្ម កូដកម្ម និងបញ្ចៀសរាល់សកម្មភាពភេរវកម្ម រួមទាំងទប់ស្កាត់ឧក្រិដ្ឋកម្មឆ្លងដែនគ្រប់ប្រភេទផងដែរ៕
© 2025, ឌឹ ខេមបូឌា ដេលី. All rights reserved.